Nta̱m A̱yaata̱m 10 - A̠lyiat A̠gwaza na di̠n Tyap: A̠li̠ka̠uli A̠fai

Ka̱rna̱liyut Ta̱m á̱ Yorong Bitut

¹ Ma̱ a̱keang Kaisa̱riya, á̱ ku byia̱ a̱kwak a̱son sot á̱niet nzwang A̱romawa, á̱ si̱ ngyei nggu Ka̱rna̱liyut. A̱ ku yet a̱gba̱ndang wa, a̱ ba̱ng sot á̱niet nzwang chyi nang á̱ ngyei “Sot Á̱niet Nzwang Italiya” a̱ni.

² A̱ si̱ yet a̱tyu kwok ntong a̱zaghyi A̱gwaza, a̱ si̱ bu yet a̱tyu fwuong a̱wun A̱gwaza; ma a̱nia wa a̱mgba̱m kyang mbwak gu hu. A̱ ku kwan ba̱t, a̱ si̱ nwuat kurum za̱nang shansham, a̱ si̱ beang á̱kunak, a̱ si̱ bu naai A̱gwaza kuzang jen.

³ A̱ghyang a̱tuk, chobai tswam tsat a̱ta̱mam, á̱ si̱ tak gu ma̱ a̱ma̱bwoi! A̱ si̱ li a̱ta̱m tswa A̱gwaza nang gu chobai da̱ a̱vwuo nggu! A̱ta̱m tswa A̱gwaza wu si̱ yorong ngguu nyia̱, “Ka̱rna̱liyut!”

⁴ Ka̱rna̱liyut si̱ fa̱k a̱wun ba̱t, a̱ si̱ sak á̱ghyi da̱ a̱ta̱m tswa A̱gwaza wu. Ka̱rna̱liyut si̱ lyip a̱ta̱m tswa A̱gwaza wu nyia̱, “A̱tyoli, yihwa hwa bai?” A̱jawa a̱ta̱m tswa A̱gwaza wu si̱ nyia̱ ma̱ng Ka̱rna̱liyut, “A̱gwaza fa̱k naai ang hu. A̱wot za̱náng nang a ka̱u á̱kunak na a̱ni, A̱gwaza san ji nang sa̱da̱ka a̱ni!

⁵ Ma̱ninika, ta̱m á̱ghyang á̱niet ba̱ nat a̱keang Yafa, ba̱ si̱ yei a̱ghyang a̱niet nang á̱ ngyei Siman, a̱wot á̱ bu ngyei nggu Bitut a̱ni.

⁶ A̱ yet a̱nietchen a̱mali a̱tyu luk á̱kukwa, nang á̱ ngyei Siman mameang, a̱ swan kpa̱mkpaan ma̱ng kyai a̱sa̱khwot a̱ni.”

⁷ Nang a̱ta̱m tswa A̱gwaza wu ndyiat a̱ tyak a̱ si̱ nkat a̱ni, Ka̱rna̱liyut si̱ yorong á̱khwo nggu a̱feang, ma̱ng a̱tyu nzwang a̱nyiung ka̱ kwok A̱gwaza ntong a̱ni. Ka̱ bu ku yet a̱tyo nyiung mi̱ á̱niet nzwang ba̱ beang nggu nta̱m na a̱ni.

⁸ Ka̱rna̱liyut si̱ hyia̱ ma̱ng mba kyang hu nang a̱ta̱m tswa A̱gwaza wu tak ma̱ng a̱nggu a̱ni. A̱wot a̱ sii du ta̱m ba, ba̱ si̱ nat Yafa.

⁹ Da̱ a̱tsotson tat ka, nang a̱yaata̱m Ka̱rna̱liyut ba nshim tat Yafa a̱ni, Bitut si̱ nyeak a̱ nat a̱mali tazwa da̱ a̱kup nyuo wu a̱ta̱mam, da̱nian gu ka naai A̱gwaza a̱ja.

¹⁰ A̱wot jen a̱ja nang Bitut fwuong zong, nang á̱ shya̱ di̱ wan nggu kyayak, a̱ si̱ nwuo a̱ma̱bwoi!

¹¹ A̱ si̱ li nang kyai tswazwa hu khwuk! A̱wot kyang ghyang si̱ ghwut, ku li kpa̱kpai nang a̱toot khwi wun a̱ni; á̱ ngyei á̱ ba̱ng hu di̱ pyipyia̱ naai á̱ chorop á̱ chobai ndyo a̱byin.

¹² Mami a̱kpa̱kpai a̱toot wu, á̱ ku mbyia̱ ntangka̱i a̱na̱ndyung nyam a̱yit ma̱ a̱di̱di̱t; nkyang kwang a̱byin, mbeang a̱ka̱man a̱yit.

