Matyu 19 - A̠lyiat A̠gwaza na di̠n Tyap: A̠li̠ka̠uli A̠fai

Yesu Tyiet tazwa Swat Nyeang ma̱ng Tyat Nyeang

¹ Nang Yesu ntyak a̱mgba̱m tyiet huni mi̱ fam a̱byin Ga̱lili hu a̱ni, a̱ si̱ nat mi̱ nfam bibyin Yahudiya, ku shya̱ a̱tyin a̱ma̱nyi a̱ghyui Urdun a̱ni.

² Susot á̱kpa á̱niet ma̱ a̱di̱di̱t si̱ khwi ngguu. A̱ si̱ choot á̱niet nzwán ba ma̱ mba.

³ A̱fa̱risawa á̱ghyang si̱ bai da̱ a̱vwuo Yesu, ba̱ ka mak gu. Ba̱ si̱ lyip gu nyia̱, “Doka ji shim a̱tyok a̱ tyat nyeang ma̱ng a̱byii̱k nggu wu di̱ kuzang tangka̱i ta̱fwat a?”

⁴ Yesu si̱ nwuak ba shim nyia̱, “Nyi ka̱n fang ma̱ A̱lyiat A̱gwaza na baa? Neet di̱n tsa swanta hu, ‘A̱gwaza mat mba a̱feang, a̱tyok ma̱ng a̱byii̱k wa.’

⁵ A̱ si̱ bu nyia̱, ‘Huhwa mbyia̱, a̱tyok na ghwon á̱niet mbyin nggu, a̱ ta̱meet da̱ a̱kyuo nggu. A̱wot a̱mgba̱m mba a̱feang ba̱ na mun á̱pyia̱, ba̱ li nang a̱tyo nyiung a̱ni.’

⁶ Mat ba̱ bu li nang á̱niet a̱feang bya a̱ni bah. A̱wot ba̱ li nang a̱tyo nyiung a̱ni da̱ a̱vwuo A̱gwaza. Huhwa mbyia̱, nyeang nang A̱gwaza ka̱n da̱p a̱ni, a̱tyubishyi gu yok tyat hu bah!”

⁷ A̱fa̱risawa ba si̱ bu lyip Yesu nyia̱, “Ka̱ a̱nia wa, yihwa mbyia̱ nang Musa ku nshim mami doka ji; a̱tyok a̱ lyuut wusika tyat nyeang, a̱wot a̱ nwuak a̱kyuo nggu wu, a̱wot a̱ ti̱n gu a̱ nkat?”

⁸ Yesu si̱ nwuak ba shim nyia̱, “Mat lak fwuong nyin hwa mbyia̱ Musa si̱ nghwon nyin, nyi tyat nyeang ma̱ng á̱nyiuk nyin ba. A̱wot neet di̱ tsa swanta hu, a̱nia wa A̱gwaza ku nda̱p a̱ sak bah!

⁹ N tak nyin, kuzang a̱tyok wa tyat nyeang ma̱ng a̱kyuo nggu, da̱nang á̱ ta̱bat a̱byii̱k wu di̱ katnaan nia bah, a̱wot a̱ si̱ bwuo a̱byii̱k a̱ghyang, a̱ katnaan nia.”

¹⁰ Mman ta̱m na si̱ nyia̱ ma̱ng Yesu, “Ka̱ a̱nia wa nang swat nyeang hu ndi, ku na lan a̱yin a̱ swan di̱ mi̱n nyeang!”

¹¹ Yesu si̱ nyia̱ ma̱ng a̱mba, “Kuzang a̱yin wa byia̱ chet san tyiet huni bah, si̱ á̱niet ba nang A̱gwaza wa nwuak ba chet hu a̱ni.

¹² Mat á̱ nyia̱ á̱ghyang á̱niet neet di̱ mbyin ba̱ nyia̱ nyeang bah. Á̱ghyang á̱niet, á̱niet bya tyei mba nwai nyia̱ nyeang hu. A̱wot á̱ghyang á̱niet si̱ khai ba̱ nyia̱ nyeang bah, da̱nian Tyok Ma A̱gwaza tswazwa hu. A̱tyu a̱ byia̱ chet san tyiet huni a̱ni, gu san.”

Yesu Tyia̱ A̱chyuang Mman A̱li̱ba̱rka

¹³ Á̱ghyang á̱tuk, á̱niet mbyin á̱ghyang si̱ bai ma̱ng Yesu a̱chyuang mman mba, gu ka byiam baa, a̱ bu naai A̱gwaza da̱nian mbaa. A̱wot mman ta̱m Yesu na si̱ kam mbaa, ba̱ yok tyei gu dyem bah.

¹⁴ Yesu si̱ nyia̱ ma̱ng mman ta̱m nggu na, “Nyi yok a̱chyuang mman wu ba̱ bai da̱ a̱vwuo nung. Nyi yok vwuong ba bah! Mat Tyok Ma A̱gwaza tswazwa hu yet si̱ tangka̱i á̱niet ba̱ kyiak á̱pyia̱ mba nang a̱chyuang mman wuni a̱ni.”

¹⁵ A̱wot nang Yesu mbyiam mba á̱pyia̱, a̱ si̱ bu nang mba a̱tan a̱nu a̱ni, a̱ si̱ doot a̱ja.

