Nta̱m A̱yaata̱m 8 - A̠lyiat A̠gwaza na di̠n Tyap: A̠li̠ka̠uli A̠fai

¹ A̱wot Sha̱wulu ku yet a̱tyo nyiung ma̱ á̱niet ba̱ li si̱sak nang á̱ nhyat Itifanut a̱ni. A̱wot a̱ si̱ shim a̱ si̱ li̱n a̱ma kyang nang á̱ nyia̱ a̱ni. A̱tuk a̱kya, á̱ si̱ nwuo ya̱shuk á̱niet khwi ba ba̱t mi̱ Urusha̱lima. A̱wot a̱mgba̱m á̱niet khwi ba, á̱ si̱ seang mbaa á̱ kai nfam bibyin Yahudiya ma̱ng Sa̱mariya. Ma̱ a̱yaata̱m Yesu bibya á̱ ku ghwon.

Á̱niet Khwi ba Seang mat Ya̱shuk

² (Á̱tsatsak á̱niet khwi A̱gwaza á̱ghyang si̱ bai. Ba̱ si̱ niat Itifanut. A̱wot ba̱ si̱ twei nggu ba̱t.)

³ A̱wot Sha̱wulu si̱ nwuai mi̱ kuzang a̱keang a̱ hyaai á̱niet khwi ba. A̱ si̱ nwuai ma̱ a̱ka̱sa na, a̱ kwak á̱tyok ma̱ng á̱nyiuk, a̱ tyei mba mi̱ jaru.

Filibut Shei A̱sham Nkhang ma̱ A̱keang Fam A̱byin Sa̱mariya

⁴ A̱wot á̱niet khwi ba nang á̱ ku seang a̱ni, ba̱ ku shei A̱sham Nkhang Yesu ka mi̱ kuzang a̱vwuo nang ba̱ nnat a̱ni.

⁵ Kidee, Filibut ku nat ma̱ a̱keang ka̱ shya̱ mi̱ fam a̱byin Sa̱mariya a̱ni. A̱ si̱si̱ shei á̱niet ba A̱sham Nkhang tazwa Kristi.

⁶ Á̱kpa á̱niet ka si̱ myiai a̱fufwuo á̱ fwuong Filibut. Ba̱ si̱ byia̱ di̱dang ba̱ fa̱k A̱sham Nkhang ka. Mat ba̱ bu li nkyang a̱ga̱de ma̱ng a̱ri̱bi̱di nang gu nyia̱ a̱ni!

⁷ Kidee, Filibut si̱ khai á̱ka̱tuk ntswá ba̱ ghwut ma̱ á̱niet ma̱ a̱di̱di̱t. Á̱ka̱tuk ntswá ba si̱ tyiet nkun, ba̱ si̱ ghwut ma̱ a̱mba. A̱wot á̱niet nang a̱ti̱tak ba ta̱luk, ma̱ng á̱niet ba̱ ku chong a̱kyiat a̱ni, á̱ si̱ choot mbaa.

⁸ Huhwa á̱niet ma̱ a̱keang a̱bya mi̱ fam a̱byin Sa̱mariya si̱ gwai ba̱t!

⁹ A̱ghyang a̱niet ku nshya̱ ma̱ a̱keang a̱kya mi̱ fam a̱byin Sa̱mariya. Á̱ si̱ ngyei nggu Siman. A̱ si̱ bwuo ndyia̱ ma̱ a̱di̱di̱t nang gu nyia̱ á̱niet ba la̱tong ma̱ng nkyang a̱ga̱de. A̱ si̱ kyiak a̱pyia̱ nggu nang a̱gba̱ndang a̱yin a̱ni.

¹⁰ A̱wot konyan ma̱ a̱keang ka, a̱gba̱ndang ma̱ng a̱da̱dei, si̱ myiai a̱fufwuo da̱ nggu. Ba̱ si̱ nyia̱, “A̱tyu wuni wa yet Chet A̱gwaza hu nang á̱ ngyei, ‘A̱gba̱ndang Chet’ a̱ni.”

¹¹ Á̱niet ba ku myiai a̱fufwuo ba̱t á̱ fwuong Siman. Mat a̱ ku labeang nang gu nyia̱ mba nkyang a̱ga̱de ma̱ng la̱tong nggu hu.

¹² A̱wot ma̱nini, á̱niet ba si̱ nwuak a̱chuchuk da̱ A̱sham Nkhang nang Filibut shei mba tazwa A̱lyiat Tyok A̱gwaza na ma̱ng a̱lyoot Yesu Kristi ka. Nang ku ndi a̱nia a̱ni, á̱ si̱ nyia̱ á̱tyok ma̱ng á̱nyiuk ma̱ a̱di̱di̱t ba̱ptisman.

