A̱romawa 2 - A̠lyiat A̠gwaza na di̠n Tyap: A̠li̠ka̠uli A̠fai

A̱gwaza Nyia̱ Shi̱ri̱ya nggu ji Tsotswat

¹ Ma a̱nia wa, nwan a̱tyu a dam a na bat á̱ghyang á̱niet a̱bun a̱ni, a mun nyia̱ a̱ka̱tuk nyia̱ wu nang ba̱ nyia̱ a̱ni. Mat a̱nia, a byia̱ ta̱fwat bah! A̱wot jen nang a mbat ntangka̱i á̱niet a̱nia a̱bun, nyia̱ ku myim á̱ nyiak mba a̱ni, a nyia̱ a̱pyia̱ ang kya shi̱ri̱ya ji. Mat nwan a̱tyu a bat á̱ghyang ang a̱bun a̱ni, nwan meang, a mun nyia̱ a̱ka̱tuk nyia̱ a̱wa.

² A̱wot zi̱ lyen, A̱gwaza nyia̱ shi̱ri̱ya nggu ji tsotswat, a̱ khai a̱yin da̱ á̱ghyi bah. A̱ na nyiak kuzang a̱yin ma̱ cha̱chaat ma̱ng kyang nang gu nyia̱ a̱ni.

³ Nwan a̱tyubishyi! Mat nang a mbat á̱ghyang á̱niet a̱bun tazwa a̱ka̱tuk nyia̱ nang a mun nyia̱ a̱ni, a̱nia wa nang a nfa a na nshot shi̱ri̱ya A̱gwaza ji a?

⁴ Ke a jhyuai si̱sak nang A̱gwaza nfa̱k a̱gba̱ndang shok, a̱ si̱ nyap fwuo, a̱ si̱ nwai vwuot lyen hu da̱ nwan a̱ni a? Si̱ huni yet a̱buk kyang wa da̱ a̱vwuo ang a? Ka̱ doot a li nang A̱gwaza, mat shok nggu ji, a̱ nwuat ang a̱wat a ghwon a̱ka̱tuk nyia̱ ang wu, a shyak a̱chyet kya baa?

⁵ A̱wot mat gba̱p a̱pyia̱ ang hu, ma̱ng fufwuo nchet ang hu, a si̱ lak ghwon a̱ka̱tuk nyia̱ ang wu. A̱nia wa a mban a̱pyia̱ ang kya si̱sak nang A̱gwaza na nnyia̱ ang shi̱ri̱ya ji byia̱ chet a̱ni. Mat a̱tuk mwai lyen A̱gwaza ka chobai, nang gu na nnyia̱ a̱tsotswat shi̱ri̱ya tazwa á̱niet ka kpa̱sai a̱ni.

⁶ A̱gwaza na nyia̱ konyan shi̱ri̱ya ma̱ cha̱chaat ma̱ng kyang hu nang gu nyia̱ a̱ni.

⁷ Á̱niet ba ba̱ ni̱ gbang a̱lyia̱ ba̱ nyia̱ a̱tan nta̱m, ba̱ ni̱ chat A̱gwaza a̱ chyin mba za̱m, a̱wot ba̱ ni̱ chat á̱ nang mba zang ji̱ yet swuan ji̱ nwai tyiai a̱ni; A̱gwaza na nang ntangka̱i á̱niet nani swuan sang sangba̱p.

⁸ Ma a̱nia wa, á̱niet chat á̱pyia̱, á̱niet lak khwi a̱tsak a̱lyiat, ma̱ng á̱niet ba̱ swan swat a̱ka̱tuk nyia̱ a̱ni; A̱gwaza na fa̱k a̱lyia̱ ya ma̱ng a̱mba ba̱t. A̱wot a̱ tak ba mwai lyen nggu hu kpa̱sai.

⁹ A̱mgba̱m á̱niet ba̱ nyian a̱ka̱tuk a̱ni, ba̱ na swuo a̱bung, a̱wot vam ku niaat mbaa. A̱gwaza na tsa nyia̱ A̱yahudawa bya shi̱ri̱ya ji. A̱wot á̱ sii nyia̱ Nnwap na̱ nwai yet A̱yahudawa a̱ni ndyo mameang.

