Nta̱m A̱yaata̱m 25 - A̠lyiat A̠gwaza na di̠n Tyap: A̠li̠ka̠uli A̠fai

Á̱ Nat ma̱ng Bulut a̱zaghyi Gwomna Festut

¹ Nang Festut nsan tyok yet gwomna hu a̱ni, a̱ si̱ nyia̱ mam tat. A̱ sii doot Kaisa̱riya a̱ nat Urusha̱lima.

² A̱ja wa a̱cha̱chet pris ba, mbeang a̱yaakwak a̱son A̱yahudawa ba, ba̱ si̱ bai a̱zaghyi gwomna Festut, ba̱ ka bat Bulut a̱hyiak.

³ Ba̱ si̱ naai gwomna Festut gu nyia̱ mba shok a̱ shai Bulut a̱ nat ndyo Urusha̱lima. (Mat ba̱ ku la̱p á̱ sak, ba̱ myia̱ Bulut a̱bwu mi̱ njhyuai ba̱ ka hyat gu).

⁴ A̱wot gwomna Festut si̱ nwuak ba shim nyia̱; Bulut shya̱ di̱ nyim ma̱ a̱keang Kaisa̱riya, a̱wot á̱ na labeang bah, nggu Festut na bwuok a̱ nat a̱ja.

⁵ Huhwa, gwomna Festut si̱ nyia̱, “Nyi tyia̱ a̱yaakwak a̱son nyin ba, ba̱ nat Kaisa̱riya ji dundung ma̱ng a̱nung. Ka̱ Bulut bwuo nyin a̱bun, nyi si̱ bat gu a̱hyiak na a̱ja.”

⁶ Gwomna Festut si̱ nyia̱ mam a̱ni̱nai si̱ nat swak, dundung ma̱ng A̱yahudawa ba ma̱ a̱keang Urusha̱lima ka. A̱ sii du bwuok a̱ nat a̱keang Kaisa̱riya ka. Da̱ a̱tsotson tat ka, a̱ si̱ swan di̱ kyang swat nggu hu mi̱ tutu shi̱ri̱ya hu. A̱wot a̱ sii tyia̱ á̱ si̱ nwuo ma̱ng Bulut a̱zaghyi nggu.

⁷ Jen nang Bulut mbai a̱zaghyi gwomna Festut a̱ni, a̱yaakwak a̱son A̱yahudawa ba ba̱ ku neet Urusha̱lima a̱ni, si̱ doot á̱ yong á̱ tyong nggu á̱ keang. Ba̱ si̱ ta̱bat bat Bulut a̱hyiak ma̱ a̱di̱di̱t na̱ byia̱ chet a̱ni. Da̱ mba, ba̱ byia̱ a̱tsak a̱lyiat bah.

⁸ A̱jawa, Bulut si̱ fwuo a̱hyiak nang A̱yahudawa ba bat gu a̱ni. A̱ si̱ nyia̱, “N bwuo a̱bun di̱ nwai khwi doka A̱yahudawa bah, ku A̱li Nwuat Za̱nang A̱gwaza, ku tyok a̱byin A̱romawa hu!”

⁹ A̱jawa gwomna Festut mameang si̱ chat a̱ fa̱k shok A̱yahudawa ba. Huhwa gu si̱ nyia̱ ma̱ng Bulut, “A na shim a nat Urusha̱lima, n si̱ nzop a̱lyiat ang na a̱ja a?”

¹⁰ A̱wot Bulut si̱ nwuak gu shim nyia̱, “Kaai! Tutu shi̱ri̱ya huni yet a̱si̱ A̱romawa hwa. Mat a̱nia, ku myim á̱ zop a̱lyiat nung na a̱ji wa. A lyen chi̱k nang n bwuo A̱yahudawa ba a̱bun bah.

¹¹ Ki̱ n wa nyia̱ kyang ku maai á̱ hyat nung a̱ni, si̱ n na ndak á̱ hyat nung bah. A̱wot ki̱ n byia̱ a̱bun bah, á̱ mbyia̱ a̱tyu a̱ maai a̱ tyia̱ nung mbwak á̱niet bani ba̱ hyat nung a̱ni bah. N chat n naai a̱gwam shan Kaisar, a̱ bu zop a̱lyiat nung na!”

¹² Huhwa gwomna Festut si̱ ya ndyiat ma̱ng á̱niet a̱tung gu ba da̱ a̱beam. A̱ sii nwuak Bulut shim, nyia̱, “Ku yet a̱sham ba̱t! Nwan Bulut, a naai á̱ nat ma̱ng a̱nwan da̱ a̱vwuo Kaisar. A̱wot da̱ a̱vwuo Kaisar kya á̱ na nnat ma̱ng a̱nwan!”

Gwomna Festut Lyiat ma̱ng A̱gwam A̱ga̱riba tazwa Bulut

¹³ A̱ si̱ bwuo mam ma̱ a̱da̱dei, A̱gwam A̱ga̱riba si̱ bai Kaisa̱riya mbeang Ba̱rniki, a̱na̱nyiuk a̱nap nggu wu, ba̱ ka byiat gwomna Festut.

¹⁴ Nang ba̱ mbwuo mam ma̱ a̱di̱di̱t a̱ja a̱ni, gwomna Festut si̱ bwuo A̱gwam A̱ga̱riba nkhang Bulut na. Gwomna Festut si̱ nyia̱, “A̱yin wa shya̱ a̱ji mi̱ jaru, nang gwomna Filikut ku tyia̱ shi̱ri̱ya gu ji mbwak nung a̱ni.

