A̱fisawa 2 - A̠lyiat A̠gwaza na di̠n Tyap: A̠li̠ka̠uli A̠fai

A̱gwaza Nang Á̱niet Khwi Swuan Swai

¹ Di̱n jen ji ji̱ swak a̱ni, nyi ku li nang nkwom a̱ni da̱ a̱vwuo A̱gwaza. Mat si̱sak nang nyi ku ndak khwi A̱gwaza, nyi si̱ nyia̱ a̱ka̱tuk nyia̱ a̱ni.

² Nyi ni̱ khwi a̱ka̱tuk nyia̱ swanta wuni ma̱nang á̱kum á̱niet swanta ka a̱ni. Nyi si̱ khwi A̱ta̱nyeang ka̱ yet a̱gwam á̱ka̱tuk ntswá ba̱ nyia̱ tyok mi̱ kyai tswazwa hu a̱ni. Kikya yet a̱ka̱tuk ntswa ji̱ ni̱ nyia̱ nta̱m mi̱ nfwuo á̱niet ba̱ lak khwi A̱gwaza a̱ni.

³ A̱mgba̱m zi̱t, zi̱ ku swan tangka̱i a̱ka̱tuk nswat a̱hwa dundung ma̱ng á̱kum á̱niet swanta ba. Zi̱ ni̱ khwi shyuo nvam nzi̱t ji, ma̱ng si̱ a̱di̱dam a̱ka̱tuk za̱kwa nzi̱t wu. Mat za̱kwa a̱ka̱tuk nyia̱ nzi̱t ji, A̱gwaza si̱ mwai lyen ma̱ng a̱nzi̱t, ma̱nang á̱kum á̱niet swanta ba a̱ni.

⁴ A̱mgba̱m ma̱ng a̱nia, A̱gwaza si̱ chat zi̱t ba̱t. A̱wot a̱ si̱ fwuong kunak nzi̱t gba̱mgbam,

⁵ ku nang zi̱ ku ndi nang nkwom a̱ni da̱ a̱vwuo nggu mat a̱ka̱tuk nyia̱ nzi̱t wu a̱ni. A̱ si̱ tyia̱ zi̱ swan swat fai ma̱ A̱za̱za̱rak Ntswa, di̱n jen nang gu ku nta̱ngam Kristi ma̱ng swuan ma̱ á̱niet ba̱ ka̱n kwi a̱ni. (Mat shok A̱gwaza ja ma̱nyin ji, mbyia̱ nang nyi nshya̱ san!)

⁶ A̱wot A̱gwaza si̱ ta̱ngam nzi̱t ma̱ng swuan ma̱ á̱niet ba̱ ka̱n kwi a̱ni dundung ma̱ng Kristi. A̱wot a̱ si̱ nwuak nzi̱t a̱vwuo nswat dundung ma̱ng a̱nggu mi̱ tyok ma̱ a̱ka̱vwuo Ma A̱gwaza tswazwa, mat zi̱ mun á̱pyia̱ ma̱ng Kristi Yesu.

⁷ A̱gwaza nyia̱ a̱nia da̱nian gu ka tak ma̱ng a̱nzi̱t ma̱ng a̱mgba̱m che ji chobai á̱zanson a̱ni, tangka̱i a̱gba̱mgbam shok ma̱ng kunak nang gu fa̱k da̱ nzi̱t, nang á̱ si̱ mi̱n nwai tyan a̱ni. Si̱ huni tak a̱mgba̱m nkyang nang A̱gwaza nyia̱ nzi̱t ndyo, nzi̱t á̱niet zi̱ mun á̱pyia̱ ma̱ng Kristi Yesu a̱ni.

⁸ A̱gwaza ku san nyin mat shok nggu ji, di̱n jen nang nyi nnwuak fwuo di̱ Yesu a̱ni. A̱wot si̱ huni yet kwan ma̱ á̱pyia̱ nyin di̱ nyia̱ a̱tan nta̱m hwa bah. Ku yet za̱nang A̱gwaza ja.

⁹ San sang sangba̱p hu yet zang a̱tan nta̱m ja nang zi̱ nnyia̱ a̱ni bah. Mat a̱nia, á̱ mbyia̱ a̱yin ma̱ nzi̱t a̱ si̱ mi̱n tam da̱ nhu a̱ni bah.

