A̱kolosiyawa 2 - A̠lyiat A̠gwaza na di̠n Tyap: A̠li̠ka̠uli A̠fai

¹ N chat nyi lyen si̱sak nang n byia̱ a̱fi̱fa ba̱t da̱nian nyin ma̱ng sot á̱niet khwi ji ji̱ shya̱ ma̱ a̱keang La̱wudikiya a̱ni; mbeang a̱mgba̱m á̱niet khwi ba, ba̱ ka̱n nwai li nung ma̱ng a̱ghyi a̱ni.

² N chat n tyia̱ mba gba̱gbak, da̱nian ba̱ ka mun á̱pyia̱ ma̱ng á̱ghyang mami a̱tsatsak chat á̱ghyang. N chat ba̱ byia̱ a̱jhyem a̱gwai ma̱ng nwuak a̱chuchuk nang á̱ shyat da̱ a̱tsatsak lyen a̱ni. Da̱nian ba̱ ka fi̱k la̱p sak A̱gwaza ku shya̱ di̱ niat a̱ni; huhwa yet Kristi ma̱ a̱pyia̱ nggu.

³ Kristi byia̱ chet a̱ nang nyin mumwang, a̱ bu tyai nyin lyen nkyang hu, nyi ka fi̱k A̱lyiat A̱gwaza na na̱ yet a̱tan nang zwá a̱ni.

⁴ N shei nyin a̱lyiat nani, da̱nian nyi ka yok shim a̱yin a̱ laai nyin ma̱ng lyen a̱lyiat bah.

⁵ Ku nang n shya̱ zan ma̱ng a̱nyin mi̱ vam a̱ni, a̱mgba̱m ma̱ng a̱nia, fwuo nung hu shya̱ dundung ma̱ng a̱nyin. N shya̱ ma̱ng a̱gwai ba̱t, di̱ si̱sak ji nang nyi mmun á̱pyia̱ ma̱ng á̱ghyang, nyi si̱ nwuak fwuo mi̱ chet di̱ Kristi a̱ni.

Kristi Nwuat Swuan Swai

⁶ A̱wot ma̱ninika, ma̱nang nyi wa ka̱n san Kristi Yesu a̱ yet A̱tyoli nyin wu a̱ni, ku yet ta hwa nyi ya a̱son ma̱ng khwi nggu hu a̱nia.

⁷ Nyi yong mi̱ chet di̱ mun á̱pyia̱ nyin hu ndung ma̱ng a̱nggu, nang a̱kwon ka̱ byia̱ á̱ni̱nan ni̱ ngyong mi̱ chet a̱ni. A̱wot nyi nok swat nyin hu da̱ nggu. A̱nia wa nwuak fwuo nyin hu na mbeang chet da̱ a̱tsatsak a̱lyiat wu nang á̱ ku tyiet nyin a̱ni, a̱wot nyi yong mi̱ di̱ gwai A̱gwaza ba̱t kuzang jen.

⁸ Nyi ta̱bam ma̱ng á̱pyia̱ nyin, kalak a̱yin a̱ du laai nyin ma̱ng tyiet ku neet mi̱ mumwang swanta huni, ku yet a̱buk tyiet tazwa A̱gwaza a̱ni. Tyiet hu ku neet ma̱ a̱di̱dam ma̱ng taada a̱tyubishyi ma̱ng chet a̱yaata̱m tswá mi̱ swanta huni, ku nwai yet si̱ Kristi a̱ni.

⁹ Mat mi̱ Kristi wa ma̱nyin nggu nang á̱ ndi a̱jhyem za̱kwa A̱gwaza wu mi̱ vam a̱tyubishyi.

¹⁰ Mat a̱nia, nang nyi mmun á̱pyia̱ ma̱ng Kristi a̱ni, nyin meang, nyi byia̱ a̱jhyem swuan ma̱ng a̱nggu. Nggu wa yet a̱kwak a̱son tazwa kuzang a̱gwam ma̱ng kuzang tyok.

¹¹ Di̱n jen nang nyi ku mmun á̱pyia̱ ma̱ng Kristi a̱ni, á̱ ku tyia̱ nyin mi̱ nchen. A̱wot tangka̱i tyia̱ mi̱ chen Kristi hu yet si̱ vam a̱tyubishyi hwa bah. Tangka̱i tyia̱ mi̱ nchen huni yet si̱ A̱za̱za̱rak Ntswa hwa; mat Kristi wa faat za̱kwa a̱ka̱tuk nyia̱ nyin ji a̱ tyat a̱ si̱ ji̱p.

¹² Jen nang á̱ ku nnyia̱ nyin ba̱ptisman ji a̱ni, ku yet kidee nyi ku khwu á̱ si̱ niat nyin dundung ma̱ng Kristi wa. A̱wot á̱ si̱ bu ta̱ngam nyin dundung ma̱ng a̱nggu. Nyi si̱ shya̱ swuan swai mat nyi nwuak fwuo di̱n chet A̱gwaza. Nggu wa ku ta̱ngam Kristi ma̱ng swuan ma̱ á̱niet ba̱ ka̱n kwi a̱ni.

