Tyai Á̱zanson 21 - A̠lyiat A̠gwaza na di̠n Tyap: A̠li̠ka̠uli A̠fai

Urusha̱lima A̱fai

¹ A̱wot n si̱ kin di kyai tswazwa fai ma̱ng a̱byin a̱fai! Mat a̱khwukhwop kyai tswazwa hu ma̱ng a̱khwukhwop a̱byin wu ka̱n swaak. A̱wot kyai a̱sa̱khwot hu meang si̱ swak.

² A̱jawa n si̱ bu ndi a̱za̱za̱rak a̱keang, a̱ yet Urusha̱lima a̱fai hu a̱ni, nang ku neet tswazwa da̱ a̱vwuo A̱gwaza a̱ chorop, nang nggwon neam naat nyeang ka̱ gwai shansham a̱ swan a̱ fwuong ka̱ myim ma̱ng a̱tyok nka wu a̱ni!

³ N si̱ nfa̱k a̱nwuat ka̱ kaat mi̱ chet ka̱ neet mi̱ a̱gba̱ndang chuk tyok wu, nyia̱, “Di, a̱li A̱gwaza ka shya̱ dundung ma̱ng á̱niet nggu ba! A̱ na swan ma̱ng a̱mba, a̱wot ba̱ na yet á̱niet gu bya! A̱gwaza ma̱ a̱pyia̱ nggu na shya̱ dundung ma̱ng a̱mba,

⁴ A̱gwaza na lyang mba kuzang lang a̱ghyi ma̱ á̱ghyi mba ba! A̱wot a̱khwu bu na nshya̱ bah, ku a̱lyia̱ byian, ku a̱nak ma̱ng swuo a̱bung! A̱mgba̱m a̱khwukhwop nkyang wu na swak si̱ nat sang sangba̱p!”

⁵ A̱wot A̱gwaza a̱ swan di̱ a̱gba̱ndang chuk tyok wu a̱ni, si̱ nyia̱, “Di, n shai kuzang kyang ku tyia̱ fai!” A̱wot a̱ si̱ bu nyia̱ ma̱ a̱nung, “Lyuut á̱lyiat nani, mat á̱lyiat na n shei ang a̱ni, yet a̱tsatsak ma̱ng a̱chuchuk a̱lyiat wa, ku myim á̱ khwi naa!”

⁶ A̱wot A̱gwaza si̱ bu nyia̱, “Ku bai tyak! Nung gwa ngyet A̱lfa ma̱ng Omega; A̱son ka ma̱ng A̱ngaan ka! Konyan wa a̱ fwuong mashyi a̱ni, n na nang gu a̱sa̱khwot mi̱ nnang a̱sa̱khwot nswuan na gu swuo! A̱ na tan bah.

⁷ A̱mgba̱m á̱niet ba̱ swuo chet swanta hu a̱ni, ba̱ na ya gado a̱mgba̱m a̱li̱ba̱rka wuni! A̱wot n na ngyet A̱gwaza mba, mba meang, ba̱ na yet mman nung!

⁸ “A̱wot á̱niet a̱wun, á̱niet nwai khwi Yesu, á̱niet nyia̱ nkyang nsum, á̱niet hyaai á̱niet, á̱niet a̱shi̱shi̱k nyia̱, á̱niet nkut, á̱niet khwi nghwughwu a̱yaagwaza sang swuan, ma̱ng á̱niet bwoi kuzang tangka̱i a̱ka̱laa; záng mba ji na yet a̱gba̱ndang tswa ndong ji̱ ya long sa̱lfa a̱ni. A̱khwu kani kya á̱ ngyei a̱khwu a̱ka̱feang ka.”

⁹ A̱jawa a̱tyo nyiung ma̱ a̱yaata̱m tswá a̱natat ba a̱ ba̱ng khám mbyep a̱natat ji ji̱ yet a̱mgba̱m wu a̱ni, si̱ bai a̱ ba̱ nyia̱ ma̱ng a̱nung, “Bai, zi̱ chong! N na tak ang nggwon neam ka̱ na nyeang, ka̱ yet a̱kyuo Fi̱ng A̱nfwuk wu a̱ni!”

¹⁰ Mat a̱nia, a̱ta̱m tswa wu si̱ kyiak nung ma̱ng chet A̱za̱za̱rak Ntswa hu, a̱ si̱ nat ma̱ng a̱nung tazwa a̱gba̱ndang a̱ga̱nga̱ng a̱fan. A̱wot a̱ si̱ tak ma̱ng a̱nung a̱za̱za̱rak a̱keang Urusha̱lima; a̱ chorop a̱ neet tswazwa da̱ a̱vwuo A̱gwaza a̱ni.

¹¹ A̱keang ka sai a̱ ya á̱ghyi ma̱ kyenkyai ma̱ng sai A̱gwaza hu! Ka̱ sai ma̱ jhya̱jhyat nang a̱tsatsak a̱fang a̱ yet a̱sham a̱ni, nang jaspa a̱ li wowot nang ma̱dubi a̱ni.

¹² Bat hu nang á̱ nkeang a̱keang ka a̱ni byia̱ a̱kpai ku si̱ bu shi ga̱nga̱ng, ku byia̱ á̱na̱nwuai swak ma̱ a̱feang. A̱wot a̱yaata̱m tswá A̱gwaza swak ma̱ a̱feang si̱ chok na. A̱wot á̱ si̱ lyuut lyulyoot kwai swak ma̱ a̱feang mman Isi̱rela ji tazwa á̱na̱nwuai na.

