Ibriniyawa 13 - A̠lyiat A̠gwaza na di̠n Tyap: A̠li̠ka̠uli A̠fai

Tyia̱ Gba̱gbak Ngaan hu

¹ Nyin á̱niet khwi Yesu ba, nyi ya a̱son mi̱ chat á̱ghyang nyin nang á̱na̱nyiuk a̱ni.

² Nyi bu ya a̱son ma̱ng saai á̱nietchen mbwak nfeang ma̱ a̱ka̱sa nyin na. Mat á̱ghyang á̱niet ba̱ ku nyia̱ a̱nia a̱ni, ba̱ ku saai a̱yaata̱m tswá A̱gwaza di̱ mi̱ lyen.

³ Nyi ni̱ njhyung á̱niet ba nang á̱ la̱p ba̱ shya̱ mi̱ jaru a̱ni, á ngyei nyi mun shya̱ mi̱ jaru ji dundung ma̱ng a̱mba. Nyi bu jhyung á̱niet ba nang á̱ ya̱shuk á̱ si̱ nyiak a̱ni, á ngyei nyin ma̱ á̱pyia̱ nyin nyi swuo a̱bung ka dundung ma̱ng a̱mba.

⁴ A̱mgba̱m á̱tyok ma̱ng á̱nyiuk, nyi yok jhyuai swat nyeang bah. Ku myim nyi swan a̱tsotswat nswat ma̱ng á̱ghyang nyin. A̱wot nyi yok katnaan ma̱ng á̱tyok á̱ghyang ku á̱nyiuk á̱ghyang ma̱ zan bah. A̱tsak a̱lyiat, A̱gwaza na nyia̱ á̱niet katnaan ma̱ng á̱niet a̱shi̱shi̱k nyia̱ shi̱ri̱ya.

⁵ Nyi yok la̱u shyuo kurum bah. Nyi swan ma̱ng a̱swa, nyi gwai ma̱ng zwá nang nyi byia̱ a̱ni. Mat A̱gwaza nyia̱, “Nung, n si̱ mi̱n nwai beang ang bah. Da̱ nung, n na kai ang ghwon bah.”

⁶ Mat a̱nia, ka̱ doot zi̱ gbang a̱lyia̱ zi̱ hyia̱, nyia̱, “A̱gwaza wa yet a̱tyu beang nung wu. Mat a̱nia, n na fa̱k a̱wun bah. Yihwa hwa nang a̱tyubishyi na nyia̱ nung dyo?”

⁷ Nyi jhyung a̱yaakwak a̱son nyin ba, ba̱ ku tyiet nyin a̱lyiat A̱gwaza na di̱n jen ji ji̱ swak a̱ni. Nyi bu dam tazwa a̱tan swat nang ba̱ ku swan a̱ni. Nyi khwi kidee nwuak fwuo mba ji da̱ A̱gwaza.

⁸ Yesu Kristi shai bah. Nggu wa ku nshya̱ gbangbang. Nggu wa nshya̱ ma̱nini. Nggu wa na nshya̱ ba̱ng si̱ nat sang sangba̱p.

⁹ Mat a̱nia, nyi yok khwi kuzang tangka̱i tyiet fai, ku vwuon ma̱ng A̱sham Nkhang ka a̱ni bah. Tangka̱i tyiet fai ku na tyia̱ nyi nteap, nyi ghwon a̱tsatsak nvak wu a̱ni. A̱wot khwi taada ya ntangka̱i nkyayak ma̱ a̱di̱di̱t ku ni̱ beang nzi̱t bah. Shok A̱gwaza ja tyei nfwuo nzi̱t na chet.

¹⁰ A̱yaapris ba, ba̱ ni̱ nyia̱ nta̱m na mi̱ Suswak nang A̱yahudawa ba ndyep A̱gwaza a̱ni, ba̱ byia̱ a̱wat ba̱ ya za̱nang da̱ a̱tyii nzi̱t wu nang zi̱ nneap za̱nang ji a̱ni bah.

¹¹ Di̱n jen a̱khwukhwop ta̱m pris hu, a̱gba̱ndang pris wu ni̱ nwuai ma̱ng a̱sok nzón ma̱ng nyák nang za̱nang chi a̱ka̱tuk nyia̱ a̱ni kuzang a̱lyia̱, mami A̱vwuo ka̱ Swak ma̱ng yet A̱za̱za̱rak a̱ni. A̱wot nkwom zón ma̱ng á̱si̱ nyák na, á̱ ni̱ fwui na a̱ma̱nta a̱chya̱ ka.

¹² Ma̱ a̱nia wa, nang Yesu ku nswuo a̱bung ka, a̱ si̱ khwu a̱ma̱nta a̱nu nwuai a̱keang ka, da̱nian gu ka jaat a̱ka̱tuk nyia̱ á̱niet wu ma̱ng a̱sok nggu na, ba̱ tyia̱ a̱za̱za̱rak.

