1 Crónicas 9 - Bible in Tzotzil de Chamula

¹ Ti jech taj une, sjunul Israel bejel comel sbiic ta jpoc vun yu'un ti ajvaliletic ta Israele. Ja'uc ti jnaclejetic yu'un ti Judae bec'bil batic ta chuquel c'alal to Babilonia ta scoj ti jelav ti stoyobbailique.

Ti c'u yepalic ta xictaic comel ti Babiloniae

² Ti buch'u ba'yel sutic talel ti vul nacliicuc ta yosilic ta steclumalique, ja'ic ti israeletique, ti paleetique, ti levitaetic jtuneletic yu'un ti ch'ulnae.

³ Ta Jerusalén, lic naquiicuc snitilultac ti Judae, ti Benjamine, ti Efraine, xchi'uc ti Manasese.

⁴ Snitilultac ti Judá ti sutic talele, xi s'elane: ti Utaie, xnich'on ti Amiude, xnich'on ti Omrie, xnich'on ti Imrie, xnich'on ti Banie, ti scotolic ja' snitilultac ti Fares xnich'on ti Judae.

⁵ ti Silonitase, ti Asaiase sbanquilal nich'on ti Silonitase.

⁶ Ta sventa snitilul ti Zerae: ti Jeuele, xchi'uc scotol c'u yepal ti yuts' yalal sbaique, ti oy vaquib ciento xchi'uc lajuneb yo'vinic (690) ta vo'e.

⁷ Snitilultac ti Benjamín ti sutic talele, xi s'elane: ti Salue, xnich'on ti Mesulame, xnich'on ti Hodaviase, xnich'on ti Asenuae;

⁸ ti Ibneías xnich'on ti Jerohame; ti Ela xnich'on ti Uzie, xnich'on ti Micrie; ti Mesulame, xnich'on ti Sefatiase, xnich'on ti Reuele, xnich'on ti Ibniase.

⁹ Scotolic taje, totiletic yu'unic ta jujuchop ti sjaylajun-cojal laj ech'icuc talel ti yuts' yalal sbaique, ti loq'uic ta chapel baluneb ciento xchi'uc vaclajuneb yoxvinic (956) ta vo'e.

¹⁰ Ti paleetic ti sutic talele, xi s'elane: ti Jedaiase, ti Joiaribe, ti Jaquine,

¹¹ ti Hilcías xnich'on ti Azariase, ti Mesulam xnich'on ti Sadoque, xnich'on ti Meraiote, xnich'on ti Ahitob banquilal jpas-mantal ta xch'ulna ti Diose;

¹² ti Adaiase, xnich'on ti Jerohame, xnich'on ti Pasure, xnich'on ti Malquiase; ti Masaie, xnich'on ti Adiele, xnich'on ti Jahzerae, xnich'on ti Mesulame, xnich'on ti Mesilemite, xnich'on ti Imere.

¹³ Loc' ta chapel xchi'uc scotol ti yuts' yalaltaque, cha'vinic xa mu teyuc jmil xchi'uc vaxaquib ciento (1,760) ta vo' totiletic ta jujuchop viniquetic ti xtojobic ta tunel ta xch'ulna ti Diose.

¹⁴ Ti levitaetic ti sutic talele, xi s'elane: ti Semaiase, xnich'on ti Hasube, xnich'on ti Azricame, xnich'on ti Hasabiase, ti ja' snitilul ti jchop yu'un ti Merarie;

¹⁵ ti Bacbacare, ti Herese, ti Galale, ti Mataniase, xnich'on ti Micaiae, xnich'on ti Zicrie, xnich'on ti Asafe;

¹⁶ ti Obadiase, xnich'on ti Semaiase, xnich'on ti Galale, xnich'on ti Jedutune; ti Berequiase, xnich'on ti Asae, xnich'on ti Elcanae, ti naqui ta bic'tal lumetic yu'unic ti netofatitaetique.

¹⁷ Ti jchabiej ti'naetic ti sutic talele, xi s'elane: ti Salume, ti Acube, ti Talmone, ti Ahimane. Ti Salum xchi'ilic ta voq'uele, c'ot ta banquilal yu'unic,

¹⁸ ti ja' to jchabiej ti'na yu'un ajvalil ti oy ta yeloval sloq'ueb c'ac'ale. Taje, ja'ic ti sbainojic to ox ta sq'uelel ochebal yu'un ti bu vololic ti levitaetique.

¹⁹ Ti Salum xnich'on ti Coree, xnich'on ti Ebiasafe, xnich'on ti Coree, xchi'uc ti yuts' yalal sbaic ti co'ol coreitaetique, sbainojic ta xchabiel ti ochebal sti' ti bu nupel ta be xchi'uc ti Diose, jech c'u cha'al ech'ic ti smolmuc'totic ta vo'ne ti laj xchabiic ochebal sti' ti Axibalna yu'un ti Diose.

²⁰ C'alal mu'yuc to ox c'otemic ta pasel ti va'i s'elan taje, ja' to ox c'otem ta banquilal yu'unic ti Finees xnich'on ti Eleazare. ¡Sva'anojuc o sba ti Dios ta stojol le'e!

²¹ Ti Zacarías xnich'on ti Meselemiase, ja' sbainoj ta xchabiel ti ochebal sti' ti Axibalna ti bu nupel ta be xchi'uc ti Diose.

²² Vinaj ti oyic lajcheb xbuluchvinic (212) ta vo' ta scotol ti t'ujbil ta xchabiel ti ti'naetique, ti c'alal laj yich'ic chapel ta jujuchop ta jteclum ti bu nacalique. Ac'bat yabtelic yu'un ti Davide, xchi'uc ti Samuel ti jamal sba sate, ti jmoj yo'ntonic xchi'uquique.

