Tyai Á̱zanson 16 - A̠lyiat A̠gwaza na di̠n Tyap: A̠li̠ka̠uli A̠fai

Khám Byep A̱tsotswat Mwai Lyen A̱gwaza A̱natat

¹ A̱jawa n si̱ nfa̱k a̱gba̱ndang a̱nwuat a̱ghyang gu ghwut a̱ neet A̱mali Nwuat Za̱nang A̱gwaza ka. A̱ shei a̱yaata̱m tswá A̱gwaza a̱natat ba nyia̱, “Nyi nat, nyi si̱ koot mbyep na̱ shya̱ mi̱ khám a̱natat ji mi̱ swanta hu, ku tak a̱tsotswat mwai lyen A̱gwaza hu a̱ni!”

² Huhwa nang a̱ta̱m tswa a̱ yet a̱son ka a̱ni, si̱ nat a̱ si̱ koot byep ku shya̱ mi̱ kham nggu ji a̱ni mi̱ swanta hu. A̱wot á̱ka̱tuk nkyang tang na̱ kpeam ba̱t a̱ni, si̱ kin tang konyan a̱ byia̱ zwunzwuo a̱ka̱tuk nyam a̱yit ji a̱ni, ma̱ng a̱tyu a̱ kwok ntong a̱zaghyi ghwughwu nggu hu a̱ni!

³ A̱ta̱m tswa a̱feang wu si̱ nat, a̱ si̱ koot byep hu ku shya̱ mi̱ kham nggu ji a̱ni, mi̱ kyai a̱sa̱khwot. A̱wot a̱sa̱khwot na si̱ bwuak a̱ tyia̱ nang a̱sok a̱tyu a̱ yet kwom a̱ni! A̱wot a̱mgba̱m nkyang swuan na̱ shya̱ mi̱ kyai a̱sa̱khwot hu a̱ni, si̱ kwi!

⁴ A̱ta̱m tswa A̱gwaza a̱tat wu si̱ koot byep hu ku shya̱ mi̱ kham nggu ji a̱ni, ma̱ a̱ka̱ghyui ma̱ng nnang a̱sa̱khwot. A̱wot a̱mgba̱m a̱sa̱khwot na si̱ bwuak a̱ tyia̱ a̱sok!

⁵ A̱wot n si̱ nfa̱k a̱ta̱m tswa A̱gwaza a̱ chok a̱mgba̱m a̱sa̱khwot na a̱ni nyia̱, “Nwan, A̱za̱za̱rak A̱gwaza, a fak shi̱ri̱ya ang ji tsotswat, nwan wa nshya̱ a̱fwun, a̱wot a ku nshya̱ gbangbang, mat nwan wa nyia̱ shi̱ri̱ya jini!

⁶ Mat nang á̱ka̱tuk á̱niet ba ngweam a̱sok a̱za̱za̱rak á̱niet khwi, ma̱ng a̱yaata̱m a̱kwonu ang ba, a ma nang mba a̱sok ba̱ swuo! Zang mba ji nat cha̱chaat ma̱ng a̱ka̱tuk nyia̱ mba wu!”

⁷ A̱wot n si̱ nfa̱k a̱nwuat ka̱ neet ma̱ a̱tyii nwuat za̱nang wu nyia̱, “A̱tsatsak a̱lyiat, Nwan, A̱gwaza, a yet A̱tyoli A̱mgba̱m tyok a̱ni, a fak shi̱ri̱ya ang ji mami a̱chuchuk ma̱ng tsotswat!”

⁸ A̱jawa a̱ta̱m tswa A̱gwaza a̱naai wu si̱ koot byep ku shya̱ mi̱ kham nggu ji a̱ni, tazwa a̱nu mam ka. A̱ si̱ tyia̱ mam hu ku ngaat a̱ fwui konyan ma̱ gba̱gbai a̱gbai!

⁹ A̱gba̱gbai mam a̱wa si̱ fwui konyan ma̱ng shwai hu. A̱wot á̱niet ba si̱ lyiat a̱lyoot A̱gwaza ka lihyat; nggu a̱ byia̱ chet tazwa byep huni a̱ni. A̱mgba̱m ma̱ng a̱nia, ba̱ si̱ lak ghwon a̱ka̱tuk nyia̱ mba wu, ba̱ bwuak ba̱ khwi A̱gwaza, a̱wot ba̱ nwuak gu shi.

¹⁰ A̱ta̱m tswa A̱gwaza a̱fwuon wu si̱ koot byep ku shya̱ ma̱ kham nggu ji a̱ni, di̱n chuk tyok a̱ka̱tuk nyam a̱yit a̱wa. A̱wot á̱ si̱ ta tyok nggu hu mi̱ ndyin! Á̱niet ba ba̱ yet á̱si̱ nggu ba a̱ni, si̱ nywai nunu mba hu, mat a̱khwu ba̱ fwuong a̱ni ba̱t!

¹¹ A̱wot ba̱ si̱ nwuo lyiat A̱gwaza a̱ swan tswazwa ka a̱ni lihyat, mat a̱khwu ba̱ fwuong a̱ni ma̱ng a̱fi̱fa̱t nang ba̱ bwoi a̱ni. A̱mgba̱m ma̱ng a̱nia, ba̱ si̱ lak ghwon a̱ka̱tuk nyia̱ mba wu, ba̱ khwi A̱gwaza.

