Yoona 19 - A̠lyiat A̠gwaza na di̠n Tyap: A̠li̠ka̠uli A̠fai

¹ A̱jawa Bilatut si̱ tyia̱ á̱ si̱ ta̱bat Yesu á̱ si̱ tsot gu ma̱ng a̱ya̱u a̱ byia̱ pyipyia̱ ntswam a̱ni.

² Á̱niet nzwang ba si̱ chyip bung tyok sa̱kan. Ba̱ si̱ kup Yesu a̱pyia̱. Ba̱ si̱ bu kup gu a̱shong a̱toot nang a̱si̱ tyok a̱ni.

³ A̱wot ba̱ si̱ chong á̱ tsot gu, á̱ tsa á̱ nyia̱ gu lihyat, “Shyichet ang ku labeang, A̱gwam A̱yahudawa!”

⁴ Gwomna Bilatut si̱ bu ghwut a̱ bai ta̱usa. A̱ si̱ nyia̱ ma̱ng a̱cha̱chet A̱yahudawa ba a̱ni, “Nyi li, n na ghwut ma̱ng Yesu n bai ma̱ng a̱nyin ndyo. N chat nyi lyen nang n shya̱ nggu ma̱ng a̱bun bah!”

⁵ Huhwa Yesu si̱ ghwut a̱ bai ta̱usa ma̱ng bung tyok sa̱kan ji a̱pyia̱ nggu ka; mbeang tangka̱i a̱shong a̱toot, a̱ yet a̱gba̱ndang a̱toot tyok a̱ni. Gwomna Bilatut si̱ nyia̱ ma̱ng a̱mba, “Nyi li, di nggu wa wu!”

⁶ Nang a̱cha̱chet a̱yaapris ma̱ng á̱niet cham A̱li Nwuat za̱nang A̱gwaza ba ndi Yesu a̱ni, ba̱ si̱ koot a̱gugwong mi̱ chet nyia̱, “Á̱ kpang nggu da̱ a̱team a̱khwu!” Huhwa Bilatut si̱ nyia̱ ma̱ng a̱mba, “Nyi nat nyi kpang nggu da̱ a̱team a̱khwu wu ma̱ á̱pyia̱ nyin! Mat nung, n shya̱ nggu ma̱ng a̱bun bah!”

⁷ A̱yahudawa ba si̱ yong chi̱k nyia̱, “Nzi̱t zi̱ byia̱ doka, a̱wot kyang hu nang doka nzi̱t ji hyia̱ a̱ni, huhwa yet; ku myim á̱ hyat gu. Mat a̱ kyiak a̱pyia̱ nggu nang Nggwon A̱gwaza a̱ni!”

⁸ Jen nang gwomna Bilatut nfa̱k kyang ba̱ lyiat a̱ni, a̱wun nggu na si̱ mbeang.

⁹ A̱ si̱ bwuok a̱ nwuo mi̱ gaat ji. A̱ si̱si̱ lyip Yesu nyia̱, “A neet a̱ji wa?” Yesu si̱ nwuak gu shim bah.

¹⁰ Huhwa gwomna Bilatut si̱ nyia̱ ma̱ng a̱nggu, “A lak lyiat hu ma̱ng a̱nung, ka̱ni? A lyen n byia̱ a̱wat n tyia̱ á̱ byii̱k ang á̱ ghwon; n si̱ bu mbyia̱ a̱wat ka nang n na ntyia̱ á̱ kpang ang da̱ a̱team a̱khwu a̱ni baa?”

¹¹ Yesu si̱ ma nwuak gu shim nyia̱, “A byia̱ tyok hu tazwa nung, ka̱nang á̱ jong ang hu neet Ma A̱gwaza tswazwa. Huhwa mbyia̱, á̱niet ba̱ ta̱bat nung ba̱ si̱ nwuak ang a̱ni; a̱ka̱tuk nang ba̱ nyia̱ a̱ni, swak a̱ si̱ nwan wu.”

¹² Nang gwomna Bilatut nfa̱k a̱lyiat na a̱ni, a̱ si̱ kwan a̱ chat vak nang gu na nkai Yesu a̱ wot a̱ni. A̱mgba̱m ma̱ng a̱nia, A̱yahudawa ba si̱ bu koot a̱gugwong mi̱ chet nyia̱, “Ka̱ a kai a̱tyu wuni ghwon; to, nwan wa yet a̱kpa̱ndang Kaisar, a̱gwam shan A̱romawa wu bah! Konyan wa kyiak a̱pyia̱ nggu nang a̱gwam a̱ni, a̱tyu wa nyia̱ na̱nvan hwa ma̱ng Kaisar!”

