Tyai Á̱zanson 5 - A̠lyiat A̠gwaza na di̠n Tyap: A̠li̠ka̠uli A̠fai

Fi̱ng A̱nfwuk Khwuk Ta̱ka̱da nang á̱ Kut di̱n Shan a̱ni

¹ A̱jawa nung Yoona, n si̱ ndi ta̱ka̱da nang á̱ kut di̱n shan a̱ni, ku shya̱ di̱ mbwak yak A̱gwaza, a̱ swan di̱ a̱gba̱ndang chuk tyok wu a̱ni. Ta̱ka̱da hu si̱ nhyat ma̱ng lyuut di̱ kuzang a̱ma̱nta. A̱wot á̱ si̱ ndwi a̱yaatimi a̱natat.

² A̱wot n si̱ bu ndi a̱gba̱ndang a̱ta̱m tswa A̱gwaza a̱ghyang, a̱ si̱ lyip ma̱ng a̱gba̱ndang a̱nwuat nyia̱, “A̱nyan wa maai a̱ ghwok a̱yaatimi ba, a̱wot a̱ khwuk ta̱ka̱da hu nang á̱ kut di̱n shan ji a̱ni?”

³ A̱wot á̱ mbyia̱ a̱yin Ma A̱gwaza tswazwa, ku mi̱ swanta, ku tafa a̱byin; a̱ maai a̱ khwuk ta̱ka̱da hu nang á̱ kut di̱n shan a̱ni, a̱wot a̱ fang hu a̱ni bah!

⁴ A̱jawa n si̱ ntwei ba̱t ma̱ng byian fwuo. Mat nang á̱ ndyin a̱tyu a̱ maai a̱ khwuk ta̱ka̱da hu nang á̱ kut di̱n shan ji, a̱wot a̱ fang hu a̱ni.

⁵ A̱jawa a̱tyo nyiung mami á̱niet khwop á̱niet swak nfeang ma̱ naai a̱bya nyia̱ ma̱ng a̱nung, “Yok twei bah! Di, zaki a̱ neet mi̱ kwai Yahuda a̱ni! Nggu wa yet a̱tyu a̱ na ya gado tyok a̱gwam Da̱wuda hu a̱ni. A̱ ka̱n swuo chet swanta hu! Nggu wa maai a̱ ghwok a̱yaatimi a̱natat a̱bya, a̱wot a̱ bu khwuk ta̱ka̱da hu nang á̱ kut di̱n shan a̱ni!”

⁶ A̱wot n si̱ kin di Fi̱ng A̱nfwuk a̱ li nang á̱ faat gu a̱ni; ma̱ng a̱nia, nang gu yong ma̱ a̱ka̱wa̱tyia̱ a̱gba̱ndang chuk tyok ma̱ng nkyang nswuan naai mami a̱zwu á̱niet khwop á̱niet swak nfeang ma̱ a̱naai a̱bya! Fi̱ng A̱nfwuk hu si̱ byia̱ a̱ti̱tam a̱natat, ma̱ng á̱ghyi a̱natat. Bibya yet tswá A̱gwaza a̱natat ji nang á̱ ta̱m ndyo mi̱ kuzang a̱vwuo mi̱ swanta hu a̱ni.

⁷ Fi̱ng A̱nfwuk hu si̱ nat a̱ si̱ san ta̱ka̱da hu nang á̱ kut di̱n shan ji a̱ni, di̱ mbwak yak a̱tyu a̱ swan da̱ a̱gba̱ndang chuk tyok wu a̱ni.

⁸ Nang Fi̱ng A̱nfwuk hu nsan ta̱ka̱da hu nang á̱ kut di̱n shan ji a̱ni, nkyang nswuan naai na ma̱ng á̱niet khwop á̱niet swak nfeang ma̱ naai a̱bya, si̱ ta̱bwak a̱byin a̱zaghyi Fi̱ng A̱nfwuk hu. Nang konyan ma̱ a̱mba ba̱ng zunzom, a̱wot ba̱ si̱ ba̱ng a̱chyichya̱ ntswam zi̱nariya, ba̱ nhyiai tyentyang ma̱ng turare; jija yet naai á̱za̱za̱rak á̱niet khwi A̱gwaza ba.

⁹ A̱wot ba̱ si̱ bwom a̱bwom a̱fai nyia̱: “Nwan wa maai a san ta̱ka̱da hu nang á̱ kut di̱n shan ji a̱ni, a bu ghwok a̱yaatimi ba, a̱wot a fang huu! Mat nwan wa á̱ ku faat, a̱wot a̱sok ang nia yet zang a nsan á̱niet da̱nian A̱gwaza a̱ni; á̱niet mi̱ kuzang nwap, a̱lyem, ma̱ng kuzang a̱byin!

¹⁰ Nwan wa tyia̱ mba, ba̱ yet a̱yaapris ma̱ng mman Tyok da̱nian A̱gwaza nzi̱t wu! A̱wot ba̱ na nyia̱ tyok mi̱ swanta hu!”

¹¹ Nang n bu nwuan a̱ni, n si̱ ndi, n si̱ nfa̱k nwunwuat a̱yaata̱m tswá A̱gwaza ba̱ swak susot chyikwop ma̱ a̱di̱di̱t, nang ba̱ tyong a̱gba̱ndang chuk tyok wu á̱ keang á̱ tyia̱ ma̱ a̱ka̱wa̱tyia̱, ma̱ng nkyang nswuan naai na mbeang á̱niet khwop á̱niet swak nfeang ma̱ a̱naai a̱bya.

¹² A̱wot ba̱ si̱ bwom ma̱ng a̱gba̱ndang a̱nwuat nyia̱, “Fi̱ng A̱nfwuk hu nang á̱ faat a̱ni, a̱ maai a̱ san tyok, zwá, mumwang, chet, chyin, shi, ma̱ng a̱gwai!”

¹³ A̱wot n si̱ bu nfa̱k kuzang nkyang nswuan nang A̱gwaza mat, ku shya̱ mi̱ kyai tswazwa ma̱ng a̱byin, ma̱ng tafa a̱byin ma̱ng kyai a̱sa̱khwot a̱ni. A̱mgba̱m nkyang nswuan na si̱ kyiak a̱bwom nyia̱, “A̱gwai ma̱ng shi, dyep ma̱ng chet yet si̱ A̱gwaza, a̱ swan da̱ a̱gba̱ndang chuk tyok wu a̱ni; mbeang Fi̱ng A̱nfwuk hu, si̱ nat sang sangba̱p!”

¹⁴ A̱jawa nkyang nswuan naai a̱nia, si̱ shim nyia̱, “Samba̱rka!” A̱wot á̱niet khwop á̱niet swak nfeang ma̱ naai ba si̱ bu ta̱bwak a̱byin. Ba̱ si̱ kwok ntong a̱zaghyi Fi̱ng A̱nfwuk hu.