1 Crónicas 11 - Bible in Tzotzil de Chamula

Ti Davide ta x'och ta ajvalilal yu'un ti Israele xchi'uc ti ta Judae

¹ Scotol ti israeletique laj stsob sbaic ti xi bat yalbeic ya'i c'alal bat sc'oponic ti David ti oy ta Hebrone: “Ti vo'otique, jun ti jch'ich'eltique.

² Melel un, ajvalil ono'ox ti Saule. Vo'ot xa jtsobvanejot ta spasel ta mantal ti Israele. Ma'uc no'ox un, ti Ajvalil Dios avu'une yaloj ono'ox ye sti' ta xatojobtas ta sventainel ti Israel ti ja' slumale.”

³ Ti jech taj une, scotol ti moletic yu'un ti Israele bat xchi'inic ta lo'il ti ajvalil David ti oy ta Hebrone. Ti stuque laj yac' strate ta stojolic ti laj sva'an ta rextico ti Diose. Va'i un, ti stuquique laj yac'beic snup yabtel ta ajvalilal yu'un Israel ti Davide jech c'u cha'al yaloj ono'ox ti Dios ta sventa ti Samuele.

Ti Davide cuch yu'un spojel ti pojobbail ti oy ta vits Sione

⁴ Ti Davide xchi'uc scotol ti israeletique, laj stam batel sbeic ta Jerusalén, ti Jebús to ox ti sbie. Naca jebuseoetic nacalic ma' ta banomil taj une.

⁵ Xi laj yalbeic ya'i ti Davide: “Mu stac' xa'och talel ma' li' une.” Manchuc mi jech un, ti Davide cuch yu'un spojel ti pojobbail ta Sione, ti sbiinoj o yu'unic Steclumal Davide.

⁶ Xi ono'ox scaj'aloj ti Davide: “Ti buch'u ba'yel ta stsac ta leto ti jebuseoetique, ta xcac'be yabtel ti ta xc'ot ta banquilale.” Ti buch'u ba'yel laj stic' sba ta sliquesel ti letoe, ja' ti Joab xnich'on ti Sarviae. Ac'bat yich' yabtel ti c'ot ta banquilale.

⁷ Ta ts'acal to un, lic naquiuc ta pojobbail ti Davide. Jech o xal laj sbiin Steclumal David yu'unic.

⁸ Ta ach' lic sva'anan jteclumetic ti David ta sjoylejal ti lume, ti lic ech'el ta sti'il sjoylejal ti sbutbenal banomile. Ti c'u yepal quechel ta sva'anel ti jteclume, Joab laj xa stsutses.

⁹ Yantic no'ox ta xich' batel yip xchi'uc yabtel ti Davide. Chi'inbil yu'un Dios ti scotol xu' yu'une.

Soldadoetic yu'un ti David ti c'otic ta banquilaletique

¹⁰ Ja'ic li' ti soldadoetic yu'un David ti mu jutebuc sna' stsiq'ues yo'nton yu'un ti xi'ele, ti coltavanic yo' jech ta x'och ta yabtel yu'unique, xchi'uc xtoc ti laj svolic scotol ti israeletic ti c'ot ta ajvalil yu'unic jech c'u cha'al yaloj ono'ox ti Dios ta stojol ti Israele.

¹¹ Xi s'elan xcholet ta xtal ma' ti sbiique, ti vinaj ti banquilal soldadoetic yu'un ti Davide: Ti Jasobeam xnich'on ti Hacmonie, ti c'ot ta banquilal yu'unic ti oxvo' ti x'ech' to xu' yu'unique, ti oy jun c'ac'al ta slanza no'ox laj smil vo'lajunvinic (300) ta vo' viniquetic.

¹² Nabal talel ec ti Eleazar xnich'on ti Dodo ti ahohitae, jun ta yoxibalic ti x'ech' to xu' yu'unique.

¹³ Xchi'inoj sbaic xchi'uc David ta Pas-damim, c'alal lic svol sbaic ta letovajel ti filisteoetic ti bu taje. Ma' ti bu taj une, oy ts'unbil jchop o ta trigo ta jsep banomil c'alal ti soldado Israeletic jatavic loq'uel ta stojol ti filisteoetique.

¹⁴ Jech ti stuque bat svol sbaic ta o'lol jsep osil ti chapal lec ta ch'amvanej ta bee, ti j'ech'el tsalbil c'ot yu'un ti filisteoetique. Ja' jech ac'bat yip yu'un Dios ti c'ot ta jtsalvaneje.

¹⁵ Oy jun velta, ti oxib yu'unic ti lajuneb xcha'vinic (30) ta vo' ti tsatsaquil viniquetique, bat snupic ta be ti David ta nail ch'en ti oy ta lican ch'entic yu'un ti Adulame. Ti epal filisteoetique svoloj sbaic ta stenlej yu'un ti Refaime.

¹⁶ Ti Davide snac'oj sba ec ta pojobbail c'alal ja' o yorail vololic ti epal j'ac'-leto filisteoetic ta Belene.

¹⁷ Juteb ta yo'nton ti David ti xi laj yale: “¡Ti oyuc la buch'u slupbun talel vo' cuch' ti oy ta joc' ta sti' ochebal yu'un ti Belene!”

¹⁸ Va'i un, ti oxib viniquetic ti mu'yuc xi'el yu'unique, ochic batel ti bu vololic ti filisteoetique. Laj slupic loq'uel ti vo' ti oy ta joc' ta ochebal yu'un ti Belene. Laj yich'beic ech'el ti Davide. Ja'uc ti David une, mu'yuc laj yuch'. C'ajomal no'ox laj smal ti c'ot ta smoton Dios yu'une.