¹³ Nang gwomna Bilatut nfa̱k a̱lyiat a̱nia a̱ni, a̱ si̱ ghwut ma̱ng Yesu a̱ bai ndyo a̱ta̱usa. A̱ si̱ swan di̱n chuk tyok nyia̱ shi̱ri̱ya tazwa a̱tyii nang á̱ ku nok ma̱ng nfang a̱ni. Da̱ a̱lyem A̱yahudawa ka, á̱ ngyei a̱tyii wu “Ga̱bata.”

¹⁴ A̱tuk a̱kya nang mam ka̱ mbai di̱di̱r, nang á̱ wu shyip á̱ nwuo A̱yet Ghwut mman Isi̱rela mi̱ Khwo hu; huhwa gwomna Bilatut nyia̱ ma̱ng a̱mba a̱ni, “Nyi li, a̱gwam nyin wu wa wu!”

¹⁵ A̱yahudawa ba si̱ bu koot a̱gugwong mi̱ chet nyia̱, “Á̱ hyat gu! Á̱ kpang gu da̱ a̱team a̱khwu!” Bilatut si̱ lyip ba nyia̱, “Nyi chat n kpang a̱gwam nyin wu da̱ a̱team a̱khwu a?!” Huhwa a̱cha̱chet a̱yaapris ba si̱ nwuak gu shim nyia̱, “Nzi̱t, zi̱ byia̱ a̱gwam a̱ghyang bah; mi̱ Kaisar wa ma̱nyin nggu!”

¹⁶ Huhwa gwomna Bilatut si̱ kin ta̱bat Yesu a̱ nwuak a̱cha̱chet A̱yahudawa ba, nyia̱ ba̱ kpang gu da̱ a̱team a̱khwu wu. Á̱niet nzwang ba, si̱ ta̱bat Yesu ba̱ si̱ nkat ma̱ng a̱nggu.

Á̱ Kpang Yesu da̱ A̱team A̱khwu

¹⁷ Yesu si̱ ghwut ma̱ a̱keang ka, a̱ fan a̱team a̱khwu wu ma̱ a̱pyia̱ nggu. A̱ si̱ nat ndyo da̱ a̱vwuo nang á̱ ngyei, “A̱vwuo A̱ghyighyak A̱pyia̱.” (Da̱ a̱lyem A̱yahudawa ka, á̱ ngyei, a̱vwuo ka “Goli̱gota”).

¹⁸ Da̱ a̱vwuo kani kya nang á̱ ku nkpang Yesu da̱ a̱team a̱khwu wu, dundung ma̱ng á̱tang a̱feang; a̱tyo nyiung a̱zayak, a̱tyo nyiung a̱za myian.

¹⁹ Gwomna Bilatut mameang si̱ tyia̱ á̱ si̱ lyuut a̱lyiat da̱ a̱lo á̱ si̱ lya̱u tazwa a̱team a̱khwu wu. Kyang nang gu ku lyuut a̱ni huhwa yet; “Di, Yesu A̱tyu Na̱za̱ra̱t A̱gwam A̱yahudawa wu wa wu!”

²⁰ A̱yahudawa ma̱ a̱di̱di̱t si̱ fang a̱lyiat nani. Kyang ku mbyia̱ a̱ni, a̱vwuo ka nang á̱ ku nkpang Yesu da̱ a̱team a̱khwu wu a̱ni, ka̱ ku shya̱ kpa̱mkpaan ma̱ng a̱gba̱ndang a̱keang wu. Á̱ ku lyuut a̱lyiat nani da̱ a̱lyem A̱yahudawa, A̱romawa, ma̱ng A̱helenawa.

²¹ Huhwa a̱cha̱chet a̱yaapris ba̱ yet A̱yahudawa a̱ni, ba̱ si̱ nyia̱ ma̱ng gwomna Bilatut a̱ni, “Yok lyuut, nyia̱, ‘A̱gwam A̱yahudawa’ bah. A̱wot kyang hu á̱ na lyuut a̱ni huhwa yet; ‘A̱tyu wuni kyiak a̱pyia̱ nggu a̱ yet a̱gwam A̱yahudawa wa.’ ”

²² Gwomna Bilatut si̱ nwuak ba shim nyia̱, “Kyang hu n dyuut a̱ni, n wa ka̱n dyuut!”

