Nta̱m A̱yaata̱m 9 - A̠lyiat A̠gwaza na di̠n Tyap: A̠li̠ka̠uli A̠fai

Sha̱wulu Bwuak a̱ Nwuo Khwi Yesu

¹ Sha̱wulu si̱ ya a̱son ma̱ng ya̱shuk á̱niet khwi Yesu ba a̱ tsa a̱ bu chat a̱ hyaai mbaa. Huhwa a̱ si̱ nat da̱ a̱vwuo a̱gba̱ndang pris wu.

² A̱ si̱si̱ naai gu á̱ lyuut wusiká á̱ ta̱m ndyo ma̱ á̱tutu a̱tung A̱yahudawa ba̱ shya̱ ma̱ a̱keang Da̱maskut a̱ni. A̱ ku nyia̱ a̱nia, mat a̱ ka shya̱ mun a̱pyia̱ mba, a̱ ka ya̱baat á̱niet ba̱ shya̱ mami susot á̱niet khwi Yesu (nang á̱ bu ngyei ji “Vak hu” a̱ni.) A̱ si̱ chat a̱ bai ma̱ng a̱mba di̱ la̱p, á̱tyok ma̱ng á̱nyiuk, mi̱ Urusha̱lima.

³ Jen nang Sha̱wulu nshya̱ da̱ a̱chyet a̱ naat ta̱m nggu hu a̱ni, a̱ si̱ tat kpa̱mkpaan ma̱ng Da̱maskut. Ma̱nang but á̱ghyi a̱ni, sai si̱ kin neet Ma A̱gwaza tswazwa ma̱ mya̱ra̱m á̱ ba̱ tyong nggu a̱keang!

⁴ A̱ si̱ kin shot a̱kwa a̱byin. A̱ si̱ fa̱k a̱nwuat ka̱ nyia̱ ma̱ng a̱nggu, “Sha̱wulu, Sha̱wulu! Yihwa mbyia̱ nang a ngya̱shuk nung a̱nia?!”

⁵ A̱jawa Sha̱wulu si̱ lyip nyia̱, “A̱tyoli, nwan wa a̱nyan?” A̱wot a̱nwuat ka si̱ nwuak shim nyia̱, “Nung gwa gyet Yesu, a̱tyu nang a ya̱shuk a̱ni!

⁶ Ma̱ninika, doot a nwuo ma̱ a̱keang ka! A̱wot á̱ na tak ma̱ng a̱nwan kyang ku yet ta nang a na nyia̱ a̱ni.”

⁷ Á̱niet ba ba̱ chong ma̱ng Sha̱wulu a̱ni, ba̱ si̱ bwuok á̱ yong ma̱ nywang! Mat ba̱ ku fa̱k a̱nwuat a̱yin; da̱ mba ba̱ li a̱nyuu bah!

⁸ Sha̱wulu si̱ doot a̱byin ka. A̱ si̱ khwuk á̱ghyi nggu ba, a̱wot a̱ si̱ kin kwa a̱fi̱fan! Huhwa á̱kpa̱ndang a̱chyet nggu ba, si̱ ta̱bat gu di̱ mbwak. Ba̱ si̱ kwak gu á̱ si̱ nwuo ndyo Da̱maskut.

⁹ A̱ si̱ nyia̱ mam tat a̱ja nang gu si̱ mi̱n di a̱vwuo bah. Da̱ nggu, a̱ ya kyayak ku a̱ swuo a̱sa̱khwot bah.

¹⁰ A̱tyu khwi a̱ghyang ku shya̱ ma̱ a̱keang Da̱maskut ka. Á̱ si̱ ngyei nggu Ananiya. A̱tyoli Yesu si̱ lyiat ma̱ng a̱nggu ma̱ a̱ma̱bwoi. A̱ si̱ yorong guu nyia̱, “Ananiya!” Ananiya si̱ shim nyia̱, “A̱tyoli, di nung gwa wu!”

¹¹ A̱tyoli Yesu si̱ nyia̱ ma̱ng a̱nggu, “Doot a nat di̱n vak hu nang á̱ ngyei ‘A̱di̱di̱r Nvak’ wu a̱ni. A si̱ chat a̱li a̱tyu nang á̱ ngyei Yahuda a̱ni. Ka a si̱ tat a̱li ka, a lyip a̱tyu a̱keang Tasut, nang á̱ ngyei Sha̱wulu a̱ni. Ma̱ninika, a̱ shya̱ a̱ja a̱ naai nung.