¹⁹ Xi lic yalilane: “¡Ma'uc to calbe Dios ta xcuch' ti vo' li'e! ¡Mi ta xcuch'e, co'ol xa s'elan ta xcuch'be xch'ich'el ti viniquetic ti sjipoj xa sbec'talic c'alal ay spulic talele!” Mi ja'uc laj yuch' ti vo'e. Taje, ja' jech laj spasic ti oxib viniquetic ti xi'bal sba ta j'ech'ele.

²⁰ Ti Abisaie, xchi'il ta voq'uel ti Joabe, spajebal o banquilal yu'un ti lajuneb xcha'vinic (30) ta vo' ti mu'yuc xi'el yu'unique. Oy bu jun velta, ta slanza no'ox, laj smil vo'lajunvinic (300) ta vo' viniquetic ti laj stsac ta letoe. Ja' jech puc sc'oplal ta stojol ti lajuneb xcha'vinic ta vo'e.

²¹ Stuc no'ox cajal c'ot sc'oplal ta j'ech'el yu'unic. Ja'uc le' une, mu sta c'ot jech c'u cha'al ti oxibic ta ba'yele.

²² Ti Benaía xnich'on ti Joiada ti liquel talel ta jteclum Cabseele, ja' jun vinic ti mu sna' xi'e, ti ep ta tos ti c'usitic xi'bal sba laj spase. Taje, ja' ti buch'u laj smilbe xchibal xnich'on ti Ariel ti oy ta Moabe. Oy jun c'ac'al, c'alal ja' o yorail taive, yal batel ta yut joc' ti laj smil jcot león ta yute.

²³ Ja' jech xtoc laj smil jun natil egipcio vinic ti nopol o'lol yoxibal (2.50) metro ti snatile, ti lec chapal batel xchi'uc slanzae, ti jun to yoc jolobil ti yoc slanzae. Ti Benaiae laj st'anbe te' ti laj spojbe ta sc'ob ti slanzae. Ti ta slanza no'ox stuc laj smil oe.

²⁴ Ti va'i s'elan cuch yu'un spasilanel ti Benaía xnich'on ti Joiadae, cajal c'ot sc'oplal ta stojol ti lajuneb xcha'vinic (30) ta vo' ti tsatsal viniquetique.

²⁵ X'ech' to ich'bil c'ot ta muc' yu'unic. Mu ono'ox sta jech laj spas jech c'u cha'al laj spasic ti oxib banquilaletic ta ba'yele. Laj yac' ochuc ta jpas-mantal yu'un yajchabivanej stuc ti Davide.

^26-47 Ti mu sna' stsiq'ues yo'ntonic yu'un ti xi'ele, ja'ic li'e: Ti Asaele, xchi'il ta voq'uel ti Joabe. Ti Elhanane, xnich'on ti Dodó ti liquel talel ta Belene. Ti Samot ti liquel talel ta Harode. Ti Heles ti paltitae. Ti Irá xnich'on ti Iqués ti liquel talel ta Tecoae. Ti Abiezer ti liquel talel ta Anatote. Ti Sibecai ti liquel talel ta Husae. Ti Ilai ti ahohitae. Ti Maharai ti liquel talel ta Netofae. Ti Heled xnich'on ti Baanae, ti liquel talel ta Netofa xtoque. Ti Itai xnich'on ti Ribai ti liquel talel ta Gabaae, ti tiq'uil ta yosilal ti Benjamine. Ti Benaías ti liquel talel ta Piratone. Ti Hidai ti liquel talel ta sts'el uc'um Gaase. Ti Abiel ti arbatitae. Ti Azmávet ti liquel talel ta Bahurime. Ti Eliahbá ti saalbonitae. Ti xnich'nab Jasén ti gizonitae. Ti Jonatán xnich'on ti Sagué ti araritae. Ti Ahiam xnich'on ti Sacare, ti ararita eque. Ti Elifal xnich'on ti Ure. Ti Héfer ti mequeratitae. Ti Ahías ti pelonitae. Ti Hesrai ti liquel talel ta Carmele. Ti Naarai xnich'on ti Esbaie. Ti Joel xchi'il ta voq'uel ti Natane. Ti Mibhar xnich'on ti Hagraie. Ti Sélec ti amonitae. Ti Naharai ti liquel talel ta Berote, yajcuch-abtejebal ti Joab xnich'on ti Seruiae. Ti Irá ti liquel talel ta Jatire. Ti Gareb ti liquel talel ta Jatir eque. Ti Urías ti hititae. Ti Zabad xnich'on ti Ahlaie. Ti Adiná xnich'on ti Sizae, ti rubenita ti c'otem ta banquilal yu'unic ti rubenitaetique, ti oy lajuneb xcha'vinic (30) ta vo' svinictac ti oy ta stojole. Ti Hanán xnich'on ti Maacae. Ti Josafat ti mitnitae. Ti Uzías ti liquel talel ta Astarote. Ti Samae, xchi'uc ti Jehiele, xnich'nab ti Hotam ti liquel talel ta Aroere. Ti Jediael xnich'on ti Simrie, xchi'uc ti xchi'il ta voq'uel ti Johá sbie, ti ja' tizita vinique. Ti Eliel ti liquel talel ta Mahanaime. Ti Jerebai xchi'uc ti Josaviae, xnich'nab ti Elnáame. Ti Itmá ti moabitae. Ti Eliele, ti Obede, xchi'uc ti Jaasiele, ti liquel talel ta Sobae.