Filimon 1 - A̠lyiat A̠gwaza na di̠n Tyap: A̠li̠ka̠uli A̠fai

Byat

¹ Nung Bulut, a̱tyu a̱ shya̱ mi̱ jaru ji mat shei A̱sham nkhang Yesu Kristi ka a̱ni, ma̱ng Timoti a̱na̱nyiuk nzi̱t wu mi̱ khwi Kristi. Zi̱ byiat ang Filimon, a̱gi̱ngi̱ng a̱kpa̱ndang ta̱m nzi̱t wu nang zi̱ chat a̱ni.

² Zi̱ mun byiat a̱mgba̱m á̱niet khwi A̱gwaza ba, ba̱ ni̱ tung a̱mali ang ka a̱ni, ma̱ng A̱fiya a̱na̱nyiuk a̱nap nzi̱t wu mi̱ khwi Kristi, ma̱ng A̱kibut a̱kpa̱ndang nang zi̱ swuo a̱bung mi̱ ta̱m dundung ma̱ng a̱nggu a̱ni.

³ Yok A̱gwaza A̱tyia̱ nzi̱t wu, gu fa̱k shok nyin, a̱ bu nang nyin swat nyinyang mami A̱tyoli Yesu Kristi.

Bulut Gwai A̱gwaza mat Nwuak Fwuo Filimon

⁴ Filimon, kuzang jen, ki̱ n shya̱ di̱ naai A̱gwaza wu da̱nian ang, n ni̱ gwai.

⁵ Mat n fa̱k si̱sak ji a nchat á̱niet khwi A̱gwaza ba a̱ni, ma̱ng si̱sak ji a nnwuak fwuo di̱ Yesu Kristi a̱ni.

⁶ N naai A̱gwaza, mat mun á̱pyia̱ nzi̱t hu ma̱ng a̱nwan, nang zi̱ byia̱ di̱ nwuak a̱chuchuk hu a̱ni, na mbeang zi̱ ka nfi̱k kuzang a̱tan kyang shansham, mat shi Yesu Kristi hu.

⁷ A̱gi̱ngi̱ng a̱na̱nyiuk a̱ khwi Yesu a̱ni, si̱sak ji nang a nchat á̱niet khwi ba a̱ni, nwuak nung a̱lyia̱ sai. A̱wot ku si̱ tyia̱ nung ma̱ng á̱kum á̱niet khwi ka gba̱gbak ba̱t.

Bulut Naai Filimon da̱nian Oni̱simut

⁸ Ku nang n gbang a̱lyia̱ mi̱ Yesu Kristi, n kam ang a nyia̱ kyang ku myim a̱ni,

⁹ da̱ a̱kwonu a̱kya mat si̱sak ji nang n chat ang wa a̱ni, ku myim n naai ang. Nung Bulut, n gyet a̱niet khwop a̱niet. A̱wot ma̱nini á̱ bu nyim nung mi̱ jaru da̱nian Kristi Yesu.

¹⁰ Mat a̱nia, n bai ma̱ng a̱nak kani da̱nian Oni̱simut, a̱tyu a̱ ku yet nggwon nung mi̱ khwi Yesu Kristi, neet nang n ni̱ shya̱ mi̱ jaru ji a̱ni.

¹¹ Di̱n jen jhyang a̱ ku byia̱ tswá da̱ a̱vwuo ang bah. A̱wot ma̱nini a̱ byia̱ tswá da̱ a̱vwuo ang ma̱ng a̱nung.

¹² N na ta̱m ma̱ng a̱nggu ma̱ninika gu bwuok a̱ bai da̱ a̱vwuo ang, nggu wa nang n chat ma̱ng fwuo nyiung.

¹³ N za nchat n ghwon gu a̱ji ma̱ng a̱nung, gu nyia̱ nung ta̱m da̱ a̱kwonu ang, nang á̱ nyim nung mi̱ jaru mat A̱sham nkhang Yesu ka a̱ni.

¹⁴ A̱mgba̱m ma̱ng a̱nia, n chat n nyia̱ kyang di̱ mi̱ shim ang bah, kalak shok ang ji ji̱ li nang khwo a̱ni, ji̱ yet kyang nang a khai, a si̱ shim wa a̱ni bah.

¹⁵ Shimba, á̱ ku ghai Oni̱simut ma̱ng a̱nwan da̱ a̱banjen kya ma̱ chunchwiit, da̱nian a ka shya̱ nggu da̱ á̱kum jen ka, ba̱ng si̱ nat sang sangba̱p.

¹⁶ Ma̱ninika, a san gu nang a̱khwo wa a̱ni bah. A̱wot a̱ swak chet yet a̱khwo, a san gu nang a̱gi̱ngi̱ng a̱na̱nyiuk wa mi̱ khwi Yesu Kristi a̱ni. Si̱sak ji gu nshya̱ a̱gi̱ngi̱ng ma̱ng nung a̱ni, ma a̱nia wa gu nshya̱ gi̱ngi̱ng ma̱ng a̱nwan a̱ swak di̱ yet a̱khwo ma̱ng a̱na̱nyiuk di̱ khwi Yesu Kristi.

¹⁷ Mat a̱nia, ka̱ a kyiak nung nang a̱kpa̱ndang ta̱m ang a̱ni, ma a̱nia wa a na nsan nggu ma̱ cha̱chaat nang a nsan nung a̱ni.

¹⁸ Ka̱ a̱ bwuo ang a̱bun, ku a̱ ya ta ang hwa, ghwon nung ndyo.

¹⁹ Nung Bulut wa lyuut si̱ huni ma̱ng bwak nung: “N na tan ang si̱ a̱hwa.” (A̱wot n na njhyung ang nang a mba̱ng nung ta swuan swai ang hu bah.)

²⁰ Mat a̱nia, Filimon, a̱na̱nyiuk nung mi̱ khwi Yesu, ma̱sa̱kut n naai a nyia̱ nung shok da̱ a̱lyoot A̱gwaza. Yok a tyia̱ fwuo nung hu ku sai mami Yesu Kristi.

²¹ N dyuut ang dyo, n byia̱ gbang a̱lyia̱ a na shim kyang hu n naai ang a̱ni. N dyen a na nyia̱ kyang hu ku swak a̱nia a̱ni.

²² Kyang nyiung hwa nshya̱, n chat nyi jhyi nung a̱vwuo khwat. Mat n ba̱ng fwuo nang A̱gwaza na nfa̱k a̱mgba̱m naai nyin hu, a̱wot gu bu bwuok ma̱ng a̱nung a̱ bai ndyo da̱ a̱vwuo nyin.

Byat Ngaan

²³ A̱bafa̱rat, a̱tyu a̱ shya̱ mi̱ jaru ji ndung ma̱ng a̱nung da̱nian a̱lyoot Yesu Kristi ka a̱ni, byat ang.

²⁴ Ma̱rkut, Ari̱sta̱kut ma̱ng Dimat, mbeang Luka, a̱mgba̱m ba ba̱ yet á̱kpa̱ndang ta̱m nung a̱ni, mba meang ba̱ mun á̱ byat ang.

²⁵ Yok A̱tyoli Yesu Kristi, a̱ fa̱k shok a̱mgba̱m nyin.