Nta̱m A̱yaata̱m 5 - A̠lyiat A̠gwaza na di̠n Tyap: A̠li̠ka̠uli A̠fai

Ananiya ma̱ng Sa̱fa̱ratu

¹ Di̱n jen a̱ja, a̱ghyang a̱niet ku nshya̱ á̱ si̱ ngyei nggu Ananiya, a̱ si̱ byia̱ a̱byii̱k nang á̱ ngyei Sa̱fa̱ratu a̱ni. Ba̱ si̱ lyap a̱byin mba ka.

² Ananiya si̱ bai ma̱ng á̱kum kurum kya da̱ a̱vwuo a̱yaata̱m Yesu ba. A̱ si̱ kyiak nyia̱ a̱mgba̱m kurum hu hwa nang gu bai ndyo. A̱ si̱ bwuo kurum ghyáng a̱ niat ma̱ng lyen a̱byii̱k nggu hu.

³ A̱jawa Bitut si̱ nyia̱ ma̱ng a̱nggu, “Ananiya, yihwa mbyia̱ nang a ghwon A̱ta̱nyeang ka si̱ swuo chet fwuo ang hu? A bwuo A̱za̱za̱rak Ntswa wu la! A si̱ bu niat á̱kum kurum nang a ndyap a̱byin ka a̱ni da̱nian a̱pyia̱ ang.

⁴ A̱byin ka yet a̱ si̱ nwan kya, a si̱ ndyap ka baa? A̱wot nang a ndyap a̱ni, kurum hu si̱ yet si̱ nwan hwa baa? Yihwa mbyia̱ a si̱ nyia̱ tangka̱i a̱di̱dam a̱hwa mi̱ fwuo ang hu? Mat a̱nia, a̱tyubishyi wa nang a bwuo nggu la hu bah. A̱gwaza wa nang a bwuo nggu la hu!”

⁵ Mi̱ di̱ yong a̱hwa, nang Ananiya nfa̱k a̱lyiat a̱nia a̱ni, a̱ si̱ kin shot a̱kwa a̱byin, a̱ si̱ khwu! A̱mgba̱m á̱niet ba, ba̱ si̱ fa̱k nkhang na a̱ni, a̱wun si̱ ta̱bat baa.

⁶ A̱jawa nfi̱ng á̱niet si̱ kin doot, ba̱ si̱ gat kwom Ananiya hu mi̱ kikyak. Ba̱ si̱ kyiak gu á̱ ghwut ndyo. Ba̱ si̱si̱ niat.

⁷ Á̱ si̱ labeang bah, Sa̱fa̱ratu a̱byii̱k nggu wu si̱ bai a̱ ba̱ nwuo. Da̱ nggu, a̱ lyen kyang hu ku shya̱ Ananiya a̱tyok nggu wu a̱ni bah.

⁸ A̱jawa Bitut si̱ lyip gu nyia̱, “Hyia̱ ma̱ nung, zang kurum jini ja nang nyin ndyap a̱byin nyin ka a?” Sa̱fa̱ratu si̱ shim, nyia̱, “Ii, zang kurum jija a̱ja.”

⁹ A̱jawa Bitut si̱ nyia̱ ma̱ng a̱nggu, “Yihwa mbyia̱ nang nwan ma̱ng a̱tyok ang wu nda̱p a̱nu; nyi mak A̱za̱za̱rak Ntswa A̱gwaza wu? Nfi̱ng á̱niet na ba̱ si̱ niat a̱tyok ang wu a̱ni; di bibya a̱zanunyuo ka! A̱wot ba̱ bu na kyiak kwom ang hu mameang á̱ ghwut ndyo!”

¹⁰ Mi̱ di̱ yong a̱hwa, Sa̱fa̱ratu si̱ kin shot a̱kwa a̱byin a̱zaghyi Bitut, a̱ si̱ khwu! Jen nang nfi̱ng á̱niet na nnwuo mi̱ nyuo hu a̱ni, ba̱ si̱ shya̱ nang gu wa ka̱n khwu. Ba̱ si̱ kyiak kwom nggu hu á̱ ghwut ndyo. Ba̱ si̱si̱ niat gu a̱ hyia̱k a̱tyok wu.

¹¹ A̱gba̱ndang a̱wun si̱ ta̱bat a̱mgba̱m á̱niet khwi ba, mbeang konyan wa a̱ fa̱k nkhang nkyang a̱ga̱de nani a̱ni!

