Ibriniyawa 1 - A̠lyiat A̠gwaza na di̠n Tyap: A̠li̠ka̠uli A̠fai

Yesu Kristi wa Tyai A̱gwaza Kpa̱sai

¹ Gbangbang, A̱gwaza ku lyiat ma̱ng a̱yaatyia̱ a̱khwop nzi̱t ba a̱bwonu a̱yaata̱m a̱kwonu nggu ba di̱n jen ma̱ng nvak ma̱ a̱di̱di̱t.

² A̱wot di̱n jen ngaan jini, A̱gwaza lyiat ma̱ng a̱nzi̱t a̱bwonu Nggwon nggu kya. Kikya nang A̱gwaza nyia̱ a̱li̱ka̱uli a̱ na tyia̱ kuzang kyang bwak nka, ku yet gado nkaa. A̱wot kikya yet vak nang A̱gwaza nnyia̱ swanta hu a̱ni.

³ Nggwon kikya tyai a̱kyenkyai shi A̱gwaza wu. A̱wot ka̱ si̱ bu tyai za̱kwa A̱gwaza ji ma̱ cha̱chaat. Kikya ba̱ng a̱mgba̱m kuzang kyang mi̱ swanta hu, mat chet a̱lyiat nka hu. Nang nggwon ka ntyak chi a̱ka̱tuk nyia̱ ka̱ si̱ jaat zi̱t a̱ni, ka̱ si̱ swan di̱n chuk tyok a̱zayak A̱gwaza Tswazwa, A̱ byia̱ A̱tsatsak A̱gba̱ndang Tyok a̱ni.

Kristi Swak A̱yaata̱m Tswá A̱gwaza ba ma̱ng Shi

⁴ Ma̱nang a̱kyenkyai shi nggu wu nswak si̱ a̱yaata̱m tswá A̱gwaza ba a̱ni, ma a̱nia wa a̱lyoot tyok nang A̱gwaza tyia̱ nggu a̱ni, nswak lyulyoot mba hu ma̱ za̱nzan.

⁵ Mat A̱gwaza ka̱n mak hyia̱ ma̱ng a̱ta̱m tswa a̱ghyang kyang nang gu hyia̱ ma̱ng Yesu a̱ni bah, mat A̱gwaza ku nyia̱, “A yet nggwon nung kya, N ma ngyet A̱tyia̱ ang wa a̱fwun.” A̱gwaza si̱ bu nyia̱, “N na ngyet a̱tyia̱ nggu wu. Nggu meang, a̱ na yet nggwon nung.”

⁶ Ma a̱nia wa, jen ji nang A̱gwaza na nta̱m Nggwon nggu ka ka̱ byia̱ shi a̱ swak kuzang kyang mi̱ swanta hu a̱ni, a̱ si̱ nyia̱, “Yok a̱mgba̱m a̱yaata̱m tswá A̱gwaza ba, ba̱ kyuak ntong a̱zaghyi nggu!”

⁷ A̱wot nang á̱ ndyiat tazwa a̱yaata̱m tswá ba a̱ni, á̱ si̱ nyia̱, “Nung, A̱gwaza, n ti̱n a̱yaata̱m tswá nung ba, n ta̱m ndyo nang wun a̱ni. A̱wot n si̱ nta̱m á̱khwo nung ba nang a̱ka̱lyera̱p ndong a̱ni.”

⁸ A̱wot tazwa Nggwon ka, á̱ si̱ nyia̱, “A swan da̱ a̱gba̱ndang chuk tyok ang wu, A̱gwaza, a nyia̱ tyok si̱ nat sang sangba̱p. A nyia̱ tyok hu ma̱ng a̱tsotswat shan tyok wa.

⁹ A chat tsotswat, a̱wot a si̱ lak a̱ka̱tuk. Mat a̱nia, A̱gwaza, A̱gwaza ang wu khai ang a nyia̱ tyok, a̱ si̱ koot ang a̱sham a̱myia̱ a̱gwai, ka̱ swak a̱si̱ konyan a̱ni.”

¹⁰ Á̱ si̱ bu nyia̱ ma̱ng Nggwon ka, “Neet di̱n tsa hu, A̱tyoli, nwan wa kpaat kuntyin a̱byin hu. Ma̱ng mbwak ang nia a si̱ nnyia̱ kyai tswazwa hu.

¹¹ Nkyang nani na tyak, a̱wot nwan, a na nshya̱ si̱ nat sang sangba̱p. A̱mgba̱m na, na tyak chet nang á̱khwukhwop a̱yaatoot a̱ni.

¹² A na kut naa nang gyepto a̱ni. A̱wot a na ji̱p naa nang á̱ ni̱ nji̱p a̱khwukhwop a̱toot a̱ni. A̱wot nwan, a shyak bah, a na swuan si̱ nat sang sangba̱p.”

¹³ A̱gwaza ka̱n mak hyia̱ ma̱ng a̱tyo nyiung ma̱ a̱yaata̱m tswá nggu ba bah nyia̱, “Swan da̱ a̱gba̱ndang chuk tyok a̱zayak nung ka, si̱ nang n tyia̱ á̱niet lak li ang ba a̱tafa ang, ba̱ yet ang chuk saai a̱ti̱tak.”

¹⁴ Mat a̱nia, a̱yaata̱m tswá ba yet ma̱ á̱khwo bya, nang A̱gwaza ni̱ ta̱m, ba̱ beang á̱niet ba̱ na shya̱ san sang sangba̱p ku yet gado mba a̱ni.