Matyu 4 - A̠lyiat A̠gwaza na di̠n Tyap: A̠li̠ka̠uli A̠fai

A̱ta̱nyeang Mak Yesu

¹ A̱wot A̱za̱za̱rak Ntswa wu si̱ nat ma̱ng Yesu mi̱ tswa a̱yit da̱nian A̱ta̱nyeang ka, ka̱ ka mak gu a̱ja.

² A̱wot Yesu si̱ swan a̱fa a̱khwot mam swak naai, a̱ta̱mam ma̱ng a̱tyetuk, nang gu naai A̱gwaza. A̱wot zong si̱ ta̱bat gu ba̱t.

³ Di̱n jen a̱ja, A̱ta̱nyeang ka si̱ bai da̱ a̱vwuo Yesu, ka̱ si̱ nyia̱, “Ka̱nang a yet Nggwon A̱gwaza kya chi̱k, tyia̱ nfang nani na̱ bwuak á̱ tyia̱ burodi, a yaa.”

⁴ Yesu si̱ nwuak A̱ta̱nyeang ka shim nyia̱, “Kaai! Á̱ lyuut ma̱ A̱lyiat A̱gwaza na nyia̱, ‘Mi̱ nkyayak hwa ma̱nyin hu nang a̱tyubishyi na ya a̱ nswuan bah. A̱wot ma̱ng kuzang swang a̱lyiat ja ji̱ ghwut a̱bwonu A̱gwaza a̱ni, nang a̱tyubishyi na nswuan.’ ”

⁵ A̱jawa A̱ta̱nyeang ka si̱ kyiak Yesu a̱ nat ndyo Urusha̱lima, a̱ yet a̱za̱za̱rak a̱keang wu a̱ni. Ka̱ si̱ sak Yesu da̱ a̱ga̱nga̱ng a̱ta̱n A̱li Nwuat Za̱nang A̱gwaza wu.

⁶ A̱ta̱nyeang ka si̱ nyia̱ ma̱ng Yesu, “Ka̱ nwan wa yet nggwon A̱gwaza ka chi̱k, fi̱p kwa a̱byin! Mat á̱ lyuut ma̱ A̱lyiat A̱gwaza na nyia̱, ‘A̱gwaza na tyia̱ a̱yaata̱m tswá nggu ba, ba̱ chok ang. A̱wot ba̱ na fwun ang ma̱ng mbwak mba na, kalak a du kwa a lwi tak ang da̱ a̱fang.’ ”

⁷ Yesu si̱ bu nwuak ka shim, nyia̱, “Kaai, á̱ lyuut ma̱ A̱lyiat A̱gwaza na nyia̱, ‘Yok mak mi̱ mak a mak A̱tyoli a̱ yet A̱gwaza ang a̱ni bah.’ ”

⁸ Si̱ a̱hwa si̱ swak, A̱ta̱nyeang ka si̱ bu nat ma̱ng Yesu da̱ a̱ta̱n a̱tsatsak a̱ga̱nga̱ng a̱fan. Ka̱ si̱ kin shei nggu ntyok swanta na ma̱ng shyit na nhu.

⁹ A̱ta̱nyeang ka si̱ nyia̱, “N na nang ang a̱mgba̱m ntyok nani, ka a shim a si̱ kpaat a̱khwukhwut, a si̱ kyuak nung ntong.”

¹⁰ Yesu si̱ bu nyia̱ ma̱ng A̱ta̱nyeang ka, “Sha̱tan, doot a̱ji a ghwon nung, mat á̱ lyuut ma̱ A̱lyiat A̱gwaza na nyia̱, ‘Ku yet ta hwa a kyuak ntong a̱zaghyi A̱tyoli a̱ yet A̱gwaza ang a̱ni. A̱wot nggu wa a bu nyia̱ nggu ta̱m ma̱nyin nggu.’ ”

¹¹ A̱jawa A̱ta̱nyeang ka si̱ doot a̱ nkat, ka̱ si̱ ghwon Yesu. A̱wot a̱yaata̱m tswá A̱gwaza ba si̱ bai, ba̱ si̱ beang ngguu.

Yesu Nwuo Ta̱m Shei A̱lyiat A̱gwaza

¹² Nang Yesu nfa̱k á̱ ta̱bat Yoona a̱tyu nyia̱ ba̱ptisman á̱ tyia̱ mi̱ jaru a̱ni, a̱ si̱ ghwon fam a̱byin Yahudiya, a̱ si̱ bwuok a̱ nat fam a̱byin Ga̱lili.

¹³ Yesu ku ya nnat a̱keang Na̱za̱ra̱t. Nang gu nghwon Na̱za̱ra̱t hu a̱ni, a̱ si̱ bwuok ma̱ng swat hu a̱ nat ndyo ma̱ a̱keang Ka̱fanahum, ka̱ hyia̱k gak a̱gba̱ndang jok Ga̱lili wu a̱ni, mi̱ nfam bibyin nkwaí Za̱bulun ma̱ng Na̱fi̱ta̱li.

