Tyai Á̱zanson 7 - A̠lyiat A̠gwaza na di̠n Tyap: A̠li̠ka̠uli A̠fai

A̱mgba̱m Á̱kpa Á̱niet Khwi A̱gwaza na Shot

¹ Nang si̱ huni nswak a̱ni, n si̱ ndi a̱yaata̱m tswá A̱gwaza a̱naai, nang ba̱ yong di̱ nfam naai mi̱ swanta na. Ba̱ si̱ fwun wun hu hyap mi̱ nfam naai mi̱ swanta na; ku kyai a̱sa̱khwot, ku kuzang a̱kwon.

² N si̱ bu ndi a̱ta̱m tswa A̱gwaza a̱ghyang nang gu ghwut a̱ neet a̱tyin, nang gu ba̱ng chon chak zwunzwuo A̱gwaza nswuan. A̱ si̱ yorong ma̱ng a̱gba̱ndang a̱nwuat a̱yaata̱m tswá A̱gwaza a̱naai a̱bya, nang á̱ nwuak ba tyok ba̱ byian swanta ma̱ng kyai a̱sa̱khwot hu a̱ni;

³ a̱wot a̱ si̱ nyia̱, “Nyi yok byian a̱byin, kyai a̱sa̱khwot, ma̱ng a̱ka̱kwon na bah; si̱ nang zi̱ ya ntyei á̱khwo A̱gwaza ba zwunzwuo a̱zakpeang!”

⁴ N si̱ nfa̱k a̱mgba̱m á̱kpa á̱niet khwi, nang á̱ chak ba zwunzwuo A̱gwaza ji a̱ni. Ba̱ tat chyikwop chyi ma̱ng chyikwop swak naai ma̱ a̱naai (144,000)! Ba̱ neet mi̱ a̱mgba̱m kwaí swak ma̱ a̱feang Isi̱rela ji.

⁵ Á̱ si̱ chak á̱niet chyikwop swak ma̱ feang mi̱ kwai Yahuda zwunzwuo (12,000), mi̱ kwai Ruben; á̱niet chyikwop swak ma̱ feang (12,000), mi̱ kwai Gad; á̱niet chyikwop swak ma̱ feang (12,000),

⁶ mi̱ kwai A̱shi̱ru; á̱niet chyikwop swak ma̱ feang (12,000), mi̱ kwai Na̱fi̱ta̱li; á̱niet chyikwop swak ma̱ feang (12,000), mi̱ kwai Ma̱nasa; á̱niet chyikwop swak ma̱ feang (12,000),

⁷ mi̱ kwai Simiyon; á̱niet chyikwop swak ma̱ feang (12,000), mi̱ kwai La̱wi; á̱niet chyikwop swak ma̱ feang (12,000), mi̱ kwai Isaka; á̱niet chyikwop swak ma̱ feang (12,000),

⁸ mi̱ kwai Za̱bulun; á̱niet chyikwop swak ma̱ feang (12,000), mi̱ kwai Isuu; á̱niet chyikwop swak ma̱ feang (12,000), mi̱ kwai Benyamin; á̱niet chyikwop swak ma̱ feang (12,000).

A̱gba̱ndang Á̱kpa Á̱niet Dyep A̱gwaza

⁹ Nang si̱ huni nswak a̱ni, n si̱ kin di a̱gba̱ndang á̱kpa á̱niet, nang á̱ si̱ mi̱n fang a̱ni bah! Ba̱ neet mi̱ kuzang a̱byin, nwap, kwaí, ma̱ng a̱lyem, nang ba̱ yong a̱zaghyi a̱gba̱ndang chuk tyok wu ma̱ng Fi̱ng A̱nfwuk hu. Ba̱ si̱ khwi a̱junjung a̱sai a̱yaatoot. Ba̱ si̱ ba̱ng mbwak ntswan.

¹⁰ Ba̱ si̱ koot a̱gugwong ma̱ng a̱gba̱ndang a̱nwuat nyia̱, “San sang sangba̱p neet da̱ a̱vwuo A̱gwaza nzi̱t, a̱ swan da̱ a̱gba̱ndang chuk tyok wu a̱ni; a̱wot ku si̱ neet da̱ a̱vwuo Fi̱ng A̱nfwuk hu!”

¹¹ A̱wot a̱mgba̱m a̱yaata̱m tswá A̱gwaza ba, si̱ yong á̱ keang a̱gba̱ndang chuk tyok wu, á̱niet khwop á̱niet ba, ma̱ng nkyang nswuan naai a̱nia. A̱mgba̱m ba si̱ ta̱bwak a̱zaghyi a̱gba̱ndang chuk tyok wu, ma̱ng a̱ghyi mba ba a̱byin. Ba̱ si̱ kwok A̱gwaza ntong,

¹² ba̱ si̱ bwom nyia̱, “Samba̱rka! Dyep, shi, mumwang, a̱gwai, chyin, tyok, ma̱ng chet, yet si̱ A̱gwaza nzi̱t hwa, si̱ nat sang sangba̱p! Samba̱rka!”

¹³ A̱jawa a̱tyo nyiung ma̱ á̱niet khwop á̱niet swak nfeang ma̱ a̱naai ba si̱ lyip nung, nyia̱ “Á̱niet ba̱ kup a̱sai a̱yaatoot bani a̱ni, a̱nyanyan bya? Ba̱ neet a̱ji wa?”

¹⁴ A̱jawa n si̱ nyia̱ ma̱ng a̱nggu, “A̱tyoli, nwan wa lyen.” Huhwa gu nyia̱ ma̱ng a̱nung, “Á̱niet bani bya kwí di̱n jen a̱gba̱ndang swuo a̱bung ji. Ba̱ si̱ kwi a̱junjung a̱yaatoot mba ba ma̱ng a̱sok Fi̱ng A̱nfwuk na. Huhwa tyia̱ a̱yaatoot mba ba nsai.

¹⁵ Mat a̱nia wa, ba̱ ni̱ ngyong a̱zaghyi a̱gba̱ndang chuk Tyok A̱gwaza wu, á̱ dyep gu, a̱ta̱mam ma̱ng a̱tyetuk A̱mali Nwuat Za̱nang nggu ka! A̱wot nggu, a̱tyu a̱ swan da̱ a̱gba̱ndang chuk tyok wu a̱ni, a̱ na yet ba a̱ghwaghwu.

¹⁶ Ba̱ bu byia̱ fa̱k zong, ku mashyi bah. Di̱ mam, ku bu na shwai mba bah; da̱ a̱vwuo ka̱ bu na gurup mba bah.

¹⁷ Mat Fi̱ng A̱nfwuk hu ku yong da̱ a̱beam a̱gba̱ndang chuk tyok wu a̱ni, nggu wa na chok ba! A̱ bu nat ma̱ a̱mba di̱ nnang a̱sa̱khwot nwuat swuan. A̱wot A̱gwaza na lyang mba kuzang ndang a̱ghyi ma̱ á̱ghyi mba ba!”