Luka 18 - A̠lyiat A̠gwaza na di̠n Tyap: A̠li̠ka̠uli A̠fai

Kidee Tyia̱ A̱lyia̱ di̱ Naai A̱gwaza Nchi̱ri̱ng

¹ Á̱ghyang á̱tuk, Yesu si̱ lyiat ma̱ng mman ta̱m nggu na di̱ kidee nang ku myim ba̱ naai A̱gwaza nchi̱ri̱ng, ba̱ yok but mi̱ nfwuo bah.

² A̱ si̱ nyia̱, “A̱tyu shi̱ri̱ya a̱ghyang ku nshya̱ ma̱ a̱keang á̱ghyang. A̱ si̱ fwuong a̱wun A̱gwaza bah. Ma̱ da̱ nggu a̱ fwuong shok á̱nietbishyi bah.

³ A̱byii̱k a̱ghyang nang a̱tyok wu ka̱n khwu a̱ni, si̱ nshya̱ ma̱ a̱keang a̱kya. Kuzang jen, a̱ ni̱ ghwut a̱ chong a̱ naai a̱tyu shi̱ri̱ya wu nyia̱, ‘Ma̱sa̱kut a̱tyoli, nyia̱ nung shi̱ri̱ya tsotswat tazwa a̱tyu lak li nung, nang zi̱ ya fwuang ma̱ng a̱nggu a̱ni.’

⁴ “A̱wot a̱tyu shi̱ri̱ya wu si̱ kyiak a̱junjung jen nang gu nwuan a̱byii̱k wu gbi̱t. Di̱ ngaan hu, a̱ si̱ dam mi̱ fwuo nggu hu nyia̱, ‘Nung, n fwuong a̱wun A̱gwaza bah. Ma̱ da̱ nung, n dam ma̱ng a̱tyubishyi bah.

⁵ A̱mgba̱m ma̱ng a̱nia, mat nang a̱byii̱k wuni nchong a̱ shyui nung a̱fufwuo kuzang jen a̱ni; n na mbeang nggu n nyia̱ nggu shi̱ri̱ya ji tsotswat. Kalak a̱byii̱k wuni na tyia̱ nung van ba̱t ma̱ng naai nchi̱ri̱ng nggu hu!’ ”

⁶ A̱jawa A̱tyoli Yesu si̱ nyia̱ ma̱ng mman ta̱m nggu na, “Nyi myiam da̱ a̱di̱dam nang a̱tyu shi̱ri̱ya nwai nyia̱ tsotswat wuni nyia̱ a̱ni!

⁷ Ka̱ tangka̱i a̱tyu shi̱ri̱ya nwai nyia̱ tsotswat wuni fa̱k, a̱ si̱ shim a̱ beang a̱byii̱k a̱ naai gu a̱ni; ku fa A̱gwaza na nyia̱ shi̱ri̱ya nggu ji tsotswat tazwa á̱niet nggu ba nang gu khai a̱ni, ba̱ naai nggu a̱ta̱mam ma̱ng a̱tyetuk a̱ni baa? A̱gwaza na kyiak jen nang gu nnwuan á̱niet nggu ba gbi̱t a?

⁸ Yok n tak ma̱ng a̱nyin, a̱tsak a̱lyiat, A̱gwaza na beang mbaa a̱ nyia̱ mba shi̱ri̱ya ji tsotswat ma a̱nggang! A̱mgba̱m ma̱ng a̱nia, jen nang Nggwon A̱tyubishyi na mbwuok a̱ bai mi̱ swanta hu a̱ni; á̱niet a̱mang bya nang gu na shya̱ nang ba̱ nwuak fwuo da̱ nggu?”

Kidee tazwa A̱tyu A̱fa̱risawa ma̱ng A̱tyu Saai Kurum Ga̱ndu

⁹ A̱jawa Yesu si̱ bu lyiat ma̱ng a̱mba di̱ kidee jhyang tazwa tangka̱i á̱niet ba̱ kyiak á̱pyia̱ mba nang á̱tsotswat á̱niet a̱ni; a̱wot ba̱ nyia̱ a̱di̱dam A̱gwaza kyiak á̱kum á̱niet ka nang á̱tsotswat a̱ni bah. Yesu si̱ bu nyia̱,

¹⁰ “Á̱niet a̱feang nat naai A̱mali Nwuat Za̱nang A̱gwaza. A̱tyo nyiung ku yet a̱tyu A̱fa̱risawa. A̱wot a̱tyo nyiung wu si̱ yet a̱tyu saai kurum ga̱ndu nang á̱ jhyuai a̱ni.

