A̱romawa 12 - A̠lyiat A̠gwaza na di̠n Tyap: A̠li̠ka̠uli A̠fai

Yok Á̱niet Khwi ba̱ Neap A̱gwaza A̱chet Za̱nang

¹ Mat a̱nia, nyin á̱na̱nyiuk nung ba, nyi yet á̱niet khwi Yesu nang n chat a̱ni, n naai nyin, mat nang A̱gwaza ka̱n fa̱k kunak nyin ba̱t a̱ni, nyi neap nvam nyin na nang a̱chet ma̱ng a̱za̱za̱rak za̱nang ji̱ myim A̱gwaza a̱ni. Tangka̱i neap za̱nang huni hwa yet a̱tsatsak nvak wu nang nyi na nkyuak A̱gwaza ntong a̱ni.

² Nyi yok khwi a̱ka̱tuk za̱kwa ma̱ng taada nang á̱niet swanta ba ni̱ khwi a̱ni bah. Da̱ a̱kwonu a̱kya, nyi yok A̱gwaza a̱ shyak nfwuo nyin na; nyi yet á̱niet á̱fai di̱ si̱sak nang nyi na nshyak a̱di̱dam nyin wu a̱ni. A̱ni wa nang nyi na nfi̱k kyang nang A̱gwaza chat a̱ni, huhwa yet si̱ ku yet a̱tan a̱zaghyi nggu, ma̱ng kyang ku yet a̱tsatsak ku myim gu a̱ni.

³ Mat nang A̱gwaza ka̱n fa̱k shok nung a̱ si̱ nwuak nung a̱wat n gyet a̱ta̱m nggu a̱ni, n gba konyan ma̱ nyin, a̱yin gu yok kyiak a̱pyia̱ nggu a̱ swak shya̱ nggu hu bah. Yok konyan a̱ dam shansham di̱ si̱sak ji nang gu nkyiak a̱pyia̱ nggu a̱ni. Konyan gu kyiak a̱pyia̱ nggu cha̱chaat ma̱ng za̱nang chet nang A̱gwaza nang nggu a̱ni, di̱ si̱sak nang nyi nnwuak fwuo da̱ A̱gwaza a̱ni.

⁴ Ma̱nang nvam nzi̱t na mbyia̱ nkap ma̱ a̱di̱di̱t a̱ni; ma a̱nia wa kuzang kap nyia̱ tangka̱i ta̱m nhu.

⁵ Ma a̱nia wa, zi̱ yet á̱niet ma̱ a̱di̱di̱t bya zi̱ yet vam nyiung mami Kristi a̱ni. A̱wot kuzang a̱yin ma̱ nzi̱t yet kap a̱ghyang nggu hwa.

⁶ A̱gwaza nyia̱ konyan shok ma̱ a̱nzi̱t, a̱wot a̱ si̱ nang nzi̱t za̱náng chet A̱za̱za̱rak Ntswa, zi̱ ka nnyia̱ nta̱m jhyang. Ki̱ za̱nang chet shei á̱zanson ja nang A̱gwaza tyai nyin ndyo; ku myim nyi shei a̱lyiat na ma̱ cha̱chaat nang nyi nwuak a̱chuchuk A̱gwaza wa tak ma̱ng a̱nyin na a̱ni.

⁷ Ka̱ A̱gwaza nang ang za̱nang chet A̱za̱za̱rak Ntswa a ka mbeang á̱niet khwi á̱ghyang bya; a ni̱ mbeang mba shansham. Ka̱ a yet a̱tyu tyiet á̱niet khwi wa; a ni̱ ntyiet ba shansham.

⁸ Ki̱ za̱nang chet ang ji yet si̱ tyei á̱niet gba̱gbak ja; a ni̱ ntyei mba gba̱gbak shansham ba̱t. Ka̱ ji̱ yet si̱ ka̱u á̱niet nkyang ja; a ni̱ nka̱u mba ma̱ng fwuo ang nyiung. Ma a̱nia wa, ki̱ za̱nang chet ang ji yet si̱ kwak a̱son á̱niet ja; a ni̱ ntyia̱ a̱lyia̱ di̱ kwak á̱niet ba a̱son ka. Ka̱ ji̱ yet si̱ fwuong kunak á̱niet ja, a ni̱ nfa̱k kunak mba ma̱ng fwuo sai.

Tangka̱i Swat ku Myim Á̱niet Khwi Yesu a̱ni

⁹ Nyi chat á̱ghyang nyin ma̱ng fwuo nyiung. Nyi yok yet á̱bubuk á̱niet di̱ chat á̱ghyang bah. Nyi lak nkyang na̱ yet a̱ka̱tuk a̱ni ma̱ng a̱mgba̱m chet nyin hu. Nyi ba̱ng kyang ku yet a̱tan a̱ni gi̱ngi̱ng.

