Ibriniyawa 12 - A̠lyiat A̠gwaza na di̠n Tyap: A̠li̠ka̠uli A̠fai

Yesu wa yet A̱tsatsak Kidee A̱tyu Nwuak Fwuo da̱ A̱gwaza

¹ Mat a̱nia, nang á̱kpa á̱niet ba̱ tak nwuak fwuo mba hu da̱ A̱gwaza nswan, á̱ tyong nzi̱t á̱ keang á̱ nwuan nzi̱t a̱ni, nzi̱t meang ku myim zi̱ ji̱p a̱mgba̱m kuzang kyang ku swan kpa̱p ku na tyia̱ nzi̱t ndyem a̱ni; huhwa yet a̱ka̱tuk nyia̱ nang zi̱ chat nyia̱ ba̱t a̱ni. Yok zi̱ gbang a̱lyia̱, zi̱ tyong chung a̱khwom nang A̱gwaza tyia̱ nzi̱t ndyo a̱zaghyi a̱ni.

² Yok zi̱ tyia̱ a̱di̱dam nzi̱t wu di̱ Yesu kuzang jen. Nggu wa yet a̱gwak a̱ tsa nwuak fwuo da̱ A̱gwaza nzi̱t wu. A̱wot nggu wa bu na tyia̱ nwuak fwuo nzi̱t hu ku ngyet a̱tsatsak. Mat a̱lyia̱ sai nang Yesu na shya̱ á̱zanson a̱ni, a̱ ku gbang a̱lyia̱ nang á̱ nkpang nggu da̱ a̱team a̱khwu a̱ni. Á̱niet ba ku kyiak nang a̱khwu da̱ a̱team a̱khwu ngyet a̱ka̱tuk kyang nsum wa; a̱wot Yesu si̱ kyiak a̱nia bah. Ma̱ninika, Yesu swan a̱zayak da̱ a̱vwuo shi da̱ a̱beam a̱gba̱ndang chuk Tyok A̱gwaza ji.

³ Nyi dam, nyi tyan si̱sak nang Yesu nswuo a̱bung, a̱ si̱ gbang a̱lyia̱ mbwak á̱niet a̱ka̱tuk nyia̱ a̱ni. Da̱nian nyi ka yok but mi̱ fwuo, nyi ghwon nwuak fwuo nyin hu da̱ A̱gwaza wu bah.

⁴ Di̱ kwan nyin hu ma̱ng a̱ka̱tuk nyia̱, nyi ka̱n tat si̱sak nang nyi na nnwuak swuan nyin ji, á̱ hyaai nyin a̱ni bah.

Nyep A̱gwaza hu yet A̱tan Nkyang wa da̱ a̱vwuo Á̱niet Khwi

⁵ A̱wot nyi ka̱n bwung A̱lyiat A̱gwaza na̱ tyei nyin gba̱gbak nang mman A̱gwaza a̱ni a? Ma̱nang á̱ ndyuut a̱ni nyia̱, “Nggwon nung, myiai a̱fufwuo shansham, a fa̱k nyep A̱gwaza hu. A̱wot a yok nti̱n fwuo di̱n jen nang gu ntyiet ang a̱ni bah.

⁶ Mat A̱gwaza ni̱ nyep á̱niet nang gu chat wa a̱ni. A̱wot a̱ ni̱ tyiet kuzang nggwon nang gu kyiak ka, ka̱ yet nggwon nggu a̱ni.”

⁷ Nang nyi gbang a̱lyia̱ di̱ nyep nang A̱gwaza nyep nyin ma̱ng swuo a̱bung huni a̱ni, nyi jhyung nyi fi̱k nang A̱gwaza nnyep nyin nang a̱tsatsak mman nggu nia a̱ni. Á̱ ka̱n mbyia̱ nggwon nang a̱tyia̱ nka wu nwai nyep ka a̱ni a?

⁸ Ka̱ A̱gwaza nyep nyin nang gu ni̱ nnyep a̱mgba̱m mman nggu na a̱ni bah, ku fa nyi yet a̱tsatsak mman nggu nia bah. Da̱ a̱kwonu a̱kya, ku fa á̱ tyei nyin di̱n vak katnaan nia.

⁹ Ma̱ng a̱nia, zi̱ byia̱ a̱yaatyia̱ mi̱ swanta hu, ba̱ ni̱ nyep nzi̱t a̱ni, a̱wot zi̱ ni̱ nwuat ba shi. Ku na yet a̱ swak zi̱ shim zi̱ nwuak á̱pyia̱ nzi̱t da̱ a̱vwuo A̱tyia̱ nzi̱t wu a̱ ba̱ng tswá nzi̱t ji a̱ni, a̱ nyep zi̱t da̱nian zi̱ ka swuan si̱ nat sang sangba̱p baa?