¹³ Kuzang fam bat byia̱ á̱na̱nwuai ntat; ntat a̱tyin, ntat jenshyung, ntat a̱za, ma̱ng ntat a̱tak.

¹⁴ Bat a̱keang hu byia̱ nfang kuntyin swak ma̱ a̱feang. A̱wot di̱ kuzang a̱fang á̱ si̱ ndyuut a̱lyoot a̱ta̱m a̱nyiung ma̱ a̱yaata̱m swak ma̱ a̱feang Fi̱ng A̱nfwuk ba.

¹⁵ A̱ta̱m tswa a̱ ku lyiat ma̱ng a̱nung a̱ni, si̱ ba̱ng shan mai nang á̱ fwu ma̱ng zi̱nariya a̱ni; jija nggu na mmak a̱keang ka ma̱ng á̱na̱nwuai na, ma̱ng bat hu.

¹⁶ Nang a̱ta̱m tswa wu mmak a̱keang ka a̱ni, a̱ si̱ shya̱ kuzang fam, swap hu, ma̱ng a̱kpai ka shya̱ cha̱chaat. Mami a̱chuchuk, swap, a̱kpai, ma̱ng a̱za a̱keang ka yet met chyikwop jhyung ma̱ng chyi nyaai ja (1,400) cha̱chaat.

¹⁷ A̱wot a̱ta̱m tswa wu si̱ bu mak a̱byi̱t mbat a̱keang na. A̱ si̱ shya̱ nang na̱ yet nia̱ chyi sweang ma̱ng swak ma̱ a̱taa (216); (di̱ si̱sak kyang mai a̱tyubishyi nang a̱ta̱m tswa wu nnyia̱ ta̱m hu a̱ni).

¹⁸ Á̱ nok bat hu ma̱ng nfang jaspa. A̱wot a̱keang ka, á̱ si̱ nok ka ma̱ng a̱za̱za̱rak zi̱nariya. Ma̱ng a̱nia, a̱ si̱ yet a̱wowot nang ma̱dubi a̱ni.

¹⁹ Á̱ ku nok bat a̱keang hu tazwa nfang kuntyin nang á̱ lyuut ma̱ng a̱tsatsak nfang swak ma̱ a̱feang a̱ni, kuzang a̱fang ma̱ng a̱sa̱khwot nka: A̱nyiung ka yet jaspa, a̱feang ka si̱ yet sa̱faya, a̱tat ka a̱ga̱t, a̱naai ka si̱ yet a̱mila,

²⁰ a̱fwuon ka si̱ yet a̱nik, a̱taa ka si̱ yet ka̱naliyen, a̱natat ka si̱ yet kisoli̱t, a̱ni̱nai ka si̱ yet beri̱t, a̱kubunyiung ka si̱ yet tofat, swak hu si̱ yet ki̱ri̱sofurat, swak ma̱ a̱nyiung hu si̱ yet ja̱sin, swak ma̱ a̱feang hu si̱ yet a̱meti̱t.

²¹ Á̱na̱nwuai swak ma̱ a̱feang a̱nia, á̱ nyia̱ na ma̱ng a̱tsatsak a̱sai a̱yaawulu ba̱ yet a̱sham a̱ni. Kuzang a̱na̱nwuai, á̱ nyia̱ nka ma̱ng wulu a̱nyiung! A̱wot a̱gba̱ndang a̱gaat a̱keang wu, á̱ si̱ jhyi nka ma̱ng a̱za̱za̱rak zi̱nariya wa. Ma̱ng a̱nia, ka̱ si̱ li wowot nang ma̱dubi a̱ni.

²² N ku ndi A̱li Nwuat Za̱nang A̱gwaza ma̱ a̱keang ka bah. Mat A̱gwaza a̱ byia̱ A̱mgba̱m tyok a̱ni ma̱ng Fi̱ng A̱nfwuk hu; bibya yet A̱li Nwuat Za̱nang A̱gwaza ka!

²³ A̱keang ka chat sai mam ku zwat bah. Mat a̱kyenkyai shi A̱gwaza wu wa yet sai a̱keang hu, a̱wot Fi̱ng A̱nfwuk hu hwa yet long fi̱tila ku sai a̱keang ka a̱ni!

²⁴ A̱mgba̱m nnwap mi̱ bibyin swanta na na chong mi̱ sai a̱keang nhu. A̱wot á̱gwam swanta ba na nwuo ma̱ sa̱t ma̱ a̱keang ka ma̱ng zwá ma̱ng a̱mgba̱m shyit mba hu.

²⁵ Á̱ mbyia̱ nyim á̱na̱nwuai a̱keang di̱n jen mam hu nkwa a̱ni bah. Mat á̱ na mbyia̱ a̱tyetuk a̱ja bah.

²⁶ A̱wot a̱mgba̱m nnwap mi̱ bibyin swanta na, na bai ma̱ng zwá ma̱ng shyit ma̱ng ntyok mba na ma̱ a̱keang ka.

²⁷ Á̱ na shim á̱niet a̱na̱ndyung ba̱ nwuo ma̱ a̱keang ka bah; ku á̱niet ba̱ nyia̱ nkyang nsum ba̱ khwi nghwughwu a̱yaagwaza sang swuan, ku á̱niet bwoi a̱ka̱laa; a̱wot si̱ ma̱ á̱niet ba nang á̱ lyuut lyulyoot mba hu mi̱ Ta̱ka̱da Nswuan Fi̱ng A̱nfwuk hu a̱ni ma̱nyin mba.