Yakubu 1 - A̠lyiat A̠gwaza na di̠n Tyap: A̠li̠ka̠uli A̠fai

Byat hu

¹ Nung Yakubu, n gyet a̱khwo A̱gwaza ma̱ng A̱tyoli Yesu Kristi a̱ni. N dyuut wusika jini nat ndyo da̱ a̱vwuo kwaí swak ma̱ a̱feang á̱niet Isi̱rela, ba̱ yet á̱niet khwi Yesu ba̱ seang á̱ kai swanta hu a̱ni.

Nwuak Fwuo ma̱ng Gbang A̱lyia̱ di̱n Jen Mak

² Nyin á̱niet khwi Yesu ba nang n chat a̱ni, jen nang nyi nnwuo mi̱ swuo a̱bung a̱ni, nyi ni̱ nkyiak hu ku yet nyin a̱wat a̱gba̱ndang a̱lyia̱ sai.

³ Mat nyi lyen jen nang á̱ mmak nwuak fwuo nyin hu da̱ A̱gwaza a̱ni, nyi na shya̱ a̱wat nyi gbang a̱lyia̱, nyi mbeang nyap fwuo hu.

⁴ Si̱ nyi ya a̱son ma̱ng gbang a̱lyia̱ si̱ tat jen nang swuo a̱bung hu na ntyak a̱ni, nyi ka yet á̱tsatsak ma̱ng á̱niet khwi ba tat a̱ghyi, da̱ ba̱ lyin kyang a̱ni bah.

⁵ Ka̱ a̱yin ma̱ nyin chat mumwang, a̱ naai A̱gwaza wu a̱ ka̱u konyan gba̱mgbam ma̱ng fwuo a̱nyiung a̱ni. A̱wot A̱gwaza na tyia̱ nggu a̱bun di̱ naai nggu hu bah.

⁶ A̱wot ka̱ a naai A̱gwaza wu, ku yet ta hwa, a nwuak fwuo da̱ nggu, a yok but mi̱ fwuo bah. A̱wot kuzang a̱yin wa but mi̱ fwuo, a̱ li nang ja̱fi̱k a̱sa̱khwot nang wun hyap a̱ ji̱m ndyo ma̱ tai a̱ni.

⁷ Tangka̱i a̱yin a̱hwa a̱ byia̱ nfwuo nfeang a̱ni, gu yok tyia̱ fwuo nyia̱ a̱ na shya̱ kyang da̱ a̱vwuo A̱gwaza bah.

⁸ Tangka̱i a̱yin a̱hwa nang fwuo nggu hu shya̱ da̱ A̱gwaza ma̱ng swanta a̱ni, a̱ byia̱ a̱vwuo yong mi̱ kuzang kyang nang nggu nyia̱ a̱ni bah.

Á̱niet Zwá ma̱ng Á̱kunak

⁹ Yok á̱niet khwi ba̱ yet á̱kunak a̱ni, ba̱ tam da̱ A̱gwaza, mat á̱ wa ka̱n nwuak ba shi.

¹⁰ Ma a̱nia wa, a̱tyu nzwa wu na ntam nang A̱gwaza nghyuai a̱vwuo yong nggu ka a̱ni. Mat a̱tyu nzwa wu na shyuk nang nkywat a̱kwon a̱ni.

¹¹ Jen nang mam ntat jenjai a̱ni, nkywat na ni̱ shyuk na̱ ta̱kut, shisham ji ji̱ tyak. A̱nia wa a̱tyu nzwa wu na khwu a̱ ghwon zwá ji nang gu swuo a̱bung a̱ tung da̱ a̱bwuang wu a̱ni.

Yok Á̱niet Khwi ba̱ Gbang A̱lyia̱ di̱n jen Mak

¹² A̱tyu a̱ gbang a̱lyia̱ a̱ si̱ yong mi̱ chet di̱n jen nang á̱ mmak gu a̱ni, a̱gwai yet a̱si̱ nggu. Mat jen nang gu ngbang a̱lyia̱ a̱ si̱ swuo chet mak hu a̱ni, a̱ na san zang swuan sang sangba̱p ji nang A̱gwaza wu nyia̱ a̱li̱ka̱uli a̱ na nang a̱mgba̱m á̱niet ba̱ chat gu a̱ni.

¹³ A̱wot nyi yok bwung bah, jen nang á̱ mmak nyin a̱ni, nyi yok nyia̱, “A̱gwaza wa mak nzi̱t” bah. Nyi lyen da̱nang á̱ si̱ mi̱n mak A̱gwaza a̱ ka nyia̱ a̱ka̱tuk bah. Da̱ A̱gwaza, a̱ si̱ mi̱n mak a̱yin gu nyia̱ a̱ka̱tuk kyang bah.

¹⁴ Di̱dang nkyang swanta ni̱ laai a̱tyubishyi a̱ tyia̱ zan, si̱ a̱hwa hwa yet a̱tyin mak ka.

