A̱fisawa 5 - A̠lyiat A̠gwaza na di̠n Tyap: A̠li̠ka̠uli A̠fai

Yok Á̱niet Khwi ba̱ Swan Swat Tak Sai A̱gwaza

¹ Nang nyi ngyet mman nang A̱gwaza chat a̱ni. Mat a̱nia, nyi kwan nyi tai nggu, di̱ kuzang kyang nang nyi nyia̱ a̱ni.

² Nyi swan swat chat á̱ghyang, nyi khwi kidee Kristi ji. A̱ chat zi̱t, a̱ si̱ bu nwuak a̱pyia̱ nggu. A̱ si̱ khwu da̱nian nzi̱t, nang za̱nang á̱ fwui ji̱ byia̱ swam nyinyang nang A̱gwaza chat a̱ni.

³ Nang nyi ngyet á̱niet A̱gwaza bya a̱ni, ku myim á̱ fa̱k nkhang katnaan, a̱shi̱shi̱k nyia̱, shyuo vam, ku wuwok nkyang swanta ma̱ nyin bah. Mat tangka̱i a̱ka̱tuk nyia̱ a̱hwa myim á̱ fa̱k hu ma̱ á̱niet khwi bah.

⁴ Ma a̱nia wa, a̱lyiat sang nsum, a̱buk a̱lyiat, ma̱ng a̱shi̱shi̱k a̱lyiat na̱ myim nyin bah. Da̱ a̱kwonu a̱kya, nyi ni̱ ngwai A̱gwaza kuzang jen.

⁵ Si̱ nyi lyen za̱m, nang a̱tyu a̱shi̱shi̱k nyia̱, a̱tyu nshyuo vam, ku a̱tyu wuwok, na ya gado Tyok Kristi ma̱ng A̱gwaza bah. (Mat a̱tyu wuwok yet kidee a̱tyu a̱ kwok ntong a̱zaghyi nghwughwu a̱yaagwaza sang swuan a̱ni).

⁶ Nyi yok ghwon a̱yin a̱ laai nyin ma̱ng a̱buk ta̱fwat bah, mat a̱ka̱tuk nyia̱ wuni wa ni̱ tyia̱ A̱gwaza a̱ mwai lyen ma̱ng á̱niet ba̱ lak fwuong a̱ni.

⁷ Mat a̱nia, nyi yok mun á̱pyia̱ ma̱ng á̱niet ba̱ nyia̱ ntangka̱i a̱ka̱tuk nyia̱ wuni a̱ni bah.

⁸ Mat di̱n jen ji ji̱ swak a̱ni, nyi ku shya̱ ma̱ a̱gbi̱ri̱ng ndyin. A̱wot ma̱ninika, nyi shya̱ mami a̱kyenkyai sai wa a̱ neet da̱ a̱vwuo A̱gwaza a̱ni. Mat a̱nia, nyi yok swat nyin hu ku tak nang nyi shya̱ mami sai A̱gwaza hu za̱m!

⁹ Mat sai ku shya̱ mi̱ nfwuo nyin na a̱ni, huhwa tyei kpangti̱n ji̱ yet a̱tan, tsotswat, ma̱ng a̱chuchuk a̱ni.

¹⁰ Nyi ta̱bam nyi myiam kyang hu nang A̱gwaza chat a̱ni.

¹¹ Nyi yok mun á̱pyia̱ nyin hu ma̱ng á̱niet ba̱ nyia̱ a̱ka̱tuk nta̱m mi̱ ndyin na̱ sang tswa a̱ni bah. Da̱ a̱kwonu a̱kya, nyi ni̱ nghwut ma̱ng á̱na wa. Nyi tyai na kpa̱sai.

¹² Ku yet kyang nsum hwa, á̱ lyiat a̱ka̱tuk nkyang nang á̱niet nwai khwi A̱gwaza nyia̱ da̱ bang a̱ni.

¹³ A̱wot a̱ka̱tuk nyia̱ mba wu á̱ na tyai nggu kpa̱sai, di̱n jen nang sai hu nteak da̱ mba a̱ni. A̱jawa konyan na ndi si̱sak nang nta̱m mba na ngyet a̱ka̱tuk a̱ni.

¹⁴ Mat sai hu ni̱ tyia̱ á̱ li kuzang kyang kpa̱sai. Huhwa mbyia̱ á̱ nnyia̱, “Nwan a̱tyu a̱ khat nda a̱ni, shyip! Doot ma̱ng swuan ma̱ á̱niet ba̱ ka̱n kwi a̱ni! A̱wot Kristi na tyia̱ sai ku teak tazwa ang!”

Yok Á̱niet Khwi ba̱ Ghwon A̱za̱za̱rak Ntswa wu wa Tyia̱ mba Chet

¹⁵ Mat a̱nia, si̱ nyi ta̱bam ma̱ng tangka̱i swat hu nang nyi swan a̱ni. Nyi yok yet á̱bwuon á̱niet bah, a̱wot nyi swan nang á̱niet ba̱ byia̱ mumwang hwa a̱ni.

¹⁶ Nyi nyia̱ a̱tan nta̱m ma̱ng kuzang a̱wat nang nyi byia̱ a̱ni, mat jen ji yet a̱ka̱tuk wa.

