A̱romawa 1 - A̠lyiat A̠gwaza na di̠n Tyap: A̠li̠ka̠uli A̠fai

Byat

¹ Nung Bulut, a̱khwo Kristi Yesu, nang A̱gwaza khai n gyet a̱ta̱m, a̱wot a̱ si̱ ta̱m nung n shei A̱sham Nkhang ka a̱ni, nung gwa dyuut nyin wusika jini.

² A̱sham Nkhang kani kya nang A̱gwaza ku nyia̱ a̱li̱ka̱uli wu neet gbangbang a̱bwonu a̱yaata̱m a̱kwonu nggu ba, ma̱nang á̱ ndyuut mami A̱za̱za̱rak A̱lyiat A̱gwaza wu a̱ni.

³ A̱sham Nkhang kani shya̱ tazwa Nggwon A̱gwaza kikya. Tazwa za̱kwa Yesu di̱ yet a̱tyubishyi, á̱ ku byin nggu mi̱ kwai A̱gwam Da̱wuda ja.

⁴ A̱wot tazwa za̱kwa A̱gwaza nang Yesu byia̱ a̱ni, á̱ si̱ tyai nggu kpa̱sai nang nggu ngyet a̱tsatsak Nggwon A̱gwaza wa, di̱n jen nang chet A̱za̱za̱rak Ntswa hu ku nta̱ngam nggu ma̱ng swuan ma̱ á̱niet ba̱ ka̱n kwi a̱ni. Nggu wa yet Yesu Kristi A̱tyoli nzi̱t wu!

⁵ Mat mun á̱pyia̱ nzi̱t hu ma̱ng Kristi, A̱gwaza si̱ fa̱k shok zi̱t, a̱ si̱ khai nzi̱t, a̱ si̱ nwuak nzi̱t a̱wat ma̱ng tyok nang a̱yaata̱m nggu a̱ni, da̱nian zi̱ ka shei A̱sham Nkhang ka da̱ a̱vwuo a̱mgba̱m á̱niet mi̱ bibyin swanta hu, ba̱ ka nwuak fwuo ba̱ khwi Yesu, ba̱ nwuak a̱lyoot nggu ka shi.

⁶ A̱wot nyin á̱niet khwi nyi shya̱ ma̱ a̱keang Rom ka a̱ni, nyi mun yet á̱niet mami Nnwap na̱ nwai yet A̱yahudawa a̱ni mi̱ swanta hu nang á̱ yorong na̱ yet á̱si̱ Yesu Kristi a̱ni.

⁷ N dyuut nyin wusika jini a̱mgba̱m nyin nyi shya̱ Rom a̱ni. Nyin bya nang A̱gwaza wu chat ba̱t, a̱wot a̱ si̱ yorong nyin nyi yet á̱za̱za̱rak á̱niet ngguu. Yok A̱gwaza a̱ yet A̱tyia̱ nzi̱t a̱ni, ma̱ng A̱tyoli Yesu Kristi, a̱ fa̱k shok nyin, a̱wot a̱ nang nyin swat nyinyang.

Bulut Naai A̱gwaza ma̱ng A̱gwai

⁸ Di̱ ntsa hu, n gwai ma̱ng A̱gwaza nung wu mami a̱lyoot Yesu Kristi da̱nian nyin a̱mgba̱m. Mat á̱niet khwi ma̱ a̱di̱di̱t mi̱ swanta hu bwoi nkhang di̱ si̱sak ji nang nyi nnwuak fwuo di̱ Yesu Kristi a̱ni.

⁹ A̱gwaza wu lyen si̱sak nang n naai nggu kuzang jen da̱nian nyin a̱ni. A̱ta̱mam ma̱ng a̱tyetuk, n ni̱ naai A̱gwaza da̱nian nyin, a̱wot gu nang nyin nkyang nang nyi chat a̱ni. A̱gwaza wa nang n nyia̱ nggu ta̱m shei A̱sham Nkhang hu tazwa Nggwon nggu ka Yesu Kristi, ma̱ng fwuo nyiung.

