A̱romawa 15 - A̠lyiat A̠gwaza na di̠n Tyap: A̠li̠ka̠uli A̠fai

Yok Á̱niet Khwi ba̱ Swan Swat Beang Á̱ghyang

¹ Nzi̱t á̱niet khwi zi̱ nwuak a̱chuchuk nang Kristi shim nzi̱t ndyo zi̱ nyia̱ nkyang njhyang a̱ni, ku myim zi̱ nyap fwuo ma̱ng á̱niet khwi ba̱ but mi̱ fwuo di̱ nkyang njhyang nang Yesu shim mba ndyo a̱ni. Zi̱ yok nyia̱ mi̱ nkyang na̱ myim nzi̱t wa a̱ni bah.

² Ku myim zi̱ beang á̱niet khwi á̱ghyang ba̱ tat á̱ghyi di̱ nyia̱ kyang ku yet a̱tan a̱ni, a̱wot zi̱ bu tyia̱ mba gba̱gbak mi̱ khwi A̱tyoli Yesu hu.

³ Mat ku nggu Kristi ma̱ a̱pyia̱ nggu, a̱ ku nyia̱ kyang ku myim nggu wa a̱ni bah. Á̱ lyuut ma̱ A̱lyiat A̱gwaza kyang nang gu hyia̱ ma̱ng A̱gwaza a̱ni, nyia̱, “Ma̱nang á̱ nfwoi ang a̱ni, ma a̱nia wa nang fwoi nang á̱ fwoi ang a̱ni, ku kwa da̱ nung mameang.”

⁴ Kuzang kyang nang á̱ ku lyuut gbangbang ma̱ A̱lyiat A̱gwaza na a̱ni, á̱ ku lyuut wa da̱nian á̱ ka tyiet zi̱t, zi̱ mban si̱sak ji nang zi̱ na ntyia̱ fwuo a̱ni. A̱lyiat A̱gwaza na si̱ bu tyei nzi̱t gba̱gbak nang zi̱ nswan ma̱ng nyap fwuo fwuong a̱li̱ka̱uli A̱gwaza a̱ na bai da̱ a̱nu ka a̱ni.

⁵ Yok A̱gwaza a̱ tyei nzi̱t zi̱ nyap fwuo a̱ni. A̱wot a̱ si̱ bu tyei nzi̱t gba̱gbak gba̱mgbam a̱ni, gu beang nyin nyi swan swat mun á̱pyia̱ ma̱ng á̱ghyang nyin, ma̱nang ku mmyim á̱niet khwi Yesu Kristi ba a̱ni.

⁶ A̱jawa a̱mgba̱m nyin na mbai dundung ma̱ng a̱nwuat a̱nyiung. Nyi dyep A̱gwaza dundung. Nyi bu nwuak gu shi. Nggu wa yet A̱tyia̱ A̱tyoli nzi̱t wu, Yesu Kristi.

Nnwap na̱ Nwai yet A̱yahudawa a̱ni Mun á̱ Shya̱ A̱sham Nkhang ka

⁷ Mat a̱nia, nyi san á̱ghyang nyin mbwak nfeang ma̱nang Yesu Kristi nsan nyin a̱ni, da̱nian á̱ ka nwuak A̱gwaza shi.

⁸ Nyi jhyung nang Kristi ku mbai nang a̱khwo a̱ni da̱ a̱vwuo A̱yahudawa, gu ka tak ba nang A̱gwaza ni̱ mba̱ng a̱li̱ka̱uli nang gu ku nyia̱ a̱yaatyia̱ a̱khwop mba ba ndyo a̱ni.

⁹ Ma a̱nia wa, Kristi bu ku bai da̱nian Nnwap na̱ nwai yet A̱yahudawa a̱ni, na̱ ka nwuak A̱gwaza shi. Mat A̱gwaza yet a̱tyu fwuong kunak mba wa. Ma̱nang a̱tyu lyuut Za̱bura wu ku nfa, a̱ si̱ ndyuut a̱ni nyia̱, “Mat si̱ huni, n na tyia̱ Nnwap na̱ nwai yet A̱yahudawa a̱ni na̱ dyep ang. A̱wot n bu na bwom a̱bwom n dyep a̱lyoot ang ka.”

¹⁰ A̱wot á̱ bu lyuut da̱ a̱vwuo á̱ghyang nyia̱, “A̱mgba̱m nyin Nnwap na̱ nwai yet A̱yahudawa a̱ni, nyi gwai dundung ma̱ng á̱niet A̱gwaza ba!”

¹¹ A̱wot á̱ bu lyuut mi̱ Za̱bura a̱ghyang nyia̱, “A̱mgba̱m nyin Nnwap na̱ nwai yet A̱yahudawa a̱ni, nyi dyep A̱gwaza! A̱mgba̱m nnwap mi̱ bibyin swanta na nyi dyep guu!”