¹² N wa ka̱n tak ma̱ng a̱nggu ma̱ a̱ma̱bwoi nang a̱ghyang a̱niet nchobai á̱ ngyei Ananiya. A̱ na sak nggu mbwak, da̱nian a̱ bu shya̱ nwuan a̱vwuo.”

¹³ Ananiya si̱ nyia̱, “A̱tyoli, a̱wot n ka̱n fa̱k nang á̱niet ma̱ a̱di̱di̱t bwoi nkhang a̱ka̱kpa̱t nang a̱tyu wuni ka̱n nyia̱ á̱za̱za̱rak á̱niet khwi ang ba ndyo mi̱ Urusha̱lima a̱ni!

¹⁴ A̱wot a̱cha̱chet a̱yaapris ba ka̱n nwuak gu tyok gu ka ya̱baat a̱mgba̱m á̱niet ba̱ nwuak fwuo da̱ a̱lyoot ang ka a̱ni!”

¹⁵ A̱wot A̱tyoli Yesu si̱ nyia̱ ma̱ng Ananiya, “Ma̱ninika nat, n wa ka̱n khai Sha̱wulu a̱ yet a̱tyu nta̱m nung; a̱ ka shei A̱lyiat nung na da̱ a̱vwuo Nnwap na̱ nwai yet A̱yahudawa ma̱ng á̱gwam mba ba a̱ni. Ma a̱nia wa, gu na nshei á̱niet Isi̱rela ba.

¹⁶ A̱wot n na ntak ma̱ng a̱nggu si̱sak ji nang ku ngyet ta hwa, gu swuo a̱bung da̱nian a̱lyoot nung ka a̱ni!”

¹⁷ A̱jawa Ananiya si̱ kin nat, a̱ si̱si̱ shya̱ Sha̱wulu. A̱ si̱ sak nggu mbwak, a̱ si̱ nyia̱, “Sha̱wulu, a̱na̱nyiuk nung, A̱tyoli Yesu wu a̱ ku tyai a̱pyia̱ nggu da̱ a̱vwuo ang di̱n vak hu a̱ni. Nggu wa ta̱m nung da̱ a̱vwuo ang, da̱nian a bu shya̱ nwuan a̱vwuo, a̱wot Á̱za̱za̱rak Ntswa a̱ ka tyia̱ ang chet nggu hu.”

¹⁸ Mi̱ di̱ yong a̱hwa, nkyang jhyáng nang á̱ghwughwuk a̱ni, si̱ kin ghwok neet ma̱ á̱ghyi Sha̱wulu ba! A̱ si̱ bu kin nwuo nwuan a̱vwuo na! A̱jawa gu si̱ doot, á̱ si̱ nyia̱ nggu ba̱ptisman.

¹⁹ Á̱ si̱ labeang bah, Sha̱wulu si̱ ya kyayak, a̱wot vam hu si̱ mbeang chet hu. Sha̱wulu si̱ bwuo mam ma̱ a̱da̱dei dundung ma̱ng á̱niet khwi ba Da̱maskut.

Sha̱wulu Shei A̱sham Nkhang ma̱ A̱keang Da̱maskut

²⁰ A̱wot mi̱ di̱ yong a̱hwa, Sha̱wulu si̱ kin nwuo shei A̱sham Nkhang Yesu ka ma̱ á̱tutu a̱tung A̱yahudawa ba. A̱ si̱ nyia̱, “Yesu wa yet Nggwon A̱gwaza ka za̱m!”

²¹ A̱mgba̱m á̱niet ba̱ si̱ fa̱k gu a̱ni, ku si̱ yet mba kyang a̱ga̱de hwa. Ba̱ si̱ lyip nyia̱, “A̱tyu wuni wa ku ya̱shuk á̱niet khwi Yesu ba mi̱ Urusha̱lima baa? A̱wot wá ngyei a̱ ku bai a̱ji a̱ ka ya̱baat mbaa, a̱ la̱p ba a̱ nat ma̱ng mba da̱ a̱vwuo a̱cha̱chet a̱yaapris ka baa?”

²² A̱wot Sha̱wulu si̱ mban chet di̱ shei A̱sham Nkhang ka. A̱wot A̱yahudawa ba ba̱ shya̱ Da̱maskut a̱ni, ba̱ si̱ mi̱n fwuo ta̱fwat Bulut ji nang Yesu wa ngyet Kristi, a̱tyu nang A̱gwaza kup gu tyok a̱ni bah.