²³ Ti stuquique, xchi'uc ti xnich'nabique, sjel stsac sbaic ta xchabiel ochebal sna ti Diose, ti sbiinoj ch'ulna xcaltique.

²⁴ Xi s'elan oy ti jchabiej-ti'naetic ta xcha'jotale: ti jvoq'ue, ja' tey oyic ti xi sq'ueloj ta stuq'uil sloq'ueb c'ac'ale; ti jvoq'ue, ja' tey oyic ti xi sq'ueloj ta stuq'uil smaleb c'ac'ale; ti jvoq'ue, ja' tey oyic ti xi sq'ueloj ta stuq'uil yolon ti yolon xocon sloq'ueb c'ac'ale; ti jvoq'ue, ja' tey oyic ti xi sq'ueloj ta stuq'uil ti yolon yac'ol xocon sloq'ueb c'ac'ale.

²⁵ Ti jujuchop yuts' yalal sbaic ti nacalic ta slumalique, ta xtal coltavanicuc vucub c'ac'al sjalil ti xquechet ta x'ech'ique.

²⁶ Ja'uc ti chanib banquilal jchabiej-ti'naetique, ti ja' levitaetique, mi ja'uc juteb ti oy bu xu' ta xloq'uic batele, sbainojic ta xchabiel ti jujuc'ol naetique, xchi'uc ti c'usi toyol stojol q'uejbil ta sna ti Diose.

²⁷ Xjoyetic ta x'ech' yu'unic ac'ubal ta spat ta xocon ti bu nupel ta be xchi'uc ti Diose, sbainojic ta xchabiel, ta sjamel ti'naetic ta jujun sob scotol c'ac'al.

²⁸ Oy jlom yu'unic sbainojic ta sq'uelel ti c'usitic ta xtun c'alal ta spasbeic ti stoyel xi'ele, ti tsots sc'oplal yich'oj ta sventa jayib ta stamic loq'uel xchi'uc ta sq'uelel sutele.

²⁹ Ti jlome sbainoj xtoc ta sq'uelel ti c'usitic jtunele, xchi'uc ti c'usi tsots sc'oplal jelavem stunel ta j'ech'ele, ta stuc'ulanel ti juch'bil trigoe, ti vinoe, ti aceitee, ti pome, xchi'uc ti muil poxetique.

³⁰ Oy jlom paleetic sbainojic ta xchapanel ti muil poxiletique.

³¹ Ti jun levita ti sbiinoj Matatiase, sbanquilal nich'on ti Salum ti coreitae, sbainoj ta smeltsanel ti muc'tic pan ta sventa smoton ti Diose.

³² Ti jlom yuts' yalaltac coatitaetique sbainojic ta xchapanel c'alal ta xcholic ti pan ti tsots sc'oplal c'otem ti c'alal ta sta yorail ti jujun sc'ac'alil cuxob o'ntonale.

³³ Oy jlom jq'uejimoletic xtoc, ti ja' jujuchop totiletic yu'un levitaetic ti nacalic ta sc'olol-c'olol na yu'un ti ch'ulnae, sbainojic yan abtel. C'ajomal no'ox ta xtunic ta c'ac'altic ta ac'ubaltic.

³⁴ Taje, ja'ic totiletic yu'un jujuchop ti levitaetique, ti c'u s'elan epajic talel ta jujuvoc' c'alal xa nacalic ta Jerusalene.

Snitilultac ti Saule

³⁵ Ti ta jteclum Gabaone, naqui ti Jehiel totil yu'un ti Gabaone, ti Maaca sbi ti yajnile.

³⁶ Ti xnich'nabe, Abdón sbi ti banquilale. Ti its'inaletique, ja' ti Zure, ti Cise, ti Baale, ti Nere, ti Nadabe,

³⁷ ti Gedore, ti Ahioe, ti Zacariase, xchi'uc ti Miclote.

³⁸ Ti Miclote, ja' stot ti Simeame. Taje, laj xchanbeic ta spasel jech c'u cha'al ta spasic ti xchi'iltac ta voq'uel ti jmoj nacalic ta Jerusalene.

³⁹ Ti Nere, ja' stot ti Cise. Ti Cise, ja' stot ti Saule. Ti Saule, ja' stotic ti Jonatane, ti Malquisuae, ti Abinadabe, xchi'uc ti Es-baale.

⁴⁰ Nich'naj ti Jonatane, Merib-baal laj yac'be sbi. Nich'naj ti Merib-baale, Micaía laj yac'be sbi.

⁴¹ Xnich'nab ti Micaiae, ja'ic ti Pitone, ti Meleque, ti Tareae, xchi'uc ti Acaze.

⁴² Nich'naj ti Acaze, Jara laj yac'be sbi. Xnich'on ti Jarae, ja' ti Alemete, ti Azmavete, xchi'uc ti Zimrie. Nich'naj ti Zimrie, Mosa laj yac'be sbi.

⁴³ Nich'naj ti Mosae, Biná laj yac'be sbi, stot ti Refaiase. Nich'naj ti Refaiase, Elasa laj yac'be sbi. Nich'naj ti Elasae, Azel laj yac'be sbi.

⁴⁴ Xnich'nab ti Azele, oy vaquibic ti xi s'elan ti sbiique: ti Azricame, ti Bocrue, ti Ismaele, ti Seariase, ti Obadiase, xchi'uc ti Hanane. Naca xnich'nab Azel ma' taj une.