²³ Nang á̱niet nzwang ba ku nkpang Yesu da̱ a̱team a̱khwu a̱ni, ba̱ ku kyiak a̱yaatoot nggu ba, ba̱ si̱ ka̱u mba a̱ka̱naai. Kuzang a̱tyu nzwang si̱ kyiak a̱kpa a̱nyiung. A̱wot ba̱ si̱ bu kyiak a̱junjung a̱toot nggu wu nang á̱ ku nwai twai hu a̱ni. A̱wot á̱ ku nok a̱toot wu a̱ka̱mbi̱ri̱ng neet di̱n fwuo si̱ nat da̱ a̱ti̱tak.

²⁴ Huhwa á̱niet nzwang ba si̱ nyia̱ ma̱ng á̱ghyang mba a̱ni, “Zi̱ yok sam a̱toot a̱ni bah. Kyang hu myim a̱ni, huhwa yet; zi̱ koot tswák da̱ a̱toot a̱ni, zi̱ ka li a̱tyu a̱ na ya a̱ni!” Ku ku li a̱ni wa da̱nian ku ka bai cha̱chaat ma̱ng kyang á̱ lyuut mami A̱lyiat A̱gwaza na a̱ni, nyia̱, “Ba̱ ku ka̱u a̱yaatoot nung ba di̱ tsi̱tsak mba. A̱toot nung wu meang, ba̱ si̱ koot tswák da̱ nggu.” Kyang hu nang á̱niet nzwang ku nyia̱ a̱ni, huhwa hu.

²⁵ Á̱niet ba̱ ku yong kpa̱mkpaan ma̱ng a̱team a̱khwu Yesu wu a̱ni, bibya yet; a̱yang byin nggu wu, ma̱ng a̱yang a̱feang nggu, ma̱ng Ma̱ryamu a̱byii̱k Kilobat, ma̱ng Ma̱ryamu Ma̱ga̱daliya.

²⁶ Nang Yesu ndi a̱yang byin nggu wu mbeang nggwon nta̱m nang gu chat a̱ni, kpa̱mkpaan ma̱ng a̱yang wu; huhwa gu nyia̱ ma̱ng a̱yang byin nggu wu a̱ni, “A̱yang, di nggwon ang kya ka!”

²⁷ A̱wot a̱ si̱ nyia̱ ma̱ng nggwon nta̱m nggu ka a̱ni, “Di, a̱yang ang wu wa wu!” Neet di̱n jen a̱ja, nggwon nta̱m ka si̱ kin kyiak a̱yang byin Yesu wu, ka̱ si̱ nat ndyo a̱mali a̱ si̱si̱ swan ndung ma̱ng a̱nggu.

A̱khwu Yesu

²⁸ Yesu lyen nang di̱ yong huni, kuzang kyang mbai tyak. A̱wot da̱nian kuzang kyang hu ka nat cha̱chaat nang á̱ ku ndyuut mami A̱lyiat A̱gwaza na a̱ni; huhwa si̱ mbyia̱, a̱ si̱ nyia̱, “N fwuong mashyi.”

²⁹ A̱kumbu ku shya̱ a̱ja, a̱ si̱ ntyia̱ a̱sa̱sat a̱sa̱khwot a̱na̱p na si̱ nhyat tyentyang. Ba̱ si̱ kyiak soso, ba̱ si̱ nzwup mami a̱sa̱khwot na. Ba̱ si̱ ti̱n soso ji, ba̱ si̱ la̱p ji da̱ a̱shya̱. Ba̱ si̱ tyia̱ Yesu ndyo a̱bwonu.

³⁰ Nang Yesu nniaat a̱sa̱sat a̱sa̱khwot a̱na̱p wu a̱ni, huhwa gu nyia̱, “Ku tyak!” Gu si̱ kin totong a̱pyia̱ a̱byin, a̱ si̱ khwat swuan, a̱ si̱ nkat.

Á̱ Ti̱p Yesu ma̱ng Zwang

³¹ Huhwa a̱yaakwak a̱son A̱yahudawa ba si̱ naai gwomna Bilatut; gu ghwon á̱ luk a̱ti̱tak á̱niet ba nang á̱ a̱kpang da̱ a̱team a̱khwu wu a̱ni, a̱wot a̱ bu chyok ma̱ng nkwom na tazwa a̱yaateam a̱khwu ba. Kyang hu ku mbyia̱, ba̱ si̱ nnaai gwomna Bilatut a̱ni huhwa yet; da̱ a̱tsotson ntat a̱tuk Mam Fwung kya. Ba̱ ku chat nkwom á̱niet na na̱ swan a̱nia tazwa a̱team a̱khwu wu a̱tuk Mam Fwung ka bah. Mat hu na yet a̱gba̱ndang Mam Fwung wa.

