Yahuda 1 - A̠lyiat A̠gwaza na di̠n Tyap: A̠li̠ka̠uli A̠fai

Byat

¹ Nung Yahuda, a̱khwo Yesu Kristi, n gyet a̱na̱nyiuk Yakubu. Nung gwa n dyuut nyin wusika jini. N dyuut nyin, a̱mgba̱m á̱niet ba nang A̱gwaza a̱ yet A̱tyia̱ yei a̱ni; á̱si̱ ba ba̱ bu mun á̱pyia̱ ma̱ng a̱nggu A̱gwaza, a̱ yet A̱tyia̱ wu a̱ chat ba ba̱t, a̱ si̱ bu tyia̱ mba mbwak Yesu Kristi gu ka chok ba a̱ni.

² Yok A̱gwaza a̱ fa̱k kunak nyin, a̱ nwuak nyin swat nyinyang, ma̱ng chat á̱ghyang gba̱mgbam.

Yok Á̱niet Khwi ba̱ Ta̱bam ma̱ng Á̱niet Tyiet A̱ka̱laa

³ Nyin á̱kpa̱ndang nung ba nang n chat a̱ni, ku nang n da̱p sak n dyuut nyin wusika jini tazwa san sang sangba̱p nang zi̱ byia̱ mami Yesu a̱ni. A̱wot ma̱ninika, n si̱ bu ndi ku yet nung ta hwa n dyuut nyin a̱lyiat a̱ghyang, da̱nian n ka ntyia̱ nyin gba̱gbak, nyi kwan nyi chok tyiet nwuak a̱chuchuk nzi̱t hu, nang A̱gwaza tyia̱ á̱za̱za̱rak á̱niet khwi nggu ba ndyo mbwak da̱ a̱ka̱nyiung, si̱ nat sang sangba̱p a̱ni.

⁴ N tak nyin a̱lyiat nani, mat á̱ka̱tuk á̱niet nshya̱ ba̱ bang á̱ nwuai mi̱ susot á̱niet khwi nyin ji. Ba̱ shyak tyiet shok hu nyia̱ mat nang A̱gwaza nfa̱k shok zi̱t gba̱mgbam, ku fa nang zi̱ byia̱ a̱wat zi̱ nyia̱ a̱shi̱shi̱k nyia̱ nang a̱ka̱la̱m a̱ni. Á̱ wa ka̱n dyuut shi̱ri̱ya tangka̱i á̱niet a̱ja, neet gbangbang, mat ba̱ fwuo Yesu Kristi, a̱tyu a̱ yet A̱gwaza ma̱ng A̱tyoli nzi̱t wu ma̱ nyin nggu a̱ni.

⁵ Ma̱ninika, n chat n jhyung nyin, ku nang nyi wa ka̱n dyen tyiet huni a̱ni, nang A̱gwaza ku nghwut ma̱ng á̱niet Isi̱rela ba ma̱ a̱byin Ma̱sa̱r ka. Ba̱ si̱ shot mi̱ khwo hu a̱ni. A̱wot a̱mgba̱m ma̱ng a̱nia, á̱ si̱ labeang bah, a̱ si̱ hyaai á̱niet ba̱ nwai yong di̱ nwuak fwuo da̱ a̱nggu a̱ni.

⁶ A̱wot n bu chat n jhyung nyin a̱yaata̱m tswá A̱gwaza ba, ba̱ ku lak ba̱ng a̱vwuo yong tyok nang A̱gwaza ku nang mba a̱ni. Ba̱ si̱ ghwon a̱tsatsak a̱vwuo yong tyok mba wu nang á̱ nsak ba a̱ni. A̱gwaza ku la̱p mba ma̱ng a̱nyanyang. A̱ si̱ nyim ba mi̱ jaru ji̱ byia̱ lyin a̱ni. Á̱ sak ba a̱ja á̱ nfwuong mam nang A̱gwaza na nnyia̱ mba shi̱ri̱ya a̱ni.

⁷ Ma a̱nia wa, nyi bu jhyung kidee á̱niet Sodom ma̱ng Goma̱ra ma̱ng á̱niet a̱ka̱keang ba, ba̱ ku hyia̱k ba a̱ni. Ba̱ ku nyia̱ a̱shi̱shi̱k nyia̱ á̱ nchi̱ri̱ng. A̱wot á̱tyok ku khwat ma̱ng á̱tyok nang á̱nyiuk a̱ni. Mat a̱nia A̱gwaza si̱ hyaai á̱niet ma̱ a̱ka̱keang a̱bya ma̱ng long. A̱wot si̱ huni yet kidee shi̱ri̱ya A̱gwaza ji. Ji̱ na gba zi̱t di̱ swuo a̱bung mi̱ a̱nga̱ngak ndong sang sangba̱p hu a̱ni.