¹⁰ Kyang nyiung nang n naai A̱gwaza nchi̱ri̱ng a̱ni, huhwa yet; gu shim a̱ nang nung a̱wat nang n na mbai n byiat nyin a̱ni.

¹¹ N fwuong di̱dang bai n byiat nyin, n ka nang nyin za̱nang chet A̱za̱za̱rak Ntswa, ji̱ na tyia̱ nyin nyi mbeang chet di̱ khwi A̱tyoli Yesu hu a̱ni.

¹² Kyang hu n fa a̱ni huhwa yet, jen zi̱ myim ndung a̱ni, n na chat n tyia̱ nyin gba̱gbak di̱ nwuak fwuo nyin hu di̱ Yesu. A̱wot n chat nyin mameang, nyi tyia̱ nung gba̱gbak.

¹³ Á̱niet khwi Yesu ba nang n chat a̱ni, ku myim nyi lyen ba̱t, nang n ka̱n vwuoi nsaai di̱n jen ma̱ a̱di̱di̱t n chat n bai n byiat nyin. A̱wot A̱gwaza si̱ nang nung a̱wat ka bah, si̱ ma̱nini. N chat n nyia̱ ta̱m dundung ma̱ng a̱nyin, a̱wot zi̱ ka tyia̱ á̱niet ma̱ a̱di̱di̱t ba̱ ka mbeang nwuak fwuo di̱ Yesu Kristi ba̱ khwi nggu, ma̱nang n ka̱n mbeang Nnwap na̱ nwai yet A̱yahudawa na̱ si̱ khwi nggu a̱ni.

¹⁴ Ku li á ngyei n ba̱ng ta shei A̱sham Nkhang da̱ a̱vwuo a̱mgba̱m Nnwap na̱ nwai yet A̱yahudawa a̱ni, nnwap na̱ lyen taada A̱helenawa ji a̱ni, ma̱ng á̱si̱ na na̱ chyi taada a̱ja a̱ni. Ma a̱nia wa, n ba̱ng ta n shei A̱sham Nkhang ka da̱ a̱vwuo á̱niet ba̱ lyen fang a̱ni, ma̱ng á̱si̱ ba ba̱ chyi fang hu a̱ni.

¹⁵ Mat a̱nia, n byia̱ di̱dang ba̱t n bai Rom meang, n ka shei nyin A̱sham Nkhang ka.

A̱sham Nkhang ka Byia̱ Chet

¹⁶ Mat n fwuong nsum shei A̱sham Nkhang Kristi ka bah. Kikya yet chet A̱gwaza hu ku nyia̱ ta̱m san á̱niet ma̱ a̱di̱di̱t ba̱ nwuak fwuo di̱ Kristi a̱ni; á̱ tsa shei nka hu da̱ a̱vwuo A̱yahudawa, a̱wot á̱ si̱ shei Nnwap na̱ nwai yet A̱yahudawa a̱ni meang.

¹⁷ A̱sham Nkhang kani tyai si̱sak nang A̱gwaza ntak kpa̱sai nang gu nkyiak zi̱t, zi̱ yet á̱tsotswat á̱niet sang a̱bun a̱zaghyi nggu a̱ni. Á̱ shyat tsotswat huni ku yet a̱jhyem a̱ni, mat nwuak fwuo di̱ Yesu Kristi wa ma̱nyin nggu. Ma̱nang á̱ ndyuut ma̱ A̱lyiat A̱gwaza na a̱ni, nyia̱, “Mat nwuak fwuo da̱ nung hwa nang a̱tsotswat a̱yin na nswuan.”

A̱gwaza ni̱ Mwai Lyen tazwa A̱ka̱tuk Nyia̱ Á̱nietbishyi

¹⁸ A̱wot A̱gwaza tswazwa ni̱ tak mwai lyen nggu hu tazwa a̱mgba̱m á̱niet ba̱ lak khwi ngguu, ma̱ng á̱niet a̱ka̱kpa̱t, ba̱ ni̱ vwuong lyen a̱chuchuk hu mat a̱ka̱tuk nyia̱ mba wu a̱ni.

