A̱romawa 8 - A̠lyiat A̠gwaza na di̠n Tyap: A̠li̠ka̠uli A̠fai

Swat Mami A̱za̱za̱rak Ntswa

¹ Mat a̱nia, ma̱ninika á̱ byia̱ shi̱ri̱ya a̱khwu tazwa á̱niet ba̱ mun á̱pyia̱ ma̱ng Kristi Yesu a̱ni bah.

² A̱wot mat nang nyi mmun á̱pyia̱ ma̱ng Yesu Kristi a̱ni, chet A̱za̱za̱rak Ntswa hu ku si̱ tyia̱ nyi si̱ shot chet za̱kwa a̱ka̱tuk nyia̱ ku tyei a̱khwu a̱ni.

³ Doka Musa ji ku byia̱ chet nang ji̱ na nsan nzi̱t a̱ni bah, mat lat za̱kwa a̱ka̱tuk nyia̱ nzi̱t ji. Mat a̱nia, A̱gwaza si̱ nyia̱ ta̱m nang doka ji si̱ mi̱n nyia̱ a̱ni bah. A̱ si̱ ta̱m ma̱ng Nggwon nggu ka ka̱ byia̱ tangka̱i vam nang nzi̱t á̱niet a̱ka̱tuk nyia̱ ba byia̱ a̱ni. A̱wot mi̱ vam a̱hwa hwa, nang A̱gwaza ntak kpa̱sai nang tyok a̱ka̱tuk nyia̱ ntyak. A̱gwaza nyia̱ a̱nia, di̱ si̱sak nang gu nnwuak Nggwon nggu ka, ka̱ yet za̱nang da̱nian a̱ka̱tuk nyia̱ nzi̱t wu a̱ni.

⁴ A̱gwaza nyia̱ si̱ a̱hwa da̱nian zi̱ ka nyia̱ a̱jhyem a̱tsotswat nta̱m nang A̱gwaza chat zi̱ nyia̱ mami doka ji a̱ni; nzi̱t á̱niet zi̱ nwai swan swat za̱kwa a̱ka̱tuk nyia̱ a̱ni, a̱wot da̱ a̱kwonu a̱kya, zi̱ khwi A̱za̱za̱rak Ntswa wu wa.

⁵ Á̱niet ba nang za̱kwa a̱ka̱tuk nyia̱ nyia̱ tyok da̱ mba a̱ni, ba̱ ni̱ nyia̱ a̱di̱dam tazwa nkyang a̱ka̱tuk nyia̱ mi̱ nfwuo mba na. Ma a̱nia wa, á̱niet ba nang A̱za̱za̱rak Ntswa nyia̱ tyok da̱ mba a̱ni, ba̱ ni̱ nyia̱ a̱di̱dam tazwa nkyang nang A̱za̱za̱rak Ntswa wu chat a̱ni.

⁶ Mat a̱nia, ka a shim za̱kwa a̱ka̱tuk nyia̱ si̱ nyia̱ tyok mi̱ nfwuo ang hu, ji̱ na tyia̱ ang a̱khwu. Ma a̱nia wa, ka a shim A̱za̱za̱rak Ntswa wu si̱ nyia̱ tyok mi̱ fwuo ang hu, ji̱ na nwuak ang swuan ma̱ng swat nyinyang.

⁷ Za̱kwa a̱ka̱tuk nyia̱ ji ni̱ lak li A̱gwaza nchi̱ri̱ng. A̱wot za̱kwa a̱ka̱tuk nyia̱ si̱ mi̱n mak khwi doka A̱gwaza ji bah. A̱tsak a̱lyiat, ji̱ si̱ mi̱n mak mi̱ mak ji̱ khwi doka ji bah.

⁸ Huhwa mbyia̱, á̱niet ba nang za̱kwa a̱ka̱tuk nyia̱ nyia̱ tyok da̱ mba a̱ni, ba̱ si̱ mi̱n mak nyia̱ ta̱m ku myim A̱gwaza a̱ni bah.

⁹ A̱wot nyin, za̱kwa a̱ka̱tuk nyia̱ ja nyia̱ tyok da̱ nyin bah. A̱za̱za̱rak Ntswa wa nyia̱ tyok hu da̱ nyin; ka̱nang a̱tsak a̱lyiat wa nang A̱za̱za̱rak Tswa A̱gwaza wu shya̱ mi̱ nfwuo nyin na. (A̱wot nyi yok bwung bah, a̱mgba̱m á̱niet nang A̱za̱za̱rak Ntswa Kristi wu nwai shya̱ mi̱ nfwuo mba na a̱ni, ba̱ yet á̱niet khwi Kristi bya bah, ku ma̱ chunchwiit.)