¹⁰ Ma a̱nia wa, a̱mgba̱m á̱niet ba̱ nyia̱ a̱tan nta̱m a̱ni, A̱gwaza na chyin mba ba̱t, a̱wot a̱ nang mba swat nyinyang. A̱gwaza na tsa ma̱ng A̱yahudawa bya, a̱wot Nnwap na̱ nwai yet A̱yahudawa a̱ni meang na̱ sii ntung.

¹¹ Mat A̱gwaza khai á̱niet da̱ á̱ghyi bah.

¹² Nnwap na̱ nwai yet A̱yahudawa na̱ nyia̱ a̱ka̱tuk nyia̱ a̱ni, á̱ na nyia̱ mba shi̱ri̱ya cha̱chaat ma̱ng kyang ba̱ lyen a̱ni, ku nang ba̱ mbyia̱ doka A̱gwaza nang á̱ lyuut da̱nian ba̱ khwi a̱ni bah. Ma a̱nia wa A̱yahudawa ba nang A̱gwaza ku nwuak mba doka nggu ji a̱ni; ki̱ ba̱ lak khwi nji hu, á̱ na nyia̱ mba shi̱ri̱ya cha̱chaat ma̱ng a̱nji.

¹³ Mat fwuong doka ma̱ng a̱fufwuo bya ma̱nyin hu, na tyia̱ nzi̱t zi̱ ngyet á̱tsotswat á̱niet sang a̱bun a̱zaghyi A̱gwaza bah. A̱wot khwi a̱mgba̱m doka huhwa na tyia̱ zi̱ ngyet á̱tsotswat a̱zaghyi A̱gwaza.

¹⁴ Ku nang Nnwap na̱ nwai yet A̱yahudawa nsang doka nang á̱ lyuut a̱ni, a̱mgba̱m ma̱ng a̱nia, jen jhyang na̱ ni̱ nyia̱ kyang hu doka ji tak a̱ni, di̱ si̱sak nang nfwuo mba na nchat a̱ni. Si̱ a̱hwa tak nang ba̱ ngyet á̱niet ba̱ byia̱ doka A̱gwaza ji mi̱ nfwuo mba na, a̱wot ba̱ si̱ lyen ji, ku nang ba̱ mbyia̱ doka nang á̱ lyuut mba ndyo a̱ni bah.

¹⁵ A̱chyet mba ka tak nang á̱ ndyuut doka A̱gwaza ji mi̱ nfwuo mba na. Mat a̱di̱dam mi̱ nfwuo mba wu ni̱ kpaat mbaa, a̱ hyia̱ ma̱ng mba ku ba̱ nyia̱ tsotswat ku ba̱ nyia̱ a̱ka̱tuk.

¹⁶ A̱wot A̱sham Nkhang nang n shei nyin a̱ni, kikya ka; mam chobai nang A̱gwaza na nnyia̱ á̱niet ba shi̱ri̱ya tazwa a̱di̱dam nang ba̱ nyia̱ di̱ niat mi̱ swat mba hu a̱ni. A̱wot Kristi Yesu wa nang A̱gwaza nwuak gu tyok nang gu na nnyia̱ konyan shi̱ri̱ya ji a̱ni.

A̱yahudawa ma̱ng Doká Musa ji

¹⁷ A̱wot nwan, ka̱ a nyia̱ a yet a̱tsatsak a̱tyu A̱yahudawa, a ni̱ nwuak a̱chuchuk di̱ ta̱yuk di̱ doka nang A̱gwaza ku nwuak Musa, ji̱ ka san ang a̱ni, a̱wot a ni̱ tam tazwa a̱gi̱ngi̱ng a̱meang ang wu ma̱ng A̱gwaza.

¹⁸ A dam nang a nfi̱k nkyang nang A̱gwaza chat a̱ni. A dam a lyen kyang ku yet a̱tan a̱ni, mat á̱ tyiet ang doka A̱gwaza ji.