¹⁹ Mat ba̱ lyen a̱chuchuk tazwa A̱gwaza, nang A̱gwaza ntyai mba a̱chuchuk wu kpa̱sai tazwa a̱pyia̱ nggu a̱ni.

²⁰ Neet nang A̱gwaza mmat swanta hu, á̱nietbishyi nwuan kyai tswazwa ma̱ng a̱byin. Mami kuzang kyang nang A̱gwaza mat a̱ni, á̱nietbishyi doot ba̱ li chet sang sangba̱p gu hu, ma̱ng za̱kwa yet A̱gwaza nggu ji. Mat a̱nia, á̱nietbishyi byia̱ ta̱fwat di̱ nwai lyen A̱gwaza bah.

²¹ A̱tsak a̱lyiat, ku nang ba̱ ndyen A̱gwaza wu a̱ni, ba̱ si̱ kwok gu ntong nang A̱gwaza a̱ni, ku ba̱ gwai nggu bah. Da̱ a̱kwonu a̱kya, ba̱ si̱ nwuo nyia̱ a̱di̱dam sang tswá di̱ kyang ku myim A̱gwaza a̱ni. Nang ku ndi a̱nia a̱ni, a̱di̱dam mba wu si̱ tyia̱ lyin, a̱wot nfwuo mba na si̱ tyia̱ tai.

²² Ba̱ si̱ kyiak á̱pyia̱ mba nang á̱niet mumwang a̱ni, a̱wot ba̱ yet á̱tsatsak á̱bwuon á̱niet bya.

²³ A̱wot da̱ a̱kwonu ka nang ba̱ na nkwok ntong a̱zaghyi A̱gwaza a̱ byia̱ a̱kyenkyai shi, a̱ si̱ bu yet A̱gwaza swuan sang sangba̱p a̱ni, ba̱ si̱ kwok ntong a̱zaghyi nghwughwu a̱yaagwaza sang swuan, nang á̱ nyia̱ ba̱ tai á̱nietbishyi ba̱ ni̱ kwi a̱ni. Nghwughwu a̱yaagwaza sang swuan á̱ghyang tai a̱ka̱man, nyám, ma̱ng nkyang na̱ kwang a̱byin a̱ni.

²⁴ Mat a̱nia, A̱gwaza si̱ kai mba a̱ ghwon ba̱ ya a̱son di̱ nyia̱ kuzang tangka̱i a̱shi̱shi̱k nkyang nsum á̱ nchi̱ri̱ng, nang a̱ka̱tuk nshyuo nfwuo mba wu fwuong di̱dang nyia̱ hu a̱ni. Nang ku ndi a̱nia a̱ni, ba̱ si̱ nwuo tyei á̱ghyang mba a̱ka̱tuk a̱na̱ndyung ma̱ng a̱shi̱shi̱k nyia̱ mi̱ nvam á̱ghyang mba na.

²⁵ A̱wot da̱ a̱kwonu ka nang ba̱ na nfi̱k a̱tsatsak a̱lyiat A̱gwaza wu a̱ni, ba̱ si̱ khai ba̱ kwok ntong a̱zaghyi a̱yaagwaza sang swuan. A̱wot ba̱ si̱ kwok ntong a̱zaghyi nkyang nang A̱gwaza mat a̱ni. A̱wot ba̱ si̱ nyia̱ ná nta̱m da̱ a̱kwonu A̱gwaza ma̱ a̱pyia̱ nggu, a̱ mat swanta hu a̱ni. A̱wot A̱gwaza wuni wa ma̱nyin nggu maai á̱ dyep gu si̱ nat sang sangba̱p! Samba̱rka!