¹⁵ A̱wot nang n ku nshya̱ mi̱ Urusha̱lima a̱ni, a̱cha̱chet pris ba mbeang á̱niet khwop á̱niet A̱yahudawa ba, si̱ ta̱bat bat Bulut a̱hyiak. Ba̱ si̱ naai nung, nyia̱ n tyia̱ á̱ hyat gu.

¹⁶ A̱wot n si̱ nyia̱ ma̱ng a̱mba doka A̱romawa ji shim á̱ la̱p a̱yin di̱ mi̱n zop gu bah. Ku yet ta hwa, á̱ nwuak a̱nyuu jen gu lyiat ma̱ng á̱niet ba ba̱ bat gu a̱hyiak na a̱ni, a̱ghyi ma̱ng a̱ghyi, gu tak ma̱ng a̱mba ta̱fwat gu ji.

¹⁷ “Jen nang á̱niet ba̱ bat Bulut a̱hyiak na mbai ba̱ fa̱k á̱lyiat na a̱ni, n si̱ mbyian jen bah. Da̱ a̱tsotson tat ka, n si̱ nswan di̱ kyang swat zop a̱lyiat nung hu. N si̱ tyia̱ á̱ bai ma̱ng Bulut a̱zaghyi nung.

¹⁸ A̱wot a̱hyiak nang ba̱ bat Bulut a̱ni, na̱ ku yet a̱ka̱tuk nang n fa na̱ ngyet a̱ni bah.

¹⁹ Da̱ a̱kwonu a̱kya, na̱ ku yet a̱lyiat nia tazwa khwi A̱gwaza mba wu, ma̱ng a̱tyu a̱ ka̱n khwu nang á̱ ngyei Yesu a̱ni, a̱wot Bulut si̱ yong mi̱ chet nyia̱ Yesu ni̱ shya̱ a̱chet.

²⁰ “Nang n ku ndyen si̱sak ji nang n na nzop á̱lyiat na n shya̱ a̱tsatsak a̱lyiat wu a̱ni bah; huhwa si̱ mbyia̱ n si̱ ndyip Bulut ka̱ a̱ na shim a̱ nat Urusha̱lima, á̱ si̱ zop a̱lyiat nggu na a̱ja.

²¹ A̱wot Bulut si̱ chat a̱ nat ma̱ng shi̱ri̱ya gu ji a̱zaghyi Kaisar a̱gwam shan. Huhwa si̱ mbyia̱ n si̱ ntyia̱ á̱ chok gu, ba̱ng si̱ nat jen ji nang n na nta̱m ma̱ng a̱nggu da̱ a̱vwuo a̱gwam shan Kaisar ka a̱ni.”

²² A̱jawa a̱gwam A̱ga̱riba si̱ nyia̱ ma̱ng gwomna Festut, “Nung mameang, n na chat n fa̱k á̱lyiat Bulut na ma̱ng a̱fufwuo nung ba.” A̱wot gwomna Festut si̱ nyia̱ ma̱ng a̱gwam A̱ga̱riba, “Bulut wu bai a̱tson, a fa̱k a̱lyiat gu na!”

²³ Da̱ a̱tsotson tat ka, a̱gwam A̱ga̱riba ma̱ng Ba̱rniki si̱ ghwut ma̱ng shi tyok. Ba̱ si̱ nwuo ma̱ a̱gba̱ndang tutu a̱tung wu dundung ma̱ng a̱cha̱chet a̱yaakwak a̱son á̱niet nzwang, ma̱ng a̱cha̱chet á̱niet a̱keang ba. Gwomna Festut si̱ tyia̱ á̱ si̱ bai ma̱ng Bulut mami tutu a̱tung hu.

²⁴ A̱jawa gwomna Festut si̱ nyia̱, “A̱gwam A̱ga̱riba ma̱ng a̱mgba̱m á̱niet ba ba̱ shya̱ a̱ji a̱ni, a̱tyu wuni wa nang a̱mgba̱m A̱yahudawa ba ba̱ shya̱ a̱ji a̱ni, ma̱ng á̱si̱ ba ba̱ shya̱ Urusha̱lima a̱ni, chat á̱ hyat.

²⁵ A̱wot di̱ li nung hu, Bulut bwuo a̱bun a̱ maai á̱ hyat gu a̱ni bah. A̱mgba̱m ma̱ng a̱nia, nang nggu wa ma̱ a̱pyia̱ nggu nchat á̱ nat ma̱ng a̱lyiat nggu na da̱ a̱vwuo Kaisar a̱gwam shan wu a̱ni; huhwa n si̱ nshim n ta̱m ma̱ng a̱nggu Rom.

²⁶ “A̱wot yihwa n na ndyuut tazwa Bulut, n ta̱m ma̱ng Kaisar a̱gwam shan wu ndyo? Mat n shya̱ a̱tsatsak kyang nang A̱yahudawa ba mbat Bulut a̱hyiak na a̱ni bah. Huhwa mbyia̱, n si̱ mbai ma̱ng a̱nggu a̱ji, gu lyiat a̱zaghyi a̱mgba̱m nyin, a̱wot ma̱ng a̱nwan a̱gwam A̱ga̱riba. Da̱nian ki̱ zi̱ zop á̱lyiat gu na tyak, shimba n ka shya̱ a̱hyiak na n na ndyuut tazwa nggu a̱ni.

²⁷ Mat ku yet a̱sham bah, n ta̱m ma̱ng a̱khwo da̱ a̱vwuo a̱gba̱ndang a̱gwam shan wu; da̱ nung, n tak kpa̱sai a̱hyiak nang á̱ mbat gu a̱ni bah!”