Ibriniyawa 9 - A̠lyiat A̠gwaza na di̠n Tyap: A̠li̠ka̠uli A̠fai

Ta̱m Pris ma̱ A̱khwukhwop Suswak mi̱ Swanta

¹ La̱p a̱li̱ka̱uli ku yet a̱son ka a̱ni, ku byia̱ doká di̱ si̱sak ji nang á̱niet Isi̱rela ba ni̱ ndyep A̱gwaza ma̱ng a̱za̱za̱rak a̱vwuo dyep gu mi̱ swanta hu a̱ni.

² Á̱ ku byia̱ a̱ka̱swang a̱feang mami A̱za̱za̱rak Suswak wu. Ma̱ a̱swang a̱nyiung, á̱ si̱ mbyia̱ a̱gba̱ndang a̱ga̱nga̱ng chuk zi̱nariya saai fi̱tila, a̱tyii, ma̱ng a̱za̱za̱rak burodi tazwa a̱tyii ka. A̱swang kani, á̱ ku ngyei nka “A̱za̱za̱rak A̱vwuo.”

³ A̱wot a̱ja mami A̱za̱za̱rak Suswak ka, á̱ si̱ mbyia̱ a̱gba̱ndang a̱kpi̱mi̱mi̱t a̱teap, a̱ teang a̱ ghai a̱vwuo ka a̱ nnyia̱ a̱ka̱swang a̱feang a̱ni. Da̱ a̱ma̱nta a̱toot ka, a̱ja wa nang a̱swang a̱feang ka nshya̱, á̱ ku ngyei nka “A̱vwuo ka̱ Swak ma̱ng yet A̱za̱za̱rak a̱ni.”

⁴ Mami a̱swang a̱kya, á̱ mbyia̱ a̱tyii zi̱nariya neap za̱nang nang á̱ nfwui turare a̱ni. A̱wot á̱ si̱ bu mbyia̱ a̱kwati nkwon nang á̱ ngyei “A̱kwati La̱p A̱li̱ka̱uli A̱gwaza wu” nang á̱ mbeet zi̱nariya á̱ kaat kuzang a̱ma̱nta a̱ni. Mami A̱kwati ka, á̱ si̱ mbyia̱ a̱bakurung zi̱nariya nang á̱ ntyia̱ kyayak nang á̱ ngyei “mana” a̱ni, ma̱ng shan Haruna ji ji̱ ku ta nfwut a̱ni, ma̱ng a̱cha̱chet a̱kpa̱kpai nfang nang á̱ ndyuut la̱p a̱li̱ka̱uli hu a̱ni.

⁵ Tazwa a̱kwati ka, nghwughwu a̱yaata̱m tswá A̱gwaza á̱ghyang nshya̱, á̱ ngyei “Cha̱robim”. Ba̱ yong a̱kwonu shi A̱gwaza. Ba̱ si̱ teak nfeap mba na á̱ nkup tazwa a̱kwati di̱n jhyat nang á̱ nchi a̱ka̱tuk nyia̱ á̱niet wu a̱ni. A̱wot zi̱ si̱ mi̱n gwa̱i nkyang nani kpa̱sai ma̱nini bah.

⁶ Jen nang á̱ jhyi kuzang kyang á̱ si̱ sak di̱ tyan ku myim ku nswan a̱ni, a̱yaapris ba ni̱ nwuo ma̱ A̱za̱za̱rak Suswak wu kuzang a̱tuk. Ba̱ si̱ nyia̱ ta̱m pris ku myim ba̱ nyia̱ a̱ni mami a̱swang ntsa ka.

