Tyai Á̱zanson 19 - A̠lyiat A̠gwaza na di̠n Tyap: A̠li̠ka̠uli A̠fai

Bubwom Ya Zwang Ma A̱gwaza Tswazwa

¹ Nang si̱ huni nswak a̱ni, n si̱ nfa̱k kyang ghyang nang nwunwuat a̱gba̱ndang a̱tung á̱niet Ma A̱gwaza tswazwa ba̱ khwot a̱gugwong nyia̱, “Zi̱ dyep A̱gwaza! San sang sangba̱p, ma̱ng shi, ma̱ng chet, yet a̱si̱ A̱gwaza nzi̱t hwa!

² A̱ nyia̱ shi̱ri̱ya nggu ji mami a̱chuchuk ma̱ng tsotswat! A̱ ka̱n faat a̱gba̱ndang a̱byii̱k a̱ yet kham a̱ni shi̱ri̱ya! A̱byii̱k a̱wa wa byian swanta hu ma̱ng a̱shi̱shi̱k nyia̱ nggu wu. A̱gwaza si̱ tan gu di̱ si̱sak nang á̱ nhyaai á̱khwo nggu ba a̱ni!”

³ A̱wot ba̱ si̱ bu ta̱ngam nwunwuat mba hu nyia̱, “Zi̱ dyep A̱gwaza! A̱chunchung na̱ ghwut ma̱ a̱keang a̱kya a̱ni, si̱ nyeak a̱ nat Ma A̱gwaza tswazwa, si̱ nat sang sangba̱p!”

⁴ A̱jawa á̱niet khwop á̱niet swak nfeang ma̱ a̱naai a̱bya, ma̱ng nkyang nswuan naai a̱nia, si̱ ta̱bwak a̱zaghyi A̱gwaza a̱ swan da̱ a̱gba̱ndang chuk tyok nggu wu a̱ni. Ba̱ si̱ kyuak nggu ntong. Ba̱ si̱ koot a̱gugwong nyia̱, “Samba̱rka! Zi̱ dyep A̱gwaza!”

⁵ A̱wot á̱ si̱ fa̱k a̱nwuat ka̱ ghwut neet da̱ a̱gba̱ndang chuk tyok wu nyia̱, “Zi̱ dyep A̱gwaza nzi̱t wu, a̱mgba̱m á̱khwo nggu ba, a̱mgba̱m á̱niet ba̱ fwuong a̱wun A̱gwaza wu a̱ni, kyiak neet da̱ a̱chyuang si̱ nat da̱ a̱cha̱chet!”

⁶ A̱jawa n si̱ bu nfa̱k a̱nwuat ka̱ tai a̱gugwong a̱si̱ a̱gba̱ndang á̱kpa á̱niet. Ka̱ si̱ swan nang a̱gba̱ndang a̱ywan kyai a̱sa̱khwot wa tyong a̱ni, ku nang a̱gbai nza wa lwi a̱ni. N si̱ fa̱k ba̱ nyia̱, “Á̱ dyep A̱gwaza! Mat nggu wa yet A̱tyoli nzi̱t wu, a̱ yet A̱gwaza a̱ byia̱ A̱mgba̱m chet a̱ni, a̱ nyia̱ tyok nang A̱gwam a̱ni!

⁷ Yok zi̱ yet á̱niet a̱sai nfwuo! Yok zi̱ gwai zi̱ nwuak gu shi! Mat jen nyeang Fi̱ng A̱nfwuk ji nyia̱! A̱wot nggwon neam naat nyeang ka tyak a̱gwai na, ka̱ swan a̱ fwuong.

⁸ Á̱ ka̱n nwuak nggwon neam nyeang ka a̱za̱za̱rak a̱sai wulyin, a̱ swak ma̱ng yet a̱sham a̱ni, ka̱ kup!” Mat a̱sham wulyin a̱kya yet kidee a̱tan nta̱m á̱za̱za̱rak á̱niet A̱gwaza bya.

⁹ A̱ta̱m tswa A̱gwaza wu si̱ nyia̱ ma̱ng a̱nung, “Lyuut a̱lyiat nani: Á̱niet A̱li̱ba̱rka bya yet á̱niet nang á̱ shei mbaa, ba̱ bai song nyeang Fi̱ng A̱nfwuk ji a̱ni!” A̱ta̱m tswa A̱gwaza wu si̱ bu nyia̱, “A̱lyiat nani yet a̱tsatsak a̱lyiat na̱ neet da̱ a̱vwuo A̱gwaza a̱ni!”

¹⁰ A̱jawa n si̱ nta̱bwak a̱zaghyi nggu n si̱ nkyuak gu ntong. A̱wot a̱ta̱m tswa A̱gwaza wu si̱ nyia̱ ma̱ng a̱nung, “Kaai, yok kyuak nung ntong bah! N gyet a̱khwo A̱gwaza wa, ma̱nang nwan ma̱ng á̱na̱nyiuk ang ba ntak kpa̱sai nwuak fwuo nyin hu di̱ Yesu a̱ni. A̱gwaza wa ma̱nyin nggu á̱ kwok gu ntong! Mat a̱chuchuk tak kpa̱sai wu tazwa Yesu; nggu wa yet kyang nang A̱za̱za̱rak Ntswa A̱gwaza wu ni̱ nfuut á̱niet ba ba̱ shei A̱lyiat A̱gwaza na á̱zanson.”

