Yakubu 5 - A̠lyiat A̠gwaza na di̠n Tyap: A̠li̠ka̠uli A̠fai

Á̱ Gba Á̱niet Nzwá

¹ Nyin á̱niet nzwá ba, nyi myiai a̱fufwuo nyi fa̱a̱k: Nyi twei a̱nak tsa nkhwot ndang a̱ghyi, mat a̱mgba̱m a̱ka̱tuk swuo a̱bung a̱ na bai nyin a̱ni.

² Nyi li, zwá nyin ji wa ka̱n bwui! A̱wot chinchai si̱ ya a̱sham a̱yaatoot nyin ka, ba̱ si̱ tyia̱ tyiang.

³ Kurum nyin hu ku yet zi̱nariya ma̱ng a̱zurfa a̱ni, wa ka̱n kwa̱i. A̱wot ku si̱ tyia̱ a̱buk kyang. Zwá nyin ji nang nyi mba̱ng nfwuo nyi si̱ nta̱yuk a̱ni, ji̱ na fwui nvam nyin na nang long ni̱ nfwui kyang a̱ni. Zwá ji nang nyi tung sak a̱ni, jija na nnwuak sheda tazwa nyin a̱tuk shi̱ri̱ya ka.

⁴ Nyi myiai a̱fufwuo nyi fa̱k a̱nak á̱niet ba̱ nyia̱ nyin nta̱m mi̱ bibyin nyin hu nang nyi shyuo a̱ni! Záng mba ji nang nyi lak teang hu a̱ni, twei ma̱ng a̱nyin. A̱nak á̱niet ba̱ chak yak mi̱ bibyin nyin hu nang nyi shyuo a̱ni, bai ma̱ a̱fufwuo nggu, a̱tyu a̱ yet A̱gwam Á̱niet Nzwang Ma A̱gwaza Tswazwa a̱ni.

⁵ Nyin á̱niet nzwá, nyi wa ka̱n nyia̱ ndyia̱ ma̱ a̱di̱di̱t mami nyinyang swanta hu. Nyi si̱ swa̱i di̱ si̱sak nang nyi nchat a̱ni. Nyi ya, nyi si̱ tyia̱ nvam nfwuong mam nang á̱ na nyia̱ nyin shi̱ri̱ya, á̱ hyaai nyin nang á̱ ni̱ nfak nyák a̱ni.

⁶ Nyi tyia̱ á̱tsotswat á̱niet a̱bun, nyi si̱ tyia̱ á̱ hyaai mbaa. A̱wot da̱ mba, ba̱ si̱ mi̱n fwuo nyin dyo bah.

Nyap Fwuo ma̱ng Gbang A̱lyia̱

⁷ Nyin á̱niet khwi Yesu ba nang n chat a̱ni, nyi nyap nfwuo, nyi fwuong a̱tuk mam bwuok bai A̱tyoli Yesu ka. Nyi nwuan á̱niet khap ba. Nyi li si̱sak nang ba̱ ni̱ nnyap fwuo ba̱ fwuong za a̱vwuo shyim ji ma̱ng si̱ seam ji a̱ni. Ba̱ ni̱ swan ma̱ng di̱dang á̱ fwuong yak hu ku byang, ba̱ chak ba̱ ka shya̱ kpangti̱n.

⁸ Ma̱ a̱nia wa, nyin meang, ku yet ta hwa, nyi nyap nfwuo nyin na. Nyi gbang a̱lyia̱, mat jen bwuok A̱tyoli Yesu ji bai kpa̱mkpaan.

⁹ Nyin á̱niet khwi Yesu ba, nyi yok kwop a̱dyii̱ng tazwa á̱ghyang nyin bah, kalak á̱ na nyia̱ nyin shi̱ri̱ya. Mat, di a̱tyu shi̱ri̱ya wu wa yong a̱zanunyuo!

¹⁰ Nyin á̱niet khwi Yesu ba, nyi khwi kidee nyap fwuo ma̱ng swuo a̱bung a̱yaata̱m a̱kwonu A̱gwaza ba, ba̱ ku shei A̱lyiat A̱gwaza na a̱ni.

