1 Crónicas 10 - Bible in Tzotzil de Chamula

Ti Saule ta xchamic ta leto xchi'uc xnich'nabe

¹ Ti israeletique, tsaqueic ta leto yu'un ti filisteoetique, ti jatavic loq'uic ta stojole. Yepal ti animaetic javal ts'e'el com ta vitstic Gilboae.

² Ti filisteoetique snutsojic batel ti Saúl xchi'uc ti xnich'nabe, ti laj smilic ti Jonatane, ti Abinadabe, xchi'uc ti Malquisuae.

³ Ts'acal to un, ja' xa bat yo'ntonic ta svolel sbaic ta snutsel ti Saule. Laj staic ta lubtsanel ti jxach'-yolobetique, laj staic ta yayijesel.

⁴ Va'i un, xi xa laj yalbe ya'i ti yajcuch-abtejebe: “Yaleso xch'a ti avespadae, xenbun jelavel yo' jech mu xlabajic ta xchanel yoc sc'ob cu'un ti jyan-o'nton filisteoe.” Ja'uc ti yajcuch-abtejeb une mu'yuc laj xch'un ti jech ta spase, batem xa xch'ulel yu'un ti xi'el ta xa'ie. Va'i un, ti Saule laj stsac ti yespadae, ti laj sva'an muyel sni' ti laj spatlebin yalele.

⁵ C'alal laj yil ti yajcoltaobba cham xa ti Saule, lic spatlebin yalel ti sni' yespada ti cham eque.

⁶ Ja' jech c'ot ta pasel ti cham ti Saule, ti oxib xnich'nabe, xchi'uc ti c'u yepal svoloj ti c'ac'al taje.

⁷ C'alal laj yilic scotol ti israeletic ti nacalic ta stenlejal ti jatavic xae, xchi'uc ti cham xa ti Saúl xchi'uc ti oxib xnich'nabe, jatavic loq'uel ec. Laj yictaic comel ti steclumalique. Va'i un, ti filisteoetique c'otic ti comic ta naclej ta jteclumetic taje.

⁸ Ta yoc'omal un, ti filisteoetique bat stamic talel ti c'usitic x'ayan yu'un ti animaetique. Telel laj staic ti Saúl xchi'uc ti xnich'nab ta vits Gilboae.

⁹ Va'i un, laj sloc'beic ti sc'u'e, c'oc xutbeic snuc'. Ti sjole xchi'uc ti yabtejebe, laj yich'beic batel. Laj staquic batel j'al-mantal j'ich'-c'opetic ta sjunul c'u sjamlej yosilal ti filisteoetique yo' jech ta xalbeic ya'i ti jteclume xchi'uc ta stojol ti diosetic yu'unique.

¹⁰ Ta ts'acal to un, bat yac'beic yabtejeb ti Saúl ta xch'ulna ti diosetic yu'unique. Laj sjoc'anbeic ti sjol ta xch'ulna ti dios Dagone.

¹¹ C'alal laj ya'iic scotol ti jnaclejetic ta Jabes ti oy ta Galaad ti va'i s'elan laj spasbeic Saúl ti filisteoetique,

¹² jmoj lic svol sc'opic scotolic xchi'uc ti tsatsal viniquetic ti mu sna' xi'ique, ti laj spoybeic ech'el ta Jabes sbec'tal ti Saule, xchi'uc ti xnich'nabe. Ti bu taje, laj smuquic ta yolon jpets tulan. C'alal laj yo'ntonic une, vucub c'ac'al sjalil laj yicta yotic.

¹³ Jech c'ot ta pasel ti cham ti Saúl ta scoj ti stoyobbaile. Laj sta smul ti mu'yuc laj xch'unbe smantaltac ti Dios ti yaloje, xchi'uc ti lic sjac'olan sba ta stojol jt'unvanej antse,

¹⁴ ti c'alal xu' sjac'olan sba ta stojol Dios ti jechuc une. Jech o xal tuch'bat xcuxlejal yu'un ti Diose. Ti yabtel yich'oje, laj yac'be yich' ti David xnich'on ti Isaie.