Tyai Á̱zanson 11 - A̠lyiat A̠gwaza na di̠n Tyap: A̠li̠ka̠uli A̠fai

Á̱niet A̱feang Shei A̱lyiat A̱gwaza Kpa̱sai

¹ A̱jawa á̱ si̱ nwuak nung a̱ga̱faat nang á̱ mmai nkyang a̱ni. A̱wot á̱ si̱ nyia̱ ma̱ a̱nung, “Nat a mak A̱li Nwuat Za̱nang A̱gwaza ka, ma̱ng a̱tyii fwui za̱nang wu. A̱wot a fang á̱niet ba̱ dyep A̱gwaza a̱ja a̱ni.

² “A̱wot yok mak didyaat nta hu bah. Mat huhwa á̱ nwuak nnwap na̱ chyi A̱gwaza a̱ni. Ba̱ na nyia̱ zwát nswak naai ma̱ a̱feang (42) nang ba̱ ya̱shuk á̱niet ba̱ swan ma̱ a̱za̱za̱rak a̱keang Urusha̱lima wu a̱ni.

³ “A̱wot n na nwuak á̱niet shei a̱lyiat a̱feang nung ba tyok, ba̱ na shei nkyang na̱ chobai á̱zanson a̱ni mami mmam chyikwop jhyung ma̱ng chyi sweang mi̱ nswak a̱taa (1260). A̱wot ba̱ na khwi a̱kyakyak a̱yaatoot.”

⁴ A̱yaata̱m a̱kwonu A̱gwaza a̱feang bani bibya yet kidee a̱ka̱kwon za̱itun a̱feang na, ma̱ng á̱ga̱nga̱ng chuchuk saai fí̱tila sweang ji̱ yong a̱zaghyi A̱gwaza swanta wu a̱ni.

⁵ Ka̱ a̱yin chat bwuo mba nkun, a̱lya̱ra̱p ndong na ghwut mi̱ nunu mba hu, ka̱ fwui a̱tyu a̱wa! A̱ni wa á̱ na nhyat a̱tyu a̱ chat bwuo mba nkun a̱ni mut!

⁶ A̱yaata̱m a̱kwonu A̱gwaza bani na byia̱ chet ba̱ nyim kyai tswazwa hu, da̱nian za yok va di̱n jen nang ba̱ nshei nkyang na̱ na bai á̱zanson ka a̱ni. Ba̱ si̱ bu byia̱ chet nang ba̱ na mbwuak a̱sa̱khwot a̱ka̱ghyui ma̱ng nkyai a̱sa̱khwot na̱ tyia̱ a̱sok a̱ni. A̱wot ba̱ bu byia̱ chet ba̱ tyia̱ kuzang tangka̱i mbyep na̱ kwa mi̱ swanta hu di̱ kuzang jen nang ba̱ nchat a̱ni.

⁷ Ka̱ a̱yaata̱m a̱kwonu A̱gwaza a̱bya tyak shei a̱lyiat A̱gwaza na, a̱ka̱tuk nyam a̱yit a̱ shya̱ ma̱ a̱tsuung bwong sang sangba̱p wu a̱ni, na ghwut ji̱ nyia̱ zwang ma̱ng a̱mba; a̱wot ji̱ swuo chet ba, ji̱ hyaai mbaa.

⁸ A̱wot á̱ na ghwon nkwom mba na na̱ myian da̱ a̱gba̱ndang a̱gaat ma̱ a̱keang Urusha̱lima (á̱ bu ngyei Sodom ma̱ng Ma̱sa̱r); a̱keang ka nang á̱ ku nkpang A̱tyoli mba wu da̱ a̱team a̱khwu wu a̱ni.

⁹ A̱wot á̱ na nyia̱ mam tat ma̱ng á̱kum nang a̱mgba̱m á̱niet, nnwap, lilyem, ma̱ng bibyin na tyia̱ á̱ghyi á̱ nwuan nkwom mba na. A̱wot á̱ na shim a̱yin a̱ niat nkwom mba na bah.

¹⁰ A̱mgba̱m á̱niet ba̱ shya̱ mi̱ swanta huni a̱ni, ba̱ na gwai ba̱ song ba̱ mai, mat kukwi a̱yaata̱m a̱kwonu A̱gwaza a̱feang bani. A̱wot ba̱ na nwuat á̱ghyang ba za̱náng. Mat a̱yaata̱m bani ku ba̱ng mba bi̱ba̱ng ma̱ng a̱lyiat A̱gwaza.