¹⁰ A̱yaatyia̱ nzi̱t ba ba̱ tyei zi̱t mi̱ swanta hu a̱ni, ni̱ nyep nzi̱t da̱ a̱bachunchwiit njen di̱n vak nang ba̱ li ku myim mba a̱ni. A̱wot A̱gwaza ni̱ nyep nzi̱t kuzang jen zi̱ ka yet a̱tan á̱niet bya, da̱nian zi̱ ka mun á̱pyia̱ dundung ma̱ng a̱nggu, zi̱ yet á̱za̱za̱rak á̱niet.

¹¹ Á̱ mbyia̱ nyep ku byia̱ nyinyang di̱n jen nang á̱ nyia̱ nhu a̱ni bah. Ku ni̱ vwan a̱khwu ba̱t di̱n jen nang á̱ nnyep nzi̱t a̱ni. A̱wot ka̱ á̱ labeang bah, á̱niet nang á̱ nyep di̱n vak huni a̱ni, ba̱ shya̱ zang. Zang jija yet swat nyinyang ma̱ng nyia̱ tsotswat.

Á̱ Gba Á̱niet Khwi ba̱ yok Lak Shok A̱gwaza ji bah

¹² Mat a̱nia, nyi mup mbwak nyin na na̱ tyia̱ bobwot a̱ni, mi̱ chet. A̱wot nyi mbeang chet a̱khwukhwut nyin ba, ba̱ tyia̱ luluk a̱ni!

¹³ Nyi jhyi vak hu ku nat di̱di̱r da̱nian a̱ti̱tak nyin ba, mat á̱niet sang chet ma̱ng á̱si̱ nang a̱ti̱tak ba tyia̱ bobwot a̱ni, ba̱ du shyot á̱ kwa̱i. Da̱ a̱kwonu a̱kya, ba̱ tyia̱ chet.

¹⁴ Nyi kwan ba̱t, nyi li nang nyi swan swat nyinyang ma̱ng konyan. A̱wot nyi bu kwan nyi swan a̱za̱za̱rak nswat. Mat á̱ mbyia̱ a̱tyu a̱ na li A̱gwaza a̱ni bah, si̱ nang gu yet a̱za̱za̱rak.

¹⁵ Nyi cham á̱pyia̱ nyin. Nyi yong mi̱ chet. Nyi li nang a̱yin ma̱ nyin bwuok lilyim, a̱ si̱ lyin shok A̱gwaza ji bah. Nyi ta̱bam, kalak a̱yin ma̱ nyin a̱ li nang a̱ni̱nan a̱tyin a̱gba̱za̱zai a̱kwon ka̱ laai a̱ ghwut. Ka̱ si̱ tyia̱ á̱niet khwi ma̱ a̱di̱di̱t swuo a̱bung a̱ni, a̱wot ka̱ byian a̱tan swat á̱niet khwi á̱ghyang ma̱ng lyen nka hu.

¹⁶ Nyi ta̱bam, kalak á̱ ba̱ shya̱ a̱yin ma̱ nyin nang gu yet a̱tyu a̱shi̱shi̱k nyia̱, ma̱ng a̱tyu nwai fwuong a̱wun A̱gwaza nang Isuwa a̱ni. Nggu wa ku lyap gado yet a̱niet khwop nggwon nggu hu, mat kham kyayak jhyung ma̱nyin ji!

¹⁷ Nyi lyen, á̱ ku labeang bah, nang Isuwa ku ndyap gado nggu hu a̱ni. A̱ si̱ chat a̱tyia̱ nggu wu a̱ nang nggu a̱nu di̱ yet nggwon a̱ni̱nap. A̱wot a̱tyia̱ wu si̱ lak nggu ndyo. Ku nang Isuwa ku nnaai a̱tyia̱ wu a̱ tsa twei zwa ndyen a̱ni, jen si̱ swak guu. A̱ si̱ shya̱ nang a̱nu hu ma̱ng a̱li̱ba̱rka wu bah.

¹⁸ Nyi li nang á̱niet Isi̱rela ba a̱ni bah. Bibya ku bai kpa̱mkpaan ma̱ng A̱fan Si̱nai ka, nang á̱ si̱ mi̱n byiam a̱ni bah. Mat a̱fan ka ku byia̱ a̱nga̱ngak ndong ku ya a̱ni, a̱gbi̱ri̱ng ndyin, a̱duduu a̱vwuo, ma̱ng a̱ka̱tuk wun nza.

¹⁹ Mat nang ba̱ ku nfa̱k á̱ tyiap a̱gwa ka̱ tyei a̱wun a̱ni, ma̱ng a̱nwuat ka̱ bu tyei a̱wun a̱ni, ba̱ si̱ naai A̱gwaza gu yok ya a̱son mi̱ lyiat ma̱ng a̱mba bah.

