Tyai Á̱zanson 14 - A̠lyiat A̠gwaza na di̠n Tyap: A̠li̠ka̠uli A̠fai

Fi̱ng A̱nfwuk ma̱ng Sot Á̱niet Bubwom 144,000

¹ A̱jawa n si̱ nwuan, n si̱ kin di Fi̱ng A̱nfwuk hu nang ku yong tazwa A̱fan Si̱hiyona, a̱wot á̱niet chyikwop chyi ma̱ng chyikwop swak naai ma̱ naai (144,000) si̱ yong dundung ma̱ng a̱nggu; nang á̱ ka̱n dyuut zwunzwuo a̱lyoot nggu ji ma̱ng a̱si̱ A̱tyia̱ nggu ji di̱ kpi̱kpeang mba hu!

² N si̱ kin fa̱k a̱nwuat ka̱ neet Ma A̱gwaza tswazwa nang a̱khwom a̱cha̱chet ywan kyai a̱sa̱khwot, ku nang a̱gbai nza a̱ni! A̱khwom na, n si̱ nfa̱k a̱ni, na̱ swan nang sot á̱niet tsot zunzom ma̱ a̱di̱di̱t a̱ni!

³ A̱gba̱ndang sot á̱niet bubwom wuni si̱ bwom a̱bwom ka̱ yet a̱fai a̱ni, a̱zaghyi a̱gba̱ndang chuk Tyok A̱gwaza, ma̱ng a̱zaghyi nkyang nswuan naai a̱nia, ma̱ng á̱niet khwop á̱niet nswak nfeang ma̱ng naai a̱bya. Á̱ mbyia̱ a̱tyu a̱ si̱ mi̱n myiam a̱bwom ka a̱ni bah; si̱ á̱niet chyikwop chyi ma̱ng chyikwop nswak naai ma̱ naai (144,000) a̱bya. Á̱si̱ ba nang gu nwuak a̱pyia̱ nggu a̱ si̱ san baa, ba̱ yet á̱sa̱t á̱niet nggu ba a̱ni mi̱ swanta hu.

⁴ Á̱niet bani yet á̱za̱za̱rak bya, nang a̱tyok ku a̱byii̱k a̱ ka̱ nwai lyen a̱byii̱k ku a̱tyok a̱ni bah. Bibya khwi Fi̱ng A̱nfwuk hu a̱mgba̱m a̱vwuo ka gu naat a̱ni. Bibya nang á̱ san mami á̱niet swanta ba, nang á̱tsatsak za̱náng á̱ neap A̱gwaza ma̱ng Fi̱ng A̱nfwuk hu a̱ni.

⁵ Ba̱ ka̱n bwoi a̱ka̱laa bah. Da̱ mba, á̱ shya̱ mba ma̱ng a̱bun bah.

A̱yaata̱m Tswá A̱gwaza A̱tat Shei Tá̱m Tsat

⁶ N si̱ bu ndi a̱ta̱m tswa A̱gwaza a̱ghyang nang gu tyong mi̱ kyai tswazwa, a̱ chong ma̱ng A̱sham Nkhang sang sangba̱p! Da̱nian gu ka shei kuzang a̱byin, kuzang nwap, kuzang a̱lyem, ma̱ng kuzang kwai.

⁷ A̱ si̱ kaat ma̱ng a̱gba̱ndang a̱nwuat nyia̱, “Nyi fa̱k a̱wun A̱gwaza, nyi bu nwuak gu shi! Mat jen nang gu na nswan a̱ nyia̱ á̱niet mi̱ swanta ba shi̱ri̱ya ji a̱ni, nyia̱! Nyi kwok gu ntong; nggu wa nyia̱ kyai tswazwa ma̱ng a̱byin, kyai a̱sa̱khwot, ma̱ng a̱mgba̱m nnang a̱sa̱khwot!”

⁸ A̱ta̱m tswa A̱gwaza a̱ghyang si̱ khwi nggu mi̱ kyai tswazwa hu, a̱ lyiat mi̱ chet nyia̱, “Babila kwa! A̱gba̱ndang a̱keang a̱wa kwa! Mat Babila wa fuut a̱mgba̱m á̱niet mi̱ bibyin swanta ba ba̱ si̱ swuo a̱sa̱khwot a̱na̱p a̱shi̱shi̱k nyia̱ nggu na! Huhwa tyia̱ A̱gwaza a̱tsotswat mwai lyen ma̱ng a̱nggu!”

⁹ A̱ta̱m tswa A̱gwaza a̱tat wu si̱ ma nkhwi mbaa, a̱ lyiat mi̱ chet nyia̱, “Konyan wa kyuak ntong a̱zaghyi a̱ka̱tuk nyam a̱yit a̱wa, ma̱ng ghwughwu nggu hu; ku a̱ si̱ shim á̱ si̱ chak nggu zwunzwuo a̱ka̱tuk nyam ji a̱zakpeang, ku di̱ mbwak a̱ni;

¹⁰ ku yet ta hwa gu swuo a̱sa̱khwot a̱na̱p a̱tsotswat mwai lyen A̱gwaza na, nang á̱ koot tyentyang a̱kashyi a̱tsotswat mwai lyen A̱gwaza hu a̱ni! A̱wot ba̱ na swuo a̱bung mi̱ ndong ma̱ng long sa̱lfa, a̱zaghyi á̱za̱za̱rak a̱yaata̱m tswá A̱gwaza ma̱ng Fi̱ng A̱nfwuk wu!

