Nta̱m A̱yaata̱m 4 - A̠lyiat A̠gwaza na di̠n Tyap: A̠li̠ka̠uli A̠fai

Bitut ma̱ng Yoona a̱zaghyi A̱tung Sot A̱cha̱chet A̱yahudawa

¹ Jen nang Bitut ma̱ng Yoona nshya̱ da̱ lyiat ma̱ng á̱kpa á̱niet ka a̱ni, a̱yaapris, a̱kwak a̱son á̱niet chok A̱li Nwuat Za̱nang A̱gwaza, ma̱ng A̱sa̱ndukiyawa á̱ghyang si̱ bai da̱ a̱vwuo mba.

² Ba̱ ku fa̱k a̱lyia̱ ya ba̱t nyia̱ da̱ziya nang Bitut ma̱ng Yoona ba̱ ntyiet á̱niet ba; nyia̱ a̱tsak a̱lyiat mat tyok Yesu hwa nang á̱ na nshya̱ doot ma̱ng swuan ma̱ á̱niet ba̱ ka̱n kwi a̱ni.

³ A̱jawa ba̱ si̱ kin ya̱baat Bitut ma̱ng Yoona, á̱ si̱ nyim mi̱ jaru jenshyung. Ba̱ si̱ kwai a̱ja á̱ fwuong a̱tsotson tat.

⁴ A̱wot á̱niet ma̱ a̱di̱di̱t si̱ fa̱k á̱lyiat A̱gwaza na, ba̱ si̱ nwuak a̱chuchuk da̱ ná. Mat a̱nia, á̱kpa á̱niet khwi ka si̱ mbeang á̱ tat chyikwop tsuon, kang ma̱ng á̱nyiuk ma̱ng mman!

⁵ A̱tuk mam feang ka, a̱cha̱chet a̱yaakwak a̱son A̱yahudawa ba, á̱khwukhwop á̱niet a̱keang ba, ma̱ng a̱yaagwak tyiet doká ba si̱ nyia̱ a̱gba̱ndang a̱tung sot a̱cha̱chet A̱yahudawa mi̱ Urusha̱lima.

⁶ Ba̱ si̱si̱ shya̱ Hanana, a̱ ku yet a̱gba̱ndang pris wu a̱ni, dundung ma̱ng Ka̱yafat, Yoona, ma̱ng A̱liza̱nda, mbeang á̱kum á̱niet ka ba̱ neet mi̱ kwai a̱gba̱ndang pris ji a̱ni.

⁷ Ba̱ si̱ tyia̱ á̱ nwuo ma̱ng Bitut ma̱ng Yoona ma̱ a̱tung ka. Ba̱ si̱ lyip mba, nyia̱, “Zang tyok hwa, ku a̱lyoot a̱nyan kya, nang nyi nnyia̱ kyang huni?!”

⁸ A̱jawa Bitut, nang A̱za̱za̱rak Ntswa wu a̱ tyia̱ nggu chet a̱ni, si̱ nyia̱ ma̱ng a̱mba, “Nyin a̱yaakwak a̱son ma̱ng á̱khwukhwop á̱niet nzi̱t ba,

⁹ nyi ba̱ng zi̱t a̱fwun mat shok ji nang á̱ nyia̱ a̱ta̱luk a̱ti̱tak wuni ndyo a̱ni a? Nyi chat nyi lyen si̱sak ji nang á̱ nchoot gu a̱ni a?

¹⁰ A̱tsak a̱lyiat, yok n tak ma̱ng a̱nyin ma̱ng a̱mgba̱m á̱niet Isi̱rela ba; á̱ choot guu ma̱ng chet a̱lyoot Yesu Kristi A̱tyu Na̱za̱ra̱t hwa! A̱tyu wuni wa nang nyi ku kpang da̱ a̱team a̱khwu wu. A̱wot A̱gwaza si̱ ta̱ngam nggu ma̱ng swuan ma̱ á̱niet ba̱ ka̱n kwi a̱ni.

¹¹ “Yesu wa nang A̱lyiat A̱gwaza na fa, na̱ nyia̱, ‘A̱fang nok ka nang nyin á̱niet nok ba ku lak a̱ni; ma̱ninika, kikya yet a̱tsak a̱fang a̱ta̱m kuntyin nok wu!’

¹² “Yesu wa ma̱nyin gu maai a̱ san á̱niet swanta ba! Ma a̱nia wa, á̱ bu byia̱ a̱lyoot á̱ghyang nang A̱gwaza nwuak mi̱ swanta hu nang á̱niet ba na yorong ba̱ ka nshya̱ san a̱ni bah!”

¹³ Nang a̱cha̱chet á̱niet a̱tung ba ndi gbang a̱lyia̱ Bitut ma̱ng Yoona a̱ni, ba̱ si̱ fa̱k a̱ga̱de! Mat ba̱ ku fi̱k nang a̱yaata̱m ba ngyet a̱ka̱wa̱i á̱niet bya, ba̱ bu sang a̱tsatsak tyiet a̱ni. Ba̱ si̱ bu fi̱k nang ba̱ ngyet á̱niet bya ba̱ ka̱n swan dundung ma̱ng Yesu a̱ni.