²⁶ Mat a̱nia, A̱gwaza si̱ kai mba a̱ ghwon. Ba̱ si̱ ya a̱son di̱ nyia̱ kuzang tangka̱i a̱shi̱shi̱k nkyang nsum nchi̱ri̱ng, nang a̱ka̱tuk nshyuo nfwuo mba wu fwuong di̱dang nyia̱ hu a̱ni. Nang ku ndi a̱nia a̱ni, ku á̱nyiuk ba meang, ba̱ si̱ nwuo lak khwat ma̱ng á̱tyok nang ku myim ku ndi a̱ni. Da̱ a̱kwonu a̱kya, ba̱ si̱ nwuo khwat ma̱ng á̱ghyang mba, ba̱ yet á̱nyiuk a̱ni.

²⁷ Ma a̱nia wa á̱tyok ba meang, ba̱ si̱ nwuo nyian a̱shi̱shi̱k nkyang nsum, mat a̱ka̱tuk nshyuo nvam mba wu, ba̱ si̱ la̱u di̱dang chat khwat ma̱ng á̱tyok á̱ghyang nang á̱nyiuk mba a̱ni. Á̱tyok ba si̱ nyian nkyang nsum ma̱ng á̱tyok á̱ghyang. Mat tangka̱i a̱shi̱shi̱k nyia̱ huni, nang ba̱ nyia̱ mi̱ nvam mba na a̱ni, ba̱ si̱ ghwon a̱tsatsak a̱lyiat wu. Mat a̱nia, A̱gwaza si̱ nyiak ba ma̱ng swuo a̱bung ku myim mba a̱ni.

²⁸ A̱wot ku nang ba̱ ndam, nyia̱ ku yet bwuon hwa ba̱ san A̱gwaza mi̱ nfwuo mba na a̱ni, A̱gwaza si̱ ghwon mba ba̱ ya a̱son ma̱ng nyia̱ kuzang tangka̱i a̱shi̱shi̱k nkyang nsum á̱ nchi̱ri̱ng, da̱ na̱ myim ba̱ nyia̱ a̱ni bah.

²⁹ Nfwuo á̱niet nani ni̱ la̱u nyia̱ kuzang ntangka̱i nkyang na̱ nwai yet á̱tsotswat a̱ni, a̱ka̱tuk nyia̱, wuwok nkyang swanta, ma̱ng lak li á̱ghyang. Ba̱ yet á̱niet kwi swam, hyaai á̱ghyang á̱niet, á̱niet fwuon zook, á̱niet laai á̱niet, ba̱ ni̱ kwan ba̱ bwuk ma̱ng á̱niet di̱ mumwang, a̱wot ba̱ yet á̱niet chwaat a̱lyiat bya.

³⁰ Ntangka̱i á̱niet nani, ba̱ yet á̱niet tyam á̱ghyang bya, á̱niet lak A̱gwaza, á̱niet a̱ka̱kpa̱t, á̱niet gba̱p a̱pyia̱, ma̱ng á̱niet shei yet. Ba̱ ni̱ ghwut ma̱ng nvak nyian a̱ka̱tuk nyia̱ nfai. A̱wot ba̱ ni̱ jhyuai á̱niet mbyin mba ba.

³¹ Ba̱ yet á̱niet lak fwuong á̱vwuo, á̱niet chak a̱li̱ka̱uli nang ba̱ nyia̱ a̱ni, á̱niet nwai chat á̱ghyang, ma̱ng á̱niet sang kunak.

³² Ba̱ lyen nang a̱tsotswat doka A̱gwaza wu ntak nyia̱ á̱niet ba̱ nyian ntangka̱i nkyang a̱nia a̱ni, ba̱ myim a̱khwu kya. A̱mgba̱m ma̱ng a̱nia, a̱ka̱tuk wu wa yet, mi̱ nkyang nani nia nang ba̱ nyia̱ ma̱nyin na bah, a̱wot ba̱ ni̱ mun á̱ li̱n a̱ma á̱niet ba̱ nyian a̱ka̱tuk nkyang a̱nia a̱ni.