¹² A̱ta̱m tswa A̱gwaza a̱taa wu si̱ koot byep ku shya̱ mi̱ kham nggu ji a̱ni, ma̱ a̱gba̱ndang A̱ghyui Yuferitit. A̱wot A̱ghyui ka si̱ fi̱k, da̱nian á̱gwam ba̱ neet a̱tyin ma̱ng á̱niet nzwang mba na á̱ naat fam jenshyung a̱ni, ba̱ ka byia̱k di̱ mi̱n kyang ku na tyia̱ mba ndyem a̱ni.

¹³ A̱wot n si̱ ndi á̱na̱ndyung á̱ka̱tuk ntswá A̱ta̱nyeang a̱tat, ba̱ tai a̱yaakusambwat ba̱ fi̱ri̱p á̱ ghwut mi̱ nunu a̱gba̱ndang a̱ka̱tuk nzwuo a̱ byia̱ nfeap na a̱ni; ma̱ng a̱ka̱tuk nyam a̱yit a̱ yet a̱son ka a̱ni; ma̱ng a̱ta̱m bwoi a̱ka̱laa a̱kwonu nggu wu da̱nian a̱ka̱tuk nyam a̱yit a̱ yet a̱son ka a̱ni.

¹⁴ Á̱ka̱tuk ntswá a̱tat bani yet á̱si̱ A̱ta̱nyeang bya ba̱ nyia̱ nta̱m a̱ri̱bi̱di a̱ni. A̱wot ba̱ na ghwut ba̱ tung a̱mgba̱m á̱gwam mi̱ swanta ba; ba̱ nyia̱ zwang ma̱ng A̱gwaza a̱tuk a̱gba̱ndang mam shi̱ri̱ya A̱gwaza ka, A̱gwaza a̱ byia̱ A̱mgba̱m tyok a̱ni.

¹⁵ (Á̱ si̱ fa̱k a̱nwuat ka nyia̱,) “Nyi li, n na bai gba̱ngba̱ng di̱ mi̱ lyen nyin nang a̱tang a̱ni! Á̱niet ba ba̱ swan á̱ fwuong chobai nung hu a̱ni, ba̱ yet á̱niet a̱li̱ba̱rka bya! Mat ba̱ kwi a̱yaatoot mba ba kalak ba̱ ba̱ chong á̱ kat ka̱gbang, a̱wot ba̱ fa̱k nsum mami á̱niet.”

¹⁶ A̱jawa á̱ka̱tuk ntswá A̱ta̱nyeang ba̱ na laai a̱mgba̱m á̱gwam ba ma̱ng á̱niet nzwang mba ba, ba̱ tung mbaa da̱ a̱vwuo nang á̱ ngyei A̱magidon da̱ a̱lyem Ibriniyawa a̱ni.

¹⁷ A̱wot a̱ta̱m tswa A̱gwaza a̱natat wu si̱ koot byep ku shya̱ mi̱ kham nggu ji a̱ni, mi̱ kyai tswazwa hu. A̱gba̱ndang a̱nwuat a̱ghyang si̱ neet da̱ a̱gba̱ndang chuk tyok wu, ma̱ng A̱li Nwuat Za̱nang A̱gwaza ka, ka̱ si̱ kaat mi̱ chet nyia̱, “Ku tyak!”

¹⁸ A̱jawa a̱mya̱ra̱m nza si̱ kin tyia̱ mya̱ra̱m; a̱wot a̱gbai nza si̱ lwi; a̱wot a̱gbi̱ri̱ng nza si̱ nyui; a̱wot á̱ si̱ nyia̱ a̱gba̱ndang tyi̱ri̱m a̱byin a̱si̱ a̱ swak ma̱ng yet a̱ka̱tuk neet nang A̱gwaza mmat á̱niet ba mi̱ swanta hu a̱ni!

¹⁹ A̱gba̱ndang a̱keang Babila wu si̱ teang a̱ nyia̱ nfam tat! A̱wot a̱mgba̱m a̱cha̱chet a̱ka̱keang nnwap mi̱ swanta na si̱ bi̱ri̱m á̱ nyia̱ a̱ka̱kuu! A̱nia wa, A̱gwaza si̱ njhyung a̱mgba̱m a̱ka̱tuk nyia̱ Babila wu. A̱wot a̱ si̱ tyia̱ Babila si̱ swuo a̱sa̱khwot a̱na̱p ma̱ a̱kashyi a̱tsotswat mwai lyen A̱gwaza wu.

²⁰ A̱wot tyi̱ri̱m a̱byin hu si̱ tyia̱ kuzang a̱byin ma̱ a̱ka̱wa̱tyia̱ a̱sa̱khwot si̱ ta̱lyip! A̱wot a̱mgba̱m a̱ka̱fan na mameang, na̱ si̱ tyi̱ri̱p á̱ bai cha̱chaat ma̱ng a̱byin ka!

²¹ A̱gba̱ndang za si̱ va ma̱ng wun ma̱ng taan, ji̱ si̱ kwoi tazwa á̱niet ba̱ shya̱ mi̱ swanta hu a̱ni! Á̱ si̱ mak swan kpa̱p taan hu, ku si̱ yet kilo nswak ntat ma̱ a̱fwuon! Á̱niet ba si̱ lyiat A̱gwaza lihyat mat a̱ka̱tuk byep nang wun za hu ma̱ng taan hu bai ma̱ng a̱mba ndyo a̱ni.