¹⁴ A̱mgba̱m ma̱ng a̱nia, á̱niet a̱gba̱ndang a̱tung ba si̱ kaat kyang bah. Mat ba̱ ku li a̱tyu nang á̱ choot a̱ni, nang gu yong dundung ma̱ng Bitut ma̱ng Yoona.

¹⁵ Huhwa ba̱ si̱ ti̱n Bitut ma̱ng Yoona, á̱ ghwut ndyo mi̱ tutu a̱tung hu. Nang ba̱ nghwut a̱ni, sot a̱cha̱chet A̱yahudawa ji si̱ ta̱bat a̱chyuang tsi̱tsak mba.

¹⁶ Ba̱ si̱ nyia̱, “Yihwa zi̱ na nyia̱ ma̱ng á̱niet bani? A̱mgba̱m á̱niet ba ba̱ shya̱ Urusha̱lima a̱ni lyen, nang bibya nyia̱ a̱gba̱ndang a̱lama a̱ tyei á̱niet ba ba̱ fa̱k a̱ga̱de a̱ni. A̱wot da̱ nzi̱t, zi̱ byia̱ vak fwuo a̱lama wuni bah.

¹⁷ A̱wot ka̱ zi̱ chat zi̱ vwuong nkhang mba na na̱ kai a̱vwuo ka, ku yet ta hwa zi̱ gba mba, zi̱ khwat ba a̱fufwuo; ba̱ bu yok mak lyiat, ku ba̱ tyiet a̱yin da̱ a̱lyoot kani bah.”

¹⁸ A̱jawa ba̱ si̱ bu ngyorong a̱yaata̱m ba. Ba̱ si̱ tak ma̱ng a̱mba nyia̱, ba̱ yok mak mi̱ mak ba̱ lyiat ku ba̱ tyiet á̱niet da̱ a̱lyoot Yesu ka bah.

¹⁹ A̱wot Bitut ma̱ng Yoona si̱ nyia̱ ma̱ng a̱mba, “Nyin ma̱ á̱pyia̱ nyin, nyi zop nyi li kyang ku yet a̱sham da̱ a̱vwuo A̱gwaza a̱ni! Nyi fa A̱gwaza chat zi̱ khwi á̱lyiat nyin na, zi̱ ghwon á̱si̱ nggu ni̱nia kee?

²⁰ Zi̱ si̱ mi̱n tyia̱ nywang tazwa kyang nang zi̱ fa̱k, zi̱ si̱ bu li a̱ni bah.”

²¹ A̱jawa sot a̱cha̱chet a̱gba̱ndang a̱tung A̱yahudawa ji si̱ bu mbeang khwat a̱yaata̱m ba a̱fufwuo mi̱ chet! Di̱ ngaan hu, ba̱ si̱ kai mba á̱ ghwon, ba̱ si̱ nkat. Mat a̱cha̱chet a̱gba̱ndang a̱tung ba ku lyin si̱sak nang ba̱ na ntyia̱ mba swuo a̱bung a̱ni; mat ka̱ ba̱ nyia̱ a̱nia, á̱niet ba na doot jhya̱. Mat konyan ku dyep A̱gwaza,

²² da̱nian a̱yaata̱m ba ku shei a̱gba̱ndang a̱lama a̱ tyei á̱niet ba ba̱ fa̱k a̱ga̱de; di̱ si̱sak nang ba̱ ku nchoot a̱ta̱luk a̱ti̱tak a̱ ku nyia̱ a̱lyia̱ swak naai ma̱ng kyang a̱ni.

Á̱niet Khwi Naai A̱gwaza gu Nang mba Gbang A̱lyia̱

²³ Nang á̱ nkai Bitut ma̱ng Yoona á̱ ghwon a̱ni, ba̱ si̱ bwuok á̱ nat da̱ a̱vwuo sot á̱niet khwi ji. A̱wot ba̱ si̱si̱ tak ma̱ng a̱mba kyang hu nang a̱yaakwak a̱son pris ba, ma̱ng á̱niet khwop á̱niet a̱gba̱ndang a̱tung ba lyiat ma̱ng a̱mba a̱ni.

²⁴ Nang sot á̱niet khwi ji nfa̱k a̱nia a̱ni, a̱mgba̱m ba si̱ ta̱ngam nwunwuat mba hu di̱ naai A̱gwaza ma̱ng a̱lyia̱ a̱nyiung, nyia̱, “Nwan A̱gwaza a byia̱ a̱mgba̱m tyok a̱ni, nwan wa mat kyai tswazwa hu ma̱ng a̱byin ka, kyai a̱sa̱khwot hu, ma̱ng a̱mgba̱m kuzang nkyang na̱ shya̱ ma̱ ná a̱ni!

²⁵ Gbangbang, A̱za̱za̱rak Ntswa wu wa ku tyia̱ a̱khwo ang wu Da̱wuda, a̱tyia̱ a̱khwop nzi̱t wu, si̱ nyia̱, ‘Yihwa mbyia̱ Nnwap na̱ nwai yet A̱yahudawa a̱ni na nvwuot jhya̱ ji? Yihwa mbyia̱ á̱niet swanta ba nvwuoi á̱ saai da̱ a̱tai nkyang?