⁸ Ma a̱nia wa, á̱niet tyiet a̱ka̱laa bani, ba̱ ni̱ nyia̱ ba̱ byia̱ tyok nang ba̱ nwuan ma̱ a̱laat mba na a̱ni. A̱wot ba̱ ni̱ nyia̱ a̱shi̱shi̱k nyia̱. Ba̱ si̱ lak Tyok A̱gwaza hu. Ba̱ si̱ bu jhyuai tyok a̱yaata̱m tswá A̱gwaza ba.

⁹ A̱wot ku Mikailu a̱ yet a̱tyo nyiung ma̱ a̱cha̱chet a̱yaakwak a̱son a̱yaata̱m tswá A̱gwaza ba a̱ni, a̱ ku kwan a̱ san Tyok A̱gwaza hu ma̱ a̱pyia̱ nggu bah. Da̱ a̱kwonu a̱kya, a̱ si̱ nyia̱ ma̱ng A̱ta̱nyeang ka, “Ma̱ A̱gwaza wa ma̱nyin gu na nyia̱ ang shi̱ri̱ya!” (Si̱ huni ku bai di̱n jen nang Mikailu ku ngya fwuang ma̱ng A̱ta̱nyeang da̱ a̱lyiat kwom Musa na a̱ni.)

¹⁰ A̱wot á̱niet tyiet a̱ka̱laa bani ni̱ jhyuai, ba̱ nyia̱ lihyat di̱ nkyang nang ba̱ nwai fi̱k a̱ni. Ba̱ li nang nyam a̱yit ba̱ sang a̱di̱dam a̱ni. Ba̱ ni̱ nyia̱ kuzang kyang da̱ a̱ka̱nyiung nang fwuo mba na fuut ba, ba̱ nyia̱ a̱ni. Nang ba̱ nnyia̱ nkyang nani a̱ni, ba̱ kwak pyipyia̱ mba a̱khwu kya.

¹¹ Ku swan baa! Mat ba̱ khwi kidee za̱kwa Kayinu. Nggu wa ku hyat a̱na̱nyiuk nggu wu Abila. Ma a̱nia wa, á̱niet tyiet bani ni̱ shyuo á̱niet mat chat kurum ma̱nang Ba̱lam ku nyia̱ a̱ni. A̱wot ma̱nang Kora ma̱ng á̱niet nggu ba meang ku nnyia̱ a̱ni, ba̱ na kwi mat tyia̱ zat mba hu.

¹² Jen nang á̱niet tyiet a̱ka̱laa bani mbang á̱ nwuai ba̱ ya kyayak mun á̱pyia̱ ma̱ng a̱nyin da̱ a̱di̱dam chat A̱gwaza a̱ni, ba̱ ni̱ tam, a̱wot da̱ mba ba̱ fwuong nsum bah. Ba̱ yet á̱ka̱tuk nang nfang mami a̱sa̱khwot na̱ na tyia̱ nyi ga̱u, nyi kwa nang kukwon a̱wak ni̱ nkwa di̱ nfang mami a̱sa̱khwot a̱ni. Ba̱ bu li nang á̱niet chok zón seap ba̱ sang nsum. Ba̱ chok ma̱ pyipyia̱ mba hwa. Ba̱ si̱ kai zón seap ji á̱ ghwon a̱ni. Ba̱ bu li nang á̱ni̱nian nang wun hyap á̱ kat di̱ mi̱n va za a̱ni. Ba̱ yet á̱buk á̱niet bya ba̱t. Ba̱ li nang a̱ka̱kwon na̱ kwi mi̱ njen a̱won, mat na̱ tyei sum bah. A̱wot á̱ si̱ nga a̱ka̱kwon a̱nia ma̱ng á̱ni̱nan ba á̱ weam a̱ni.

¹³ Ba̱ bu li nang ywan a̱sa̱khwot hu ku vwuot ma̱ng jhyip mi̱ kyai a̱sa̱khwot a̱ni. Ma̱nang ywan a̱sa̱khwot ni̱ nghwut ma̱ng ja̱fi̱k a̱ni, ma a̱nia wa, á̱niet bani ni̱ nghwut ma̱ a̱ka̱tuk nyia̱ sang nsum nchi̱ri̱ng. Ba̱ bu li nang á̱ta̱ngwat na̱ jhyam ma̱ tai a̱ni. Á̱niet bani, á̱ sak ba á̱ nfwuong a̱khwu ma̱ng a̱tsatsak a̱dyundyung ndyin sang sangba̱p.

¹⁴ Enok, a̱tyu a̱ ku shya̱ mi̱ nche a̱natat ji̱ neet da̱ A̱da̱mu a̱ni, a̱ ku tak á̱zanson tazwa á̱niet bani, nyia̱, “Nyi fa̱k! A̱gwaza a̱ yet A̱tyoli wu a̱ni, na bai ma̱ng a̱di̱di̱t á̱kpa chyikwop á̱za̱za̱rak a̱yaata̱m tswá nggu ba, nang á̱ si̱ mi̱n fang a̱ni bah.