¹⁵ A̱ka̱tuk di̱dang nkyang swanta wu ni̱ tyia̱ a̱tyubishyi a̱ nyia̱ a̱ka̱tuk nyia̱, ma̱nang a̱byii̱k ni̱ nshya̱ a̱fa a̱ byin nggwon a̱ni. Ma a̱nia wa, ka̱ a̱ka̱tuk nyia̱ wu laai a̱ mbeang, a̱ ni̱ bai ma̱ng a̱khwu.

¹⁶ Nyin á̱niet khwi Yesu ba nang n chat a̱ni, nyi yok shim á̱ laai nyin bah.

¹⁷ Kuzang a̱tan ma̱ng a̱tsatsak za̱nang chorop a̱ neet da̱ a̱vwuo A̱gwaza a̱ yet A̱tyia̱ nzi̱t, a̱tyu a̱ mat a̱mgba̱m nkyang na̱ sai mi̱ kyai tswazwa a̱ni. Da̱ nggu, a̱ shai za̱kwa nggu ji nang nghwughwu mam, ku zwat ma̱ng a̱ta̱ngwat ni̱ nshai tityan yong mba ji a̱ni bah.

¹⁸ A̱gwaza shim a̱ nwuak zi̱t swuan sang sangba̱p ji, mat a̱tsatsak a̱lyiat nggu wu. Da̱nian a̱ ka khap zi̱t a̱ sak zan da̱nian a̱pyia̱ nggu, da̱ a̱vwuo ka̱ yet a̱ swak a̱ni. A̱wot zi̱ ka vwuon ma̱ zan mi̱ nkyang nang gu nyia̱ mi̱ swanta hu a̱ni.

Yok Á̱niet Khwi ba̱ Nyia̱ Nta̱m ma̱ng A̱lyiat A̱gwaza

¹⁹ Nyin á̱niet khwi Yesu ba nang n chat a̱ni, nyi sak a̱lyiat nani mi̱ nfwuo nyin na. Nyi yet á̱niet fwuong ma a̱nggang ma̱ng a̱fufwuo. A̱wot nyi yok ya̱baat a̱lyiat va̱vat, ku nyi vwuot ndyen ma a̱nggang bah.

²⁰ Mat, mwai lyen a̱tyubishyi tyei tsotswat A̱gwaza hu ya a̱son bah.

²¹ Mat a̱nia, si̱ nyi weam kuzang tangka̱i a̱ka̱tuk ma̱ng a̱ka̱kpa̱t mi̱ swat nyin hu. Nyi ghyuai á̱pyia̱ nyin a̱zaghyi A̱gwaza ka. A̱wot nyi san a̱lyiat nggu na nang gu ti̱p mi̱ nfwuo nyin na a̱ni. A̱lyiat gu ni̱nia byia̱ chet ku na san swuán nyin ji a̱ni.

²² Nyi yok fwuong a̱lyiat A̱gwaza na ma̱ng a̱fufwuo bya ma̱nyin ba bah. Ku yet ta hwa, nyi wa nyia̱ ta̱m ma̱ng á̱na, kalak nyi laai á̱pyia̱ nyin kya.

²³ Mat a̱tyu a̱ fwuong a̱lyiat A̱gwaza na ma̱ng a̱fufwuo bya, a̱ si̱ nwai nnyia̱ nta̱m ma̱ng á̱na a̱ni, a̱ li nang a̱tyu a̱ nwuan a̱pyia̱ nggu mi̱ ma̱ dubi a̱ni.

²⁴ Ka̱ a̱ nwuan a̱pyia̱ nggu shansham a̱ si̱ doot, a̱ bu kin bwung si̱sak ji nang gu ndi a̱ni.

²⁵ A̱wot a̱tyu a̱ tyia̱ fwuo hu di̱ zop a̱tsatsak a̱lyiat A̱gwaza na na̱ chong ma̱ng sa̱t a̱ni; a̱wot ka̱ a̱ ya a̱son ma̱ng nyia̱ a̱di̱dam da̱ A̱lyiat A̱gwaza na, a̱ si̱ nyia̱ ta̱m ma̱ng á̱na, a̱ si̱ bwung kyang hu nang gu fa̱k a̱ni bah, A̱gwaza na tyia̱ nggu a̱li̱ba̱rka mi̱ kuzang kyang nang gu nyia̱ a̱ni.

²⁶ A̱tyu a̱ kyiak a̱pyia̱ nggu nang a̱tyu khwi A̱gwaza a̱ni, da̱nang gu ta̱bat a̱lyem nggu ka shansham bah, a̱ laai a̱pyia̱ nggu kya. Khwi A̱gwaza nggu hu yet a̱buk kyang wa.

²⁷ Khwi hu nang A̱gwaza a̱ yet A̱tyia̱ nzi̱t wu kyiak ku yet a̱za̱za̱rak ma̱ng sang a̱bun a̱ni, huhwa yet; nyi ni̱ mbeang á̱kunak na ma̱ng á̱nyiuk ba nang á̱tyok mba ba kwi á̱ ghwon a̱ni. Nyi bu khap á̱pyia̱ nyin ma̱ a̱ka̱tuk nyia̱ swanta wuni, kalak ku tyei nyin a̱na̱ndyung.