¹¹ A̱tyu A̱fa̱risawa wu si̱ khap a̱ yong zan. A̱ si̱ naai A̱gwaza nyia̱, ‘A̱gwaza, n gwai ang nang n gyet a̱tyu a̱ka̱tuk nyia̱ nang á̱kum á̱niet ka a̱ni bah. Mat n gyet a̱tyu shyuo á̱niet bah; n nyia̱ a̱ka̱tuk nyia̱ bah; a̱wot n katnaan bah. A̱tsak a̱lyiat, n di nang a̱tyu saai kurum ga̱ndu wuni a̱ni bah!

¹² N ni̱ nswan a̱fa a̱khwot di̱ naai A̱gwaza mam feang mami mam a̱natat. A̱wot n ni̱ nwuak ang a̱kpa a̱nyiung mami a̱yaakpa swak mi̱ nkyang nang n shyat a̱ni!’

¹³ “A̱wot nggu a̱tyu saai kurum ga̱ndu wu, a̱ si̱ shya̱i a̱ yong ma̱ gbang. A̱ si̱ byian á̱ghyi, a̱ si̱ totong ba a̱byin. A̱ si̱ sak mbwak di̱ fi̱ri̱ng. A̱ si̱ nyia̱, ‘A̱gwaza, ma̱sa̱kut fa̱k kunak nung! Mat, n ngyet a̱tyu a̱ka̱tuk nyia̱ wa!’

¹⁴ N hyia̱ ma̱ng a̱nyin, a̱tyu saai kurum ga̱ndu wuni a̱ yet a̱tyu a̱ka̱tuk nyia̱ wu a̱ni; nggu wa nang A̱gwaza kyiak a̱ yet a̱tsotswat a̱zaghyi nggu, a̱ sii bwuok a̱ nat a̱mali; a̱wot kang ma̱ng a̱tyu A̱fa̱risawa wu. Mat a̱nia, a̱tyu a̱ nwuak a̱pyia̱ nggu shi a̱ni, á̱ na ghyuai shi nggu hu. A̱wot a̱tyu a̱ ghyuai a̱pyia̱ nggu a̱ni, á̱ na nwuak gu shi.”

Yesu Tyia̱ A̱chyuang Mman A̱li̱ba̱rka

¹⁵ Á̱ghyang á̱tuk, á̱ghyang á̱niet si̱ bai ma̱ng a̱chyuang mman mba wu da̱ a̱vwuo Yesu, da̱nian gu ka byiam baa, a̱wot a̱ bu tyia̱ mba a̱li̱ba̱rka. A̱wot nang mman ta̱m nggu na ndi a̱nia a̱ni, ba̱ si̱ kam á̱niet a̱bya; ba̱ yok tyei Yesu dyem bah.

¹⁶ A̱jawa Yesu si̱ yorong a̱chyuang mman wu ba̱ bai da̱ a̱vwuo nggu ka a̱ni, a̱ si̱ nyia̱ ma̱ng mman ta̱m nggu na a̱ni, “Nyi yok vwuong a̱chyuang mman wu bai da̱ a̱vwuo nung bah. Nyi yok ba, ba̱ bai! Mat Tyok A̱gwaza hu yet si̱ tangka̱i á̱niet ba̱ kyiak pyipyia̱ mba nang a̱chyuang mman wuni a̱ni!

¹⁷ “N tak nyin a̱tsak a̱lyiat; konyan wa da̱ a̱ san Tyok A̱gwaza hu nang a̱da̱dei nggwon a̱ni bah, a̱ si̱ mi̱n mak nwuo ma̱ nhu bah.”