¹⁴ Si̱ huni bai ma̱ cha̱chaat da̱ a̱nu ka ma̱ng shei á̱zanson nang Ishaya a̱ta̱m a̱kwonu A̱gwaza wu ku shei a̱ni, nyia̱,

¹⁵ “Mi̱ bibyin nkwaí Za̱bulun, ma̱ng Na̱fi̱ta̱li, da̱ a̱beam a̱gba̱ndang jok, a̱ma̱nyi a̱ghyui Urdun, mi̱ nfam a̱byin Ga̱lili, a̱vwuo nang nnwap na̱ chyi A̱gwaza ma̱ a̱di̱di̱t nshya̱ a̱ni;

¹⁶ á̱niet ba̱ swan mi̱ ndyin a̱ni, ba̱ si̱ li a̱gba̱ndang sai. A̱wot á̱niet ba̱ swan ma̱ a̱ghwaghwu a̱khwu a̱ni, sai A̱gwaza si̱ bai da̱ mba.”

¹⁷ Kyiak neet di̱n jen a̱ja, Yesu si̱ nwuo shei a̱lyiat A̱gwaza na, a̱ si̱ nyia̱, “Nyi ghwon a̱ka̱tuk nyia̱ nyin wu! Nyi bwuok bai da̱ a̱vwuo A̱gwaza, mat Tyok Ma A̱gwaza tswazwa hu bai kpa̱mkpaan!”

Yesu Tsa Yei Mman Nta̱m A̱naai ba̱ Khwi nggu

¹⁸ Á̱ghyang á̱tuk nang Yesu chong a̱ sweap di̱n khwong a̱gba̱ndang jok Ga̱lili, a̱ si̱ li á̱niet a̱feang ba̱ yet á̱na̱nyiuk á̱ghyang bya. Nang ba̱ shya̱ di̱ khwot á̱ka̱li, mat ta̱m mba hu yet ta̱m bwoi fa̱n hwa. A̱tyo nyiung ma̱ mba á̱ ku ngyei nggu Siman, á̱ si̱ bu ngyei nggu Bitut, ma̱ng Anda̱rawut a̱na̱nyiuk nggu wu.

¹⁹ Yesu si̱ yorong mba nyia̱, “Nyi bai nyi khwi nung. A̱wot n na ntyiet nyin si̱sak nyi na nya̱baat á̱niet chong ndyo da̱ a̱vwuo nung, ma̱nang nyi mbwoi fa̱n hu a̱ni!”

²⁰ Huhwa ba̱ si̱ kin ghwon á̱ka̱li mba na kiki, ba̱ si̱ nwuo khwi Yesu.

²¹ Nang Yesu nghwon baa, a̱ si̱ shyei a̱ nat a̱zanson ma̱ a̱da̱dei a̱ni. A̱ si̱ bu li á̱na̱nyiuk a̱feang á̱ghyang, Yakubu ma̱ng Yoona nang ba̱ swan mami kukwon a̱wak á̱ jhyi á̱ka̱li mba na ma̱ng Za̱ba̱di a̱tyia̱ mba wu. A̱ si̱ yorong ba mameang ba̱ khwi ngguu.

²² Á̱na̱nyiuk a̱bya si̱ ghwon kukwon a̱wak hu ma̱ng a̱tyia̱ mba wu mi̱ di̱ yong a̱hwa. Ba̱ si̱ kin nwuo khwi Yesu.

Á̱kpa Á̱niet ma̱ a̱di̱di̱t Khwi Yesu

²³ Yesu si̱ nwuai a̱ kat a̱mgba̱m fam a̱byin Ga̱lili hu. A̱ si̱ tyiet ma̱ á̱tutu a̱tung A̱yahudawa, a̱ bu shei á̱niet ba A̱sham Nkhang Tyok A̱gwaza ka. A̱ si̱ tsa a̱ nchoot á̱niet ba̱ nyia̱ ma̱ng kuzang tangka̱i nzwan a̱ni.

²⁴ Nkhang Yesu na si̱ ba̱ng a̱ nat ma̱ gbang, a̱ si̱ tat fam a̱byin Suriya! Á̱ si̱ labeang bah, á̱ si̱ bai ma̱ng a̱nggu a̱mgba̱m á̱niet ba̱ nyia̱ ma̱ng nzwan a̱ni. A̱wot kuzang tangka̱i nzwan ku nyia̱ mba a̱ni, ku ba̱ byia̱ a̱ka̱tuk ntswa, ku á̱niet kwi long chen, ku á̱niet ta̱luk nkap; a̱mgba̱m ba, Yesu si̱ choot baa.

²⁵ Á̱kpa á̱niet á̱ghyang ma̱ a̱di̱di̱t si̱ khwi nggu á̱ nat kuzang a̱vwuo. Á̱niet si̱ neet ma̱ a̱keang Urusha̱lima, ma̱ng nfam bibyin Ga̱lili, Dikafolit, ma̱ng a̱mgba̱m fam a̱byin Yahudiya, ma̱ng á̱niet nfam bibyin a̱ma̱nyi a̱ghyui Urdun ka.