A̱romawa 16 - A̠lyiat A̠gwaza na di̠n Tyap: A̠li̠ka̠uli A̠fai

Bulut Byat Á̱kpa̱ndang nggu ba ma̱ A̱keang Rom

¹ N chat n chyin Fibi, a̱na̱nyiuk a̱nap nzi̱t wu, a̱ yet a̱tyu khwi Kristi dundung ma̱ng a̱nzi̱t. A̱ si̱ yet a̱tyu beang mi̱ sot á̱niet khwi ba̱ shya̱ ma̱ a̱keang Ka̱nkiriya ka a̱ni.

² Nyi san Fibi mbwak nfeang mami a̱lyoot A̱tyoli Yesu. A̱ maai á̱ nwuak gu shi ma̱ á̱niet khwi A̱gwaza ba. A̱wot nyi beang nggu ma̱ng kuzang tangka̱i beang nang gu chat da̱ a̱vwuo nyin a̱ni. Mat nggu meang a̱ ka̱n beang á̱ghyang á̱niet ma̱ a̱di̱di̱t, bi̱ri̱ng ma̱ng a̱nung.

³ Nyi byiat nung Biriskila mbeang a̱tyok nggu wu A̱kila. Ba̱ yet á̱kpa̱ndang ta̱m nung bya mi̱ nta̱m Kristi Yesu.

⁴ A̱tsak a̱lyiat, bibya ku nwuak á̱pyia̱ mba ma̱ng swuan mba ji da̱nian nung. N gwai mba ba̱t, ma̱ng a̱mgba̱m susot á̱niet khwi ba̱ nwai yet A̱yahudawa ba a̱ni.

⁵ A̱wot nyi mun byiat nung á̱niet khwi ba ba̱ ni̱ tung a̱gbang A̱kila ma̱ng Biriskila a̱ni. A̱wot nyi mun byiat nung A̱banitut, a̱gi̱ngi̱ng a̱kpa̱ndang nung wu. Nggu wa yet a̱son nwuo khwi Kristi, mi̱ fam a̱byin A̱siya hu.

⁶ Nyi mun byiat nung Ma̱ryamu, a̱ ku hyai nta̱m ba̱t, da̱nian nyi ka shya̱ beang.

⁷ Nyi mun byiat A̱nda̱ranikut ma̱ng Yuniyat, zi̱ mun yet A̱yahudawa bya; á̱ ku tyia̱ mba mi̱ jaru ji ndung ma̱ng a̱nung. Mami a̱yaata̱m Yesu ba, á̱ ku chyin mba ba̱t. A̱wot ba̱ ku shya̱ a̱son nung di̱ nwuo khwi Kristi hu.

⁸ Nyi mun byiat A̱mifilitut, nggu wa yet a̱gi̱ngi̱ng a̱kpa̱ndang nung wu, di̱ mun á̱pyia̱ mi̱ khwi A̱tyoli Yesu.

⁹ Nyi mun byiat A̱banut, a̱ yet a̱kpa̱ndang nzi̱t mi̱ nta̱m Kristi, ma̱ng Istaki, a̱gi̱ngi̱ng a̱kpa̱ndang nung a̱ghyang.

¹⁰ A̱wot nyi mun byiat A̱folit, a̱ yet a̱tsatsak a̱tyu khwi Kristi wa. Nyi mun byiat á̱niet khwi ba, ba̱ yet kyang mbwak A̱ri̱tobulut a̱ni.

¹¹ Nyi mun byiat Hirudiyan, a̱na̱nyiuk nung wu nang zi̱ mun yet A̱yahudawa ba ndung a̱ni. Nyi mun byiat á̱niet khwi A̱tyoli Yesu ba, ba̱ yet kyang mbwak Na̱kisut hu a̱ni.

¹² Nyi mun byiat nung Ta̱ra̱finat, ma̱ng Ta̱ra̱fusat, ba̱ yet á̱niet nta̱m A̱tyoli Yesu bya; a̱wot ma̱ng Ba̱risa nang n fa̱k da̱ nggu a̱ni, a̱ ka̱n nyia̱ ta̱m ba̱t da̱nian A̱tyoli Yesu.

¹³ Nyi mun byiat Rufot, a̱tyu nang A̱gwaza ku kyiak gu yet a̱tsatsak a̱tyu khwi nggu a̱ni. Mbeang a̱yang byin nggu wu nang n fa̱k da̱ nggu a̱ni, a̱ bu yet a̱yang wa da̱ a̱vwuo nung.

¹⁴ Nyi mun byiat A̱si̱ki̱ri̱ta, Fi̱liguna, Ha̱rmit, Fa̱turubat, Hamat, ma̱ng a̱mgba̱m á̱niet khwi ba̱ ni̱ tung dundung ma̱ng a̱mba a̱ni.

¹⁵ Nyi mun byiat Filugusa, Yuliya, A̱lumfat, Na̱riyut mbeang a̱na̱nyiuk nggu wu a̱nap, ma̱ng a̱mgba̱m á̱niet khwi Yesu ba̱ ni̱ tung dundung ma̱ng a̱mba a̱ni.