Ku Vwuo A̱khwu Á̱niet Nzwá ba̱ Nwuo Tyok A̱gwaza hu

¹⁸ Á̱ghyang á̱tuk, a̱tyu nzwá a̱ghyang a̱ yet a̱kwak a̱son A̱yahudawa a̱ni, si̱ bai a̱ si̱ lyip Yesu nyia̱, “A̱tsatsak a̱tyu tyiet, yihwa myim n nyia̱ n ka nshya̱ swuan sang sangba̱p ji?”

¹⁹ Yesu si̱ nwuak gu shim nyia̱, “A fi̱k nang á ngyei nung a̱tsatsak, nang A̱gwaza wa ma̱nyin nggu ngyet a̱tsatsak wu a̱ni a?

²⁰ A̱wot ka̱ n na nwuak ang shim, a lyen doka A̱gwaza ji, ‘Ku yet ta hwa nyi yok katnaan; nyi yok hyat a̱yin; nyi yok shyi mi̱ tutu shi̱ri̱ya di̱ bwoi a̱ka̱laa bah. A̱wot nyi khwi a̱lyiat a̱tyia̱ ma̱ng a̱yang byin nyin wu.’”

²¹ A̱kwak a̱son a̱ yet a̱tyu nzwá wu a̱ni, si̱ nwuak Yesu shim nyia̱, “Doká jini a̱mgba̱m ji, n wa ka̱n khwi njii neet nang n ni̱ ngyet fi̱ng.”

²² Nang Yesu nfa̱k shim nggu hu a̱ni, a̱ si̱ nyia̱ ma̱ng a̱nggu, “Kyang nyiung hwa bwat a nyia̱, lyap a̱mgba̱m kyang nang a byia̱ a̱ni, a si̱ ka̱u á̱kunak kurum hu. A̱wot a na shya̱ zwá Ma A̱gwaza tswazwa. Ka̱ a nyia̱ a̱nia, a sii bai a khwi nung.”

²³ A̱wot nang a̱kwak a̱son a̱ yet a̱tyu nzwá wu nfa̱k a̱nia a̱ni, fwuo nggu hu si̱ byian ba̱t, mat a̱ ku byia̱ zwá gba̱mgbam.

²⁴ Nang Yesu ndi a̱nia a̱ni, a̱ si̱ nyia̱, “Ku na vwuo a̱khwu ba̱t; a̱tyu nzwá a̱ shya̱ nwuo mi̱ Tyok A̱gwaza hu!

²⁵ A̱tsak a̱lyiat, ku na laai lan a̱lakumi a̱ nwuo a̱ kaat a̱ ghwut mi̱ zwua̱i a̱yop, nang a̱tyu nzwá na nnwuo mi̱ Tyok A̱gwaza hu a̱ni!”

²⁶ Nang á̱niet ba nfa̱k a̱lyiat Yesu na a̱ni, ba̱ si̱ nyia̱, “Kwot! Ka̱ a̱nia wa, a̱nyan wa mi̱ swanta hu maai a̱ nwuo mi̱ Tyok A̱gwaza hu?”

²⁷ Yesu si̱ nwuak ba shim nyia̱, “A̱gwaza byia̱ chet a̱ nyia̱ kyang ku swuo chet á̱nietbishyi a̱ni. Chet A̱gwaza hu byia̱ gak bah.”

²⁸ Bitut si̱ nyia̱, “Nzi̱t, zi̱ ghwon a̱mgba̱m nkyang nang zi̱ byia̱ a̱ni, mbeang a̱ka̱sa nzi̱t na, zi̱ si̱ khwi ang!”

²⁹ Yesu si̱ nwuak gu shim nyia̱, “A̱tsak a̱lyiat, konyan wa ghwon a̱li nggu, a̱byii̱k nggu, á̱na̱nyiuk nggu, á̱niet mbyin nggu, ku mman nggu da̱nian Tyok A̱gwaza hu;

³⁰ a̱ na shya̱ záng ma̱ a̱di̱di̱t ji̱ swak nkyang nani mi̱ njen jini; a̱wot a̱ bu na shya̱ swuan sang sangba̱p di̱n jen chobai ji!”

