A̱romawa 6 - A̠lyiat A̠gwaza na di̠n Tyap: A̠li̠ka̠uli A̠fai

Yesu wa Swuo Chet A̱ka̱tuk Nyia̱

¹ A̱wot shimba á̱ na hyia̱ ku á̱ fa; yok zi̱ ya a̱son ma̱ng a̱ka̱tuk nyia̱, da̱nian A̱gwaza a̱ ka shya̱ a̱wat a̱ mbeang fa̱k shok da̱ nzi̱t wa kee?

² Kaai, ku ma̱ chunchwiit! Zi̱ wa ka̱n kwi da̱ a̱vwuo a̱ka̱tuk nyia̱, a̱ bu si̱ mi̱n nyia̱ tyok da̱ nzi̱t bah. Zi̱ na nyia̱ ni zi̱ bu ngya a̱son ma̱ng swan mami tyok nggu hu?

³ Ke nyi bwung wa la! Jen nang á̱ ku nyia̱ nzi̱t ba̱ptisman ji da̱nian zi̱ ka mun á̱pyia̱ ma̱ng Kristi Yesu a̱ni, ku li a ngyei zi̱ ku mun á̱pyia̱ dundung ma̱ng a̱nggu da̱ a̱khwu nggu ka baa?

⁴ A̱wot ku li a ngyei zi̱ ku khwu, á̱ si̱ niat nzi̱t ndung ma̱ng Kristi mi̱ Ba̱ptisman ji. A̱wot ma̱nang á̱ ku nta̱ngam Kristi ma̱ng swuan ma̱ á̱niet ba̱ ka̱n kwi a̱ni, mat chet A̱gwaza a̱ yet A̱tyia̱ a̱ byia̱ a̱kyenkyai shi a̱ni, ma a̱nia wa ma̱ninika nzi̱t meang, zi̱ na swan swat swuan swai.

⁵ Nang zi̱ mmun á̱pyia̱ dundung ma̱ng Kristi mi̱ tangka̱i a̱khwu nggu hu a̱ni, ma a̱nia wa nzi̱t meang á̱ na ta̱ngam nzi̱t ma̱ng swuan ma̱ á̱niet ba̱ ka̱n kwi a̱ni, ma̱nang á̱ ku nta̱ngam nggu a̱ni.

⁶ Zi̱ lyen ku yet ta hwa, zi̱ ni̱ njhyung nang á̱ ku nkpang a̱khwukhwop a̱ka̱tuk za̱kwa nzi̱t wu da̱ a̱team a̱khwu wu ma̱ng Kristi, da̱nian zi̱ ka swuo chet a̱ka̱tuk nyia̱ mi̱ swat nzi̱t hu. A̱wot zi̱ bu yet á̱khwo a̱ka̱tuk nyia̱ bah.

⁷ A̱wot jen nang zi̱ ku nkwi ndung ma̱ng Kristi a̱ni, á̱ si̱ ti̱n zi̱t mi̱ tyok a̱ka̱tuk nyia̱, a̱wot zi̱ si̱ yet á̱sa̱t á̱niet bya.

⁸ A̱wot nang zi̱ ka̱n kwi ndung ma̱ng Kristi a̱ni, zi̱ lyen nang zi̱ na ngya a̱son ma̱ng swan ndung ma̱ng a̱nggu meang.

⁹ Zi̱ nwuak a̱chuchuk di̱ si̱ huni, mat á̱ ta̱ngam Kristi ma̱ng swuan ma̱ á̱niet ba̱ ka̱n kwi a̱ni. A̱wot a̱ bu si̱ mi̱n mak khwu bah. A̱khwu ka bu si̱ mi̱n nyia̱ tyok tazwa nggu bah.

¹⁰ Jen nang Kristi ku nkhwu a̱ni, a̱khwu nggu ka a̱ka̱nyiung ka̱ maai ka̱ swuo chet tyok a̱ka̱tuk nyia̱ hu. A̱wot ma̱ninika, nang gu nswuan a̱ni, a̱ swuan da̱nian gu ka nwuak A̱gwaza shi hwa.

¹¹ Ma a̱nia wa, nyin meang ku yet ta hwa nyi kyiak á̱pyia̱ nyin nang á̱niet ba̱ ka̱n kwi da̱ a̱vwuo tyok a̱ka̱tuk nyia̱, a̱wot a̱ka̱tuk nyia̱ si̱ mi̱n nyia̱ tyok da̱ nyin bah. A̱wot nyi kyiak á̱pyia̱ nyin nang á̱niet ba̱ swuan ba̱ ka nwuak A̱gwaza shi di̱ mun á̱pyia̱ ma̱ng Kristi Yesu a̱ni.

¹² Mat a̱nia, nyi yok shim a̱ka̱tuk nyia̱ a̱ nyia̱ tyok mi̱ nvam nyin na bah. Nyi yok shim nyi khwi shyuo a̱ka̱tuk nyia̱ bah.