¹¹ A̱wot nang mam tat ma̱ á̱kum nswak a̱ni, A̱gwaza si̱ hyap swuan mi̱ nkwom a̱yaata̱m a̱kwonu A̱gwaza a̱feang bani. A̱wot ba̱ si̱ doot á̱ yong a̱ka̱tsak! A̱wot a̱gba̱ndang a̱wun si̱ ta̱bat á̱niet ba̱ yong á̱ nwuan nkwom a̱yaata̱m a̱kwonu A̱gwaza a̱feang a̱bya a̱ni.

¹² A̱jawa a̱gba̱ndang a̱nwuat a̱ neet Ma A̱gwaza tswazwa a̱ni, si̱ nyia̱ ma̱ng a̱yaata̱m a̱kwonu A̱gwaza a̱feang a̱bya, “Nyi nyeak, bai a̱ji!” A̱wot ba̱ si̱ nwuo ma̱ á̱ni̱nian, ba̱ si̱ nkat Ma A̱gwaza tswazwa nang á̱niet ba̱ lak li mba a̱ni yong á̱ nwuan!

¹³ Mi̱ di̱n jen a̱ja, a̱gba̱ndang tyi̱ri̱m a̱byin si̱ kin hyat fam nyiung mami nfam swak a̱keang na! A̱gba̱ndang tyi̱ri̱m a̱byin wu si̱ hyaai á̱niet chyikwop a̱natat (7,000). A̱wot a̱gba̱ndang a̱wun si̱ ta̱bat kuzang a̱yin. A̱wot ba̱ si̱ shim nang A̱gwaza a̱ swan Tswazwa a̱ni mbyia̱ chet ba̱t!

¹⁴ Kyang a̱wun feang hu swak. A̱wot kyang a̱wun tat hu chobai ma a̱nggang!

Tyiap A̱gwa A̱natat hu Bai ma̱ng Kyang A̱wun Tat

¹⁵ A̱jawa a̱ta̱m tswa a̱natat wu si̱ ntyiap a̱gwa nggu ka. Á̱ si̱ kin fa̱k nwunwuat ku neet Ma A̱gwaza tswazwa mi̱ chet nyia̱: “Tyok swanta hu ma̱nini yet si̱ A̱gwaza A̱tyoli nzi̱t mbeang Kristi, a̱tyu nang á̱ kup gu tyok a̱ni! A̱wot a̱ na nyia̱ tyok hu ku sang sangba̱p a̱ni!”

¹⁶ A̱jawa á̱niet khwop á̱niet swak nfeang ma̱ naai ba̱ swan di̱ a̱cha̱chet chuchuk tyok mba ji a̱zaghyi A̱gwaza a̱ni; ba̱ si̱ kpaat a̱khwukhwut a̱zaghyi A̱gwaza, ba̱ si̱ kyuak A̱gwaza ntong.

¹⁷ A̱wot ba̱ si̱ bwom nyia̱, “Zi̱ gwai ma̱ng a̱nwan, A̱gwaza A̱tyoli nzi̱t wu, a̱tyu a̱ byia̱ a̱mgba̱m tyok a̱ni! Nwan wa nshya̱! Nwan wa ku nshya̱, mat ma̱ninika a kyiak a̱gba̱ndang tyok ang wu, a̱wot a si̱ nwuo nyia̱ tyok hu!

¹⁸ A̱mgba̱m nnwap na̱ chyi A̱gwaza a̱ni si̱ chi̱ri̱ng ba̱t! A̱wot ma̱ninika, jen a̱tsotswat mwai lyen ang ji nyia̱! Jen nyia̱ nang a na nyia̱ á̱niet ba̱ ka̱n kwi a̱ni shi̱ri̱ya; a̱wot a nwuak á̱khwo ang ba, ba̱ yet a̱yaata̱m a̱kwonu A̱gwaza a̱ni zang; ma a̱nia wa, a̱za̱za̱rak á̱niet khwi ang ba, ma̱ng a̱mgba̱m á̱niet ba̱ nnwuat a̱lyoot ang ka shi a̱ni, neet da̱ a̱chyuang si̱ nat da̱ a̱cha̱chet! Jen nyia̱ nang a na nhyaai a̱mgba̱m á̱niet ba ba̱ hyaai á̱niet mi̱ swanta ba a̱ni!”

¹⁹ A̱jawa nyinyiit A̱li Nwuat Za̱nang A̱gwaza na̱ ku shya̱ Ma A̱gwaza tswazwa a̱ni, si̱ khwuk! A̱wot á̱ si̱ li a̱za̱za̱rak a̱kwati a̱li̱ka̱uli A̱gwaza wu mami A̱li Nwuat Za̱nang A̱gwaza ka. A̱mya̱ra̱m nza si̱ tyia̱ mya̱ra̱m; a̱gbi̱ri̱ng za si̱ nyui; a̱gbai nza si̱ lwi; a̱byin ka si̱ tyi̱ri̱m! Za si̱ va ma̱ng a̱cha̱chet taan!