Ibriniyawa 8 - A̠lyiat A̠gwaza na di̠n Tyap: A̠li̠ka̠uli A̠fai

Yesu wa Yong da̱ a̱kwonu Á̱niet Khwi di̱ La̱p A̱li̱ka̱uli A̱fai

¹ Kyang hu nang zi̱ lyiat a̱ni, huhwa yet; zi̱ byia̱ tangka̱i A̱gba̱ndang Pris a̱ghyang, nggu wa yet Yesu. A̱ swan da̱ a̱vwuo shi a̱zayak a̱gba̱ndang chuk Tyok A̱gwaza A̱ Byia̱ A̱tsatsak Shi Tswazwa a̱ni.

² Yesu shya̱ a̱ja, a̱ ni̱ nyia̱ nta̱m a̱gba̱ndang pris na da̱nian nzi̱t ma̱ A̱za̱za̱rak A̱vwuo, a̱ yet Suswak ku shya̱ Ma A̱gwaza tswazwa. Ku yet a̱tsatsak A̱za̱za̱rak Suswak ku nwai yet tat a̱tyubishyi a̱ni. A̱gwaza wa ma̱ a̱pyia̱ nggu tat hu.

³ A̱wot nang ku ngyet ta̱m kuzang a̱gba̱ndang pris hwa nang á̱ khai gu neap A̱gwaza sa̱da̱ka ma̱ng za̱nang a̱ni, mat a̱nia, ku yet ta hwa A̱gba̱ndang Pris nzi̱t wu meang, gu byia̱ za̱nang nang gu na neap A̱gwaza a̱ni.

⁴ A̱wot ma̱ninika, ka̱ a̱ wa shya̱ mi̱ swanta hwa, á̱ si̱ mi̱n kyiak gu nang pris a̱ni bah. Mat á̱ wa ka̱n shya̱ a̱yaapris ba ba̱ na neap za̱náng nang doka Musa ji nhyia̱ a̱ni.

⁵ Mami a̱chuchuk, nta̱m na nang a̱yaapris ba ni̱ nyia̱ A̱mali Nwuat Za̱nang ka a̱ni, na̱ yet mi̱ ghwughwu ku kidee A̱za̱za̱rak A̱vwuo ka̱ shya̱ Ma A̱gwaza tswazwa kya a̱ni. Mat di̱n jen nang Musa ku nchat kpaat A̱za̱za̱rak Suswak wu a̱ni, A̱gwaza si̱ gba nggu, nyia̱, “Ta̱bam a jhya̱ kuzang kyang cha̱chaat ma̱ng kidee nang n tak ang tazwa a̱fan ka a̱ni.”

⁶ A̱wot ma̱ninika, A̱gwaza a̱ nwuak Yesu yet A̱gba̱ndang Pris nzi̱t wu a̱ni. Ta̱m pris ku yet a̱ swak ntangka̱i nta̱m a̱khwukhwop sot a̱yaapris ba a̱ni. Mat Yesu wa yong da̱ a̱kwonu nzi̱t di̱ la̱p a̱li̱ka̱uli a̱fai nzi̱t hu ma̱ng A̱gwaza. La̱p a̱li̱ka̱uli a̱hwa yet a̱tsatsak a̱ swak si̱ nang Musa ku ngyong a̱ni. Mat á̱ kpaat la̱p a̱li̱ka̱uli a̱fai di̱ nkyang nang á̱ nyia̱ a̱li̱ka̱uli na̱ yet a̱ swak a̱ni.

⁷ Mat ka̱ la̱p a̱li̱ka̱uli a̱ ku yet a̱son ka a̱ni, wa ku sang jhyi, sii á̱ mbyia̱ jat kpaat a̱ghyang bah.

⁸ A̱wot jen nang A̱gwaza nshya̱ á̱niet nggu ba ma̱ng a̱bun a̱ni, a̱ si̱ lyiat ma̱ng a̱mba a̱bwonu a̱ta̱m nggu wu nyia̱, “Nung, A̱gwaza, nyia̱, ‘Jen ji chobai, nang n na nda̱p a̱li̱ka̱uli a̱fai ma̱ng á̱niet Isi̱rela ma̱ng Yahuda a̱ni.

⁹ La̱p a̱li̱ka̱uli a̱fai huni na li nang si̱ nang n ku nda̱p ma̱ng a̱yaatyia̱ a̱khwop mba ba a̱ni bah, di̱n jen nang n ku nta̱bat ba di̱ mbwak n si̱ nta̱bam, n si̱ nghwut ma̱ng a̱mba ma̱ a̱byin Ma̱sa̱r ka a̱ni. A̱wot ba̱ ku ba̱ng la̱p a̱li̱ka̱uli nung hu tsotswat bah. Mat a̱nia, n si̱ nang mba a̱ma.’

¹⁰ “Nung, A̱gwaza, n si̱ nyia̱, ‘La̱p A̱li̱ka̱uli a̱fai huni nang n na nda̱p ma̱ng á̱niet Isi̱rela ba a̱ni, mi̱ njen chobai ji, n na tyia̱ doká nung ji mi̱ nfwuo mba na, n bu ndyuut jii mi̱ nfwuo mba na. N na gyet A̱gwaza mba. Mba meang, ba̱ ma ngyet á̱niet nung.

¹¹ A̱wot á̱ bu na mbyia̱ a̱tyu a̱ na tyiet a̱ghyang a̱ni bah; ku á̱kpa̱ndang swat, ku á̱na̱nyiuk nyia̱,’ ‘Ku myim nyi lyen A̱gwaza.’ Mat konyan wa ka̱n dyen nung, neet da̱ a̱da̱dei si̱ nat da̱ a̱gba̱ndang.

¹² A̱wot n na fa̱k kunak mba, n chi a̱ka̱kpa̱t mba na. A̱wot n bu na jhyung a̱ka̱tuk nyia̱ mba wu bah.”

¹³ Nang A̱gwaza ndyiat tazwa “La̱p a̱li̱ka̱uli a̱fai hu” a̱ni, ku fa a̱ bwuak a̱khwukhwop la̱p a̱li̱ka̱uli a̱ yet a̱son ka a̱ni, a̱ si̱ kyiak huu nang ku nyia̱ ta̱m a̱ni bah. A̱wot ku na labeang bah, ku tyak chet.