⁷ A̱wot mi̱ a̱gba̱ndang pris wu wa ma̱nyin nggu ni̱ nwuo ma̱ A̱vwuo ka̱ Swak ma̱ng yet A̱za̱za̱rak hu a̱ni. A̱ ni̱ nwuo a̱ka̱nyiung kya ma̱ a̱lyia̱, a̱ neap A̱gwaza za̱náng a̱sok nzón ma̱ng á̱si̱ a̱yaaka̱la̱di. Da̱nian a̱ ka chi a̱ka̱tuk nyia̱ a̱pyia̱ nggu ma̱ng á̱si̱ nang á̱niet ba nyia̱ di̱ mi̱n shim ba a̱ni.

⁸ Di̱ nta̱m a̱yaapris nani, A̱za̱za̱rak Ntswa A̱gwaza wu tak kpa̱sai, nang a̱wat nwuai ma̱ A̱swang ka̱ Swak ma̱ng yet A̱za̱za̱rak a̱ni ka̱n khwuk bah, ka̱nang á̱ ni̱ nyia̱ ta̱m pris mami a̱khwukhwop A̱za̱za̱rak Suswak wu.

⁹ Si̱ huni yet kidee ja, ji̱ tak nta̱m nwuat za̱nang di̱n jen jini a̱ni. Mat za̱náng zón ku nyák mbeang nsa̱da̱ka na nang a̱yaapris ba ni̱ neap a̱ni, maai jaat a̱ka̱tuk nyia̱ mi̱ nfwuo á̱niet na ba̱ nwuat ji a̱ni bah.

¹⁰ Mat a̱khwukhwop ta̱m pris wuni, yet ma̱ a̱lyiat kyayak nang á̱ ya, á̱ tsa á̱ swuo, ma̱ng kwi nkap di̱ nche di̱ nche na̱ yet mi̱ taada ja a̱ni. Taada jini yet doká vam ja nang ba̱ ku nyia̱ nta̱m na ma̱ng á̱nji, si̱ nat jen nang A̱gwaza na nkpaat ta̱m pris fai ku swak ma̱ng yet a̱ni.

Ta̱m Kristi mi̱ Suswak Fai Ma A̱gwaza Tswazwa

¹¹ A̱wot ma̱ninika Kristi wa yet A̱gba̱ndang Pris wu tazwa a̱mgba̱m a̱tan nkyang na̱ na bai a̱ni. A̱ nwuo ma̱ A̱za̱za̱rak Suswak Ma A̱gwaza tswazwa, ku shi ku si̱ yet a̱tsatsak a̱ swak si̱ mi̱ swanta hu. A̱tyubishyi wa tat Suswak huni ma̱ng mbwak gu bah. A̱wot ku shya̱ mi̱ nkyang nang á̱ mat mi̱ swanta huni hwa a̱ni bah.

¹² Kristi nwuo ma̱ A̱vwuo ka̱ Swak ma̱ng yet A̱za̱za̱rak a̱ni da̱ a̱ka̱nyiung kya. A̱ nwuo ma̱ng a̱sok zón ku á̱si̱ mman nyák nia di̱ neap za̱nang ji bah. Da̱ a̱kwonu a̱kya, a̱ nwuo ma̱ng a̱sok a̱pyia̱ nggu nia. Di̱ nvak a̱hwa hwa, nang gu nnwuak a̱pyia̱ nggu a̱ si̱ san nzi̱t zi̱ yet á̱sa̱t á̱niet, zi̱ shya̱ swuan sang sangba̱p ji.

¹³ Ma̱ a̱khwukhwop ta̱m pris wu, a̱sok nzón á̱ta̱m, ma̱ng á̱si̱ a̱yaaka̱la̱di, ma̱ng ntong sha̱p nyak nang á̱ fwui a̱ni, nang á̱ ni̱ sat da̱ á̱niet na̱ kwi a̱na̱ndyung mi̱ nvam á̱niet ba̱ nwai yet a̱za̱za̱rak a̱ni, ba̱ tyia̱ za̱za̱rak.