¹⁶ Nyi ni̱ mbyiat á̱ghyang nyin kuzang jen. Nyi vwuk á̱ghyang nang á̱niet khwi ba̱ chat á̱ghyang a̱ni. A̱mgba̱m susot á̱niet khwi Kristi ji a̱ji, byat nyin.

Bulut Ngaan A̱lyiat nggu na

¹⁷ A̱wot ma̱ninika, á̱niet khwi Yesu ba nang n chat a̱ni, kyang nyiung hwa nang n chat n bu naai nyin. Nyi cham, nyi bu ta̱bam ma̱ng á̱niet ba̱ tyei nang nyi nghai pyipyia̱ nyin di̱ susot a̱ni. A̱wot ba̱ si̱ bu chat ba̱ tyia̱ nyin á̱ga̱u di̱ nwuak fwuo nyin hu di̱ Yesu. Mat tyiet mba hu ku vwuon ma̱ng si̱ nang á̱ ka̱n tyiet nyin a̱ni. Nyi yok khwi mba bah.

¹⁸ Tangka̱i á̱niet tyiet a̱ka̱laa bani nyia̱ Kristi A̱tyoli nzi̱t wu ta̱m hwa bah, ba̱ nyia̱ á̱pyia̱ mba kya ta̱m hu. Ba̱ ni̱ myiai nunu, ba̱ fak a̱ka̱laa. A̱ni wa ba̱ ndaai á̱niet ba ba̱ byia̱ a̱di̱dam nang mman a̱ni.

¹⁹ A̱wot nyi yok bwung bah, konyan ka̱n dyen si̱sak nang nyi nkhwi A̱sham Nkhang A̱tyoli Yesu ka ma̱ cha̱chaat a̱ni. Mat a̱nia, n byia̱ a̱lyia̱ sai ba̱t. N chat nyi yet á̱niet mumwang di̱ nyia̱ a̱tan nkyang, a̱wot nyi yok byia̱ a̱ka̱ta di̱ nyia̱ nkyang na̱ yet a̱ka̱tuk a̱ni bah.

²⁰ A̱gwaza a̱ nwuat swat nyinyang a̱ni, na tyia̱ nyi shai A̱ta̱nyeang ka ma̱ng a̱ti̱tak nyin ba. Yok A̱tyoli nzi̱t wu Yesu Kristi, a̱ fa̱k shok nyin.

²¹ Timoti, a̱kpa̱ndang ta̱m nung wu byat nyin ba̱t. Ma a̱nia wa, Lukiyat, Yason, ma̱ng Sosiba̱ta̱ra, ba̱ mun á̱ yet A̱yahudawa ba ndung ma̱ng a̱nung a̱ni.

²² (Nung Tatiyut, nung gwa n dyuut nyin wusika jini da̱ a̱kwonu Bulut. N mun byat nyin. N mun ngyet a̱tyo nyiung wa ma̱ á̱niet khwi Yesu Kristi ba.)

²³ Gayut, a̱tyu a̱ ku san nung mbwak nfeang a̱ si̱ nwuak nung a̱vwuo kwai; a̱wot a̱ si̱ bu nwuak á̱kum sot á̱niet khwi ka tutu nang ba̱ ntung a̱ni, mun a̱ byat nyin. A̱rastut, a̱tyu a̱ ni̱ sak kurum a̱keang hu a̱ni, mbeang Ka̱watut a̱na̱nyiuk nzi̱t a̱ghyang, ba̱ mun á̱ byat nyin.

Bulut Dyep A̱gwaza di̱ Ngaan hu

²⁵ Ma̱ninika, yok zi̱ dyep A̱gwaza, a̱wot zi̱ bu nwuak gu shi! Mat nggu wa maai a̱ tyia̱ nzi̱t chet ma̱nang A̱sham Nkhang ka nhyia̱ a̱ni. A̱lyiat nani tazwa Yesu Kristi, na̱ tyai kpa̱sai la̱p sak A̱gwaza hu da̱nian nyin Nnwap na̱ nwai yet A̱yahudawa a̱ni. La̱p sak huni nshya̱ di̱ niat neet di̱n jen ntsa ji.

²⁶ A̱wot ma̱ninika, A̱sham Nkhang kani, á̱ tyai nka kpa̱sai ma̱nang a̱yaata̱m a̱kwonu A̱gwaza ba ntak á̱zanson ka a̱ni; ma̱ng si̱sak nang A̱gwaza a̱ swuan si̱ nat sang sangba̱p nkam a̱ni. A̱wot á̱ tyai nka da̱ a̱vwuo a̱mgba̱m nnwap mi̱ bibyin swanta hu, da̱nian mba meang ba̱ ka nwuak fwuo di̱ Kristi, ba̱ khwi ngguu.

²⁷ Yok a̱kyenkyai shi a̱ yet a̱si̱ A̱gwaza a̱nyiung, a̱ byia̱ mumwang ma̱nyin nggu a̱ni, mat chet a̱lyoot Yesu Kristi si̱ nat sang sangba̱p. Samba̱rka!