1 Corintios 13 - Bible in Tzotzil de Chamula

Oyuc ti syail xc'uxul o'ntonale

¹ Manchuc mi xu' ta xic'opoj ta yan c'opetic, manchuc mi co'ol to s'elan sc'opojel jun ánjel ti jc'opojele, mi mu'yuc ti syail xc'uxul co'ntone, co'ol j'elan jech c'u cha'al jun tampol ti jeche' xtantun ta jech yepale, mi mo'oje, co'ol j'elan jech c'u cha'al ti set-set taq'uin ti jeche' xchijchune.

² Manchuc mi xu' cu'un ta yalel ti c'usi ta xiyac'bun jna' ti Diose, manchuc mi jna' yalel scotol ti c'usi mucul yu'un ti Diose, manchuc mi ven ti jbijil ta j'ech'ele, manchuc mi jch'unoj ta j'ech'el ti xu' ta jloq'ues batel ta yavil bu oy ti vitse, mi mu'yuc ti syail xc'uxul co'ntone, mu'yuc c'usi balun o.

³ Manchuc mi ta jq'uelan scotol ti c'usi oy cu'une, manchuc mi ta xcac' ta chiq'uel ti jbec'tal jtacopal ta sventa scolel ti yane, mi mu'yuc ti syail xc'uxul co'ntone, jeche', mu'yuc c'usi ta jta o yu'un.

⁴ Ti buch'u oy syail xc'uxul yo'ntone, oy sts'iquemal xcuchemal yu'un scotol. Oy slequil stuq'uil yo'nton. Laj ta alel ma' ti oy yit'ixal yo'ntone. Mu xac' sba ta ich'el ta muc', mi ja'uc toyobba.

⁵ Mi ja'uc ta spas ti mu xich' smelol xc'opoje. Mi ja'uc ta sc'an ti ja' no'ox lec oy ti stuque. Mu x'ilin. Mu teyuc no'ox xchabioj ti sc'ac'al yo'ntone.

⁶ Mi ja'uc xmuyubaj xa yu'un ti oy mulil ta xc'ot ta pasele. C'ajomal no'ox xmuyubaj yu'un ti bu ja' melele.

⁷ Ti buch'u oy syail xc'uxul yo'ntone ta xch'ay ta yo'nton ti oy c'usi chopol ta xc'ot ta pasele, x'ech' jelav no'ox yu'un scotol, smala no'ox ya'i ora, oy smuc'ul yo'nton ta sts'iquel scotol.

⁸ Ti syail xc'uxul o'ntonale j'ech'el mu xch'ay sc'oplal. Ja'uc ti bijilile, ta sta yorail ta x'ech' sc'oplal. Ta sta yorail mu'yuc xa buch'u ta xal ti c'usi ta x'ac'bat sna' yu'un ti Diose. Ta sta yorail mu'yuc xa buch'u ta xc'opoj ta yan c'opetic.

⁹ Yu'un ti c'usi stac' ojtiquinele, ti ta scaj'alel ti c'usitic ta xc'ot ta pasele, ma'uc lec jamal scotol,

¹⁰ ta xc'ot ta tsutsel ta tubel c'alal ta sta yorail ta xvul ta loq'uel ti c'usi leque.

¹¹ C'alal ololun to oxe, jech ta xic'opoj, jech ta jnop jech c'u cha'al ta snop ti olole. C'alal lipas ta vinique, laj quicta comel ta spasel jech c'u cha'al ta spas ti olole.

¹² Ja' jechotic avi tana li'e, mu xquiltic, mu jna'tic lec, co'ol s'elan ta jq'uel jsatic ta jun nen ti naca xvayet no'oxe. Ja'uc le'e, oy bu ta sta sc'ac'alil ta xcojtiquinbetic ti sate. Ja'uc tana li'e, jutuc no'ox ta jna'betic smelol. Ta sta yorail un ta yojtiquinel ti Dios jech c'u cha'al ta xijyojtiquinotique.

¹³ Xi s'elan oy oxtos ti mu sna' xlaj sc'oplale: Ti c'otem ta o'ntonal ta xch'unel ti Cajvaltique, ti c'usi jpatoj co'ntontic ta smalaele, ti syail xc'uxul o'ntonale. Ti tsots sc'oplal ta j'ech'el ti ta yoxtosal taje, ja' ti syail xc'uxul o'ntonale.