A̱yaata̱m Yesu ba Nyia̱ Nkyang A̱ga̱de ma̱ng A̱ri̱bi̱di

¹² A̱yaata̱m Yesu ba ku nyia̱ nkyang a̱ga̱de ma̱ng a̱ri̱bi̱di ma̱ a̱di̱di̱t. A̱wot a̱mgba̱m á̱niet khwi ba si̱ yong mi̱ di̱ tung kuzang jen, mami didyaat A̱mali Nwuat Za̱nang A̱gwaza hu, mi̱ a̱junjung didyaat a̱ byia̱ a̱kup nang á̱ ngyei “Didyaat Solomon hu” a̱ni.

¹³ A̱wot á̱ ku mbyia̱ á̱niet nwai khwi Yesu ba̱ mun á̱pyia̱ ma̱ng a̱mba a̱ni bah. Mat ba̱ ku fwuong a̱wun, ku nang a̱mgba̱m á̱niet ba ku nchyin mba a̱ni.

¹⁴ A̱mgba̱m ma̱ng a̱nia, á̱niet ma̱ a̱di̱di̱t si̱ nwuak fwuo da̱ A̱tyoli Yesu, á̱ si̱ shya̱ á̱kpa á̱niet, á̱tyok ma̱ng á̱nyiuk.

¹⁵ Mat nkyang a̱ga̱de ma̱ng nkyang a̱ri̱bi̱di nang a̱yaata̱m Yesu ba ku nyia̱ a̱ni, á̱niet ma̱ a̱di̱di̱t si̱ bai ma̱ng á̱niet nzwán da̱ a̱yaagbaat ma̱ng a̱yaakpang á̱ ba̱ myiai di̱ nvak. Da̱nian ghwughwu Bitut hu ku ka choot mbaa di̱n jen nang gu nchong a̱ sweap mba a̱ni.

¹⁶ Mat a̱nia, á̱niet ma̱ a̱di̱di̱t si̱ neet ma̱ a̱ka̱keang na̱ hyia̱k Urusha̱lima a̱ni. Ba̱ si̱ bai ma̱ng á̱niet nzwán mbeang á̱niet ba̱ byia̱ á̱ka̱tuk ntswá a̱ni. A̱wot a̱mgba̱m mba, á̱ si̱ choot mbaa!

A̱yaakwak A̱son A̱yahudawa Ya̱shuk A̱yaata̱m Yesu

¹⁷ A̱jawa a̱gba̱ndang pris wu ma̱ng a̱cha̱chet A̱yahudawa á̱ghyang ba̱ ku yet A̱sa̱ndukiyawa a̱ni, ba̱ si̱ nwuo kwi swam.

¹⁸ Ba̱ si̱ ya̱baat a̱yaata̱m Yesu ba, ba̱ si̱ tyia̱ mba mi̱ jaru a̱keang ji.

¹⁹ A̱mgba̱m ma̱ng a̱nia, a̱tyetuk si̱ ba̱ nyia̱, a̱ta̱m Ntswa A̱gwaza a̱ghyang si̱ bai a̱ si̱ khwuk nyinyiit jaru hu. A̱ si̱ ghwut ma̱ng a̱mba. A̱jawa gu nyia̱ ma̱ng a̱mba a̱ni,

²⁰ “Nyi nat, nyi si̱ yong mi̱ didyaat A̱li Nwuat Za̱nang A̱gwaza hu. Nyi shei á̱niet ba nkhang swuan swai nani!”

²¹ Da̱ a̱tsotson tat ka, a̱yaata̱m ba si̱ nat A̱mali Nwuat Za̱nang A̱gwaza ka; ma̱nang á̱ ku ntak mba a̱ni. A̱wot ba̱ si̱ kin nwuo tyiet á̱niet ba. Jen ji nang a̱gba̱ndang pris wu ma̱ng á̱kpa̱ndang ta̱m nggu ba mbai a̱ni, ba̱ si̱ yorong a̱gba̱ndang a̱tung sot a̱cha̱chet A̱yahudawa ba. A̱jawa ba̱ si̱ ta̱m mi̱ jaru ji, á̱ bai ma̱ng a̱yaata̱m Yesu ba, da̱nian á̱ ka nyia̱ mba shi̱ri̱ya.