Fi̱ng A̱tyu Byia̱ Zwa

¹⁶ Fi̱ng a̱tyok a̱ghyang si̱ bai a̱ ba̱ lyip Yesu nyia̱, “A̱tan A̱tyu tyiet, zang a̱tan nta̱m wa n na nyia̱ n ka shya̱ swuan sang sangba̱p ji?”

¹⁷ Yesu si̱ nyia̱ ma̱ng a̱nggu, “Yihwa mbyia̱ a ndyi̱ri̱m nung tazwa ta̱m ku yet a̱tan a̱ni? Ma̱ a̱tyu a̱nyiung wa nshya̱ a̱ yet a̱tan wu. Ka̱ a chat a shya̱ swuan sang sangba̱p ji, khwi doka A̱gwaza ji.”

¹⁸ Fi̱ng a̱tyok hu si̱ lyip gu, nyia̱, “Zang doka ja?” Yesu si̱ nyia̱, “ ‘Yok hyat a̱yin bah, yok katnaan, yok tsang, a̱wot yok shyi shyishyi a̱ka̱laa tazwa a̱yin.

¹⁹ Nwuak a̱tyia̱ ang ma̱ng a̱yang ang wu shi. Ku yet ta hwa, a chat a̱kpa̱ndang swat ang wu ma̱nang a nchat a̱pyia̱ ang a̱ni.’ ”

²⁰ Fi̱ng a̱tyok hu si̱ nyia̱, “Doká jini, n wa ka̱n khwi nji a̱mgba̱m. Yihwa nang n mbwat nyia̱ hu?”

²¹ Yesu si̱ nyia̱ ma̱ng a̱nggu, “Ka̱ a chat a yet a̱tyu sang a̱bun, nat a si̱ lyap a̱mgba̱m nkyang nang a byia̱ a̱ni, a ka̱u á̱kunak kurum nhu. A̱wot a na shya̱ zwá jhyáng tswazwa kya, a sii bai a khwi nung.”

²² A̱wot nang fi̱ng a̱tyok hu nfa̱k a̱nia a̱ni, a̱ si̱ doot, a̱ si̱ nkat ma̱ng fwuo byian. Mat a̱ ku byia̱ zwá gba̱mgbam.

²³ A̱wot Yesu si̱ nyia̱ mi̱ mman ta̱m nggu na, “N tak ma̱ng a̱nyin a̱tsak a̱lyiat, ku na vwuo a̱khwu ba̱t, á̱niet nzwá ba̱ shya̱ nwuo Tyok Ma A̱gwaza tswazwa hu.

²⁴ N bu shei nyin, ku na laai lan a̱lakumi a̱ nwuo a̱ kaat a̱ ghwut mi̱ zwua̱i a̱yop, nang a̱tyu nzwá na nnwuo mi̱ Tyok A̱gwaza hu a̱ni.”

²⁵ Nang mman ta̱m na nfa̱k a̱nia a̱ni, ba̱ si̱ tyia̱ ma̱ tai. Ba̱ si̱ lyip nyia̱, “Mi̱ ka̱ a̱nia wa, a̱nyan wa maai a̱ shya̱ nwuo mi̱ Tyok A̱gwaza hu?”

²⁶ Yesu si̱ nwuan ba di̱di̱r, a̱ si̱ nyia̱, “Ki̱ chet a̱tyubishyi hwa, a̱tyu nzwá na shya̱ nwuo Tyok A̱gwaza hu bah. A̱wot chet A̱gwaza hu byia̱ gak bah.”

²⁷ A̱jawa Bitut si̱ nyia̱ ma̱ng Yesu, “Di la! Nzi̱t, zi̱ ghwon kuzang kyang, zi̱ ka khwi ang! Yihwa zi̱ na shya̱?”

²⁸ Yesu si̱ nwuak ba shim nyia̱, “N tak nyin a̱tsak a̱lyiat, mi̱ che chobai hu, nang Nggwon A̱tyubishyi na nswan da̱ a̱gba̱ndang chuk tyok nka hu a̱ni; nyin meang nyi khwi nung a̱ni, nyi na swan da̱ a̱cha̱chet nchuk ntyok swak ma̱ a̱feang, nyi nyia̱ tyok dundung ma̱ng a̱nung tazwa kwai swak ma̱ a̱feang Isi̱rela ji.

²⁹ Konyan wa ghwon a̱ka̱sa, á̱na̱nyiuk á̱nap ku á̱sam, a̱yaayang ku a̱yaatyia̱, mman ku bibyin khap da̱nian a̱lyoot nung ka a̱ni, a̱ na shya̱ zang gba̱mgbam ji̱ tat a̱ka̱nchyi ji̱ si̱ swak nkyang nang nggu nwai a̱ni. A̱wot a̱ bu shya̱ swuan sang sangba̱p ji.

³⁰ A̱wot á̱niet ma̱ a̱di̱di̱t nang á̱ kyiak ba̱ yet a̱cha̱chet ba ma̱nini a̱ni, bibya á̱ na kyiak ba̱ yet a̱chyuang á̱niet di̱n jen chobai ji. Ma a̱nia wa, á̱niet nang á̱ kyiak ba a̱chyuang á̱niet ma̱nini a̱ni, bibya á̱ na kyiak ba̱ yet a̱cha̱chet á̱niet ba di̱n jen chobai ji.”