¹⁵ Da̱nian gu ka nyia̱ shi̱ri̱ya nggu ji tazwa a̱mgba̱m á̱niet mi̱ swanta ba. A̱ na tak a̱bun a̱mgba̱m á̱niet ba̱ lak khwi nggu a̱ni, mat a̱mgba̱m a̱ka̱tuk nyia̱ nang ba̱ nyia̱ ba̱ njhyuai tyok nggu hu a̱ni; a̱wot mat a̱mgba̱m lihyat nang á̱niet nwai khwi nggu ba, ba̱ yet á̱niet a̱ka̱tuk nyia̱, ka̱n dyiat tazwa nggu a̱ni.”

¹⁶ Tangka̱i á̱niet tyiet a̱ka̱laa bani yet á̱niet kwop a̱dyii̱ng bya ma̱ng tyei á̱ghyang á̱niet a̱bun. Ba̱ ni̱ swan swat khwi di̱dang shyuo vam nang nfwuo mba na chat wa a̱ni. Ba̱ ni̱ tam tazwa á̱pyia̱ mba. Ba̱ ni̱ laai á̱ghyang á̱niet ma̱ng lyen a̱nu, da̱nian ba̱ ka shya̱ kyang ba̱ chat a̱ni.

Yok Á̱niet Khwi ba̱ Tyei Á̱ghyang Gba̱gbak

¹⁷ A̱wot nyin, á̱kpa̱ndang nung ba nang n chat a̱ni, ku yet ta hwa nyi jhyung nkyang na nang a̱yaata̱m Yesu Kristi ba ku shei á̱zanson a̱ni.

¹⁸ Ba̱ ku tak ma̱ng a̱nyin nyia̱, “Di̱ ngaan jen wu, á̱ na byia̱ á̱niet ba̱ na jhyuai Tyok A̱gwaza hu ma̱ng a̱nyin a̱ni. Ba̱ fa ba̱ khwi shyuo vam á̱pyia̱ mba ji, ji̱ nwai yet si̱ khwi A̱gwaza a̱ni.”

¹⁹ Á̱niet bani bya yet á̱niet ba̱ chong ma̱ng ghai á̱ghyang ma̱ nyin di̱ susot a̱ni. Ba̱ ni̱ khwi di̱dang nkyang da̱ a̱ka̱nyiung nang nfwuo mba na fuut ba ba̱ nyia̱ a̱ni, mat ba̱ byia̱ A̱za̱za̱rak Ntswa A̱gwaza wu bah.

²⁰ A̱wot nyin, á̱kpa̱ndang nung ba nang n chat a̱ni, ku yet ta hwa nyi ni̱ mbeang á̱ghyang nyin chet mami a̱tsatsak a̱za̱za̱rak nwuak fwuo nyin hu di̱ Kristi. Nyi bu ni̱ nnaai A̱gwaza mami chet A̱za̱za̱rak Ntswa.

²¹ Nyi bu ni̱ nchok á̱pyia̱ nyin. Nyi yong mi̱ chet mami chat A̱gwaza hu. Nyi bu ni̱ nswan, nyi fwuong jen nang A̱tyoli Yesu Kristi na mbwuok a̱ bai, da̱nian zi̱ ka swuan si̱ nat sang sangba̱p dundung ma̱ng a̱nggu, mat nang gu nfwuong kunak zi̱t a̱ni.

²² A̱wot ku yet ta hwa, nyi fa̱k kunak á̱niet ba̱ teap di̱ nwuak fwuo mba hu di̱ Kristi a̱ni.

²³ Nyi san á̱ghyang á̱niet nang nyi wa ya̱kpa̱i mba ghwut ndyo ma̱ a̱nga̱ngak ndong shi̱ri̱ya A̱gwaza wu wa a̱ni. Nyi bu fa̱k kunak á̱ghyang á̱niet. A̱wot nyi ta̱bam ma̱ng a̱shi̱shi̱k nyia̱ mba wu. Nyi bu lak li a̱ka̱tuk nyia̱ mba wu, a̱ byian swat mba hu a̱ni.

Dyep ma̱ng Naai A̱gwaza

²⁴ Ma̱ninika, yok a̱mgba̱m a̱kyenkyai shi a̱ yet a̱si̱ A̱gwaza a̱ni, nggu wa maai a̱ byia̱k nyin nyi du ga̱u; a̱wot a̱ bu bai ma̱ng a̱nyin ma̱ng a̱gba̱ndang a̱gwai mami a̱kyenkyai shi nggu wu nang á̱niet sang a̱bun a̱zaghyi nggu a̱ni.

²⁵ Yok a̱mgba̱m a̱kyenkyai shi a̱ yet a̱si̱ nggu, nggu ma̱nyin gu a̱ yet A̱gwaza a̱ni, nggu wa yet A̱tyusan zi̱t, mat Yesu Kristi A̱tyoli nzi̱t wu. Yok a̱mgba̱m a̱kyenkyai shi, yet, chet, ma̱ng tyok, ku yet si̱ nggu hwa, neet nang á̱ ka̱n tsa nche bah, ba̱ng bai ma̱nini, ma̱ng si̱ nat sang sangba̱p! Samba̱rka!