³² Á̱niet nzwang ba si̱ kin bai da̱ a̱vwuo á̱niet nang á̱ ku kpang da̱ a̱team a̱khwu wu dundung ma̱ng Yesu a̱ni. Ba̱ si̱ kpa̱ra̱m a̱ti̱tak a̱tyo a̱zanson ba. Ba̱ si̱ swak ba̱ si̱ kpa̱ra̱m a̱ti̱tak a̱tyo ngaan ba.

³³ A̱wot nang ba̱ mbwuok á̱ bai da̱ a̱vwuo Yesu ka a̱ni, ba̱ si̱ kpa̱ra̱m gu a̱ti̱tak ba bah. Mat ba̱ ku shya̱ nang nggu wa ka̱n khwu.

³⁴ Huhwa a̱tyo nyiung mami á̱niet nzwang ba si̱ nwuan Yesu, a̱ si̱ ti̱p da̱ a̱beam tsi̱ntsa̱u ma̱ng zwang ji. Mi̱ di̱ yong a̱hwa, a̱sok ma̱ng a̱sa̱khwot si̱ kin ghwut.

³⁵ (Nggu, a̱tyu a̱ li kyang nang á̱ nyia̱ ma̱ng á̱ghyi nggu ba a̱ni, nggu wa hyia̱ a̱lyiat nani. A̱wot a̱mgba̱m kyang hu gu hyia̱ a̱ni, a̱tsatsak a̱lyiat wa. A̱wot nggu ma̱ a̱pyia̱ nggu a̱ lyen nang a̱tsatsak a̱lyiat wa nang nggu ndyiat. A̱wot a̱ lyiat wa da̱nian nyin nyi ka nwuak a̱chuchuk.)

³⁶ Si̱ huni ku bai da̱nian ku ka nat cha̱chaat ma̱ng kyang nang á̱ ku lyuut mami A̱lyiat A̱gwaza na a̱ni nyia̱, “Á̱ byia̱ kunkup gu nyiung nang á̱ na but a̱ni bah.”

³⁷ A̱wot A̱lyiat A̱gwaza a̱ghyang si̱ bu nyia̱, “Á̱niet na nwuan a̱tyu nang ba̱ ku ti̱p a̱ni.”

Á̱ Niat Kwom Yesu

³⁸ Nang á̱ nyia̱ a̱nia a̱ni, huhwa a̱ghyang a̱niet nang á̱ ngyei nggu Isuu, a̱tyu A̱ri̱matiya (nggu a̱ ku yet nggwon ta̱m Yesu kya da̱ bang mat nang gu fwuong a̱wun A̱yahudawa a̱ni,) a̱ si̱ naai gwomna Bilatut a̱ nwuak nggu shim nang gu na nkyiak kwom Yesu hu, gu niat a̱ni. Gwomna Bilatut meang si̱ shim gu ndyo. A̱ si̱ nat, a̱ si̱ kyiak kwom Yesu hu.

³⁹ Nikodimut mameang, a̱tyu a̱ ku bai da̱ a̱vwuo Yesu a̱tyetuk a̱ni, a̱ si̱ doot a̱ si̱ nat dundung ma̱ng Isuu. Nggu, a̱ ku ba̱ng hya̱u nang gu kyiai mur ma̱ng a̱lot a̱ni. Ku si̱ swan kpa̱p nang kweanghyi nchyi a̱ni.

⁴⁰ Á̱niet a̱feang bani si̱ kyiak kwom Yesu hu, ba̱ si̱ gat hu ma̱ng kikyak. Ba̱ si̱ nkwon nkyuo turare, ma̱nang taada niat nkwom A̱yahudawa ji ndi a̱ni.

⁴¹ A̱vwuo ka nang á̱ ku nkpang Yesu da̱ a̱team a̱khwu wu a̱ni, ku shya̱ kpa̱mkpaan ma̱ng a̱byin chyui nkyang fwung. A̱wot lyak fai ku shya̱ a̱ja, da̱nang á̱ ka̱n niat a̱yin a̱ni bah.

⁴² Nang a̱tuk a̱kya kya ka̱n gyet mam nang á̱ wu shyip á̱ shya̱ Mam Fwung A̱yahudawa hu a̱ni; a̱wot lyak hu ku shya̱ kpa̱mkpaan a̱ja; huhwa ku mbyia̱, ba̱ si̱ kin myiai kwom Yesu hu a̱ja.