¹² A̱wot Ishaya a̱ta̱m a̱kwonu A̱gwaza si̱ bu hyia̱ nyia̱, “A̱ka̱mbwon ka̱ na ya gado tyok a̱gwam Da̱wuda a̱ni, na bai. Ka̱ na nyia̱ tyok tazwa Nnwap na̱ nwai yet A̱yahudawa a̱ni. A̱wot na̱ na tyia̱ fwuo da̱ a̱ka̱mbwon a̱kya.”

¹³ N naai A̱gwaza, a̱ yet a̱tyin tyia̱ fwuo a̱ni, gu nang nyin a̱lyia̱ sai ma̱ng swat nyinyang gba̱mgbam, mat nang nyi nnwuak fwuo da̱ nggu a̱ni. A̱jawa nyi na mbeang gbang a̱lyia̱ ma̱ng tyia̱ fwuo nyin hu gba̱mgbam da̱ nggu, mat nang A̱za̱za̱rak Ntswa wu ntyia̱ nyin chet a̱ni.

Kyang ku mbyia̱ Bulut Ndyuut Wusika jini a̱ni

¹⁴ Á̱niet khwi Yesu ba nang n chat a̱ni, a̱tsak a̱lyiat, nyi ya a̱son ma̱ng swan a̱tan swat nyin wu. Nyi bu lyen nkyang nani ba̱t. A̱wot nyi maai nyi tyiet á̱ghyang nyin naa.

¹⁵ A̱mgba̱m ma̱ng a̱nia, n ku ndyuut nyin nkyang jhyang. N si̱ ghwut kpa̱sai n si̱ njhyung nyin naa. N ku nyia̱ a̱nia, mat shok nang A̱gwaza nyia̱ nung ndyo wa a̱ni.

¹⁶ Shok jini tyia̱ n si̱ ngyet a̱ta̱m nang Kristi Yesu ta̱m nggu da̱ a̱vwuo nyin, nyi yet Nnwap na̱ nwai yet A̱yahudawa a̱ni. N shei nyin A̱sham Nkhang ka, da̱nian n ka neap nyin nang za̱nang a̱ni da̱ a̱vwuo A̱gwaza; nang A̱za̱za̱rak Ntswa wu njaat nyin nyi si̱ tyia̱ za̱za̱rak a̱ni.

¹⁷ Mat a̱nia, ka̱ doot n tam tazwa a̱mgba̱m nkyang nang Yesu Kristi nyia̱ nung ndyo, di̱ nta̱m nang n nyia̱ A̱gwaza ndyo a̱ni.

¹⁸ A̱mgba̱m ma̱ng a̱nia, n si̱ mi̱n mak tam tazwa kyang bah; si̱ mi̱ kyang nang Yesu Kristi tyia̱ n si̱ nyia̱ a̱ni. Nang gu ntyia̱ n si̱ nshei Nnwap na̱ nwai yet A̱yahudawa A̱sham nkhang ka a̱ni, n si̱ mbai ma̱ng a̱mba da̱ a̱vwuo A̱gwaza. A̱ si̱ tyia̱ ba̱ si̱ fa̱k, da̱nian ba̱ ka nwuak fwuo da̱ A̱gwaza.

¹⁹ Chet a̱ga̱de ma̱ng nkyang a̱ri̱bi̱di, ma̱ng chet A̱za̱za̱rak Ntswa nang Nnwap na̱ nwai yet A̱yahudawa ku li a̱ni, ku tyia̱ na̱ si̱ nwuak a̱chuchuk da̱ A̱sham Nkhang ka. Di̱ nvak huni hwa, n si̱ nshei A̱sham Nkhang Kristi ka, neet Urusha̱lima ba̱ng si̱ nat fam a̱byin Ili̱rikum.

²⁰ Kyang nang n ku ntyia̱ á̱zanson n na nyia̱ a̱ni, huhwa yet; n shei A̱sham Nkhang Yesu ka da̱ a̱vwuo á̱niet ba̱ ka̱ nwai fa̱k nkhang a̱lyoot Kristi na a̱ni. Mat n ku nchat n kpaat sot á̱niet khwi da̱ a̱vwuo nang á̱ghyang á̱niet ka̱n kpaat a̱ni bah.

²¹ Si̱ huni bai cha̱chaat ma̱nang A̱lyiat A̱gwaza na nhyia̱ a̱ni, nyia̱, “Á̱niet ba nang á̱ ka̱n bwuo mba nkhang nggu na a̱ni bah, ba̱ na li. A̱wot á̱niet ba ba̱ ka̱n mak fa̱k a̱lyiat nggu na a̱ni bah, ba̱ na fi̱k na.”

²² A̱tsak a̱lyiat, jen ma̱ a̱di̱di̱t n ku nchat n bai n byiat nyin, a̱wot n si̱ shya̱ a̱wat ka bah. Mat, n ku shya̱ di̱ shei a̱lyiat A̱gwaza na mi̱ ntangka̱i nfam bibyin nani.

