A̱romawa 3 - A̠lyiat A̠gwaza na di̠n Tyap: A̠li̠ka̠uli A̠fai

A̱gwaza yet A̱tsotswat wa kuzang Jen

¹ Ka̱ a̱yin doot a̱ lyip nyia̱, zang kpangti̱n ja nang á̱ shyat di̱ yet a̱tyu A̱yahudawa? Zang kpangti̱n ja nang tyia̱ mi̱ chen hu nnwuat?

² A̱tsak a̱lyiat, A̱yahudawa ba byia̱ kpangti̱n gba̱mgbam di̱ kuzang vak! Di̱ ntsa hu, A̱yahudawa bya nang A̱gwaza ma̱ a̱pyia̱ nggu ku tyai mba a̱mgba̱m a̱lyiat nggu na. A̱wot a̱ si̱ tyia̱ mba ndyo mbwak.

³ A̱wot mami a̱tsak a̱lyiat, A̱yahudawa á̱ghyang si̱ lak khwi a̱lyiat A̱gwaza na tsotswat hu. A̱wot ma̱nang ba nwai khwi a̱lyiat A̱gwaza na tsotswat a̱ni, ku fa A̱gwaza mun a̱ nwai yet a̱tsotswat waa?

⁴ Kaai, ku ma̱ chunchwiit! Ku nang konyan ngyet a̱tyu a̱ka̱laa wa a̱ni, A̱gwaza yet a̱tyu a̱tsatsak a̱lyiat wa. Ma̱nang á̱ ndyuut tazwa A̱gwaza ma̱ A̱lyiat nggu na a̱ni, nyia̱, “Kuzang jen nang a ndyiat, konyan na fa̱k nang a ndyiat a̱tsatsak a̱lyiat wa za̱m. A̱wot a na swuo chet a̱tyu lak li ang wu mi̱ tutu shi̱ri̱ya.”

⁵ Shimba, á̱ghyang á̱niet na hyia̱ nyia̱, “Ka̱ a̱ka̱tuk nyia̱ nzi̱t wu tak kpa̱sai nang A̱gwaza ngyet a̱tsotswat wa, yihwa zi̱ na hyia̱? Ku fa, A̱gwaza nwai nyia̱ tsotswat hwa di̱n jen nang gu nnyep zi̱t a̱ni a?” (N dyiat di̱ li a̱tyubishyi hwa.)

⁶ Kaai! Ku ma̱ chunchwiit! Ka̱ A̱gwaza wa nwai yet a̱tsotswat, a̱ na nyia̱ ni wa a̱ nshya̱ a̱wat nang gu na nnyia̱ swanta hu shi̱ri̱ya a̱ni?

⁷ Shimba ka̱ doot a̱ghyang a̱niet a̱ ya fwuang nyia̱, “Ki̱ nwai nyia̱ tsotswat nung hu na mbeang A̱gwaza tsotswat hu, a̱wot ku nwuak nggu a̱gba̱ndang shi, yihwa na mbyia̱ A̱gwaza a̱ nyia̱ nung tangka̱i shi̱ri̱ya nang gu na nnyia̱ a̱tyu a̱ka̱tuk nyia̱ ndyo a̱ni?”

⁸ A̱tsak a̱lyiat, á̱ghyang á̱niet ka̱n tyam nzi̱t, nyia̱ zi̱ ni̱ tyiet, nyia̱, “Yok zi̱ ya a̱son ma̱ng nyia̱ a̱ka̱tuk nyia̱, da̱nian zi̱ ka shya̱ a̱tan kyang.” Á̱niet ba lyiat a̱nia a̱ni, ku myim á̱ nyia̱ mba shi̱ri̱ya.

A̱mgba̱m Á̱nietbishyi ba yet Á̱niet A̱ka̱tuk Nyia̱ bya

⁹ Mat a̱nia, nzi̱t A̱yahudawa ba, ka̱ doot zi̱ nyia̱ zi̱ lan á̱kum Nnwap na̱ nwai yet A̱yahudawa a̱ni aa? Kaai, ku ma̱ chunchwiit! Mat zi̱ wa ka̱n tak nang a̱mgba̱m á̱niet swanta ba, ku ba̱ yet A̱yahudawa bya, ku ba̱ yet Nnwap na̱ nwai yet A̱yahudawa bya a̱ni; a̱mgba̱m mba, za̱kwa a̱ka̱tuk nyia̱, nyia̱ tyok da̱ mba.

¹⁰ Ma̱nang á̱ ndyuut ma̱ A̱lyiat A̱gwaza na a̱ni, nyia̱, “Á̱ mbyia̱ a̱tyu a̱ yet a̱tsotswat a̱ni bah, ku a̱tyo a̱nyiung.