Sha̱wulu Shot A̱khwu ma̱ A̱keang Da̱maskut

²³ Á̱ si̱ bwuo mam ma̱ a̱da̱dei, A̱yahudawa á̱ghyang si̱ la̱p a̱nu dundung, ba̱ chat ba̱ hyat Sha̱wulu.

²⁴ Ba̱ si̱ ta̱bat cham nggu a̱ta̱mam ma̱ng a̱tyetuk a̱zanunwuai a̱keang ka. A̱mgba̱m ma̱ng a̱nia, á̱ si̱ tak ma̱ng Sha̱wulu si̱sak nang ba̱ nkwa á̱ khwom á̱ chat hyat gu a̱ni.

²⁵ Huhwa á̱niet khwi á̱ghyang si̱ chyok ma̱ng a̱nggu ma̱ a̱gba̱ndang a̱cheang a̱tyetuk, mi̱ bwong bat a̱keang hu.

²⁶ Nang Sha̱wulu si̱ ntat Urusha̱lima a̱ni, a̱ si̱ kwan a̱ nyia̱ a̱tung ma̱ng á̱niet khwi ba a̱ja. A̱wot ba̱ si̱ fa̱k a̱wun nggu! Mat ba̱ ku nwuak a̱chuchuk nang Sha̱wulu ka̱ mbwuak a̱ si̱ nwuo khwi Yesu hu bah!

²⁷ A̱wot Ba̱nabat si̱ nat ma̱ng a̱nggu da̱ a̱vwuo a̱yaata̱m Yesu ba. A̱wot a̱ si̱ tak ma̱ng a̱mba si̱sak nang Sha̱wulu ndi A̱tyoli Yesu ma̱ng á̱ghyi di̱n vak naat Da̱maskut a̱ni; ma̱ng si̱sak nang A̱tyoli Yesu ku ndyiat ma̱ng a̱nggu a̱ni. Ba̱nabat si̱ bu tak ma̱ng mba si̱sak nang Sha̱wulu ngbang a̱lyia̱ di̱ shei A̱sham Nkhang ka mami a̱lyoot Yesu ma̱ a̱keang Da̱maskut ka a̱ni.

²⁸ Mat a̱nia, Sha̱wulu si̱ swan ndung ma̱ng a̱yaata̱m Yesu ba. A̱wot a̱ si̱ chong a̱ kat a̱keang Urusha̱lima ka ma̱ng a̱mba. A̱ si̱ gbang a̱lyia̱ di̱ shei A̱sham Nkhang mami a̱lyoot A̱tyoli Yesu.

²⁹ Sha̱wulu si̱ ya fwuang ma̱ng A̱yahudawa á̱ghyang ba̱ ku lyiat a̱lyem A̱helenawa a̱ni. A̱wot ba̱ si̱ kwan ba̱ hyat gu.

³⁰ Nang á̱niet khwi ba nfa̱k a̱nia a̱ni, ba̱ si̱ nat ma̱ng a̱nggu ma̱ a̱keang Kaisa̱riya. Ba̱ si̱si̱ swak ma̱ng a̱nggu gu á̱ nat ndyo Tasut.

³¹ Jen a̱jaja nang a̱mgba̱m susot á̱niet khwi ba, ba̱ ku shya̱ nfam bibyin Yahudiya, Ga̱lili, ma̱ng Sa̱mariya a̱ni, si̱ nshya̱ swat nyinyang. A̱wot ba̱ si̱ mban chet hu, mat á̱niet khwi ba ku byia̱ a̱wun A̱gwaza. A̱wot ma̱ng si̱sak nang A̱za̱za̱rak Ntswa wu ntyei mba gba̱gbak a̱ni, ba̱ si̱ bu mban á̱kpa ka.

Bitut Choot Iniyat

³² Di njen a̱ja, Bitut si̱ chong a̱ kat a̱mgba̱m a̱ka̱keang na. A̱ si̱ bai a̱ byiat á̱niet khwi ba̱ shya̱ ma̱ a̱keang Lida a̱ni.