Yesu Tyai Á̱zanson tazwa A̱khwu Nggu

³¹ Yesu si̱ kan gyorong mman ta̱m swak ma̱ a̱feang nggu na da̱ gbang a̱nyiung. A̱ si̱ nyia̱, “Nyi fa̱k! Zi̱ naat Urusha̱lima. Ki̱ zi̱ si̱si̱ tat a̱ja, kuzang kyang nang a̱yaata̱m a̱kwonu A̱gwaza ba gbangbang ku lyuut tazwa Nggwon A̱tyubishyi a̱ni; ku na bai da̱ a̱nu ka cha̱chaat.

³² Á̱ na ta̱bat kaa, á̱ tyia̱ nka mbwak tyok A̱romawa. Á̱ na mai nkaa, á̱ nyia̱ nka lihyat, a̱wot á̱ bu tang nka a̱ta̱mpyia̱.

³³ Ba̱ na tsot ka ma̱ng a̱ya̱u a̱ byia̱ pyipyia̱ ntswam a̱ni. A̱wot ba̱ hyat ka. A̱mgba̱m ma̱ng a̱nia, a̱tuk mam tat ka, ka̱ na doot ma̱ng swuan ma̱ á̱niet ba̱ ka̱n kwi a̱ni.”

³⁴ Mman ta̱m Yesu na si̱ fi̱k kyang nyiung mami nkyang nani nang gu lyiat a̱ni bah. Á̱ ku niat ma̱ng a̱mba kyang nang á̱lyiat nani fa a̱ni. Da̱ mba, ba̱ fi̱k kyang nang gu lyiat a̱ni bah.

Yesu Choot A̱tyu A̱fi̱fan

³⁵ Nang Yesu nshim tat kpa̱mkpaan ma̱ng Yeriko a̱ni, a̱ si̱ shya̱ a̱tyu a̱fi̱fan a̱ yet a̱tyu a̱shweang a̱ni, nang gu swan da̱ a̱beam vak.

³⁶ Nang a̱tyu a̱fi̱fan wu nfa̱k a̱nwuat á̱kpa á̱niet ba̱ sweap a̱ni, a̱ si̱ lyip kyang ku naat mbwuot a̱ni.

³⁷ Á̱ si̱ tak ma̱ng a̱nggu nang Yesu a̱tyu Na̱za̱ra̱t wa nsweap.

³⁸ Mat a̱nia, a̱ si̱ nwuo yei mi̱ chet nyia̱, “Yesu, nggwon Da̱wuda, ma̱sa̱kut fa̱k kunak nung!”

³⁹ Á̱niet ba ba̱ kwak a̱son ka a̱ni, si̱ kam nggu nyia̱ gu tyia̱ nywang. A̱wot da̱ a̱kwonu a̱kya, a̱ si̱ mbeang a̱nwuat ka mi̱ chet nyia̱, “Yesu, nggwon Da̱wuda, ma̱sa̱kut fa̱k kunak nung!”

⁴⁰ Nang Yesu nfa̱k a̱nwuat nggu ka a̱ni, a̱ si̱ yong, a̱ si̱ tyia̱ ba̱ si̱ bai ma̱ng a̱tyu a̱fi̱fan wu da̱ a̱vwuo nggu. Yesu si̱ lyip gu nyia̱,

⁴¹ “Yihwa a chat n nyia̱ ang dyo?” A̱tyu a̱fi̱fan wu si̱ nyia̱, “A̱tyoli, ma̱sa̱kut, n chat n bu shya̱ nwuan a̱vwuo!”

⁴² A̱wot Yesu si̱ nyia̱ ma̱ng a̱nggu, “Ku yet a̱sham; da̱ shya̱ nwuan a̱vwuo hu! Nwuak fwuo ang hu da̱ nung choot ang.”

⁴³ Mi̱ di̱ yong a̱hwa, a̱tyu a̱fi̱fan wu si̱ kin shya̱ nwuan a̱vwuo hu! A̱ si̱ khwi Yesu, a̱ dyep A̱gwaza. A̱wot a̱mgba̱m á̱niet ba̱ shya̱ a̱ja a̱ni, mba meang, ba̱ si̱ dyep A̱gwaza.