¹³ Mat a̱nia, yok zi̱ ghwut zi̱ nat a̱ma̱nta a̱chya̱ ka da̱ a̱vwuo Yesu. A̱wot zi̱ gbang a̱lyia̱ zi̱ swuo nsum ma̱ng lihyat ma̱nang gu ku nswuo a̱ni.

¹⁴ Mat swanta huni yet a̱li nzi̱t kya kuzang jen bah. Da̱ a̱kwonu a̱kya, zi̱ swan fwuong zi̱ bwuok nat zi̱ si̱ swan a̱mali, ka̱ shya̱ Ma A̱gwaza tswazwa a̱ni.

¹⁵ Mat a̱nia, yok zi̱ neap A̱gwaza za̱nang zi̱ dyep gu nchi̱ri̱ng mami a̱lyoot Yesu. A̱wot zi̱ shei kpa̱sai nang nggu wa ngyet A̱gwaza nang zi̱ khwi a̱ni.

¹⁶ A̱wot nyi yok bwung nyia̱ á̱ghyang nyin shok, ma̱ng beang á̱kunak ma̱ng zwá nang nyi byia̱ a̱ni bah. Tangka̱i a̱tan nta̱m huni hwa yet kidee za̱náng nang A̱gwaza fwuong nyinyang a̱ni.

¹⁷ Nyi khwi a̱lyiat á̱niet ba̱ yet a̱yaakwak a̱son nyin ba̱ a̱ni. A̱wot nyi nwuak pyipyia̱ nyin mbwak tyok mba hu. Ta̱m mba huhwa yet; ba̱ chok swuan nyin ji. A̱wot ba̱ na fang kuzang nkyang nang ba̱ nyia̱ a̱ni a̱zaghyi A̱gwaza. Ki̱ nyi khwi a̱lyiat a̱yaakwak a̱son nyin na, ba̱ na nyia̱ nta̱m mba na ma̱ng fwuo sai, kalak ba̱ nyia̱ nta̱m na ma̱ng fwuo byian. Si̱ a̱hwa si̱ mi̱n beang nyin bah.

¹⁸ Nyi naai A̱gwaza da̱nian nzi̱t, mat zi̱ lyen nang zi̱ nwai nyia̱ a̱ka̱tuk nang nfwuo nzi̱t na, na̱ nkpaat zi̱t a̱ni. A̱wot zi̱ chat zi̱ swan a̱tan swat nang á̱ na chyin a̱ni di̱ kuzang kyang nang zi̱ nyia̱ a̱ni.

¹⁹ A̱wot n bu naai nyin, ma̱sa̱kut, nyi naai A̱gwaza da̱nian gu ka tyia̱ n bwuok bai da̱ a̱vwuo nyin ma a̱nggang.

²⁰ Yok A̱gwaza, a̱ nwuat swat nyinyang a̱ni, nggu wa ku ta̱ngam Yesu, a̱ yet A̱tyoli nzi̱t wu a̱ni, ma̱ng swuan ma̱ á̱niet ba̱ ka̱n kwi a̱ni. Yesu a̱ bu yet a̱gba̱ndang a̱tyu chok zón seap wu a̱ni, a̱wot a̱ si̱ tsa nyia̱ ta̱m la̱p a̱li̱ka̱uli sang sangba̱p ma̱ng a̱sok nggu na.

²¹ Yok A̱gwaza a̱ ka̱u nyin kuzang a̱tan kyang nang nyi chat a̱ni, da̱nian nyi ka nyia̱ nggu nta̱m nang gu chat a̱ni. Yok gu nyia̱ ta̱m ma̱ng a̱nzi̱t, mami chet a̱lyoot Yesu Kristi, zi̱ ka nyia̱ kuzang a̱tan nta̱m ku na tyia̱ gu fa̱k nyinyang a̱ni. Yok a̱mgba̱m a̱kyenkyai shi a̱ yet a̱si̱ nggu, si̱ nat sang sangba̱p! Samba̱rka!

Byat Ngaan

²² N naai nyin á̱niet khwi Yesu ba nang n chat a̱ni, nyi myiai a̱fufwuo da̱ a̱lyiat nani, nang n dyuut nyin ndyo ma̱ a̱bada̱dei wusika kani a̱ni.

²³ N chat nyi lyen nang á̱ ka̱n ti̱n Timoti a̱na̱nyiuk nzi̱t wu, mi̱ jaru ji. Ka̱ a̱ bwuok a̱nggang a̱ bai a̱ji, zi̱ na bai dundung ma̱ng a̱nggu da̱ a̱vwuo nyin, zi̱ ka byiat nyin.

²⁴ Nyi byiat nzi̱t a̱yaakwak a̱son nyin ba, ma̱ng a̱mgba̱m á̱za̱za̱rak á̱niet khwi Yesu ba. A̱niet khwi nzi̱t ba, ba̱ shya̱ ma̱ a̱byin Italiya ka a̱ni, ba̱ byat nyin ba̱t.

²⁵ Yok A̱gwaza a̱ fa̱k shok a̱mgba̱m nyin!