¹³ Di̱n jen ji ji̱ swak a̱ni, nyin Nnwap na̱ nwai yet A̱yahudawa a̱ni, nyi ku li nang nkwom a̱ni ma̱ a̱ka̱tuk za̱kwa nyin wu, ma̱ng a̱ka̱tuk nyia̱ nyin wu, neet nang á̱ ka̱n faat á̱ si̱ tyat za̱kwa a̱ka̱tuk nyia̱ nyin ji á̱ ji̱p bah. A̱wot ma̱ninika, A̱gwaza si̱ ta̱ngam nyin ma̱ng swuan dundung ma̱ng Kristi, mat A̱gwaza chi a̱mgba̱m a̱ka̱tuk nyia̱ nzi̱t wu.

¹⁴ Ku li á ngyei A̱gwaza si̱ lyang ta a̱ka̱tuk nyia̱ nang á̱ lyuut mami doká ji á̱ bat zi̱t a̱ni. A̱wot A̱gwaza si̱ kyiak ta̱ka̱da a̱ka̱tuk nyia̱ nzi̱t hu nang á̱ lyuut a̱ni, a̱ si̱ nkpang guu da̱ a̱team a̱khwu da̱nian nzi̱t.

¹⁵ A̱wot da̱ a̱team a̱khwu wu wa nang A̱gwaza ngya̱weap nkyang nzwang á̱gwam ma̱ng ntyok á̱ka̱tuk ntswá. Kristi si̱ tyia̱ mba nsum kpa̱sai, nang nggu nswuo chet mba da̱ a̱team a̱khwu wu a̱ni.

¹⁶ Mat a̱nia, nyi yok ghwon a̱yin a̱ bat nyin a̱hyiak tazwa ntangka̱i nkyayak nang nyi ya ku nyi swuo a̱ni bah; ku tazwa song a̱yet á̱za̱za̱rak mam; ku song a̱yet yong nzwát; ku Mmam Fwung bah.

¹⁷ Mat a̱mgba̱m ntangka̱i taada nani yet nghwughwu nkyang na̱ chobai wa a̱ni. A̱wot Kristi wa ma̱ a̱pyia̱ nggu nang taada jini yet kidee nggu ji.

¹⁸ Nyi yok shim a̱yin a̱ bat nyin a̱hyiak, a̱ si̱ tyiet nyia̱ ku yet ta hwa nyi ghyuai á̱pyia̱ nyin nyi kwok ntong a̱zaghyi a̱yaata̱m tswá A̱gwaza, á̱niet ba̱ ka li bah. Á̱niet tyiet bani, ba̱ ni̱ nyia̱ ba̱ byia̱ a̱tsatsak lyen mat ba̱ li a̱ma̱bwoi tazwa nkyang nani. A̱ka̱tuk nyia̱ mi̱ nfwuo mba wu tyei mba nang ba̱ ntam di̱ ma̱ a̱tan ta̱fwat.

¹⁹ A̱wot da̱ mba, ba̱ mun á̱pyia̱ ma̱ng Kristi bah. Mat nggu wa yet a̱pyia̱ á̱niet khwi ba, ba̱ yet vam nggu hu a̱ni. Mat nggu wa mun a̱mgba̱m vam hu, ma̱ng nkap vam na, ma̱ng á̱chi̱chi̱p ba. A̱wot nggu wa tyia̱ a̱mgba̱m vam hu ndaai nang A̱gwaza nchat a̱ni.

A̱khwu Ndung ma̱ng Yesu yet Shya̱ Swuan Swai ja

²⁰ Nang za̱kwa a̱ka̱tuk nyia̱ nyin ji nkhwu dundung ma̱ng Kristi da̱ a̱vwuo tyok taada swanta ji a̱ni, yihwa mbyia̱ nang nyi ngya a̱son ma̱ng khwi taada swanta jini, ji̱ nyia̱,

²¹ “Nyi yok ta̱bat bah! Nyi yok niaat bah! Nyi yok byiam bah!”?

²² A̱mgba̱m tangka̱i doká huni yet taada a̱tyubishyi ja tazwa nkyang na̱ na tyak; da̱ na, na̱ byia̱ kpangti̱n a̱ni bah.

²³ A̱tsak a̱lyiat, tangka̱i taada huni yet si̱ mumwang hwa di̱ li a̱tyubishyi. Mat ji̱ chat a̱tyubishyi a̱ kwan ba̱t, da̱nian gu ka tak kpa̱sai nang gu nnwuak a̱pyia̱ nggu da̱ a̱vwuo A̱gwaza. A̱wot ji̱ bu tak kpa̱sai nang gu nghyuai a̱pyia̱ di̱ khwi taada da̱ a̱kwonu A̱gwaza, ku di̱ tam ma̱ng neap vam a̱tyubishyi mi̱ chet. A̱mgba̱m ma̱ng a̱nia, tangka̱i taada huni beang a̱tyubishyi gu swuo chet a̱ka̱tuk nshyuo vam nggu wu bah.