¹¹ Á̱niet ba ba̱ ni̱ nyap fwuo, ba̱ gbang a̱lyia̱ mami swuo a̱bung a̱ni, zi̱ ni̱ dyep baa. Zi̱ nwuak ba a̱gba̱ndang shi. Kidee, nyi fa̱k nkhang Ayuba, a̱ ku nyap fwuo a̱ si̱ gbang a̱lyia̱ za̱m. Nyi si̱ bu li si̱sak ji nang A̱gwaza ku nnyia̱ nggu shok di̱ ngaan hu a̱ni. Mat A̱gwaza wu yet a̱tyu chat á̱niet ma̱ng fwuong kunak hwa gba̱mgbam.

¹² Nyin á̱niet khwi Yesu ba, kyang ku yet a̱ swak a̱ni, huhwa yet; nyi yok kyiak shyishyi nyia̱, “N shyi da̱ a̱lyoot Ma A̱gwaza tswazwa” bah; ku “N shyi da̱ a̱lyoot a̱byin” bah; ku ma̱ng kuzang tangka̱i shyishyi hwa. Nyi yok “Ii” nyin wu, a̱ yet “Ii,” a̱wot “Kaai” nyin wu, a̱ yet “Kaai,” kalak nyi na nyia̱ a̱ka̱tuk nyia̱, a̱wot A̱gwaza a̱ nyia̱ nyin shi̱ri̱ya.

A̱tsak Chet nang Naai A̱gwaza Byia̱ a̱ni

¹³ Ka̱ a̱yin ma̱ nyin swuo a̱bung, ku myim gu naai A̱gwaza. Ma a̱nia wa, ka a̱yin ma̱ nyin ma bu shya̱ ma̱ng a̱gwai, ku myim gu bwom bubwom dyep A̱gwaza.

¹⁴ Ka̱ a̱yin ma̱ nyin nyia̱ ma̱ng zwan, ku myim gu yei a̱yaakwak a̱son sot á̱niet khwi ba, ba̱ ka naai A̱gwaza da̱nian guu, ba̱ bu kwon gu hya̱u mami a̱lyoot A̱tyoli Yesu.

¹⁵ Tangka̱i naai á̱niet ba̱ nwuak fwuo da̱ A̱gwaza a̱ni, byia̱ chet ku tyia̱ á̱ choot a̱tyu zwan wu. A̱wot ka̱ a̱ nyia̱ a̱ka̱tuk nyia̱, A̱gwaza na chi nggu ndyo.

¹⁶ Mat a̱nia, nyi ni̱ nshei á̱ghyang nyin a̱ka̱tuk nyia̱ nyin wu. Nyi naai A̱gwaza da̱nian á̱ghyang nyin, á̱ ka choot nyin. Ka̱ a̱tsotswat a̱yin naai A̱gwaza ma̱ng fwuo nyiung, naai hu ni̱ byia̱ chet. A̱wot ku bai ma̱ng a̱gba̱ndang kpangti̱n.

¹⁷ Iliya, a̱ta̱m a̱kwonu A̱gwaza ku yet a̱tyubishyi wa ma̱nang a̱nzi̱t a̱ni. A̱mgba̱m ma̱ng a̱nia, jen nang gu ku nnaai A̱gwaza ma̱ng fwuo nyiung á̱ nwai va za a̱ni, á̱ si̱ nyia̱ a̱lyia̱ a̱tat ma̱ng zwát a̱taa nang za va ma̱ a̱byin ka bah!

¹⁸ A̱wot jen nang gu bu nnaai A̱gwaza, za ji ji̱ bwuok a̱ bai a̱ni, za ji si̱ va, a̱byin ka si̱ nwuak yak gba̱mgbam!

Á̱ Bwuok ma̱ng Á̱niet Khwi Yesu ba̱ Bwuok Lilyim a̱ni

¹⁹ Nyin á̱niet khwi Yesu ba nang n chat a̱ni, ka a̱yin ma̱ nyin teap, a̱ si̱ ghwon khwi vak a̱chuchuk hu; a̱wot a̱yin ma̱ nyin si̱ bwuok ma̱ng a̱nggu a̱ bai ndyo da̱ a̱vwuo A̱gwaza.

²⁰ A̱tsak a̱lyiat, ku myim a̱tyu a̱wa a̱ lyen nang konyan wa bwuok ma̱ng a̱tyu a̱ teap a̱ni, a̱ na san swuan a̱tyu teap a̱ja di̱n vak a̱khwu. A̱wot a̱ bu tyia̱ A̱gwaza a̱ chi a̱di̱di̱t a̱ka̱tuk nyia̱ a̱tyu teap wu.