¹⁷ Nyi yok yet á̱bwuon á̱niet bah. Da̱ a̱kwonu a̱kya, si̱ nyi kwan nyi fi̱k kyang hu nang A̱tyoli Kristi chat nyi nyia̱ wa a̱ni.

¹⁸ Nyi yok yet á̱niet hyeng a̱kan bah, mat si̱ a̱hwa tyei tsot wun ku chong ma̱ng a̱khwu a̱ni. Da̱ a̱kwonu a̱kya, si̱ nyi ghwon chet A̱za̱za̱rak Ntswa huhwa a̱ tyia̱ nyin chet nang gu nchat a̱ni.

¹⁹ Kuzang jen nyi ni̱ mbwom bubwom Za̱bura, bubwom dyep, ma̱ng bubwom A̱za̱za̱rak Ntswa ghyang. Nyi yong di̱ bwom bubwom ma̱ng dyep A̱tyoli Kristi, ma̱ng a̱mgba̱m nfwuo nyin na.

²⁰ Kuzang jen, mi̱ kuzang kyang, nyi ni̱ ngyong di̱ gwai A̱gwaza a̱ yet A̱tyia̱ nzi̱t a̱ni, mami a̱lyoot A̱tyoli nzi̱t wu, Yesu Kristi.

Bulut Tyiet tazwa Swat Nyeang Á̱niet Khwi

²¹ Nyi ni̱ nwuak á̱ghyang pyipyia̱ nyin, mat nang nyi fwuong a̱wun Kristi a̱ni.

²² Nyin á̱nyiuk nyeang, nyi ni̱ ntyia̱ pyipyia̱ nyin mbwak tyok á̱tyok nyin ba, ma̱nang nyi ni̱ ntyia̱ pyipyia̱ nyin mbwak tyok A̱tyoli Kristi a̱ni.

²³ Mat a̱tyok wa yet a̱kwak a̱son a̱byii̱k nggu wu, ma̱nang Kristi ngyet a̱kwak a̱son á̱niet khwi a̱ni. Nggu wa bu yet A̱tyusan vam nggu hu, ku yet á̱niet khwi ba a̱ni.

²⁴ Ma̱nang sot á̱niet khwi ji ni̱ ntyia̱ a̱pyia̱ nji mbwak tyok Kristi a̱ni, ma a̱nia wa ku myim á̱nyiuk ba, ba̱ ni̱ ntyia̱ pyipyia̱ mba mbwak tyok á̱tyok mba ba di̱ kuzang kyang.

²⁵ Nyin á̱tyok, ku myim nyi chat á̱nyiuk nyin ba, ma̱nang Kristi nchat á̱niet khwi ba, a̱wot a̱ si̱ nwuak a̱pyia̱ nggu a̱ si̱ khwu da̱nian mba a̱ni.

²⁶ Da̱nian gu ka neap á̱niet khwi ba mbwak Tyok A̱gwaza; ba̱ yet á̱za̱za̱rak á̱niet nang gu jaat ma̱ng a̱sa̱khwot ma̱ng a̱lyiat nggu na a̱ni.

²⁷ Kristi nyia̱ a̱nia, da̱nian gu ka khwat á̱niet khwi ba a̱ bai ndyo da̱ a̱vwuo nggu; ba̱ yet a̱sham, ba̱ sang a̱lyuk, ba̱ sang nyan, ba̱ sang a̱bun, a̱wot ba̱ yet á̱za̱za̱rak á̱niet.

²⁸ Ma a̱nia wa, á̱tyok ba myim ba̱ chat á̱nyiuk mba ba, ma̱nang ba̱ nchat nvam mba na a̱ni. Mat a̱tyok a̱ chat a̱byii̱k nggu a̱ni, a̱ chat a̱pyia̱ nggu kya a̱kya.

²⁹ Mat á̱ mbyia̱ a̱tyu a̱ ka̱n dak vam nggu hu a̱ni bah, si̱ gu wa cham huu, a̱ chok hu ba̱t; ma̱nang Kristi ni̱ nchok á̱niet khwi ba a̱ni.

³⁰ Mat nzi̱t á̱niet khwi ba, zi̱ yet nkap vam Kristi nia.

³¹ Ma̱nang á̱ ndyuut ma̱ A̱lyiat A̱gwaza na a̱ni, nyia̱, “A̱tyok na ghwon a̱tyia̱ ma̱ng a̱yang gu, gu ta̱meet ma̱ng a̱byii̱k nggu wu. Mba a̱feang ba̱ yet vam nyiung.”

³² A̱lyiat swat nyeang nani yet a̱gba̱ndang kyang wa a̱ shya̱ di̱ niat a̱ni. A̱wot ku yet kidee ja nang Kristi ma̱ng á̱niet khwi ba ngyet kyang nyiung a̱ni.

³³ Mat a̱nia, n bu shei ma̱ng a̱nyin, ku yet ta hwa, kuzang a̱tyok a̱ chat a̱byii̱k nggu wu ma̱nang gu nchat a̱pyia̱ nggu a̱ni. A̱wot ma a̱nia wa, ku yet ta hwa, kuzang a̱byii̱k a̱ nwuak a̱tyok nggu wu shi.