¹³ A̱jawa Siman ma̱ a̱pyia̱ nggu si̱ nwuak a̱chuchuk. Á̱ si̱ nyia̱ nggu ba̱ptisman ji. A̱ si̱ nwuo chong dundung ma̱ng Filibut kuzang a̱vwuo nang gu naat a̱ni. A̱wot a̱ si̱ fa̱k a̱ga̱de tazwa nkyang a̱ri̱bi̱di ma̱ng nkyang a̱ga̱de nang Filibut nyia̱ a̱ni!

¹⁴ Jen nang a̱yaata̱m Yesu ba mi̱ Urusha̱lima nfa̱k nang á̱niet Sa̱mariya ba nsan a̱lyiat A̱gwaza na a̱ni; ba̱ si̱ ta̱m ma̱ng Bitut ma̱ng Yoona a̱ja.

¹⁵ Mi̱ di̱ nwuo mba hu a̱ja, ba̱ si̱ naai A̱gwaza da̱nian á̱niet khwi á̱fai ba, ba̱ ka san A̱za̱za̱rak Ntswa wu.

¹⁶ Ba̱ ku nyia̱ a̱nia, mat di̱n jen a̱ja nang A̱za̱za̱rak Ntswa wu ka̱n bai a̱ si̱ tyia̱ a̱yin ma̱ mba mi̱ chet bah; mat nang á̱ ka̱n nyia̱ mba ba̱ptisman ji da̱ a̱lyoot A̱tyoli Yesu kya.

¹⁷ A̱jawa nang Bitut ma̱ng Yoona si̱ nsaai á̱niet khwi ba mbwak di̱ naai A̱gwaza. A̱wot ba̱ si̱ san A̱za̱za̱rak Ntswa wu.

¹⁸ Nang Siman ndi nang A̱gwaza nnwuak á̱niet khwi ba A̱za̱za̱rak Ntswa wu di̱n jen nang a̱yaata̱m Yesu ba nsaai mba mbwak na a̱ni; a̱ si̱ ti̱n kurum a̱ si̱ neap Bitut ma̱ng Yoona, gu ka nsan chet a̱hwa.

¹⁹ Siman si̱ nyia̱ ma̱ng a̱mba, “Nyi lyap nung tangka̱i chet huni meang! Mat ki̱ n ni̱ nsak á̱niet mbwak, mba meang ba̱ ka san A̱za̱za̱rak Ntswa wu!”

²⁰ A̱wot Bitut si̱ nwuak Siman shim nyia̱, “Yok nwan ma̱ng kurum ang hu nyi byian! Mat a fa kurum hwa nang a na nsan za̱nang chet A̱gwaza ji!

²¹ A byia̱ a̱ka̱ta mi̱ ta̱m nzi̱t huni bah! Mat fwuo ang hu yet a̱za̱za̱rak da̱ a̱vwuo A̱gwaza bah!

²² Shyak a̱chyet, a ghwon a̱ka̱tuk nyia̱ ang wu. A̱wot a naai A̱gwaza! Shimba a̱ na chi a̱ka̱tuk a̱di̱dam ang wu.

²³ Mat n di nang fwuo ang hu nhyat ma̱ng kwi swam, a̱wot a si̱ yet a̱khwo a̱ka̱tuk nyia̱!”

²⁴ A̱jawa nang Siman nyia̱ ma̱ng Bitut ma̱ng Yoona, “Ma̱sa̱kut, nyi naai A̱gwaza da̱nian nung! Kalak nkyang nang nyi lyiat a̱ni, na̱ du shya̱ nung!”

²⁵ Nang Bitut ma̱ng Yoona ku nshei A̱sham Nkhang ka Sa̱mariya ma̱ng kyang nang ba̱ lyen tazwa A̱tyoli Yesu a̱ni; ba̱ si̱ bwuok á̱ nat Urusha̱lima. Nang ba̱ nshya̱ da̱ a̱chyet ka á̱ naat á̱ mbwuot a̱ni, ba̱ si̱ yong ma̱ a̱bachyuang a̱ka̱keang Sa̱mariya ma̱ a̱di̱di̱t, ba̱ si̱ shei A̱sham Nkhang Yesu ka.

Filibut ma̱ng A̱tyu Ha̱basha

²⁶ Di̱n jen a̱ja a̱ta̱m tswa A̱gwaza si̱ nyia̱ ma̱ng Filibut a̱ni, “Doot, a kai vak a̱tak kyai a̱yit hu, ku neet Urusha̱lima a̱ naat Gaza a̱ni!”

²⁷ Huhwa Filibut si̱ doot a̱ naat. A̱wot a̱ si̱si̱ myim ma̱ng a̱tyu Ha̱basha a̱ghyang. A̱ ku yet a̱tyu ba̱ng kurum Ha̱basha wa. Á̱ si̱ vwuong gu tyei mman. A̱ si̱ yet byia̱k a̱byii̱k a̱gwam Ha̱basha (a̱ ba̱ng a̱gba̱ndang tyok Ka̱ndakatu a̱ni). A̱tyu Ha̱basha wu ku nat Urusha̱lima, a̱ ka si̱ kyuak ntong a̱zaghyi A̱gwaza a̱ja.