¹⁹ Lyen doka ang hu tyia̱ a dam nwan wa yet a̱tyu a̱ na tak Nnwap na̱ nwai yet A̱yahudawa a̱ni a̱chuchuk wu, ma̱nang a̱tyu a̱ kwak á̱niet a̱fi̱fan shán ni̱ ntak ma̱ng a̱mba vak a̱ni. A bu dam a yet long sang da̱ a̱vwuo á̱niet ba̱ bwuk mi̱ ndyin a̱ni.

²⁰ A̱wot a dam ka̱ doot a tyiet á̱niet chyi kyang ma̱ng a̱chyuang mman nvak lyen A̱gwaza. Mat a nwuak a̱chuchuk nang doka A̱gwaza ji nnwuak ang a̱jhyem lyen nkyang ma̱ng a̱tsatsak a̱lyiat.

²¹ Ka̱ a̱nia wa, nwan a̱tyu a̱ tyiet á̱ghyang á̱niet a̱ni, a tyiet a̱pyia̱ ang a? A ni̱ nyia̱ á̱ yok tsang, a̱wot nwan meang, a nyiin a?

²² Nwan a̱tyu a̱ nyia̱ á̱ yok katnaan a̱ni, a katnaan a? Nwan a ni̱ lak kyuak ntong a̱zaghyi nghwughwu a̱yaagwaza sang swuan a̱ni, a ni̱ shya̱ kpangti̱n ma̱ng nkyang nang á̱ nyiin ma̱ á̱tutu a̱yaagwaza sang swuan mba a̱ni a?

²³ A tam ba̱t nyia̱ a lyen doka A̱gwaza ji. A̱wot a jhyuai A̱gwaza wu di̱ si̱sak ji nang a ndak khwi nji hu a̱ni.

²⁴ Ma a̱nia wa, nang A̱lyiat A̱gwaza na nhyia̱ a̱ni, “Mat nyin bya mbyia̱, nang Nnwap na̱ nwai yet A̱yahudawa a̱ni, nnyia̱ A̱gwaza lihyat hu.”

²⁵ Tyia̱ mi̱ chen ang hu a̱tyu A̱yahudawa, ku yet, ka̱nang a khwi doka A̱gwaza ji. A̱wot ka̱ a lak khwi doka A̱gwaza ji, a shyak ma̱ng a̱tyu Nwap a̱ nwai yet a̱tyu A̱yahudawa nang á̱ nwai tyia̱ mi̱ nchen hu a̱ni bah.

²⁶ Ma a̱nia wa, ka̱ a̱tyu Nwap a̱ nwai yet a̱tyu A̱yahudawa a̱ni khwi doka A̱gwaza ji, A̱gwaza na kyiak gu nang a̱tyo nyiung mami á̱niet nggu a̱ni baa?

²⁷ A̱tsak a̱lyiat, a̱tyu Nwap a̱ nwai yet a̱tyu A̱yahudawa a̱ nwai tyia̱ a̱pyia̱ nggu mi̱ chen a̱ni, a̱wot ka̱nang gu khwi doka A̱gwaza ji shansham, a̱ na tak nang A̱gwaza ngyet a̱tsotswat a̱ nyia̱ ang shi̱ri̱ya, ku nang nwan wa yet a̱tyu A̱yahudawa nang á̱ tyia̱ ang mi̱ chen hu, a si̱ bu byia̱ doka A̱gwaza ji, a̱wot a si̱ lak khwi nji hu a̱ni.

²⁸ A yet a̱tsatsak a̱tyu A̱yahudawa mat á̱niet mbyin ang ba yet A̱yahudawa bya, ku á̱ tyia̱ ang mi̱ chen hwa bah.

²⁹ Da̱ a̱kwonu a̱kya, a̱tsatsak a̱tyu A̱yahudawa nggu wa yet a̱tyu A̱yahudawa mami nfwuo. A̱wot a̱tsatsak tyia̱ mi̱ chen wu, nggu wa yet tyia̱ mi̱ chen mami nfwuo! Tangka̱i tyei mi̱ chen huni hwa yet si̱ nang A̱za̱za̱rak Ntswa A̱gwaza wa nyia̱ a̱ni, kang ma̱ng khwi doka ma̱nyin ji nang á̱ lyuut a̱ni. Tangka̱i a̱yin a̱hwa, chat A̱gwaza wa a̱ chyin nggu, kang ma̱ng a̱tyubishyi.