Tyai Á̱zanson 9 - A̠lyiat A̠gwaza na di̠n Tyap: A̠li̠ka̠uli A̠fai

Tyiap A̱gwa A̱fwuon hu Bai ma̱ng Kyang A̱wun Nyiung

¹ A̱jawa a̱ta̱m tswa A̱gwaza a̱fwuon wu, si̱ tyiap a̱gwa nggu ka. A̱wot n si̱ kin di a̱ta̱ngwat neet kyai tswazwa a̱ ba̱ kwa a̱byin! A̱wot á̱ si̱ nwuak a̱ta̱ngwat ka tswa yaya a̱tsuung bwong sang sangba̱p!

² A̱ta̱ngwat ka si̱ khwuk a̱tsuung bwong wu. A̱chunchung si̱ kin ghwut mi̱ bwong hu ma̱nang a̱chunchung ni̱ ghwut ma̱ a̱gba̱ndang a̱sha̱ndong a̱ni. A̱wot mam hu ma̱ng wun hu si̱ tyia̱ lyin mat a̱chunchung na!

³ Á̱gankwon si̱ ghwut ma̱ a̱chunchung na, ba̱ si̱ chyok á̱ nwuo mi̱ swanta hu. Á̱ si̱ nang ba chet ba̱ chyui á̱niet nang nyang a̱ni!

⁴ Á̱ si̱ tak ba nyia̱ ba̱ yok ya á̱kwop, a̱ka̱kwon, ku yak á̱ byian bah; si̱ ba̱ chyui á̱niet ba̱ sang zwunzwuo A̱gwaza ji di̱ kpi̱kpeang mba hu a̱ni.

⁵ Á̱ si̱ tak á̱gankwon wu ba̱ yok hyaai ba bah; si̱ ba̱ nyiak baa, ba̱ tyia̱ mba swuo a̱bung zwát tsuon, a̱wot ba̱ na fa̱k a̱khwu nang nyang ni̱ nti̱p a̱yin a̱ni.

⁶ Di̱n jen a̱ja, á̱niet a̱bya na chat a̱khwu. A̱wot da̱ mba, ba̱ na shya̱ nka bah. Ba̱ na fa̱k di̱dang a̱khwu, a̱wot a̱khwu ka na tyong ka̱ ghwon baa!

⁷ Á̱gankwon a̱wa tai tsaai ba̱ la̱p vam á̱ naat zwang a̱ni. Ba̱ si̱ kup nkyang di̱ pyipyia̱ mba hu, na̱ tai bung tyok zi̱nariya a̱ni. A̱wot a̱ghyi mba ba tai a̱ghyi á̱nietbishyi.

⁸ Pyia̱ mba hu tai pyia̱ á̱nyiuk. A̱wot a̱nyunyung mba ba si̱ tai a̱nyunyung zaki.

⁹ Ba̱ khwi nfi̱ri̱ng mba na ma̱ng nkubi ntswam, Nfeap mba na si̱ khwom nang tsaaí ma̱ a̱di̱di̱t ja kwak kéké ntsaaí di̱n chung á̱ naat zwang a̱ni.

¹⁰ Ba̱ si̱ byia̱ a̱ka̱ndi̱m, na̱ chyui nang nyang a̱ni. Ba̱ byia̱ chet nang ba̱ na ntyia̱ á̱niet swuo a̱bung zwát tsuon a̱ni.

¹¹ A̱gwam á̱gankwon wu yet a̱ta̱m tswa a̱ neet ma̱ a̱tsuung bwong sang sangba̱p a̱ni. Á̱ ngyei nggu da̱ a̱lyem A̱yahudawa ka; “A̱badon,” da̱ a̱lyem A̱helenawa; “A̱poliyon.” Huhwa yet; “A̱tyu hyaai.”

¹² Kyang a̱wun nyiung hu swak, nfeang ni̱ shya̱ na̱ bwat a̱ chobai a̱ni!