¹⁴ Ka̱ a̱nia wa, nyi dam nyi lii, si̱sak nang a̱sok Kristi na nswak si̱ nzón ma̱ng nyák ma̱ za̱nzan a̱ni. Na̱ na jaat a̱di̱dam mi̱ nfwuo nzi̱t na, zi̱ ka ghwon a̱ka̱tuk nyia̱ nzi̱t wu, da̱nian zi̱ ka kwok ntong a̱zaghyi A̱gwaza a̱ byia̱ swuan a̱ni. Mat chet A̱za̱za̱rak Ntswa sang sangba̱p hwa, Kristi si̱ nwuak a̱pyia̱ nggu da̱ a̱vwuo A̱gwaza, a̱ si̱ yet a̱tsatsak za̱nang, da̱nian a̱ ka chi a̱ka̱tuk nyia̱ nzi̱t wu a̱mgba̱m.

¹⁵ Huhwa mbyia̱, Kristi wa yet a̱tyu a̱ yong a̱ka̱wa̱tyia̱ A̱gwaza ma̱ng á̱niet ba mi̱ la̱p a̱li̱ka̱uli a̱fai wu. Da̱nian a̱mgba̱m á̱niet ba nang á̱ yei a̱ni, ba̱ ka san gado nwai tyak, nang A̱gwaza nyia̱ mba a̱li̱ka̱uli wu a̱ni. Mat Kristi khwu, da̱nian a̱ ka ti̱n mba mi̱ swuo a̱bung ku yet shi̱ri̱ya a̱khwu mat a̱ka̱tuk nyia̱, nang ba̱ nyia̱ di̱ khwi la̱p a̱li̱ka̱uli ku yet a̱khwukhwop wu a̱ni.

¹⁶ Tazwa ta̱ka̱da ka̱u gado nkyang a̱tyu a̱khwu a̱ni, ku yet ta hwa á̱ tak za̱m nang a̱tyu byia̱ nkyang wu, a̱ lyuut ta̱ka̱da hu a̱ni, ka̱n khwu.

¹⁷ Ta̱ka̱da ka̱u gado hu na nyia̱ ta̱m bah, si̱ nang a̱tyu lyuut ta̱ka̱da ka̱u gado wu ka̱n khwu. Ka̱nang a̱tyu lyuut ta̱ka̱da ya gado wu ni̱ shya̱ a̱chet, ta̱ka̱da ka̱u gado hu si̱ mi̱n nyia̱ ta̱m bah.

¹⁸ Huhwa mbyia̱, ku a̱khwukhwop la̱p a̱li̱ka̱uli wu nwuo nyia̱ ta̱m ma̱ng a̱sok nzón, ku á̱si̱ nyák.

¹⁹ Jen nang Musa nfang kuzang doka A̱gwaza da̱ a̱vwuo a̱mgba̱m á̱niet ba a̱ni; a̱ si̱ kyiak a̱sok nyák ma̱ng á̱si̱ nzón, mbeang a̱sa̱khwot. A̱ si̱ kyiak a̱shong wulyin. A̱ si̱ ngat a̱chyuang a̱shyim a̱kyikyo a̱kwon nang á̱ ngyei hizop a̱ni. A̱ si̱ zwup ma̱ a̱sok na. A̱ si̱ sat di̱ ta̱ka̱da doka A̱gwaza hu ma̱ng a̱mgba̱m á̱niet ba.

²⁰ A̱jawa gu nyia̱, “A̱sok nani nia tak, a̱li̱ka̱uli nang A̱gwaza la̱p ma̱ng a̱nyin, a̱ si̱ nwuak nyin doka ji nyi khwi a̱ni.”

²¹ Ma a̱nia wa, gu si̱ nya̱sang a̱sok na ma̱ A̱za̱za̱rak Suswak wu ma̱ng a̱mgba̱m kuzang kyang nang á̱ nyia̱ nta̱m dyep A̱gwaza hu mami hu a̱ni.