¹³ A̱jawa Bitut si̱ fa̱k a̱nwuat ka̱ nyia̱ ma̱ng a̱nggu, “Bitut doot yong! A fak nyam jini, a yaa!”

¹⁴ Bitut si̱ nyia̱, “Kaai, A̱tyoli, n ka̱n mak ya kyang nang doka A̱yahudawa nzi̱t ji kyiak ku yet a̱shi̱shi̱k, ku na tyia̱ nung a̱na̱ndyung a̱ni bah!”

¹⁵ A̱wot a̱nwuat ka si̱ bu lyiat ma̱ng Bitut nyia̱, “Yok yorong kyang hu nang A̱gwaza mat ku yet a̱za̱za̱rak a̱ni, nyia̱ ku byia̱ a̱na̱ndyung bah!”

¹⁶ Á̱ ku tak Bitut a̱ma̱bwoi wuni á̱ bwuo a̱ka̱tat. Á̱ sii du khwat a̱kpa̱kpai a̱toot wu ma̱ng nyam ji, á̱ nat ndyo kyai tswazwa.

¹⁷ Jen nang Bitut nshya̱ ma̱ a̱di̱dam di̱ kyang hu nang a̱ma̱bwoi wuni fa a̱ni; jen a̱ja ja nang a̱yaata̱m mba nang Ka̱rna̱liyut ta̱m a̱ni, si̱ nshya̱ a̱li Siman a̱tyu luk á̱kukwa ka! Nang ba̱ yong a̱zanunwuai a̱li Siman ka,

¹⁸ ba̱ si̱ byiat baa. Ba̱ si̱ lyip nyia̱, “A̱nietchen shya̱ a̱ji nang á̱ ngyei Siman Bitut a̱ni a?”

¹⁹ Ma̱ cha̱chaat njen a̱wa nang Bitut ni̱ shya̱ di̱ kwan a̱ fi̱k kyang hu nang a̱ma̱bwoi wu fa a̱ni; jen a̱jaja nang A̱za̱za̱rak Ntswa wu si̱ nyia̱ ma̱ng a̱nggu, “Di la, á̱niet a̱tat bya bai ba̱ chat li ang!

²⁰ Doot a̱nggang, a chyok nat a̱byin. A̱wot a nat ma̱ng a̱mba. A yok but mi̱ fwuo bah. Yok nyia̱ a̱fi̱fa bah, mat nung gwa ta̱m mba da̱ a̱vwuo ang.”

²¹ Huhwa Bitut si̱ kin chyok a̱ nat a̱byin. A̱ si̱ nyia̱ ma̱ng a̱mba, “Di̱ nung gwa wu! Nung gwa gyet a̱tyu nang nyi chat li hu a̱ni. Nyi bai ma̱ shansham a?”

²² A̱jawa a̱yaata̱m Ka̱rna̱liyut ba si̱ nwuak Bitut shim nyia̱, “Ka̱rna̱liyut, a̱ yet a̱kwak a̱son á̱niet nzwang A̱romawa wu a̱ni; nggu wa ta̱m nzi̱t da̱ a̱vwuo ang. A̱ yet a̱tyu kwok ntong a̱zaghyi A̱gwaza. A̱ si̱ bu fwuong a̱wun gu. A̱wot a̱mgba̱m A̱yahudawa ba chyin guu. A̱za̱za̱rak a̱ta̱m tswa A̱gwaza wa ku tak ma̱ng a̱nggu, nyia̱ gu yorong ang a bai a̱mali nggu ka, da̱nian gu ka fa̱k a̱lyiat nang a byia̱ na hyia̱ ma̱ng a̱nggu a̱ni.”

²³ A̱jawa Bitut si̱ kin tyia̱ a̱yaata̱m Ka̱rna̱liyut ba si̱ kwai ma̱ng a̱nggu. Da̱ a̱tsotson tat ka, Bitut si̱ nat ndung ma̱ng mba, mbeang á̱niet khwi á̱ghyang ba̱ ku shya̱ ma̱ Yafa a̱ni.

²⁴ A̱tuk mam feang ka, Bitut ma̱ng a̱yaata̱m ba si̱ nwuo ma̱ a̱keang Kaisa̱riya ka. Ba̱ si̱ shya̱ nang Ka̱rna̱liyut swan a̱ fwuong mbaa, nang gu ka̱n gyorong a̱mgba̱m kyang bwak gu hu, mbeang á̱gi̱ngi̱ng á̱kpa̱ndang nggu á̱ghyang.

²⁵ Jen ji nang Bitut nnwuo a̱mali Ka̱rna̱liyut ka a̱ni, Ka̱rna̱liyut si̱ kin tyia̱ bwop a̱byin, a̱ si̱ kyuak ntong a̱zaghyi Bitut!