Tyiap A̱gwa A̱taa hu Bai ma̱ng Kyang A̱wun Feang

¹³ A̱ta̱m tswa A̱gwaza a̱taa wu, si̱ tyiap a̱gwa nggu ka. N si̱ nfa̱k a̱nwuat ka̱ ghwut mi̱ gugwa naai a̱tyii zi̱nariya a̱ shya̱ a̱zaghyi A̱gwaza a̱ni!

¹⁴ A̱nwuat ka si̱ nyia̱ ma̱ng a̱ta̱m tswa A̱gwaza a̱taa wu, a̱ ba̱ng a̱gwa ka a̱ni, nyia̱ “Byii̱k a̱yaata̱m tswá a̱naai ba nang á̱ la̱p ma̱ a̱gba̱ndang a̱ghyui Yuferitit wu a̱ni!”

¹⁵ A̱wot á̱ si̱ byii̱k a̱yaata̱m tswá a̱naai ba á̱ ghwon nang á̱ sak á̱ nfwuong a̱cha̱chaat njen a̱wa, mam a̱hwa, zwat a̱ja, ma̱ng a̱lyia̱ a̱kya a̱ni. Da̱nian ba̱ ka hyaai sot jhyung mi̱ susot tsat a̱mgba̱m á̱niet ba ba̱ shya̱ mi̱ swanta hu a̱ni.

¹⁶ N si̱ nfa̱k á̱kpa á̱niet nzwang di̱n tsaai, ba̱ ku tat miliyon chyi sweang a̱ni (200,000,000)!

¹⁷ A̱wot ma̱ a̱ma̱bwoi nung na, n si̱ ndi tsaaí ma̱ng á̱niet ba̱ nyeak ji a̱ni. Á̱niet ba̱ nyeak tsaaí ji a̱ni, si̱ kup a̱yaatoot ntswam di̱ nfi̱ri̱ng mba na. Ba̱ si̱ shong ma̱ tsontswang, ma̱ng a̱dyundyung a̱sa̱khwot bula, ma̱ng a̱sa̱khwot magina. Pyipyia̱ ntsaai hu si̱ tai pyipyia̱ a̱yaazaki. A̱wot long, a̱chunchung, ma̱ng long sa̱lfa ku yet magina a̱ni si̱ ghwut mi̱ nunu mba hu!

¹⁸ Sot jhyung mi̱ susot tsat a̱mgba̱m á̱nietbishyi ba̱ shya̱ mi̱ swanta hu a̱ni, si̱ kwi ma̱ng mbyep ndong tat nani; long, a̱chunchung, ma̱ng long sa̱lfa na̱ ku ghwut mi̱ nunu ntsaaí hu a̱ni.

¹⁹ Chet ntsaaí hu ku shya̱ mi̱ nunu nji hu hwa ma̱ng ndi̱m ji na. Mat ndi̱m tsaaí na ku byia̱ pyipyia̱ nang zwák a̱ni, na̱ si̱ byia̱ lyen nang na̱ na mbwoi á̱niet nkun a̱ni!

²⁰ A̱mgba̱m ma̱ng a̱nia, á̱kum á̱niet ka nang á̱ nwai hyaai mi̱ mbyep nani a̱ni, ba̱ si̱ lak ghwon a̱ka̱tuk nyia̱ mba wu, ba̱ bwuak ba̱ khwi A̱gwaza. Ba̱ si̱ ya a̱son ma̱ng kwok ntong a̱zaghyi á̱ka̱tuk ntswá A̱ta̱nyeang, ma̱ng nghwughwu a̱yaagwaza sang swuan njhyang nang á̱ fwu ma̱ng zi̱nariya, a̱zurfa, a̱shong ntswam, nfang, ma̱ng nkwon; nghwughwu na̱ nwai nwuan a̱vwuo, na̱ nwai fwuong a̱vwuo, ku na̱ nwai chong a̱ni!

²¹ A̱wot da̱ mba, ba̱ ghwon a̱ka̱tuk nyia̱ mba wu, hyaai á̱niet, nkut, a̱shi̱shi̱k nyia̱, ma̱ng tsang mba ji bah.