Bulut La̱p a̱ Sak a̱ na Nat Rom

²³ A̱wot ma̱ninika, nang n tyak ta̱m shei a̱lyiat A̱gwaza hu mi̱ nfam bibyin nani a̱ni; a̱wot n si̱ nyia̱ ndyia̱ ma̱ a̱di̱di̱t nang n swan fwuong a̱ni. N byia̱ di̱dang ba̱t n bai n byiat nyin.

²⁴ N da̱p sak n nat a̱byin A̱si̱paniya, a̱wot jen nang n shya̱ di̱ naat hu a̱ni, n na ngyong ma̱ a̱keang Rom ka, n teap n byiat nyin. A̱wot ki̱ zi̱ labeang nang zi̱ swan dundung, n bu shya̱ beang da̱ a̱vwuo nyin, da̱nian a̱chyet ka̱ shya̱ nung á̱zanson a̱ni.

²⁵ A̱wot ki̱ n na bai da̱ a̱vwuo nyin, ku yet nung ta hwa n ya nat ma̱ng za̱nang da̱ a̱vwuo á̱za̱za̱rak á̱niet khwi A̱gwaza ba̱ shya̱ ma̱ a̱keang Urusha̱lima ka a̱ni.

²⁶ Mat susot á̱niet khwi ba̱ shya̱ mi̱ nfam bibyin Ma̱kidoniya ma̱ng A̱ka̱ya a̱ni, ba̱ ku tung za̱náng kurum ma̱ng fwuo nyiung ba̱ chat á̱ mbeang á̱kunak na na̱ yet á̱niet khwi A̱gwaza na̱ shya̱ mi̱ Urusha̱lima a̱ni.

²⁷ Á̱niet khwi ba̱ nwai yet A̱yahudawa a̱ni, ku fa̱k nyinyang ba̱t nang ba̱ ku mbeang á̱niet khwi A̱yahudawa ba mi̱ Urusha̱lima ba̱ yet á̱kunak na a̱ni. Ba̱ si̱ kyiak beang hu. Ku si̱ li mba nang ta hwa á̱ khwi mba a̱ni. Ba̱ dam ki̱ mba á̱niet khwi ba̱ shya̱ Urusha̱lima a̱ni beang Nnwap na̱ nwai yet A̱yahudawa ma̱ng a̱li̱ba̱rka A̱za̱za̱rak Ntswa, a̱ yet A̱sham Nkhang ka a̱ni; ma a̱nia wa, ku ma ngyet mba ta hwa ba̱ beang á̱niet khwi A̱yahudawa ba̱ shya̱ Urusha̱lima hu a̱ni ma̱ng kurum.

²⁸ Ki̱ n si̱ tyak a̱tan ta̱m wuni, nang á̱niet khwi bani nyia̱ a̱ni, a̱wot n si̱ nwuak á̱niet khwi ba̱ yet á̱kunak na a̱ni kurum hu, n sii na bai n byiat nyin, n sii swak nat A̱si̱paniya.

²⁹ A̱wot n nwuak a̱chuchuk, jen nang n na mbai da̱ a̱vwuo nyin ka a̱ni, Kristi na tyia̱ nzi̱t a̱li̱ba̱rka gba̱mgbam dundung ma̱ng a̱nyin.

³⁰ Nyin á̱niet khwi Yesu ba nang n chat a̱ni, n naai nyin mami a̱lyoot A̱tyoli nzi̱t ka Yesu Kristi; nyi mun á̱pyia̱ ma̱ng a̱nung di̱ kwan shei A̱sham Nkhang nung hu, di̱ si̱sak nyi nnaai A̱gwaza da̱nian nung a̱ni. Nyi nyia̱ a̱nia, mat si̱sak nang A̱za̱za̱rak Ntswa wu ntyia̱ nyi chat nung a̱ni.

³¹ Nyi naai A̱gwaza da̱nian nung, gu ka ti̱n nung mbwak á̱ka̱tuk á̱niet ba̱ shya̱ mi̱ fam a̱byin Yahudiya, ba̱ lak khwi A̱gwaza wu a̱ni. Nyi bu naai A̱gwaza da̱nian á̱niet khwi Yesu ba nang n naat ma̱ng mba za̱nang kurum ji mi̱ Urusha̱lima a̱ni, ba̱ ka san jii ma̱ng fwuo nyiung.

³² A̱jawa, ki̱ A̱gwaza shim, n na bwuok mbai da̱ a̱vwuo nyin ma̱ng a̱lyia̱ sai, a̱wot zi̱ ka tyia̱ á̱ghyang nzi̱t gba̱gbak.

³³ A̱wot ma̱ninika, yok A̱gwaza a̱ nwuat zi̱t swat nyinyang a̱ni, gu shya̱ dundung ma̱ng a̱mgba̱m nyin. [[Samba̱rka!]]