²⁸ A̱wot jen nang gu nshya̱ di̱ bwuot a̱ naat a̱mali a̱ni, a̱ si̱ swan di̱ kéké ntsaaí. A̱ si̱ fang A̱lyiat A̱gwaza na mi̱ chet mi̱ ta̱ka̱da nang Ishaya a̱ta̱m a̱kwonu A̱gwaza ku lyuut a̱ni.

²⁹ Huhwa nang A̱za̱za̱rak Ntswa wu si̱ nyia̱ ma̱ng Filibut, “Nat, a si̱ chong kpa̱mkpaan ma̱ng kéké ntsaaí jini.”

³⁰ Filibut si̱ tyia̱ kwak chung, a̱ nat kpa̱mkpaan. A̱ si̱si̱ fa̱k nang a̱tyu Ha̱basha wu fang mi̱ ta̱ka̱da nang Ishaya a̱ta̱m a̱kwonu A̱gwaza wu lyuut a̱ni! Filibut si̱ lyip gu nyia̱, “A fi̱k kyang hu nang a fang a̱ni a?”

³¹ A̱jawa a̱tyu Ha̱basha wu si̱ nyia̱ ma̱ng Filibut, “A̱ji wu, n na nyia̱ ni n fi̱k, mi̱ si̱ nang a̱yin wa̱i nung dyo a?” A̱wot a̱ si̱ naai Filibut, a̱ nyeak a̱ swan ma̱ng a̱nggu tazwa kéké ntsaaí ji.

³² A̱vwuo ka nang a̱tyu Ha̱basha wu ku fang mami A̱lyiat A̱gwaza na a̱ni, kikya ka: “Á̱ ku kwak gu nang zon seap a̱ni, á̱ nat ndyo di̱n tyan fak. A̱wot nang fi̱ng a̱nfwuk ni̱ nswan nyonywang, nang á̱ kywat chat hu a̱ni, a̱ si̱ kaat kyang bah!

³³ Á̱ ku nyia̱ nggu lihyat. A̱wot á̱ si̱ lak tyia̱ nggu tsotswat. A̱nyan wa si̱ mi̱n nwuak nkhang a̱yaatyia̱ a̱khwop nggu na? Mat á̱ ku kyiak swuan nggu ji mi̱ swanta hu.”

³⁴ A̱tyu Ha̱basha wu si̱ lyip Filibut, nyia̱, “Tak ma̱ng a̱nung; a̱ta̱m a̱kwonu A̱gwaza wu lyiat tazwa a̱pyia̱ nggu kya, ke a̱ghyang a̱niet wa ma̱ zan?”

³⁵ A̱jawa Filibut si̱ tsa ma̱ng A̱lyiat A̱gwaza nang A̱tyu Ha̱basha wu fang a̱ni, a̱ si̱ wa̱i nggu A̱sham Nkhang ka tazwa Yesu.

³⁶ Nang ba̱ nshya̱ da̱ a̱chyet ka ndung a̱ni, ba̱ si̱si̱ shya̱ a̱sa̱khwot. A̱jawa a̱tyu Ha̱basha wu si̱ nyia̱ ma̱ng Filibut, “Di a̱sa̱khwot nia na! Yihwa na nvwong á̱ nyia̱ nung ba̱ptisman ji?”

³⁸ A̱tyu Ha̱basha wu si̱ tyia̱ kéké ntsaaí ji, si̱ yong. A̱mgba̱m mba a̱feang, Filibut ma̱ng a̱tyu Ha̱basha wu, ba̱ si̱ chyok á̱ nwuo ma̱ a̱sa̱khwot na. Filibut si̱ nyia̱ nggu ba̱ptisman ji.

³⁹ Jen ji nang ba̱ nghwut ma̱ a̱sa̱khwot na a̱ni, A̱za̱za̱rak Ntswa A̱gwaza wu si̱ ghwup Filibut a̱ nkat ndyo zan. A̱tyu Ha̱basha wu si̱ bu li nggu bah. A̱wot a̱ si̱ ya a̱son ma̱ng a̱chyet nggu ka, a̱ gwai ba̱t!

⁴⁰ Á̱ si̱ labeang bah, Filibut si̱ kin shya̱ a̱pyia̱ nggu ma̱ gbang mi̱ fam a̱za a̱keang nang á̱ ngyei A̱zotut a̱ni. A̱ si̱ shei A̱sham Nkhang Yesu ka a̱ja, ma̱ng kuzang a̱keang ka̱ shya̱ di̱n vak a̱ni; si̱ nang gu si̱ ntat a̱gba̱ndang a̱keang wu nang á̱ ngyei Kaisa̱riya a̱ni.