²⁰ Mat nang ba̱ nwai khwi doka A̱gwaza ji ji̱ nyia̱, “Ku nang kyang zwá byiam a̱fan ka, ku yet ta hwa á̱ mang hu ma̱ng nfang, ku khwu.”

²¹ Musa ma̱ a̱pyia̱ nggu ku fa̱k a̱wun ba̱t di̱ kyang nang gu li a̱ni. A̱ si̱ nyia̱, “N fwuong a̱wun ba̱t, a̱wot vam hu si̱ tyi̱ri̱m nung!”

²² A̱wot nyin, nyi vwuon ma̱ng á̱niet Isi̱rela a̱bya, mat nyi bai kpa̱mkpaan ma̱ng A̱fan Si̱hiyona kya, ka̱ shya̱ Ma A̱gwaza tswazwa a̱ni. Ka̱ yet a̱keang A̱gwaza a̱ byia̱ swuan a̱ni. Kikya yet Urusha̱lima. A̱wot a̱ja wa a̱yaata̱m tswá A̱gwaza ba̱ yet chyikwop ma̱ a̱di̱di̱t a̱ni ntung, á̱ nyia̱ a̱gwai.

²³ Nyi ka̱n bai da̱ a̱vwuo nang mman ni̱nap A̱gwaza ntung a̱ni, á̱si̱ nang á̱ lyuut lyulyoot mba hu Ma A̱gwaza tswazwa a̱ni. Nyi ka̱n bai da̱ a̱vwuo A̱gwaza kya ma̱ a̱pyia̱ nggu. Nggu wa na nyia̱ konyan shi̱ri̱ya. Nyi ka̱n mbai da̱ a̱vwuo ntswá á̱tsotswat á̱niet ba̱ tung Ma A̱gwaza tswazwa a̱ni. Ma̱ninika, A̱gwaza ka̱n tyia̱ mba ba̱ yet á̱tsatsak á̱niet.

²⁴ Nyi ka̱n bai da̱ a̱vwuo Yesu, a̱tyu a̱ yong da̱ a̱ka̱wa̱tyia̱ á̱nietbishyi ma̱ng A̱gwaza da̱ a̱kwonu la̱p a̱li̱ka̱uli a̱fai hu a̱ni. A̱wot a̱sok nggu na nang á̱ koot á̱ si̱ ya̱sang a̱ni, ni̱nia chi a̱ka̱tuk nyia̱. Na̱ si̱ swak a̱sok Habila na̱ tak tan a̱ka̱tuk ma̱ng a̱ka̱tuk mi̱ yet a̱ni.

²⁵ Nyi ta̱bam, kalak nyi du lak myiai a̱fufwuo nyi fa̱k A̱tyu a̱ gba nzi̱t a̱ni. Mat ka̱ á̱niet Isi̱rela ba ku shot bah, di̱n jen nang ba̱ ku ndak myiai a̱fufwuo ba̱ si̱ fa̱k a̱lyiat Musa na a̱ni, nggu a̱ ku yet a̱ta̱m A̱gwaza wu mi̱ swanta hu a̱ni; a̱wot ku na swak ma̱ng yet a̱ka̱tuk za̱m, ki̱ zi̱ lak fa̱k A̱tyu a̱ lyiat ma̱ng a̱nzi̱t neet Ma A̱gwaza tswazwa ka a̱ni! A̱tsak a̱lyiat, zi̱ na shot bah.

²⁶ Di̱n jen nang A̱gwaza ku ndyiat da̱ A̱fan Si̱nai ka a̱ni, a̱nwuat nggu ka si̱ zwun a̱byin ka. A̱wot ma̱ninika, a̱ nyia̱ a̱li̱ka̱uli a̱ghyang, nyia̱, “Ma̱ninika, ma̱ a̱byin kikya n na zwun ma̱nyin ka bah. A̱wot n bu na zwun kyai tswazwa hu mameang.”

²⁷ A̱lyiat nani tak kpa̱sai nang a̱mgba̱m nkyang nang A̱gwaza mat mi̱ swanta hu a̱ni, á̱ na zwun naa. A̱wot á̱ ti̱n ná, mat mi̱ nkyang na na̱ nwai zwun a̱ni, ni̱nia na bwat ma̱nyin na.

²⁸ Mat a̱nia, ka̱nang A̱gwaza nang nzi̱t Tyok ku nwai zwun a̱ni, ku myim zi̱ gwai zi̱ kyuak A̱gwaza ntong ma̱ng a̱za̱za̱rak a̱wun, gu ka fa̱k nyinyang nzi̱t, a̱wot zi̱ bu nwuak gu a̱gba̱ndang shi.

²⁹ A̱tsak a̱lyiat, A̱gwaza nzi̱t wu li nang long hwa ku ya ma̱ a̱nga̱ngak a̱ngak a̱ni!