¹⁰ Mat nang Kristi nshya̱ mi̱ nfwuo nyin na, ku nang nvam nyin na nkwi mat a̱ka̱tuk nyia̱ a̱ni, A̱za̱za̱rak Ntswa wu na nwuak nyin swuan. Mat A̱gwaza tak kpa̱sai nang gu nkyiak nyin á̱tsotswat á̱niet ma̱ng sang a̱bun bya a̱zaghyi nggu.

¹¹ A̱wot A̱za̱za̱rak Ntswa A̱gwaza wu a̱ ku ta̱ngam Yesu ma̱ng swuan ma̱ á̱niet ba̱ ka̱n kwi a̱ni, nggu wa shya̱ mi̱ nfwuo nyin na. A̱wot ma̱nang A̱gwaza nta̱ngam Kristi Yesu ma̱ng swuan ma̱ á̱niet ba̱ ka̱n kwi a̱ni; ma a̱nia wa a̱ na nwuak nvam nyin na na̱ kwi a̱ni swuan sang sangba̱p, mat ma̱ nggu A̱za̱za̱rak Ntswa wuni a̱ shya̱ mi̱ fwuo nyin na a̱ni.

¹² Mat a̱nia, nyin á̱niet khwi Yesu ba nang n chat a̱ni, ku yet ta hwa nyi yok khwi kyang nang za̱kwa a̱ka̱tuk nyia̱ nyin ji chat a̱ni bah.

¹³ Mat ki̱ nyi khwi kyang nang za̱kwa a̱ka̱tuk nyia̱ nyin ji chat a̱ni, nyi kai vak a̱khwu hwa a̱hwa. Ma a̱nia wa, ka̱ nyi shim A̱za̱za̱rak Ntswa wu wa si̱ nyia̱ tyok da̱ nyin, za̱kwa a̱ka̱tuk nyia̱ nyin ji na kwi. A̱wot nyi na shya̱ swuan sang sangba̱p.

¹⁴ A̱wot a̱mgba̱m á̱niet ba nang A̱za̱za̱rak Ntswa A̱gwaza wu kwak ba a̱son a̱ni, bibya yet mman A̱gwaza na.

¹⁵ A̱wot A̱za̱za̱rak Ntswa wu nang nyi san a̱ni, a̱ yet a̱si̱ a̱ tyei nyin nyi yet á̱khwo ba̱ fwuong a̱wun a̱ni bah. Da̱ a̱kwonu a̱kya, nyi san A̱za̱za̱rak Ntswa A̱gwaza wu wa di̱n jen nang A̱gwaza nsan nyin, a̱ si̱ kyiak nyin nyi yet mman nggu a̱ni. Ma̱ninika, zi̱ yei nggu, “Abba, A̱tyia̱!”

¹⁶ A̱wot A̱za̱za̱rak Ntswa wu ma̱ a̱pyia̱ nggu, mun dundung ma̱ng tswá nzi̱t ji. A̱ si̱ tak nang zi̱ ngyet á̱tsatsak mman A̱gwaza bya.

¹⁷ Nang zi̱ ngyet mman A̱gwaza nia a̱ni, zi̱ yet á̱niet ya gado nggu bya. A̱tsak a̱lyiat, zi̱ yet á̱niet ba̱ na ya gado a̱kyenkyai shi A̱gwaza wu dundung ma̱ng Kristi a̱ni. A̱wot ka̱ zi̱ chat zi̱ shya̱ a̱kwonu nzi̱t ma̱ng a̱kyenkyai shi Kristi wu, ku myim zi̱ swuo a̱bung ka ndung ma̱ng a̱nggu.

Shi nang Á̱niet Khwi na Shya̱ Á̱zanson a̱ni

¹⁸ A̱tsak a̱lyiat, a̱bung ka zi̱ swuo mi̱ jen jini a̱ni, á̱ si̱ mi̱n tyan ka ma̱ng a̱kyenkyai shi wu nang á̱ na tyai nzi̱t ndyo á̱zanson a̱ni bah.

¹⁹ A̱mgba̱m nkyang nang A̱gwaza mat mi̱ swanta hu a̱ni, na̱ twei ma̱ng a̱khwu ma̱ng di̱dang na̱ li mam a̱hwa á̱zanson nang A̱gwaza na ntyai tangka̱i á̱niet nang mman nggu na yet a̱ni.