²² A̱tsatsak a̱lyiat, ma̱nang doka Musa ji nhyia̱ a̱ni, kuzang kyang myim á̱ jaat hu ma̱ng a̱sok nia. Ka̱nang á̱ koot a̱sok bah, á̱ si̱ mi̱n chi a̱ka̱tuk nyia̱ bah.

A̱sok Kristi nia yet Za̱nang Chi A̱ka̱tuk nyia̱

²³ Huhwa mbyia̱, A̱za̱za̱rak Suswak wu ma̱ng kuzang kyang ku shya̱ ma̱ nhu a̱ni, na̱ yet ghwughwu nkyang na̱ shya̱ Ma A̱gwaza tswazwa a̱ni, ku myim á̱ jaat naa ma̱ng a̱sok nzón ma̱ng á̱si̱ nyák. A̱wot á̱tsatsak nkyang wu na̱ shya̱ ma̱ A̱za̱za̱rak Suswak Ma A̱gwaza tswazwa ka a̱ni, na̱ myim á̱ jaat naa ma̱ng za̱náng ji̱ swak a̱sok nzón ma̱ng á̱si̱ nyák swanta nani a̱ni.

²⁴ Mat Kristi ku nwuo ma̱ A̱za̱za̱rak Suswak nang á̱nietbishyi bya tat a̱ni bah, mat hu ku yet mi̱ ghwughwu a̱za̱za̱rak a̱vwuo ka̱ shya̱ Ma A̱gwaza tswazwa a̱ni. Da̱ a̱kwonu a̱kya, Kristi si̱ nwuo Ma A̱gwaza tswazwa. A̱ja wa nang gu nshya̱ ma̱nini a̱zaghyi A̱gwaza tswazwa da̱nian nzi̱t.

²⁵ A̱wot Kristi ni̱ nwuo Ma A̱gwaza tswazwa ka, a̱ ka neap a̱pyia̱ gu kya kuzang a̱lyia̱ ma̱nang a̱gba̱ndang pris wu ni̱ nnwuai a̱ni bah. A̱gba̱ndang pris mi̱ swanta wu ni̱ nwuo A̱vwuo ka̱ Swak ma̱ng yet A̱za̱za̱rak a̱ni, ma̱ng a̱sok nzón ma̱ng á̱si̱ nyák, a̱ka̱nyiung kya kuzang a̱lyia̱.

²⁶ Ki̱ Kristi wa nyia̱ a̱nia, si̱ a̱ kwi á̱ nchi̱ri̱ng neet di̱n tsa swanta hu. Da̱ a̱kwonu a̱kya, ma̱ninika a̱ tyai a̱pyia̱ nggu a̱ka̱nyiung kya za̱m di̱ nche ngaan jini. Da̱nian gu ka chi a̱ ti̱n a̱ka̱tuk nyia̱, mat nang gu nkhwu, a̱ si̱ neap a̱pyia̱ nggu gu yet za̱nang a̱ni.

²⁷ A̱wot ma̱nang ku ngyet a̱daat wa a̱tyubishyi a̱ khwu a̱ka̱nyiung a̱ni, kang ma̱ng a̱nia, A̱gwaza a̱ sii nyia̱ nggu shi̱ri̱ya.

²⁸ Ma a̱nia wa, Kristi ku neap a̱pyia̱ nggu nang za̱nang a̱ni, a̱ si̱ khwu a̱ka̱nyiung, da̱nian gu ka chi a̱ka̱tuk nyia̱ á̱niet ma̱ a̱di̱di̱t. A̱wot a̱ bu na bwuok a̱ bai a̱ka̱feang ka, da̱nian a̱ ka chi a̱ka̱tuk nyia̱ nzi̱t wu wa bah. Da̱ a̱kwonu a̱kya, a̱ na bai wa a̱ san a̱mgba̱m á̱niet ba, ba̱ swan á̱ fwuong chobai nggu hu a̱ni.