²⁶ A̱jawa, Bitut si̱ ta̱ngam nggu ka̱tsak, a̱ si̱ nyia̱ ma̱ng nggu, “Doot, yong! Mat nung ngyet a̱tyubishyi wa ma̱nang a̱nwan a̱ni!”

²⁷ Huhwa Bitut si̱ lyiat ma̱ng Ka̱rna̱liyut. A̱wot ba̱ si̱ nwuo mami a̱li ka. Ba̱ si̱si̱ shya̱ nang á̱ghyang á̱niet ma̱ a̱di̱di̱t tung á̱ fwuong Bitut.

²⁸ Bitut si̱ tak ma̱ng a̱mba, nyia̱, “Nyin, nyi lyen nang ku ndi kang mi̱ doká nzi̱t ji, a̱tyu A̱yahudawa a̱ nwuo a̱mali a̱tyu nwai yet A̱yahudawa nang a̱si̱ ka a̱ni; ku a̱ mun a̱pyia̱ ma̱ng a̱nyin. A̱wot a̱mgba̱m ma̱ng a̱nia, A̱gwaza tak nung, di̱ n gyok kyiak a̱yin a̱ yet a̱shi̱shi̱k, ku a̱ byia̱ a̱na̱ndyung bah.

²⁹ Mat a̱nia, nang n fa̱k ta̱m ang ji nyia̱ n mbai a̱ni, n si̱ mbut mi̱ fwuo bah. Ma̱ninika, tak ma̱ng a̱nung kyang hu nang a ngyei nung a̱ji a̱ni.”

³⁰ Ka̱rna̱liyut si̱ nyia̱ ma̱ng Bitut, “Mam naai hwa hu a̱fwun, n ku nshya̱ di̱ naai A̱gwaza a̱gbang nung, nang jen ji yet tswam tsat a̱ta̱mam. Ma̱nang but á̱ghyi a̱ni, n si̱ kin di a̱yin nang gu kup a̱mya̱myat a̱yaatoot, a̱ yong a̱zaghyi nung!

³¹ “A̱nyuu si̱ nyia̱ ma̱ng a̱nung, ‘Ka̱rna̱liyut, A̱gwaza wa ka̱n fa̱k naai ang hu! A̱wot za̱náng ang ji nang a mbeang á̱kunak na a̱ni; A̱gwaza fa̱k nyinyang ang da̱ nji ba̱t.

³² Ma̱ninika, ta̱m a̱yaata̱m ba̱ nat a̱keang Yafa, ba̱ si̱ yorong a̱tyu nang á̱ ngyei Siman Bitut a̱ni. A̱ yet a̱nietchen wa di yong huni a̱mali a̱ghyang a̱niet nang á̱ bu ngyei Siman mameang, a̱ yet a̱tyu luk á̱kukwa wa a̱ni. A̱li nggu ka shya̱ da̱ a̱beam kyai a̱sa̱khwot.’

³³ “Mat a̱nia, mi̱ di̱ yong a̱hwa n si̱ kin ta̱m á̱ yorong ang a bai. A̱wot a nyia̱ shansham nang a mbai a̱ni. Ma̱ninika, zi̱ tung a̱ji a̱mgba̱m nzi̱t, zi̱ fwuong a̱zaghyi A̱gwaza, zi̱ ka fa̱k a̱lyiat nang A̱tyoli Yesu ta̱m ang a tak zi̱t a̱ni.”

Bitut Shei Nnwap na̱ nwai yet A̱yahudawa a̱ni A̱sham Nkhang

³⁴ A̱jawa Bitut si̱ nwuak gu shim nyia̱, “Di̱ yong huni, n fi̱k da̱ nang A̱gwaza nkhai á̱niet da̱ á̱ghyi bah.

³⁵ Mi̱ kuzang nwap, A̱gwaza ni̱ san á̱niet ba̱ fwuong a̱wun nggu, a̱wot ba̱ si̱ nyia̱ tsotswat a̱ni.

³⁶ Nyi lyen ta̱m jini ja yet A̱sham Nkhang ka da̱nian á̱niet Isi̱rela ba; nyia̱ á̱ shyat swat nyinyang ma̱ng A̱gwaza mat mun á̱pyia̱ ma̱ng Yesu Kristi. Nggu wa yet A̱tyoli a̱mgba̱m á̱nietbishyi.

³⁷ “Nyi bu lyen kyang hu ku bai ma̱ a̱mgba̱m fam a̱byin Yahudiya hu a̱ni; á̱ ku tsa neet mi̱ fam a̱byin Ga̱lili, nang Yoona ku ntsa shei a̱lyiat ba̱ptisman nggu na a̱ni.