A̱yin Nyeak A̱sai Ntsaai

¹¹ A̱jawa n si̱ ndi Ma A̱gwaza tswazwa ka khwuk, n si̱ kin di a̱sai ntsaai gu yong a̱ja! A̱tyu a̱ nyeak tsaai ji a̱ni, á̱ ngyei nggu “A̱tsotswat” ma̱ng “A̱chuchuk;” mat da̱ a̱chuchuk nvak wa nang gu nnyia̱ shi̱ri̱ya, a̱ si̱ bu ngya zwang a̱tsotswat.

¹² Tswá á̱ghyi nggu ji ya á̱ghyi ma̱ mya̱myat a̱myat nang a̱lya̱ra̱p ndong a̱ni! A̱wot a̱ si̱ kup búng tyok ma̱ a̱di̱di̱t a̱pyia̱ nggu ka! Á̱ si̱ lyuut a̱lyoot da̱ a̱nggu nang a̱yin si̱ mi̱n fi̱k a̱ni bah, si̱ ma̱ nggu ma̱nyin gu!

¹³ A̱ si̱ kup a̱junjung a̱toot nang á̱ zwup ma̱ a̱sok a̱ni! A̱lyoot tyok nggu ka yet, “Swang A̱lyiat A̱gwaza.”

¹⁴ Susot á̱niet nzwang ma̱ a̱di̱di̱t ba̱ shya̱ Ma A̱gwaza tswazwa a̱ni, si̱ kup á̱za̱za̱rak a̱sai wulyin a̱ swak ma̱ng yet a̱sham a̱ni, ba̱ si̱ nyeak á̱sai ntsaaí á̱ khwi guu!

¹⁵ Tswat ji ya nang gu na nswuo chet a̱mgba̱m nnwap mi̱ bibyin swanta hu a̱ni, si̱ ghwut a̱bwonu nggu ka! A̱ na nyia̱ tyok tazwa mba ma̱ng shan ntswam. A̱ na ghwut ma̱ng a̱tsotswat mwai lyen A̱gwaza, A̱tyu a̱ byia̱ a̱mgba̱m tyok a̱ni; nang a̱sa̱khwot a̱na̱p na̱ tyong á̱ neet da̱ a̱vwuo shyui sum a̱na̱p hu nang gu nshai a̱na̱p wu a̱ni.

¹⁶ Tazwa a̱toot nggu ka da̱ a̱bwan ntak nggu wu, á̱ si̱ ndyuut a̱lyoot tyok kani, “A̱gwam á̱gwam, ma̱ng A̱tyoli a̱yaatyoli!”

¹⁷ A̱jawa n si̱ di a̱ta̱m tswa A̱gwaza gu yong mami a̱nu mam. A̱ si̱ yorong á̱nggulu ba ba̱ tyong ma̱ gbang mi̱ kyai tswazwa hu a̱ni mi̱ chet nyia̱, “Nyi bai! Nyi tung dundung nyi song a̱gba̱ndang a̱yet nang A̱gwaza jhyi a̱ni!

¹⁸ Nyi bai nyi ya nam á̱gwam, a̱yaakwak a̱son á̱niet nzwang, á̱gwam nzwang, tsaaí ma̱ng á̱niet ba̱ ban ji a̱ni, ma̱ng a̱mgba̱m á̱nietbishyi, á̱khwo, ma̱ng á̱si̱ ba̱ nwai yet á̱khwo a̱ni, a̱chyuang ma̱ng a̱cha̱chet á̱niet!”

¹⁹ A̱wot n si̱ ndi a̱ka̱tuk nyam a̱yit a̱wa ma̱ng á̱gwam swanta ba, ma̱ng susot á̱niet nzwang mba ji, nang ba̱ tung ndung ba̱ kwan zwang ma̱ng a̱tyu a̱ swan tazwa ntsaai ka a̱ni, ma̱ng susot á̱niet nzwang nggu ji!

²⁰ A̱wot á̱ si̱ ta̱bat a̱ka̱tuk nyam a̱yit wu ma̱ng a̱ta̱m a̱kwonu nggu wu a̱ nyia̱ a̱cha̱chet nta̱m a̱ri̱bi̱di da̱ a̱kwonu a̱ka̱tuk nyam a̱yit wu a̱ni. Nta̱m a̱ri̱bi̱di nani nia ku laai a̱mgba̱m á̱niet ba̱ san zwunzwuo a̱ka̱tuk nyam a̱yit ji, ma̱ng á̱niet ba̱ kwok ghwughwu a̱ka̱tuk nyam a̱yit wu ntong a̱ni. A̱ka̱tuk nyam a̱yit wu ma̱ng a̱ta̱m bwoi a̱ka̱laa a̱kwonu nggu wu; á̱ si̱ ta mba ma̱ng swuan mami a̱gba̱ndang nga̱ngak ntswa ndong a̱ ya ma̱ng long sa̱lfa a̱ni.

²¹ Á̱ si̱ hyaai a̱mgba̱m susot á̱niet nzwang a̱ka̱tuk nyam a̱yit ji ma̱ng tswat ji̱ ghwut a̱bwonu a̱tyu a̱ ku nyeak a̱sai tsaai wu a̱ni. A̱wot á̱nggulu ba, si̱ ya nkwom na. Ba̱ si̱ swa̱i nang ba̱ nchat a̱ni.