Titut 3 - A̠lyiat A̠gwaza na di̠n Tyap: A̠li̠ka̠uli A̠fai

Swat ku Myim Á̱niet Khwi a̱ni

¹ Jhyung á̱niet khwi ba ba̱ nwuak á̱gwam ma̱ng a̱yaakwak a̱son mba ba shi. Mat tyok mba hu, si̱ ba̱ khwi doká mba ji. Ba̱ bu la̱p vam ba̱ nyia̱ a̱tan ta̱m.

² Tak ma̱ng a̱mba ba̱ yok tyam á̱ghyang, ba̱ bu fwuon zok bah. Da̱ a̱kwonu a̱kya, ku myim ba̱ swan swat nyinyang ma̱ng á̱ghyang. Ba̱ ghyuai á̱pyia̱ mba, ba̱ bu nyia̱ shonshyon ma̱ng a̱mgba̱m á̱niet ba.

³ Nzi̱t ma̱ á̱pyia̱ nzi̱t, gbangbang zi̱ ku nyia̱ bwuon. Zi̱ si̱ lak fwuong. Á̱ si̱ laai nzi̱t. Zi̱ ku yet á̱khwo bya di̱ nkyang shyuo mi̱ chat fa̱k nyinyang swanta hu ma̱ a̱di̱di̱t. Zi̱ ku swan a̱ka̱tuk nswat, ma̱ng kwi swam. Zi̱ si̱ ba̱ng á̱ghyang mi̱ fwuo. Zi̱ si̱ lak li á̱ghyang.

⁴ A̱wot nang A̱gwaza A̱tyusan san nzi̱t wu ntyai shok ma̱ng chat nggu hu kpa̱sai a̱ni,

⁵ a̱ si̱ san zi̱t, mat a̱tsotswat ta̱m nang zi̱ nnyia̱ wa a̱ni bah. Da̱ a̱kwonu a̱kya, mat fa̱k kunak gu hwa nang gu nsan zi̱t. A̱ si̱ san nzi̱t ma̱ng jaat nang gu jaat nzi̱t ma̱ng A̱za̱za̱rak Ntswa a̱ni. Da̱ a̱nia wa, á̱ si̱ mbyin zi̱t a̱ka̱feang á̱ si̱ nang zi̱t swuan swai.

⁶ A̱gwaza si̱ nang zi̱t A̱za̱za̱rak Ntswa nggu wu gba̱mgbam, di̱ mun á̱pyia̱ nzi̱t hu ma̱ng Yesu Kristi A̱tyusan zi̱t.

⁷ Mat shok gu ja mbyia̱ A̱gwaza si̱ ntak kpa̱sai nang gu nkyiak zi̱t á̱tsotswat á̱niet sang a̱bun a̱zaghyi nggu. Zi̱ si̱ yet á̱niet ya gado swuan sang sangba̱p nang zi̱ ntyia̱ fwuo a̱ni.

⁸ A̱lyiat nani yet a̱tsatsak wa. A̱wot n chat a shei na za̱m, da̱nian á̱niet ba̱ ka nwuak fwuo da̱ A̱gwaza. Ba̱ tyia̱ nfwuo mba na, ba̱ nyia̱ a̱tan nta̱m. Tyiet huni yet a̱tsatsak wa za̱m. A̱wot ku bu na beang a̱mgba̱m á̱niet ba.

⁹ A̱wot tyong zan, a yok a̱tai nfwuang ma̱ng lyuut lyulyoot nche a̱yaatyia̱ khwop, ma̱ng fwuang, ma̱ng zok tazwa khwi doká Musa ji. Mat ji̱ yet kyang tswa bah. Da̱ nji, ji̱ si̱ mi̱n beang bah.

¹⁰ A̱tyu a̱ kwak jhya̱, a̱ bu ghai á̱niet khwi ba di̱ susot a̱ni; ka̱ a gba nggu a̱ka̱nyiung, a si̱ bu gba nggu da̱ a̱ka̱feang ka. Ka̱ a̱ lak fa̱k ang hu, a yok gu. A khap a̱pyia̱ ang zan ma̱ng a̱nggu.

¹¹ A lyen za̱m nang tangka̱i a̱tyu a̱hwa mbwuk a̱ si̱ teap a̱ ghwon a̱chuchuk wu. A̱wot a̱ka̱tuk nyia̱ nggu wu tak nang gu ngyet a̱tyu bwoi a̱bun wa.

A̱lyiat Ngaan

¹² Di̱n jen nang n ta̱m Antimat ku Tikikut da̱ a̱vwuo ang a̱ni, a kwan ba̱t, a bai da̱ a̱vwuo nung mi̱ Nikafolit. N wa ka̱n kyiak mi̱ fwuo n na nyia̱ a̱kwa̱i ka a̱ja.

¹³ Kwan ba̱t a beang Zi̱nat a̱gwak lyen doká a̱byin a̱wa ma̱ng A̱folot ba̱ ta̱bat vak. A kwan a li nang ba̱ shya̱ kuzang kyang ba̱ chat di̱ a̱chyet ka a̱ni.

¹⁴ Ku yet ta hwa á̱niet khwi nzi̱t ba, ba̱ hyaat di̱ nyia̱ á̱tsatsak nta̱m nang ba̱ na mbeang á̱niet ba̱ sang kyang a̱ni. Huhwa na tyia̱ ba̱ nswan a̱buk nswat bah.

¹⁵ A̱mgba̱m á̱niet ba ba̱ shya̱ ma̱ng a̱nung a̱ni, byiat ang. Byiat á̱niet khwi ba, ba̱ chat zi̱t a̱ni. Yok, A̱gwaza a̱ fa̱k shok a̱mgba̱m nyin!