¹³ Nyi bu yok nwuak nkap nvam nyin na na̱ yet nkyang ta̱m a̱ka̱kpa̱t. A̱wot nyi bu nnyia̱ a̱ka̱tuk nyia̱ ma̱ng á̱na bah. Da̱ a̱kwonu a̱kya, nyi nwuak á̱pyia̱ nyin jhyem da̱ a̱vwuo A̱gwaza. Mat, nyi ka̱n kwi di̱ nyia̱ a̱ka̱tuk. A̱wot ma̱ninika, á̱ ta̱ngam nyin ma̱ng swuan swai ma̱ á̱niet ba̱ ka̱n kwi a̱ni. Mat a̱nia, si̱ nyi nyia̱ ta̱m ma̱ng a̱mgba̱m nvam nyin na, na̱ yet nkyang a̱tan nta̱m, da̱nian nyi ka nwuak A̱gwaza shi.

¹⁴ Nyi yok shim a̱ka̱tuk nyia̱ a̱ nyia̱ tyok tazwa nyin nang a̱tyoli nyin a̱ni bah. Mat, doka Musa ji ni̱ nyia̱ tyok da̱ nyin bah. Da̱ a̱kwonu a̱kya, nyi swan ma̱ sa̱t mbwak tyok shok A̱gwaza ja.

Á̱tsotswat Á̱khwo A̱gwaza

¹⁵ A̱wot nang shok A̱gwaza ji nnyia̱ tyok da̱ nzi̱t, a̱wot zi̱ bu yet á̱sa̱t á̱niet a̱ni, zi̱ bu shya̱ mbwak tyok doka ji bah. Ka̱ a̱nia wa, ku fa zi̱ ya a̱son ma̱ng a̱ka̱tuk nyia̱ a? Kaai, ku ma̱ chunchwiit!

¹⁶ Nyi lyen nang nyi ngyet á̱khwo kuzang kyang nang nyi khai nyi khwi nhu wa a̱ni a? Ka̱ doot nyi khai nyi yet á̱khwo a̱ka̱tuk nyia̱, a̱ na tyia̱ nyin a̱khwu a̱ni; ku nyi khai nyi khwi A̱gwaza a̱ na tyia̱ nyi swan nang á̱tsotswat á̱niet a̱ni.

¹⁷ A̱wot zi̱ gwai A̱gwaza, ku nang nyi ku ngyet á̱khwo a̱ka̱tuk nyia̱ a̱ni, a̱wot ma̱ninika, nyi san tyiet nzi̱t hu, nyi si̱ khwi nhu ma̱ng fwuo nyiung.

¹⁸ Ma̱ninika, nyi yet á̱sa̱t á̱niet bya. Nyi bu yet á̱khwo a̱ka̱tuk nyia̱ bah. Da̱ a̱kwonu a̱kya, nyi yet á̱khwo di̱ swan swat yet á̱tsotswat á̱niet bya da̱ a̱vwuo A̱gwaza.

¹⁹ Mat nang za̱kwa yet á̱nietbishyi nyin ji mbyia̱ lat a̱ni, n dyiat ma̱ng a̱nyin di̱ kidee nyia̱ khwo, n ka beang nyin nyi fi̱k a̱mgba̱m tyiet huni. Di̱n jen swak ji, nyi ku shim nyi yet á̱khwo a̱shi̱shi̱k nyia̱ ma̱ng tsot wun ku kwak nyin nyi mbeang nyia̱ a̱ka̱tuk nyia̱ a̱ni. A̱wot ma̱ninika, ku yet ta hwa nyi nwuak á̱pyia̱ nyin, nyi yet á̱khwo di̱ swat tsotswat hwa da̱nian nyi ka yet á̱za̱za̱rak á̱niet.

²⁰ Mi̱ njen nyi ku ngyet a̱khwo di̱ nyia̱ a̱ka̱tuk nyia̱ a̱ni, tsotswat si̱ mi̱n nyia̱ tyok tazwa nyin bah.

²¹ Zang kpangti̱n ja nyi ku shya̱? Ma̱ninika, nyi fwuong nsum di̱ nkyang nang nyi ku nyia̱ di̱n jen swak a̱ni; nkyang na na̱ tyei nyin a̱khwu sang sangba̱p ka a̱ni!

²² A̱wot ma̱ninika, nang á̱ nti̱n nyin mbwak tyok a̱ka̱tuk nyia̱, nyi si̱ shya̱ shot, nyi yet á̱sa̱t á̱niet a̱ni. Nyi bu yet á̱khwo A̱gwaza bya. Ma̱ninika, nyi nyia̱ nkyang na̱ na tyei nyin yet a̱za̱za̱rak á̱niet, a̱wot na̱ nwuak nyin swuan sang sangba̱p a̱ni.

²³ Mat záng a̱ka̱tuk nyia̱ ji yet a̱khwu kya, a̱wot za̱nang nang A̱gwaza nang zi̱t a̱ni, ji̱ si̱ yet swuan sang sangba̱p ja, nang á̱ shyat di̱ mun á̱pyia̱ ma̱ng Kristi Yesu A̱tyoli nzi̱t wu a̱ni.