¹⁰ Nyi chat á̱ghyang nyin ma̱ng fwuo nyiung nang á̱na̱nyiuk mi̱ khwi Kristi a̱ni. A̱wot nyi fwuong di̱dang di̱ nwuat á̱ghyang nyin shi swak á̱pyia̱ nyin.

¹¹ Nyi yok yet á̱niet a̱ka̱li̱t bah. Da̱ a̱kwonu a̱kya, nyi tyia̱ a̱lyia̱ di̱ nyia̱ nta̱m A̱gwaza na ma̱ng fwuo nyiung.

¹² Nyi gwai di̱ si̱sak nang nyi ngbang a̱lyia̱, nyi si̱ tyia̱ fwuo di̱ nkyang nang nyi nwuak a̱chuchuk tazwa na a̱ni. Nyi nyap fwuo mami swuo a̱bung nyin hu. A̱wot nyi yong mi̱ di̱ naai A̱gwaza nchi̱ri̱ng.

¹³ Nyi ka̱u nkyang nang nyi byia̱ a̱ni ma̱ng á̱niet khwi A̱gwaza ba̱ sang a̱ni. A̱wot nyi yet á̱niet saai á̱nietchen mbwak nfeang ma̱ a̱ka̱sa nyin na kuzang jen.

¹⁴ Á̱niet ba̱ ya̱shuk nyin a̱ni, nyi naai A̱gwaza da̱nian mbaa. Nyi yok shyi mba bah. Da̱ a̱kwonu a̱kya, nyi naai A̱gwaza a̱ nang mba a̱li̱ba̱rka.

¹⁵ Nyi gwai dundung ma̱ á̱niet ba̱ shya̱ ma̱ gwai a̱ni. A̱wot á̱niet ba̱ twei a̱ni, nyi twei dundung ma̱ng a̱mba.

¹⁶ Nyi swan swat mun á̱pyia̱ ma̱ng á̱ghyang. Nyi yok gba̱p a̱pyia̱. Nyi shim nyi nyia̱ á̱ghyang á̱niet nta̱m nang nyi wa yet á̱khwo mba bya a̱ni. Nyi nyia̱ kpa̱ndang ma̱ng á̱niet ba̱ yet á̱kunak, nang á̱ghyang á̱niet jhyuai a̱ni. A̱wot nyi yok dam nyi yet á̱niet mumwang, nyi si̱ lyen kuzang kyang bah.

¹⁷ Nyi yok tan a̱ka̱tuk ma̱ng a̱ka̱tuk bah. Da̱ a̱kwonu a̱kya, nyi kwan nyi nyia̱ á̱niet ma̱ a̱di̱di̱t a̱tan nkyang nang ba̱ na nchyin nyin a̱ni.

¹⁸ Nyi kwan nyi nyia̱ a̱mgba̱m kuzang kyang ku na tyia̱ nyin swat nyinyang ma̱ng konyan a̱ni.

¹⁹ Nyin á̱kpa̱ndang nung ba nang n chat a̱ni, nyi yok mak tan a̱ka̱tuk nang á̱ nyia̱ nyin dyo a̱ni bah. Da̱ a̱kwonu a̱kya, nyi ghwon kuzang kyang bwak a̱tsotswat mwai lyen A̱gwaza. Mat á̱ lyuut nyia̱, “A̱gwaza tak nyia̱, ‘Nung gwa na tan a̱ka̱tuk tazwa á̱niet ba̱ nyia̱ a̱ka̱tuk a̱ni. N na tan mba di̱ si̱sak nang ba̱ ntyia̱ á̱ghyang á̱niet swuo a̱bung a̱ni.’ ”

²⁰ Da̱ a̱kwonu a̱kya, á̱ lyuut nyia̱, “Ka̱ á̱niet ba̱ lak li ang a̱ni fwuong zong, nang mba kyayak, ba̱ ya. Ka̱ ba̱ ma nfwuong mashyi, a nang mba a̱sa̱khwot, ba̱ swuo. Ka̱ a nyia̱ a̱nia, a na tung mba a̱chi̱chan ndong á̱pyia̱, ba̱ ka fa̱k nsum.”

²¹ Nyi yok ghwon a̱ka̱tuk a̱ swuo chet nyin bah. Da̱ a̱kwonu a̱kya, nyi kwan nyi swuo chet a̱ka̱tuk di̱ nyia̱ a̱tan nta̱m.