²² A̱wot jen nang á̱niet chok A̱li Nwuat Za̱nang ba nnat mi̱ jaru ji a̱ni, ba̱ si̱si̱ shya̱ nang á̱ wa ka̱n ti̱n a̱yaata̱m Yesu ba mi̱ jaru ji! Mat a̱nia, ba̱ si̱ bwuok á̱ nat á̱ si̱ hyia̱ ma̱ng á̱niet a̱tung ba, nyia̱,

²³ “Zi̱ si̱ shya̱ nang á̱ nyim jaru ji mi̱ chet! A̱wot nang á̱niet chok jaru ba yong a̱ta̱usa. A̱wot jen ji nang zi̱ nkhwuk nyinyiit jaru na a̱ni, zi̱ si̱ shya̱ a̱yin mami jaru ka bah!”

²⁴ Jen nang a̱kwak a̱son á̱niet chok A̱li Nwuat Za̱nang A̱gwaza wu, mbeang a̱cha̱chet a̱yaapris ba nfa̱k a̱nia a̱ni; ba̱ si̱ tyia̱ ma̱ a̱tai. Ba̱ si̱ byia̱ a̱fi̱fa di̱ si̱sak ji á̱ na ntyak a̱ni.

²⁵ A̱jawa a̱yin si̱ kin neet a̱ ba̱ nwuo, a̱ si̱ nyia̱ ma̱ng a̱mba “Nyi fa̱k! A̱niet ba nang nyi ku nyim mi̱ jaru ji a̱ni; di bibya yong mi̱ didyaat hu A̱mali Nwuat Za̱nang A̱gwaza ka, á̱ tyiet á̱niet ba!”

²⁶ A̱kwak a̱son á̱niet chok A̱li Nwuat Za̱nang A̱gwaza wu si̱ doot ma̱ng á̱niet nggu ba. Ba̱ si̱ nat, ba̱ si̱si̱ ya̱baat a̱yaata̱m Yesu ba. A̱wot ba̱ ku si̱ nyia̱ jhya̱ bah. Mat, ba̱ ku fwuong a̱wun kalak á̱niet ba ba̱ du mang mba ma̱ng nfang.

²⁷ A̱jawa ba̱ si̱ bai ma̱ng a̱yaata̱m Yesu ba a̱zaghyi a̱gba̱ndang a̱tung sot a̱cha̱chet A̱yahudawa wu. A̱gba̱ndang pris wu si̱ ngai ma̱ng a̱mba nyia̱,

²⁸ “Wa ngyei zi̱ ku khwat nyin a̱fufwuo nyia̱ di̱ nyi yok tyiet tazwa a̱tyu wuni baa?! A̱wot da̱ a̱kwonu a̱kya, nyi tyia̱ a̱mgba̱m á̱niet ba mi̱ Urusha̱lima ba̱ fa̱k tyiet nyin hu! A̱wot zi̱ bya nang nyi chat bat zi̱t jat a̱khwu nggu ji!”

²⁹ A̱wot Bitut ma̱ng á̱kum a̱yaata̱m Yesu ba si̱ nwuak ba shim nyia̱, “Ku yet ta hwa, zi̱ khwi kyang nang A̱gwaza tak zi̱t a̱ni. Ku lan nang zi̱ na nkhwi tyok a̱tyubishyi a̱ni.

³⁰ A̱gwaza a̱yaatyia̱ a̱khwop nzi̱t wu ku ta̱ngam Yesu ma̱ á̱niet ba̱ ka̱n kwi a̱ni, nang nyi ku nkpang nggu da̱ a̱kwon a̱khwu ka a̱ni.

³¹ A̱wot A̱gwaza si̱ sak gu da̱ a̱vwuo shi a̱zayak nggu ka, gu ka yet A̱gwam ma̱ng A̱tyusan! A̱gwaza ku nyia̱ si̱ huni, gu ka nwuak á̱niet Isi̱rela ba a̱wat ba̱ ghwon a̱ka̱tuk nyia̱ mba wu, a̱wot A̱gwaza a̱ ka chi mba a̱ka̱tuk nyia̱ wu.

³² Nzi̱t bya ku li ma̱ng á̱ghyi. Zi̱ si̱ bu yet á̱niet ba, ba̱ shei kyang hu nang A̱gwaza nyia̱ a̱ni; a̱wot ma a̱nia wa, A̱za̱za̱rak Ntswa wu nang A̱gwaza nwuak á̱niet ba ba̱ khwi á̱lyiat nggu na a̱ni.”