³³ A̱jawa gu si̱ nshya̱ a̱tyok nang á̱ ngyei Iniyat a̱ni; nang gu ka̱n nyia̱ a̱lyia̱ a̱ni̱nai nang gu myian da̱ a̱gbaat mat ta̱luk a̱ti̱tak.

³⁴ Huhwa Bitut si̱ nyia̱ ma̱ng a̱nggu, “Iniyat, Yesu Kristi choot ang! Doot, a kuut a̱kpang myia̱ ang wu!” A̱wot mi̱ di̱ yong a̱hwa, a̱ si̱ kin choot!

³⁵ A̱wot nang a̱mgba̱m á̱niet ba ba̱ swan Lida ma̱ng Sharon ndi Iniyat gu chong a̱ kat a̱ni, ba̱ si̱ bwuak, ba̱ si̱ nwuo khwi A̱tyoli Yesu.

Bitut Ta̱ngam Dokat ma̱ng Swuan ma̱ Á̱niet ba̱ ka̱n Kwi a̱ni

³⁶ Ma̱ a̱keang Yafa, a̱byii̱k a̱ghyang ku nshya̱, a̱ si̱ yet a̱tyu khwi Yesu, á̱ si̱ ngyei nggu Ta̱bita, (a̱lyoot kani mi̱ Helenawa fa “Dokat”). A̱byii̱k wuni ku nwuak a̱pyia̱ nggu, a̱ si̱ nyia̱ á̱ghyang á̱niet a̱tan nta̱m. A̱ si̱ bu beang á̱kunak na kuzang jen.

³⁷ Mi̱ njen a̱ja, Ta̱bita si̱ nyia̱ ma̱ng zwan, a̱ si̱ khwu. Á̱ si̱ swuo kwom nggu hu da̱nian á̱ ka niat nggu. A̱wot á̱ si̱ myiai kwom gu hu mi̱ nyuo a̱mali tazwa.

³⁸ A̱wot nang á̱niet khwi ba nfa̱k nang Bitut nshya̱ kpa̱mkpaan ma̱ng Lida a̱ni; mat a̱nia, ba̱ si̱ ta̱m á̱niet a̱feang ba̱ nat ba̱ si̱ naai ngguu nyia̱, “Ma̱sa̱kut, bai ma̱ng a̱nzi̱t ma a̱nggang di̱ mi̱n byian jen!”

³⁹ Huhwa Bitut si̱ kin doot a̱ si̱ khwi mbaa. Nang gu si̱ ntat a̱ja a̱ni, ba̱ si̱ nyeak ma̱ng a̱nggu á̱ nat ndyo mi̱ nyuo hu a̱mali tazwa ka. Nang a̱mgba̱m á̱nyiuk ba nang á̱tyok ba ka̱n kwi a̱ni hyat nyuo hu tyentyang! Ba̱ si̱ yong á̱ hyia̱k kwom hu á̱ twei, á̱ shei a̱yaatoot ba nang Ta̱bita nok mba ndyo a̱ni.

⁴⁰ A̱wot Bitut si̱ tyia̱ a̱mgba̱m mba ba̱ si̱ ghwut á̱ nat nta. A̱jawa gu si̱ nkpaat a̱khwukhwut a̱byin. A̱ si̱ naai A̱gwaza. Nang gu mbwuak a̱ si̱ nwuan kwom hu a̱ni, a̱ si̱ yorong, “Ta̱bita, doot!” A̱wot Ta̱bita si̱ kin khwuk á̱ghyi nggu ba! Jen nang gu ndi Bitut a̱ni, a̱ si̱ doot a̱ swan ka̱tsak!

⁴¹ Bitut si̱ neap Ta̱bita bwak gu hu. A̱ si̱ ta̱ngam nggu ka̱tsak. A̱wot a̱ si̱ yorong á̱nyiuk ba nang á̱tyok ba ka̱n kwi a̱ni, ma̱ng a̱mgba̱m á̱niet khwi ba, a̱ si̱ neap mba Ta̱bita ma̱ng swuan.

⁴² Nkhang na si̱ kai a̱mgba̱m a̱keang Yafa ka. A̱wot á̱niet ma̱ a̱di̱di̱t si̱ nwuak fwuo da̱ A̱tyoli Yesu.

⁴³ Bitut si̱ ya nswan Yafa. A̱ si̱ nyia̱ mam ma̱ a̱di̱di̱t da̱ a̱vwuo Siman, a̱ ku nyia̱ nta̱m luk á̱kukwa na a̱ni.