Titut 1 - A̠lyiat A̠gwaza na di̠n Tyap: A̠li̠ka̠uli A̠fai

Byat

¹ Nung Bulut n gyet a̱khwo A̱gwaza ma̱ng a̱ta̱m Yesu Kristi a̱ni, da̱nian n ka ntyia̱ á̱niet khwi ba nang A̱gwaza khai a̱ni gba̱gbak, ba̱ ka mbeang lyen a̱chuchuk, da̱nian ba̱ ka swan tangka̱i swat ku myim A̱gwaza a̱ni.

² A̱chuchuk wuni tyia̱ mba ba̱ gbang a̱lyia̱, ba̱ si̱ tyia̱ fwuo nang ba̱ na nshya̱ swuan sang sangba̱p a̱ni. A̱gwaza, a̱ nwai bwoi a̱ka̱laa a̱ni, la̱p a̱ sak ma̱ng a̱nzi̱t tazwa swuan kani neet di̱n jen ntsa.

³ Da̱ cha̱chaat njen, a̱ si̱ tyai nzi̱t ndyo kpa̱sai mami shei a̱lyiat nggu na, nang gu ntyia̱ nung ndyo mbwak a̱ni. N si̱ san na di̱ si̱sak ji nang A̱gwaza A̱tyusan nzi̱t wu ntak a̱ni.

⁴ N dyuut ang wusika jini, n byiat ang Titut, a̱tsatsak nggwon nung mami nwuak a̱chuchuk nang zi̱ byia̱ dundung a̱ni. Yok A̱gwaza a̱ yet A̱tyia̱ a̱ni gu fa̱k shok ang, a̱ bu nwuak ang swat nyinyang ku neet da̱ a̱vwuo Yesu Kristi a̱ni.

Ta̱m Titut ma̱ A̱byin Ka̱rita

⁵ N ghwon ang ma̱ a̱byin a̱ka̱wa̱tyia̱ a̱sa̱khwot Ka̱rita, a ka ngaan jhyi a̱bya̱bya̱ nswat a̱ bwat a̱ni; a̱wot a bu khai a̱yaakwak a̱son á̱niet khwop á̱niet ba̱ na kwak a̱son susot á̱niet khwi ji ma̱ kuzang a̱gba̱ndang a̱keang, ma̱nang n ka̱n tak ma̱ng a̱nwan a̱ni.

⁶ Za̱kwa a̱kwak a̱son á̱niet khwi jija ji, ku myim a̱ yet: a̱tyu sang a̱bun, a̱tyu a̱ byia̱ a̱byii̱k a̱nyiung a̱ni, a̱wot mman nggu na, na̱ yet á̱niet nwuak fwuo di̱ Yesu, (da̱ á̱niet ba̱ na kyiak mman nggu na nyia̱, na̱ yet á̱niet tsot wun ku a̱yaalak fwuong bah.)

⁷ A̱tyu sang a̱bun, (mat nang gu ngyet a̱tyu ba̱ng nta̱m A̱gwaza a̱ni,) a̱tyu sang gba̱p a̱pyia̱, a̱tyu nwai ngai ma̱ng á̱niet, a̱tyu nwai la̱u swuo a̱kan, a̱tyu sang a̱ka̱kpa̱t, ma̱ng a̱tyu sang shyuo kurum.

⁸ Da̱ a̱kwonu a̱kya, ku myim a̱kwak a̱son gu yet; a̱tyu saai á̱nietchen, a̱tyu chat nyia̱ a̱tan kyang, a̱tyu byia̱ a̱chuchuk a̱di̱dam, a̱tyu a̱ yet a̱tsotswat a̱ni, a̱ bu yet a̱za̱za̱rak a̱yin, ma̱ng a̱tyu ta̱bat a̱pyia̱ nggu,

⁹ ma̱ng a̱tyu ba̱ng a̱za̱za̱rak a̱lyiat A̱gwaza gi̱ngi̱ng, ma̱nang á̱ ka̱n tyiet gu a̱ni. A̱nia wa nang nggu na ntyia̱ á̱ghyang á̱niet gba̱gbak mat shei ma̱ng tyiet A̱lyiat A̱gwaza na shansham. A̱wot a̱ bu lyen tyai kpa̱sai shot kwa á̱niet ba̱ nyia̱ fi̱p ma̱ng a̱nggu, a̱wot ba̱ fwuo tyiet nggu hu a̱ni.

¹⁰ Mat á̱ mbyia̱ a̱yaalak fwuong á̱niet tyiet ma̱ a̱di̱di̱t, ma̱ng á̱niet ba̱ la̱u a̱tai a̱lyiat a̱ni, ma̱ng á̱niet laai á̱ghyang á̱niet. Sot A̱yahudawa ja swak ma̱ng a̱lyiat tyiet tyei mi̱ chen nyia̱ ku na san a̱yin a̱ni, bibya swak ma̱ng nyia̱ a̱nia hu.

¹¹ Ku yet ta hwa, á̱ gba mba ba̱ tyia̱ nywang. Mat nang ba̱ nda̱u laai á̱niet a̱ka̱sa á̱ tyei mba bwuok lilyim di̱ nwuak fwuo mba hu di̱ Kristi Yesu a̱ni. Tyiet mba hu myim bah. Ba̱ laai á̱niet ma̱ng tyiet mba hu, ba̱ ka shya̱ a̱ka̱tuk a̱fi̱ng kurum.

¹² Ma̱ng a̱nia, a̱ta̱m a̱kwonu A̱gwaza A̱ka̱ritawa a̱ghyang nyia̱, “A̱ka̱ritawa yet á̱niet bwoi a̱ka̱laa bya kuzang jen; nyam a̱yit, á̱niet a̱ka̱li̱t, ma̱ng á̱niet a̱fi̱fa lyiak.”

¹³ Kyang nang gu hyia̱ a̱ni, a̱tsak a̱lyiat wa. Tazwa a̱lyiat nani, nyi ni̱ ngai ma̱ng a̱mba mi̱ chet, da̱nian ba̱ ka mban chet da̱ a̱tsak nwuak fwuo mba hu di̱ Yesu.

¹⁴ Ba̱ yok myiai a̱fufwuo mba ba da̱ a̱tai tashikum A̱yahudawa bah, ma̱ng khwi doká á̱niet ba̱ lak khwi a̱tsatsak a̱lyiat a̱ni.

¹⁵ Kuzang kyang nang A̱gwaza mat a̱ni, yet a̱za̱za̱rak wa da̱ a̱vwuo á̱niet ba̱ byia̱ á̱za̱za̱rak nfwuo a̱ni. A̱wot á̱ byia̱ kyang hu yet a̱za̱za̱rak da̱ a̱vwuo á̱niet ba̱ byia̱ a̱ka̱tuk nfwuo, ba̱ si̱ bu nwai nwuak fwuo di̱ Yesu a̱ni bah. Da̱ a̱kwonu a̱kya, nfwuo mba na ma̱ng a̱di̱dam mba wu si̱ nkhap a̱ka̱tuk ma̱ng a̱tan zan bah.

¹⁶ Ntangka̱i á̱niet tyiet nani, shei mi̱ nunu nyia̱ ba̱ lyen A̱gwaza. A̱wot tangka̱i swat nang ba̱ swan a̱ni, tak nang ba̱ ndyen nggu bah. Ba̱ yet kyang shushyuk, á̱niet lak fwuong. Ba̱ si̱ mi̱n nyia̱ kyang tswa bah.