²⁶ Á̱gwam swanta ba si̱ la̱p vam ba̱ ka nyia̱ zwang. A̱wot a̱yaakwak a̱son ba si̱ mun á̱pyia̱ dundung ma̱ng á̱ghyang; ba̱ ka lak li A̱gwaza ma̱ng Kristi, a̱tyu nang A̱gwaza khai a̱ si̱ kup gu tyok a̱ni!’

²⁷ A̱tsak a̱lyiat wa za̱m; nkyang nani nia bai ma̱ a̱keang kani! Mat a̱gwam Hiridut Antibat ma̱ng gwomna Buntut Bilatut ku mun á̱pyia̱ ma̱ng á̱kum nnwap ka, ma̱ng á̱niet Isi̱rela ba, mat ba̱ lak li Yesu Kristi; a̱ yet A̱za̱za̱rak A̱khwo ang wu, a̱tyu nang nwan wa kup gu tyok a̱ni.

²⁸ A̱wot kuzang nkyang nang ba̱ ku nyia̱ a̱ni, na̱ ku nat cha̱chaat ma̱ng kyang nang a ku mi̱ nshim, a si̱ la̱p sak ma̱ng chet ang hu a̱ni!

²⁹ A̱wot ma̱ninika, A̱gwaza nzi̱t wu, nwuan si̱sak ji nang á̱niet lak li nzi̱t ba nkwan á̱ vwuong nzi̱t a̱ni! Ma̱sa̱kut, nang nzi̱t á̱khwo ang ba gbang a̱lyia̱ di̱ shei a̱lyiat ang na!

³⁰ Tak a̱gba̱ndang chet ang wu a tyia̱ zi̱ choot á̱niet nzwán, zi̱ bu nyia̱ nkyang a̱ga̱de ma̱ng a̱ri̱bi̱di mami chet a̱lyoot Yesu, a̱ yet A̱za̱za̱rak A̱khwo ang wu a̱ni!”

³¹ Nang ba̱ ntyak naai A̱gwaza hu a̱ni, tutu hu nang ba̱ ntung a̱ni, si̱ tyi̱ri̱m ku si̱ tyia̱ ma̱ zunzung a̱nzung! A̱za̱za̱rak Ntswa wu si̱ tyia̱ mba chet. A̱wot ba̱ si̱ ta̱bat shei á̱lyiat A̱gwaza na ma̱ng gbang a̱lyia̱.

Á̱niet Khwi Yesu Ka̱u Zwá nang ba̱ Byia̱ a̱ni Dundung

³² A̱mgba̱m sot á̱niet khwi Yesu ji ku byia̱ a̱nu a̱nyiung ma̱ng fwuo nyiung. Á̱ si̱ mbyia̱ a̱tyo nyiung ma̱ mba a̱ ku kyiak zwá nang gu byia̱ a̱ni; ji̱ yet si̱ nggu ja ma̱nyin nggu bah. Mat a̱nia, ba̱ si̱ ka̱u a̱mgba̱m zwá nang ba̱ byia̱ a̱ni dundung.

³³ A̱wot a̱yaata̱m Yesu ba si̱ ya a̱son ma̱ng shei mi̱ chet nang A̱tyoli Yesu ndoot ma̱ á̱niet ba̱ ka̱n kwi a̱ni! A̱wot A̱gwaza si̱ nyia̱ a̱mgba̱m mba a̱gba̱ndang shok.

³⁴ A̱mgba̱m mba mi̱ sot á̱niet khwi ji, á̱ ku mbyia̱ a̱tyo nyiung ma̱ mba a̱ ku sang zwá a̱ni bah. Mat á̱niet byia̱ bibyin, ma̱ng á̱niet byia̱ a̱ka̱sa, ba̱ ku lyiai nkyang a̱nia.

³⁵ Ba̱ si̱ bai ma̱ng kurum hu da̱ a̱vwuo a̱yaata̱m Yesu, ba̱ ka ka̱u á̱niet khwi á̱ghyang ba̱ sang a̱ni.

³⁶ Kidee, a̱ghyang a̱niet ku nshya̱, a̱ si̱ yet a̱ta̱m Yesu. Á̱ si̱ ngyei nggu Isuu. A̱ ku neet mi̱ kwai A̱la̱wiyawa ja, á̱ si̱ byin ngguu ma̱ a̱byin a̱ka̱wa̱tyia̱ a̱sa̱khwot nang á̱ ngyei Kuburut a̱ni. A̱yaata̱m Yesu ba ku tyia̱ nggu a̱lyoot nggan. Ba̱ si̱ ngyei nggu “Ba̱nabat.” (A̱lyoot kani fa, “A̱tyu tyei nfwuo á̱niet gba̱gbak.”)

³⁷ Ba̱nabat ku lyap a̱byin nggu á̱ghyang, a̱ si̱ bai ma̱ng kurum hu, a̱ ba̱ nwuak á̱kum a̱yaata̱m Yesu ka, ba̱ ka ka̱u á̱niet khwi á̱ghyang.