Ibriniyawa 5 - A̠lyiat A̠gwaza na di̠n Tyap: A̠li̠ka̠uli A̠fai

¹ Kuzang a̱gba̱ndang pris, A̱gwaza ni̱ khai gu mami á̱niet bya, gu ka nyia̱ ta̱m da̱ a̱kwonu á̱niet ba ma̱ng A̱gwaza. A̱wot a̱ ni̱ nwuak A̱gwaza sa̱da̱ka á̱niet hu. A̱ bu neap za̱náng da̱nian a̱ ka nchi a̱ka̱tuk nyia̱ mba wu.

² A̱wot a̱ byia̱ chet nyia̱ shonshyon ma̱ng á̱niet ba̱ ghyuap di̱ mi̱n shim mba, ma̱ng á̱si̱ ba̱ ni̱ teap zan ma a̱nggang a̱ni. Mat, nggu ma̱ a̱pyia̱ nggu a̱ byia̱ lat a̱zaghyi A̱gwaza.

³ Huhwa mbyia̱ ku ngyet ta hwa gu neap za̱náng da̱nian a̱ka̱tuk nyia̱ nggu wu, mbeang a̱ka̱tuk nyia̱ á̱ghyang á̱niet wu.

⁴ Á̱ mbyia̱ a̱tyu a̱ si̱ mi̱n khai a̱pyia̱ nggu yet a̱gba̱ndang pris, da̱nian a̱ ka shya̱ shi hwa a̱ni bah. Ku yet ta hwa, A̱gwaza wa a̱ khai nggu nyia̱ ta̱m a̱gba̱ndang pris hu; ma̱nang gu ku nkhai Haruna a̱ nyia̱ nggu ta̱m a̱gba̱ndang pris hu a̱ni.

⁵ Ma a̱nia wa, Kristi wa ku khai a̱ nwuak a̱pyia̱ nggu shi yet a̱gba̱ndang pris wu bah. Da̱ a̱kwonu a̱kya, A̱gwaza wa ku khai guu. A̱ si̱ tak nyia̱, “A yet Nggwon nung kya. A̱fwun, n ma ngyet A̱tyia̱ ang wa.”

⁶ A̱gwaza si̱ bu tak ma̱ng a̱nggu nyia̱, “A yet pris wa si̱ nat sang sangba̱p, ma̱nang tangka̱i pris ku neet mi̱ sot a̱yaapris Ma̱lkiza̱dek a̱ni.”

⁷ Mi̱ jen nang Yesu ku nshya̱ mi̱ swanta hu a̱ni, a̱ si̱ naai A̱gwaza a̱ fat a̱sa̱kut. A̱ twei mi̱ chet ma̱ng ndang a̱ghyi, da̱ a̱vwuo a̱tyu a̱ na san nggu, gu nwai khwu a̱ni. A̱wot A̱gwaza si̱ fa̱k naai nggu hu, mat si̱sak nang gu ku nnwuak a̱pyia̱ nggu, a̱ si̱ fwuong a̱wun A̱gwaza ba̱t a̱ni.

⁸ Ku nang Yesu ngyet Nggwon A̱gwaza kya a̱ni, a̱ si̱ myiam si̱sak nang gu na nkhwi a̱lyiat A̱gwaza na, mi̱ nkyang ma̱ a̱di̱di̱t nang nggu nswuo a̱bung a̱ni.

⁹ Mat a̱nia wa mbyia̱, A̱gwaza si̱ li Kristi maai a̱ yet A̱gba̱ndang Pris a̱ sang a̱bun a̱ni. A̱wot a̱ yet a̱tyin shya̱ san sang sangba̱p a̱mgba̱m á̱niet ba̱ khwi nggu a̱ni.

¹⁰ A̱wot A̱gwaza si̱ khai nggu gu yet A̱gba̱ndang Pris nang tangka̱i pris ku neet mi̱ sot a̱yaapris Ma̱lkiza̱dek ji a̱ni.

Á̱ Gba Á̱niet Khwi ba̱ yet Á̱niet Tat A̱ghyi di̱ Khwi Kristi

¹¹ Zi̱ byia̱ a̱lyiat ma̱ a̱di̱di̱t nang zi̱ na lyiat tazwa Ma̱lkiza̱dek a̱ni. A̱wot ku na vwuo a̱khwu zi̱ wa̱i nyin naa nyi lyen, mat nfwuo nyin na swan gba̱pdok. Da̱ nyin, nyi ya̱baat a̱lyiat A̱gwaza na a̱nggang bah.

¹² A̱tsak a̱lyiat, ba̱ng ba̱ tat a̱fwun, nyi ka̱n dabeang mi̱ khwi Yesu hu, ku myim si̱ nyi mi̱ nkai ngyet á̱niet tyiet bya! Da̱ a̱kwonu a̱kya, nyi chat a̱ghyang a̱niet wa a̱ bu tyiet nyin a̱tyin a̱lyiat A̱gwaza ka. Nyi li nang a̱chyuang mman na̱ swuo a̱jojot a̱baan a̱ni. Nyi si̱ mi̱n gya a̱kpa̱u kyayak bah.

¹³ Mat a̱tyu a̱ ni̱ swuo a̱jojot a̱baan a̱ni, a̱ ni̱ yet a̱banggwon kya. A̱ ka̱n maai lyen a̱wot a̱ nyia̱ ta̱m ma̱ng tyiet ku yet a̱tsotswat a̱ni bah.

¹⁴ A̱wot a̱kpa̱u kyayak wu yet si̱ á̱niet ba̱ ka̱n tat a̱ghyi bya a̱ni, nang á̱ tyiet mbaa ba̱ lyen si̱sak ji ba̱ na nkhap a̱wot ba̱ fi̱k a̱ka̱tuk wu ma̱ng a̱tan wu a̱ni.