¹¹ Chunchung ndong na̱ tyei mba swuo a̱bung a̱ni, na yong di̱ vwuot kuzang jen si̱ nat sang sangba̱p! A̱wot swuo a̱bung a̱hwa na shyak bah, a̱ta̱mam ma̱ng a̱tyetuk, da̱ a̱vwuo á̱niet ba̱ kwok ntong a̱zaghyi a̱ka̱tuk nyam a̱yit a̱wa ma̱ng ghwughwu nggu hu a̱ni; ma̱ng a̱mgba̱m á̱niet ba̱ shim á̱ si̱ ghwang mba zwunzwuo a̱lyoot a̱ka̱tuk nyam a̱yit a̱wa a̱ni!”

¹² Si̱ huni tak zi̱t nang ku ngyet ta hwa á̱za̱za̱rak á̱niet A̱gwaza ba̱ gbang a̱lyia̱, ba̱ nyap fwuo mami ya̱shuk mba hu, ba̱ ya a̱son di̱ khwi doka A̱gwaza ji, ba̱ ya a̱son di̱ nwuak nfwuo mba na di̱ Yesu Kristi.

¹³ N si̱ bu nfa̱k a̱nwuat ka̱ neet Ma A̱gwaza tswazwa nyia̱, “Lyuut si̱ huni: A̱li̱ba̱rka shya̱ da̱ á̱niet ba̱ kwi mi̱ khwi A̱gwaza, doot ma̱ninika si̱ nat á̱zanson!” A̱za̱za̱rak Ntswa wu si̱ nyia̱, “A̱tsatsak a̱lyiat wa ba̱t; ba̱ na̱ fwung swuo a̱bung mba hu, mat ba̱ na san zang nta̱m mba ji!”

Jen Chak Yak Swanta ji Nyia̱

¹⁴ A̱jawa n si̱ bu ndi a̱sai á̱ni̱nian a̱zanson nung, tazwa ka a̱yin a̱ tai Nggwon A̱tyubishyi a̱ni nswan ma̱ng bung tyok zi̱nariya a̱pyia̱ nggu ka. A̱ si̱ ba̱ng a̱gba̱ndang a̱la̱unjhyi a̱ ya ba̱t a̱ni mbwak nggu ka, a̱ na nchak yak hu.

¹⁵ A̱jawa a̱ta̱m tswa a̱ghyang si̱ ghwut A̱mali Nwuat Za̱nang A̱gwaza ka. A̱ si̱ kaat mi̱ chet ma̱ a̱tyu a̱ swan ma̱ á̱ni̱nian ba a̱ni nyia̱, “A̱tyoli, jhyip a̱gba̱ndang a̱la̱unjhyi ang wu a nchak yak hu! Mat jen chak yak swanta ji nyia̱; yak swanta hu maai chak ba̱t!”

¹⁶ Huhwa mbyia̱ nang a̱tyu a̱ swan tazwa á̱ni̱nian ba a̱ni si̱ jhyip a̱gba̱ndang a̱la̱unjhyi nggu wu mi̱ swanta hu. A̱ si̱ nchak yak swanta hu.

¹⁷ Nang si̱ a̱hwa nswak a̱ni, a̱ta̱m tswa a̱ghyang si̱ ghwut Mali Nwuat Za̱nang A̱gwaza ka̱ shya̱ tswazwa a̱ni. Nggu meang, a̱ ba̱ng a̱la̱unjhyi a̱ ya ba̱t a̱ni.

¹⁸ Ma a̱nia wa, a̱ta̱m tswa A̱gwaza a̱ghyang, a̱ chok long a̱tyii nwuat za̱nang hu a̱ni, si̱ neet da̱ a̱tyii wu. A̱ si̱ yorong a̱ta̱m tswa A̱gwaza wu a̱ ba̱ng a̱la̱unjhyi wu a̱ ya ba̱t a̱ni. A̱ si̱ kaat mi̱ chet nyia̱, “Neap a̱la̱unjhyi ang wu a nchak susot sum a̱na̱p ji ma̱ a̱byin a̱na̱p swanta ka! Mat sum a̱na̱p hu byang!”

¹⁹ Mat a̱nia, a̱ta̱m tswa A̱gwaza wu si̱ neap a̱la̱unjhyi nggu wu mi̱ swanta hu. A̱ si̱ nchak sum a̱na̱p wu, a̱ si̱ tung. A̱ si̱si̱ bwuak a̱ koot da̱ a̱gba̱ndang a̱vwuo shyui a̱na̱p a̱tsotswat mwai lyen A̱gwaza hu.

²⁰ Á̱ si̱ shai sum a̱na̱p hu da̱ a̱vwuo shyui a̱na̱p ka, ma̱nta a̱keang Urusha̱lima ka. A̱sok a̱na̱p na da̱ a̱vwuo shyui sum a̱na̱p hu si̱ hyat chen, ku shi a̱ swap a̱ tat met chyi jhyung ma̱ng swak a̱ni̱nai (180) a̱ni. A̱wot a̱sok na si̱ nyeak a̱ tat a̱za a̱li̱nzami ntsaai!