³⁸ A̱wot nyi bu lyen nang A̱gwaza nkup Yesu a̱tyu Na̱za̱ra̱t tyok, a̱ si̱ bu nang nggu chet A̱za̱za̱rak Ntswa. A̱jawa Yesu si̱ chong a̱ kat a̱ nyia̱ a̱tan nta̱m ma̱ng choot a̱mgba̱m á̱niet nang á̱ka̱tuk ntswá nyia̱ tyok A̱ta̱nyeang da̱ mba a̱ni. Mat A̱gwaza ku shya̱ ndung ma̱ng a̱nggu.

³⁹ “A̱wot nzi̱t a̱yaata̱m Yesu ba, zi̱ yet á̱niet ba̱ ku li a̱mgba̱m nkyang nang gu ku nyia̱ ma̱ a̱byin Yahudiya ka ma̱ng Urusha̱lima ma̱ng á̱ghyi nzi̱t ba a̱ni. Ba̱ si̱ hyat gu di̱ si̱sak nang ba̱ ku nkpang nggu da̱ a̱kwon a̱ni.

⁴⁰ A̱wot a̱mgba̱m ma̱ng a̱nia, A̱gwaza si̱ ta̱ngam nggu ma̱ng swuan ma̱ á̱niet ba̱ ka̱n kwi a̱ni a̱tuk mam tat ka. A̱wot A̱gwaza si̱ shim Yesu a̱ tyai a̱pyia̱ nggu,

⁴¹ da̱ a̱vwuo á̱kpa á̱niet kya ma̱nyin mba bah; a̱wot da̱ a̱vwuo nzi̱t kya nang A̱gwaza ku mi̱ nkhai zi̱ yet á̱ghyi nggu ba. Nzi̱t bya ku yet á̱niet ba̱ ku ya á̱ tsa nswuo dundung ma̱ng Yesu di̱n jen nang gu ku ndoot ma̱ á̱niet ba̱ ka̱n kwi a̱ni.

⁴² “A̱ si̱ tyia̱ nzi̱t ta̱m shei A̱sham Nkhang hu mi̱ kuzang a̱vwuo. A̱wot zi̱ tak kpa̱sai nang Yesu wa nang A̱gwaza nkup gu tyok, gu ka nyia̱ a̱mgba̱m á̱niet mi̱ swanta ba shi̱ri̱ya; á̱niet ba̱ swuan a̱ni, ma̱ng á̱si̱ ba̱ ka̱n kwi a̱ni.

⁴³ Yesu wa nang a̱mgba̱m a̱yaata̱m a̱kwonu A̱gwaza ba ku tak kpa̱sai tazwa nggu nyia̱; kuzang a̱yin wa nwuak fwuo da̱ a̱nggu, á̱ na chi a̱ka̱tuk nyia̱ nggu wu, mami chet a̱lyoot Yesu hu.”

Á̱ Nang Nnwap na̱ nwai yet A̱yahudawa a̱ni Za̱nang Chet A̱za̱za̱rak Ntswa

⁴⁴ Di̱n jen nang Bitut ni̱ shya̱ di̱ shei á̱niet ba A̱sham Nkhang ka a̱ni, A̱za̱za̱rak Ntswa wu si̱ kin chyok tazwa a̱mgba̱m á̱niet ba̱ myiai a̱fufwuo á̱ fwuong a̱lyiat nggu na a̱ni!

⁴⁵ A̱yahudawa ba, ba̱ ku yet á̱niet khwi ba ba̱ ku chong ndung ma̱ng Bitut neet ma̱ a̱keang Yafa ka a̱ni; ba̱ si̱ fa̱k a̱ga̱de mat A̱gwaza nang Nnwap na̱ nwai yet A̱yahudawa a̱ni za̱nang chet A̱za̱za̱rak Ntswa ji mameang!

⁴⁶ Mat nang ba̱ ku nfa̱k nang á̱niet ba lyiat di̱ lilyem A̱za̱za̱rak Ntswa nang ba̱ mi̱ ndyen a̱ni bah! A̱wot ba̱ si̱ dyep A̱gwaza. A̱jawa Bitut si̱ lyip nyia̱,

⁴⁷ “Ka̱ doot a̱yin á̱ nvwuong nyia̱ á̱niet bani ba̱ptisman ma̱ninika, nang ba̱ nsan A̱za̱za̱rak Ntswa ma̱nang zi̱ ku nsan a̱ni a?”

⁴⁸ A̱jawa Bitut si̱ kin tyia̱ á̱ si̱ nyia̱ mba ba̱ptisman mami a̱lyoot Yesu Kristi. Nang si̱ a̱hwa nswak a̱ni, Ka̱rna̱liyut si̱ naai Bitut gu bwuo mmam nang gu swan ma̱ng mba.