1 Crónicas 5 - Bible in Tzotzil de Chamula

Snitilultac ti Rubene

¹ Sbanquilal nich'on ti Israele, ja' ti Rubén sbie. Banquilal nich'onil un, chapal sc'oplal oy c'usi ta xich' ti jech banquilal nich'onile. Ta scoj ti laj soques sba xchi'uc sts'acal ajnil ti stote, ch'ay sc'oplal. Mu'yuc xa ich'bil ta muc' c'ot ti banquilal nich'onile, ja' laj yich' xnich'nab ti José xnich'on ti Israele.

² Ti Judá une, cajal c'ot sc'oplal ta j'ech'el, ja' mu sta ti xchi'iltac ta voq'uele. Vul ta loq'uel ta stojol jun banquilal jventainvanej. Ma' ti c'usi chapal sc'oplal ta sventa ti banquilal nich'onile, c'ot ta stojol ti Josee.

³ Le' une, ti Rubén sbanquilal nich'on ti Israele laj yil xnich'nab, ja' ti Hanoque, ti Falue, ti Hesrone, ti Carmie.

⁴ Ti bats'i snitilultac sts'unubal ti Joel laj yile, ja' ti Semaiase. Nich'naj ti Semaiase, Gog laj yac'be sbi. Nich'naj ti Goge, Simí laj yac'be sbi.

⁵ Nich'naj ti Simie, Micaía laj yac'be sbi. Nich'naj ti Micaiae, Reaías laj yac'be sbi. Nich'naj ti Reaiase, Baal laj yac'be sbi.

⁶ Nich'naj ti Baale, Beerá laj yac'be sbi, jtsobvanej yu'un ti rubenitaetic ti Beerá c'alal ic'bil bat ta chuquel yu'un Tiglat-piléser ajvalil yu'un ti Asiriae.

⁷ Ti c'u s'elan xchopol-chop bejel ta vun ta xvinaj sc'oplal xchi'iltac ta voq'uel ti Beerae, ja' ti Jeiele, ti Zacariase.

⁸ Tal ec ti Bela xnich'on ti Azaze, smom ti Sema xnich'on ti Joele. Ti Belae naqui ta Aroer. Jamal ta j'ech'el ti yosil sbanomile, ti cot c'alal to Nebo xchi'uc ta Baal-meone.

⁹ Naquiic xtoc ta yeloval sloq'ueb c'ac'al nopol xa ta sti'il sbajtical banomil ti smacoj ech'el c'alal to uc'um Eufrates. Bol ta j'ech'el ti xchon sbolomtac ta yosilal ti Galaade.

¹⁰ C'alal yorail tiq'uil ta ajvalilal ti Saule, ti rubenitaetique lic stsaquic ta leto ti agarenoetique, ti laj stsalique. Lic svol sbaic ta naclej ta stuq'uil sloq'ueb c'ac'al ta yosilal ti Galaade.

Snitilultac ti Gade

¹¹ Snitilultac ti Gad ti naquiic nopol xchi'uc ti rubenitaetic ta yosilal Basane, laj smaquic ech'el c'alal to jteclum Salcae.

¹² Ti sliquebal nitilulile, ja' ti Joele. Ta ts'acal to, tal ti Safane. Tal ti Jaanaie. Tal ti Safate.

¹³ Ti bats'i yuts' yalal sbaic ta sventa ti jujuchope, ja' jech xcholet tal jech c'u cha'al li'e: ti Micaele, ti Mesulame, ti Sebae, ti Joraie, ti Jacane, ti Ziae, xchi'uc ti Hebere, vuc-chop ta scotolic.

¹⁴ Ti va'i yepalic taje, ja' xnich'nab ti Abihail xnich'on ti Hurie. Nich'naj ti Hure, Jaroa laj yac'be sbi. Nich'naj ti Jaroae, Galaad laj yac'be sbi. Nich'naj ti Galaade, Micael laj yac'be sbi. Nich'naj ti Micaele, Jesisai laj yac'be sbi. Nich'naj ti Jesisaie, Jahdo laj yac'be sbi. Nich'naj ti Jahdoe, Buz laj yac'be sbi.

¹⁵ Ti Ahí xnich'on ti Abdiele, smom ti Gunie, jtsobvanej c'ot yu'unic c'u yepal ti snitilultaque.