³³ Jen ji nang á̱niet ma̱ a̱gba̱ndang a̱tung sot a̱cha̱chet A̱yahudawa ba nfa̱k a̱nia a̱ni, ba̱ si̱ mwai lyen ba̱t. Ba̱ si̱ chat hyaai a̱yaata̱m Yesu ba.

³⁴ A̱wot a̱tyu nyiung ma̱ mba, a̱ ku yet a̱tyu A̱fa̱risawa á̱ si̱ ngyei nggu Ga̱maliyal, a̱ ku yet a̱gwak a̱tyu tyiet doka wa. A̱wot a̱mgba̱m á̱niet ba si̱ nwuat gu shi. A̱ si̱ doot a̱ yong ma̱ a̱gba̱ndang a̱tung wu. A̱ si̱ tyia̱ á̱ si̱ ya nghwut ma̱ng a̱yaata̱m ba nta.

³⁵ A̱jawa gu si̱ nyia̱ ma̱ng á̱kpa̱ndang ta̱m nggu ba, “Á̱niet Isi̱rela, nyi ta̱bam ma̱ng kyang hu nyi chat nyia̱ á̱niet bani ndyo a̱ni.

³⁶ Mi̱ jen jhyang ji̱ swak a̱ni, a̱ghyang a̱niet ku nshya̱ á̱ si̱ ngyei nggu Tudat, a̱ ku kyiak a̱pyia̱ nggu nang a̱gba̱ndang a̱yin a̱ni. A̱wot á̱niet ma̱ a̱di̱di̱t ba̱ ku tat chyi nyaai a̱ni, si̱ khwi nggu. A̱wot á̱ si̱ hyat gu. A̱wot á̱niet khwi nggu ba, konyan si̱ kai vak gu. A̱mgba̱m sot mba ji si̱ kam. Tyia̱ zat mba hu yet kyang bah.

³⁷ Ma a̱nia wa, nang a̱tyu a̱wa nswak a̱ni, di̱n jen fang á̱niet, a̱ghyang a̱niet ku nshya̱ á̱ si̱ ngyei nggu Yahuda a̱tyu Ga̱lili. A̱ ku tung sot á̱niet, ba̱ si̱ khwi ngguu. A̱wot nggu meang, á̱ si̱ hyat gu. Á̱niet khwi nggu ba si̱ seang.

³⁸ “Mat a̱nia, a̱lyiat nung ni̱nia yet. Nyi yok nyia̱ á̱niet bani kyang bah. Nyi yok ba, ba̱ nkat. Ka̱ ba vwuoi kyang huni ba̱ chat nyia̱ hu di̱ chat á̱pyia̱ mba hwa, ku na labeang bah, ku na kwa.

³⁹ A̱wot ka̱ ku neet da̱ a̱vwuo A̱gwaza kya, nyi byia̱ chet nang nyi na nvwong á̱niet bani a̱ni bah! Ka̱ nyi lyem bah, nyi na shya̱ nang nyi nyia̱ zwang ja ma̱ng A̱gwaza ma̱ a̱pyia̱ nggu!”

⁴⁰ Ba̱ si̱ shim a̱lyiat Ga̱maliyal na, ba̱ si̱ yorong a̱yaata̱m Yesu ba. Ba̱ si̱ tsot ba ma̱ng a̱ya̱u a̱ byia̱ pyipyia̱ ntswam a̱ni. Ba̱ si̱ khwat ba a̱fufwuo; nyia̱ da̱ ba̱ yok mak tyiet da̱ a̱lyoot Yesu ka bah. Ba̱ sii kai mba á̱ ghwon, ba̱ si̱ nkat.

⁴¹ A̱yaata̱m Yesu ba si̱ ghwon a̱gba̱ndang a̱tung sot a̱cha̱chet A̱yahudawa wu ma̱ng a̱gwai. Mat A̱gwaza kyiak baa, ba̱ maai ba̱ swuo a̱bung ma̱ng nsum da̱nian a̱lyoot Yesu.

⁴² A̱wot kuzang a̱tuk, ba̱ si̱ yong mi̱ di chong didyaat A̱mali Nwuat Za̱nang A̱gwaza ka. A̱wot ba̱ si̱ nwuai ma̱ a̱ka̱sa á̱niet na. Ba̱ si̱ ya a̱son ma̱ng tyiet hu, á̱ tsa á̱ bu nshei A̱sham Nkhang ka, nyia̱, “Yesu wa yet Kristi, a̱tyu nang A̱gwaza kup gu tyok a̱ni!”