²⁰ A̱gwaza shyi a̱ si̱ vwuong a̱mgba̱m nkyang nang gu nyia̱ mi̱ swanta hu a̱ni, di̱ nyia̱ nkyang nang gu la̱p a̱ sak na ndyo a̱ni, di̱ mi̱n shim na hu. A̱wot ku li á ngyei a̱mgba̱m kyang swanta na ntyia̱ fwuo ma̱ng di̱dang ba̱t.

²¹ Na̱ nwuan mam á̱zanson nang ba̱ na mmun ndung ma̱ng mman A̱gwaza ma̱ a̱kyenkyai shi nggu wu ma̱ sa̱t, ba̱ shot a̱khwu ma̱ng bwui a̱ni.

²² Zi̱ lyen, ku li á ngyei kuzang kyang nang A̱gwaza mat a̱ni, fwuong a̱khwu á̱ tu a̱nwurung nang a̱byii̱k ni̱ ntwei mi̱ byin a̱ni.

²³ A̱wot ma̱ninika, nzi̱t meang zi̱ fwuong nvam nzi̱t na na̱ shot ma̱ a̱ka̱tuk nyia̱ ma̱ng swuo a̱bung. Zi̱ bu tu a̱nwurung nang zi̱ nfwuong A̱gwaza a̱ nang zi̱t a̱ka̱wat nzi̱t na nang gu nsan a̱ si̱ kyiak zi̱t nang á̱tsatsak mman nggu a̱ni. Zi̱ fwuong a̱nia ku nang A̱za̱za̱rak Ntswa wu a̱ shya̱ mi̱ nfwuo nzi̱t na ntyia̱ zi̱ si̱ nwuak a̱chuchuk da̱ a̱kyenkyai shi nang zi̱ na shya̱ á̱zanson a̱ni.

²⁴ A̱wot jen ji nang A̱gwaza nsan nzi̱t a̱ni, a̱ tyia̱ zi̱ si̱ ntyia̱ fwuo di̱ nkyang nani na̱ chobai á̱zanson a̱ni. (A̱wot ka̱ zi̱ ka̱n shya̱ kyang zi̱ chat a̱ni, ku yet ta hwa zi̱ ntyia̱ fwuo da̱ nhu bah.

²⁵ A̱wot ka̱ zi̱ tyia̱ fwuo di̱ kyang á̱zanson nang zi̱ ka̱n shya̱ a̱ni bah, ku yet ta hwa, zi̱ gbang a̱lyia̱ zi̱ nyap fwuo zi̱ fwuong.)

²⁶ A̱wot A̱za̱za̱rak Ntswa wu ni̱ beang nzi̱t mami lat zi̱t hu. Kidee, zi̱ lyen si̱sak ji nang ku mmyim zi̱ naai A̱gwaza a̱ni bah. A̱wot A̱za̱za̱rak Ntswa wu wa ni̱ naai A̱gwaza da̱nian nzi̱t ma̱ng tu a̱nwurung, da̱nang á̱ si̱ mi̱n tyai ma̱ng swáng a̱lyiat a̱ni bah.

²⁷ A̱wot A̱gwaza a̱ yet A̱tyia̱ a̱ni, a̱ lyen a̱mgba̱m nfwuo á̱nietbishyi na, a̱ si̱ lyen kyang nang A̱za̱za̱rak Ntswa wu fa a̱ni. Mat A̱za̱za̱rak Ntswa wu ni̱ naai A̱gwaza da̱nian nzi̱t á̱za̱za̱rak á̱niet khwi nggu ba. Naai hu ku nat cha̱chaat ma̱ng kyang nang A̱gwaza chat a̱ni.

²⁸ A̱wot zi̱ lyen nang A̱gwaza nnyia̱ ta̱m kuzang jen, da̱nian a̱ ka nyia̱ a̱tan nta̱m a̱ mbeang á̱niet ba̱ chat gu a̱ni. Bibya yet á̱niet nang gu khai cha̱chaat ma̱nang gu nda̱p a̱ sak a̱ni.

²⁹ A̱tsak a̱lyiat, A̱gwaza ku mi̱ ndyen tangka̱i á̱niet nang á̱niet nggu ba na yet á̱zanson a̱ni. A̱wot a̱ si̱ mi̱ nkhai mba neet gbangbang ba̱ li nang Nggwon nggu ka a̱ni. Da̱nian Nggwon nggu kikya ka̱ ka yet a̱niet khwop wu mami á̱na̱nyiuk ma̱ a̱di̱di̱t, á̱sam ma̱ng á̱nap.