¹⁶ Scotolic taje, naquiic ta yosilal Galaad ta yosilal Basán, xchi'uc ti bic'tal lumetic yu'une, xchi'uc ta yosilal sve'eb xchijic ti oy ta Sarón ti bu xa c'alal oy ti ts'ac yu'une.

¹⁷ Scotolic taje, ich'eic ta venta ti c'u yepal oy jujuchop ti c'alal ja' o tiq'uil ta ajvalilal yu'un Judá ti Jotame, xchi'uc ti c'alal ja' o tiq'uil ta ajvalilal yu'un Israel ti Jeroboame.

Sc'oplal ya'yejal ti cha'voc' nitilule, xchi'uc ti o'lol jvoq'ue

¹⁸ Snitilultac ti Rubene, snitilultac ti Gade, xchi'uc ti o'lol jvoc' snitilultac ti Manasese, banquilal soldadoetic ta j'ech'el ti mu sna' xi'ique, ti chapalic lec xchi'uc ti smacobbailique, ti yespadaique, xchi'uc ti syolobique, ti lec chanubtasbilic ta tsalvaneje. Oy chanib yoxvinic ta mil xchi'uc cha'vinic sc'an xc'ot ta xvaxaquibal ciento mil (44,760) ta vo' viniquetic ti xtojobic lec ta ac'-letoe.

¹⁹ Taje, lic stsaquic ta leto ti agarenoetique, ti Jeture, ti Nafise, xchi'uc ti Nodabe.

²⁰ Ja'uc le'e, coltabilic yu'un ti Diose. C'alal o'lol xa xyaquet ti leto yu'unique, laj sc'anbeic ti coltaaticuc yu'un ti Diose. Coltaatic yu'un ti Diose, yu'un nabalic ta stojol. Jech ti agarenoetique, xchi'uc ti c'u yepal ti svinictaque, ochic ta c'abal.

²¹ Ta jech to yepal, laj smacbeic ech'el xchon sbolom ti yajcontraique, ti oy lajuneb yoxvinic mil (50,000) ta cot ti camelloetique, ti oy lajuneb yoxlajunvinic mil (250,000) ta c'ot ti chijetique, ti oy cha'mil (2,000) ta cot ti burroetique. Ma'uc no'ox taje, laj to xchuquic batel vo'vinic mil (100,000) ta vo' ti jnaclejetique.

²² Ep yajcontraic laj chamicuc. Ti letovajel laj spasique, liquem talel ta stojol ti Diose. Comic ta naclej ma' ti bu taj une, ja' to ti c'uxi sta yorail ti tsobbil loq'uique.

²³ Ti o'lol jvoc' snitilultac ti Manasese, comic ta naclej ta osil ti q'uiil liquel ta Basáne, ti c'ot c'alal to Baal-hermone, ta Senir xchi'uc ta vitstic yu'un ti Hermone. Jun yepalic ta j'ech'el.

²⁴ Ti banquilal jtsobvanej yu'unic ti jujuchope, ja' ti Efere, ti Isie, ti Eliele, ti Azriele, ti Jeremiase, ti Hodaviase, xchi'uc ti Jahdiele. Scotolic banquilal soldadoetic, mu sna' xi'ic, viniquetic ti cajal sc'oplalique, jtsobvanejetic yu'un ti jujuchope.

²⁵ Ja'uc le' une, laj stoy sbaic ta stojol Dios yu'un ti stot sme'ic ta vo'nee. Yanij yo'ntonic, lic spasbeic stoyel xi'el diosetic yu'un ti jteclumetic ti laj yilic ta sba ta satic ti tenatic loq'uel tsutsesatic ta j'ech'el yu'un ti Diose.

²⁶ Ti sc'oplal taj une, ti Dios yu'un Israele, laj sliquesbe sjol ti Pul ajvalil yu'un ti Asiriae, Tiglat-pileser ma' ti lec ta alele. Laj stsob loq'uel ti rubenitaetique, ti gaditaetique, xchi'uc ti o'lol jvoc' snitilultac ti Manasese, ti ic'bil batic yu'un c'alal to Halah, c'alal to Habor, c'alal to Hará, c'alal to ti uc'um Gozane, ti nacalic to avi tana le'e.