¹¹ Á̱ mbyia̱ a̱tyu a̱ byia̱ a̱tsatsak mumwang a̱ni bah. Da̱ mba, á̱ mbyia̱ a̱tyu a̱ chat a̱ shya̱ A̱gwaza a̱ni bah.

¹² A̱mgba̱m á̱niet ba ba̱ ni̱ bwuak ba̱ tyia̱ zat. Ba̱ si̱ yet á̱niet sang tswá bya. Á̱ mbyia̱ a̱tyu a̱ nyia̱ a̱tan kyang a̱ni bah, ku a̱tyo a̱nyiung.”

¹³ “A̱lyiat nunu mba na ni̱ nyui nang swam kwom ku ghwut ma a̱gang lyak a̱ni. Lilyem mba hu ni̱ nhyat tyentyang ma̱ng a̱ka̱laa.” “A̱lyiat mba na byia̱ lyen nang lyen tsuup a̱byin a̱ni.”

¹⁴ “Nunu mba hu ni̱ nhyaai ma̱ng fwoi ma̱ng shyi á̱niet.”

¹⁵ “Ba̱ ni̱ ghan ba̱ nat hyaai á̱niet.

¹⁶ A̱wot ba̱ ni̱ hyaai kuzang kyang, koji wa nang ba̱ nnat ba̱ ni̱ tyia̱ á̱ghyang á̱niet ba̱ kyiak a̱junjung njen nang ba̱ swuo a̱bung.

¹⁷ Da̱ mba, ba̱ lyen si̱sak nang ba̱ na nswan swat nyinyang ma̱ng á̱ghyang á̱niet a̱ni bah!

¹⁸ Da̱ mba, ba̱ fwuong a̱wun A̱gwaza bah, ku ma̱ chunchwiit.”

¹⁹ Ma̱ninika, zi̱ lyen kuzang kyang ku shya̱ mi̱ doka ji a̱ni, á̱ lyuut hu da̱nian A̱yahudawa nang doka ji nyia̱ tyok da̱ mba a̱ni. Mbeang a̱nia, ta̱m doka huhwa yet; ku vwuong a̱mgba̱m á̱niet ba̱ shyat ta̱fwat kwop a̱dyii̱ng di̱ shi̱ri̱ya A̱gwaza ji a̱ni. A̱wot ku si̱ bu tak kpa̱sai nang a̱mgba̱m á̱niet swanta ba mbwuo a̱bun a̱zaghyi A̱gwaza.

²⁰ Mat á̱ mbyia̱ a̱tyu nang A̱gwaza na tak kpa̱sai a̱ kyiak gu nang a̱tsotswat a̱yin a̱ sang a̱bun a̱zaghyi nggu, di̱n vak khwi doka hu a̱ni bah. A̱wot ta̱m hu nang doka ji nyia̱ a̱ni, huhwa yet; ku tak a̱tyubishyi nang gu ngyet a̱tyu a̱ka̱tuk nyia̱ wa.

Kristi Khwu da̱ a̱kwonu Nzi̱t

²¹ A̱wot ma̱ninika, A̱gwaza tak zi̱t vak ghyang nang gu na ntak kpa̱sai a̱ kyiak zi̱t zi̱ yet á̱tsotswat á̱niet ba̱ sang a̱bun a̱zaghyi nggu a̱ni. A̱ si̱ tak kpa̱sai a̱ kyiak zi̱t á̱tsotswat á̱niet di̱ mi̱n khwi kyang hu nang doka ji tyiet a̱ni. Vak huni hwa yet si̱ nang á̱ ku nnyia̱ a̱li̱ka̱uli wu mi̱ doka Musa ji, ma̱ng a̱lyiat nang a̱yaata̱m a̱kwonu A̱gwaza ba ku lyuut gbangbang a̱ni.

²² A̱gwaza na tak kpa̱sai nang gu nkyiak zi̱t zi̱ yet á̱tsotswat á̱niet ba̱ sang a̱bun a̱zaghyi nggu, di̱n vak nwuak fwuo di̱ Yesu Kristi hwa. A̱wot vak huni hwa yet a̱tsatsak wu nang konyan na nnwuak fwuo da̱ nggu a̱ni; ku a yet a̱tyu A̱yahudawa wa, ku a̱tyu Nwap a̱ nwai yet A̱yahudawa a̱ni.

²³ Mat konyan nyia̱ a̱ka̱tuk nyia̱. A̱mgba̱m zi̱t, zi̱ si̱ lat zi̱ ntat gak a̱kyenkyai shi A̱gwaza hu.

