Yakubu 4 - A̠lyiat A̠gwaza na di̠n Tyap: A̠li̠ka̠uli A̠fai

Shyei Nat Kpa̱mkpaan ma̱ng A̱gwaza

¹ Yihwa tyei a̱ka̱yaat na ma̱ng zok ji tsi̱tsak nyin? N wa ngyei a̱ka̱tuk nshyuo wu wa a̱ kwan mi̱ nfwuo nyin na a̱ni a?

² Nyi chat nkyang, da̱ nyi byia̱ a̱ni bah. A̱wot nyi ni̱ kwan ku nang ku na ntat nyin hyaai á̱niet bya, nyi ka shya̱ ná a̱ni. Nyi ni̱ kwi swam di̱ nkyang nang á̱ghyang á̱niet byia̱ a̱ni, da̱ nyin, nyi shya̱ bah. Mat a̱nia, nyi ni̱ ta̱bat zook ma̱ng a̱yaat ma̱ng á̱ghyang nyin, nyi ka san nkyang na mi̱ chet da̱ a̱vwuo mba. A̱mgba̱m ma̱ng a̱nia, nyi ni̱ shya̱ nkyang nyi chat a̱ni bah, mat nyi ni̱ naai A̱gwaza bah.

³ A̱wot jen nang nyi nnaai A̱gwaza kyang a̱ni, da̱ nggu a̱ na nang nyin bah. Mat, nyi ni̱ naai ma̱ng a̱ka̱tuk a̱di̱dam. Nyi ni̱ chat nkyang nyi naai a̱ni, nyi ka nfa̱k nyinyang á̱pyia̱ nyin hwa ma̱nyin nyin.

⁴ Nyin á̱niet katnaan! Nyi lyen nang kpa̱ndang ma̱ng swanta hu ngyet na̱nvan hwa ma̱ng A̱gwaza baa? Mat a̱nia, konyan wa nyia̱ kpa̱ndang ma̱ng swanta hu, a̱ nyia̱ na̱nvan hwa ma̱ng A̱gwaza.

⁵ Ke nyi fa nyia̱ A̱lyiat A̱gwaza nang á̱ lyuut a̱ni, yet a̱buk kyang wa nyia̱, “A̱za̱za̱rak Ntswa wu nang A̱gwaza ta̱m ma̱ng a̱nzi̱t ndyo a̱ni, kwi swam ba̱t da̱ nzi̱t!”

⁶ A̱tsak a̱lyiat, A̱gwaza nyia̱ nzi̱t shok gba̱mgbam, ji̱ lan a̱ka̱tuk nshyuo a̱ shya̱ mi̱ fwuo nzi̱t na a̱ni. Ma̱nang á̱ ndyuut ma̱ A̱lyiat A̱gwaza na a̱ni, nyia̱, “A̱gwaza lak á̱niet ba̱ byia̱ gba̱p a̱pyia̱ a̱ni. A̱wot a̱ si̱ fa̱k shok á̱niet ba̱ ghyuai á̱pyia̱ mba a̱ni.”

⁷ Mat a̱nia, nyi ghyuai á̱pyia̱ nyin a̱zaghyi A̱gwaza. Nyi nyia̱ na̱nvan ma̱ng A̱ta̱nyeang ka, a̱wot ka̱ na tyong ka̱ ghwon nyin.

⁸ Nyi shyei nat kpa̱mkpaan ma̱ng A̱gwaza. Nggu meang, a̱ na shyei a̱ bai kpa̱mkpaan ma̱ng a̱nyin. Nyin á̱niet a̱ka̱tuk nyia̱, nyi swan a̱za̱za̱rak nswat. Nyin á̱niet nyi khwi A̱gwaza ma̱ng nfwuo nfeang a̱ni, nyi jaat a̱mgba̱m nfwuo nyin na na̱ tyia̱ za̱za̱rak.

⁹ Ku myim nyi twei ndang a̱ghyi mat a̱ka̱tuk nyia̱ nyin wu. Nyi bu fa̱k byian fwuo, nyi twei. Nyi yok mai nyin hu ku bwuak á̱ tyia̱ a̱nak, a̱wot a̱gwai nyin na na̱ bwuak á̱ tyia̱ byian fwuo.

¹⁰ Nyi ghyuai á̱pyia̱ nyin a̱zaghyi A̱gwaza. A̱wot a̱ na ta̱ngam nyin tazwa, a̱ nwuak nyin shi.

Á̱niet Khwi ba̱ yok Nyia̱ Á̱ghyang Shi̱ri̱ya bah

¹¹ Nyin á̱niet khwi Yesu ba nang n chat a̱ni, nyi yok tyam á̱ghyang nyin bah. Ka̱ nyi bat á̱ghyang nyin a̱hyiak, ku nyi nyia̱ á̱ghyang nyin shi̱ri̱ya, ku fa nyi bat doka A̱gwaza ji a̱hyiak, nyi si̱ nyia̱ nji shi̱ri̱ya meang. A̱wot ta̱m nyin hu hwa yet, nyi khwi doka A̱gwaza ji, nyi yok bat ji a̱hyiak bah. Kalak, nyi kyiak á̱pyia̱ nyin á ngyei nyi yet á̱niet nyia̱ shi̱ri̱ya bya tazwa doka ji.

¹² A̱wot A̱gwaza wa ma̱nyin nggu nwuak doka ji, a̱ si̱ bu byia̱ tyok nyia̱ shi̱ri̱ya tazwa nji. Nggu wa ma̱nyin nggu, bu byia̱ chet a̱ san swuan a̱yin ku a̱ hyat ji. Nwan wa yet a̱nyan nang a nyia̱ a̱ghyang ang wu shi̱ri̱ya?

Tam di̱ La̱p Sak A̱tyubishyi yet A̱ka̱tuk wa

¹³ Nyi fa̱k a̱lyiat nani, nyin á̱niet ba nyi ni̱ nyia̱, “A̱fwun ku a̱tson zi̱ na nat ma̱ a̱keang a̱ghyang. Zi̱ si̱ swan a̱ja a̱lyia̱ a̱nyiung. Zi̱ nyia̱ a̱bwuang a̱ja, a̱wot zi̱ ka shya̱ kpangti̱n gba̱mgbam a̱ni.”

¹⁴ Nyi na nyia̱ ni nyi ndyen si̱sak nang swuan nyin ji wu ndi a̱tson a̱ni? Swuan nyin ji li nang zwu, ji̱ ni̱ kwa a̱tsotson a̱ni. Ji̱ ni̱ kwa da̱ a̱bada̱dei njen, a̱wot ka̱ á̱ labeang bah, ji̱ tyak.

¹⁵ Da̱ a̱kwonu a̱kya, ku myim nyi ni̱ nnyia̱, “Ka̱ A̱gwaza shim, zi̱ si̱ tat a̱tson. Zi̱ na nyia̱ ta̱m huni ma̱ng si̱ huniaau.”

¹⁶ Ma̱ninika, nyi yet á̱niet tam bya tazwa la̱p sak nyin hu. A̱wot tangka̱i tam a̱hwa yet a̱ka̱tuk nyia̱ wa.

¹⁷ Mat a̱nia, a̱tyu a̱ lyen kyang ku myim gu nyia̱ a̱ni, da̱nang gu nyia̱ nhu bah, a̱ nyia̱ a̱ka̱tuk nyia̱ wa.