³⁰ A̱wot á̱niet ba nang A̱gwaza khai a̱ni, bibya gu yorong ba̱ bai da̱ a̱vwuo nggu. A̱wot á̱niet ba nang gu yorong a̱ni, a̱ si̱ tak kpa̱sai nang gu nkyiak mbaa á̱tsotswat á̱niet ma̱ng sang a̱bun a̱zaghyi nggu. A̱wot á̱niet ba nang gu tak kpa̱sai nang gu nkyiak mba á̱tsotswat á̱niet ma̱ng sang a̱bun a̱zaghyi nggu a̱ni, a̱ si̱ nang mba a̱kyenkyai shi nggu wu.

Á̱ Mbyia̱ Kyang ku na Ghai Nzi̱t ma̱ng Chat A̱gwaza a̱ni bah

³¹ Mi̱ yihwa zi̱ na hyia̱ di̱ nkyang na̱ shya̱ a̱zaghyi nzi̱t ka a̱ni? Ki̱ A̱gwaza shya̱ dundung ma̱ng a̱nzi̱t, a̱nyan wa maai a̱ nyia̱ na̱nvan ma̱ng a̱nzi̱t?

³² Mat nang A̱gwaza nnwai vwuong ma̱ng Nggwon nggu ka nang gu byia̱ ma̱nyin ka a̱ni, a̱wot a̱ si̱ neap ka nang za̱nang a̱ni da̱nian zi̱t a̱mgba̱m; a̱tsak a̱lyiat, ku fa za̱m, A̱gwaza na nang zi̱t kuzang kyang meang!

³³ A̱nyan wa maai a̱ tyia̱ á̱niet ba nang A̱gwaza khai a̱ni a̱bun? A̱gwaza wa tak kpa̱sai nang gu nkyiak mba á̱tsotswat á̱niet ma̱ng sang a̱bun a̱zaghyi gu.

³⁴ A̱nyan wa maai a̱ nyia̱ nzi̱t shi̱ri̱ya? A̱yin maai bah, mat Yesu Kristi wa khwu da̱nian nzi̱t. A̱wot á̱ si̱ ta̱ngam nggu ma̱ng swuan ma̱ á̱niet ba̱ ka̱n khwi a̱ni da̱nian nzi̱t. Nggu wa swan di̱n chuk tyok a̱zayak A̱gwaza, a̱ ni̱ naai A̱gwaza wu da̱nian nzi̱t.

³⁵ Zang ntangka̱i nkyang nia maai na̱ nvwuong Kristi chat nzi̱t? Swuo a̱bung hwa na nvwuong nggu chat nzi̱t hu kee? A̱daat wa ke ya̱shuk hwa, zong ja ke kunak hwa, a̱shong a̱ghyi wa, kee tswat ja?

³⁶ (Ma̱nang A̱lyiat A̱gwaza na nhyia̱ a̱ni, “Da̱nian ang kya, á̱ ni̱ hyaai nzi̱t kuzang jen. Á̱ ni̱ fak zi̱t nang zón seap ja a̱ni.”)

³⁷ A̱mgba̱m ma̱ng a̱nia, á̱ mbyia̱ kyang ku na vwuong A̱gwaza chat zi̱t a̱ni bah. A̱mgba̱m ma̱ng á̱ka̱tuk nkyang nani, zi̱ swuo chet na ma̱ za̱nzan, mat Kristi a̱tyu a̱ chat zi̱t a̱ni.

³⁸ Mat n nwuak a̱chuchuk, nang á̱ mbyia̱ kyang ku na vwuong A̱gwaza chat zi̱t a̱ni bah. Ku a̱khwu kya, ku swuan ja, ku a̱yaata̱m tswá A̱gwaza bya, ku á̱ka̱tuk ntswá bya, ku a̱wun a̱fwun kya, ku a̱fi̱fa nkyang na̱ chobai á̱zanson a̱ni, ku kuzang tangka̱i a̱ka̱tuk tyok,

³⁹ ku kuzang tangka̱i tyok ma̱ gbang mi̱ kyai tswazwa, ku ntyok ma̱ a̱tsuung a̱byin mi̱ swanta. A̱tsak a̱lyiat, ku kuzang kyang nang A̱gwaza mat a̱ni, ku maai mi̱ maai ku vwuong A̱gwaza chat zi̱t hu nang gu tyai da̱ a̱vwuo Kristi Yesu, A̱tyoli nzi̱t wu a̱ni bah.