²⁴ A̱mgba̱m ma̱ng a̱nia, A̱gwaza a̱ fwuong shok konyan a̱ni, a̱ tak kpa̱sai nang gu nkyiak zi̱t zi̱ yet á̱tsotswat á̱niet ba̱ sang a̱bun a̱zaghyi nggu a̱ni. A̱gwaza nyia̱ si̱ huni di̱n vak Kristi Yesu, di̱n jen nang gu nsan nzi̱t zi̱ yet á̱sa̱t á̱niet da̱ a̱vwuo nggu a̱ni.

²⁵ A̱gwaza ku neap Yesu kpa̱sai a̱ yet za̱nang a̱ ka chi a̱ka̱tuk nyia̱ nzi̱t wu. A̱gwaza na tak kpa̱sai nang gu nkyiak á̱niet ba ba̱ yet á̱tsotswat ba̱ sang a̱bun a̱zaghyi nggu di̱n vak nwuak a̱chuchuk mba hu nang Yesu Kristi neap swuan nggu ji, ji̱ yet za̱nang da̱nian nzi̱t a̱ni; ma̱ng si̱sak nang gu nnwuak a̱sok nggu na, a̱ si̱ khwu da̱ a̱team a̱khwu wu a̱ni. Za̱nang jini tak nang A̱gwaza nfaat shi̱ri̱ya nggu ji tsotswat, nang gu mbwuok lilyim a̱ si̱ tyia̱ á̱niet ba, ba̱ nyia̱ a̱ka̱tuk nyia̱ gbangbang a̱ni, si̱ swuo a̱bung bah.

²⁶ Nang A̱gwaza nnyap fwuo nggu hu a̱ni, a̱ nwuan á̱zanson, a̱ si̱ mun a̱ ntyia̱ á̱niet gbangbang a̱bya di̱ kyang nang gu na nyia̱ di̱ yong huni a̱ni, a̱ ka tak nang nggu ma̱ a̱pyia̱ nggu ngyet a̱tsotswat wa. A̱wot a̱ bu chat a̱ tak kpa̱sai nang gu nkyiak konyan a̱ yet a̱tsotswat ma̱ng sang a̱bun a̱zaghyi nggu di̱n vak nwuak fwuo di̱ Yesu.

²⁷ Ka̱ a̱nia wa, yihwa yet nkyang nang zi̱ na ntam na̱ tyia̱ A̱gwaza a̱ nsan nzi̱t a̱ni? Kyang hwa bah. A̱gwaza tak kpa̱sai nang gu nkyiak zi̱t zi̱ yet á̱tsotswat á̱niet ma̱ng sang a̱bun a̱zaghyi nggu, mat zi̱ khwi doka ja bah. Da̱ a̱kwonu a̱kya, A̱gwaza san nzi̱t, mat nang zi̱ nnwuak nfwuo di̱ Yesu Kristi wa a̱ni.

²⁸ Mat a̱nia, A̱gwaza tak kpa̱sai nang gu nkyiak zi̱t zi̱ yet á̱tsotswat á̱niet ma̱ng sang a̱bun a̱zaghyi nggu, mat nang zi̱ nnwuak fwuo di̱ Yesu Kristi wa a̱ni, a̱wot kang ma̱ng khwi doka ja.

²⁹ Ke A̱gwaza wu yet a̱si̱ A̱yahudawa wa ma̱nyin baa? A̱ mun a̱ yet a̱si̱ Nnwap na̱ nwai yet A̱yahudawa bya a̱ni baa? A̱tsak a̱lyiat, a̱ mun a̱ yet A̱gwaza a̱si̱ Nnwap na̱ nwai yet A̱yahudawa bya a̱ni meang.

³⁰ A̱gwaza wu yet a̱nyiung wa. A̱wot a̱ tak kpa̱sai nang gu nkyiak á̱niet ba, ba̱ yet á̱tsotswat á̱niet ma̱ng sang a̱bun a̱zaghyi nggu mat nwuak fwuo di̱ Yesu Kristi wa a̱ni; ku ba̱ yet A̱yahudawa bya, ku ba̱ yet Nnwap na̱ nwai yet A̱yahudawa bya a̱ni.

³¹ A̱wot ki̱ zi̱ nyia̱ A̱gwaza san nzi̱t mat nwuak fwuo di̱ Yesu hwa ma̱nyin hu, ku fa nang zi̱ nshyak doka jija a̱ni a? Kaai, ku ma̱ chunchwiit! A̱tsak a̱lyiat, jen nang zi̱ nnwuak fwuo di̱ Yesu a̱ni, zi̱ tak nang doka ji ngyet a̱tsatsak wa.