¹⁰ Mat A̱gwaza wa ma̱ a̱pyia̱ nggu nyia̱ nzi̱t zi̱ yet a̱tan nta̱m bwak gu bya. Zi̱ bu yet á̱niet á̱fai, di̱ mun á̱pyia̱ ma̱ng Yesu Kristi. Da̱nian zi̱ ka nyia̱ a̱tan nta̱m nang gu mi̱ nda̱p a̱ sak neet gbangbang zi̱ nyia̱ a̱ni.

Á̱niet Khwi Byia̱ Mun A̱pyia̱ ma̱ng Á̱ghyang mat Kristi

¹¹ Mat a̱nia, nyin Nnwap na̱ nwai yet A̱yahudawa a̱ni, nyi yok bwung bah. Nyi ku yet á̱kang á̱niet bya gbangbang. A̱yahudawa ba̱ ku tam da̱ a̱lyiat tyei mi̱ nchen a̱ni, ba̱ si̱ ngyei nyin, “Á̱niet nwai tyei mi̱ chen, ma̱ng á̱niet sang A̱gwaza.” Ba̱ ku hyia̱ a̱nia, ku nang tyei mi̱ chen mba hu ku ngyet si̱ nvam mba nia a̱ni. A̱wot tyei mi̱ chen hu si̱ tat nfwuo mba na bah.

¹² Nyi jhyung di̱n jen a̱ja, nyi ku mun á̱pyia̱ ma̱ng Kristi bah. Á̱ si̱ gang nyin zan di̱ yet mman a̱byin á̱niet Isi̱rela nang A̱gwaza khai a̱ni. A̱wot nyi ku yet á̱nietchen nyi si̱ lyen a̱yaali̱ka̱uli nang A̱gwaza ku nyia̱ di̱n jen nang gu ku nda̱p a̱li̱ka̱uli ma̱ng a̱yaatyia̱ a̱khwop A̱yahudawa ba a̱ni bah. Nyi ku swan mi̱ swanta huni. Nyi byia̱ kyang tyia̱ fwuo bah, da̱ nyin nyi byia̱ A̱gwaza bah.

¹³ A̱wot ma̱ninika, A̱gwaza mun á̱pyia̱ nyin ka ndung ma̱ng Kristi Yesu. Di̱n jen ji ji̱ swak a̱ni, nyi ku shya̱ ma̱ gbang ma̱ng A̱gwaza. A̱wot ma̱ninika, á̱ bai ma̱ng a̱nyin kpa̱mkpaan ma̱ng A̱gwaza mat a̱sok Kristi na.

¹⁴ Mat Kristi wa ma̱ a̱pyia̱ nggu jhyi nzi̱t swat hu. A̱ si̱ nwuak zi̱t swat nyinyang. A̱ si̱ mun á̱pyia̱ A̱yahudawa ma̱ng Nnwap na̱ nwai yet A̱yahudawa a̱ni, ba̱ si̱ tyia̱ kyang nyiung. A̱khwu Kristi kya da̱ a̱team a̱khwu, bi̱ri̱m bat na̱nvan hu ku ghai nzi̱t, zi̱ yet susot sweang jini a̱ni.

¹⁵ Kristi ku nyia̱ si̱ huni, di̱ tyak ma̱ng vak tyok doka A̱yahudawa ma̱ng taada mba ji, da̱nian a̱ ka mun á̱pyia̱ A̱yahudawa ma̱ng Nnwap na̱ nwai yet A̱yahudawa a̱ni dundung ma̱ng a̱nggu. A̱ si̱ bai ma̱ng a̱mba swat nyinyang tsi̱tsak mba, ba̱ si̱ yet sot á̱niet a̱fai ji̱ yet jhyung a̱ni.

¹⁶ Mat a̱khwu Kristi ka da̱ a̱team a̱khwu wu wa jhyi swat nzi̱t hu zi̱ swan swat nyinyang ma̱ng A̱gwaza. Ka̱ si̱ jhyi swat A̱yahudawa ma̱ng Nnwap na̱ nwai yet A̱yahudawa a̱ni, ba̱ si̱ nyia̱ kpa̱ndang ma̱ng á̱ghyang dundung nang vam nyiung a̱ni. Mat a̱nia, na̱nvan ku shya̱ tsi̱tsak nzi̱t A̱yahudawa ma̱ng Nnwap na̱ nwai yet A̱yahudawa a̱ni, si̱ tyak.

¹⁷ Kristi si̱ bai a̱ si̱ shei A̱sham Nkhang ka̱ yet a̱ si̱ swat nyinyang a̱ni, da̱ a̱vwuo nyin Nnwap na̱ nwai yet A̱yahudawa nyi ku shya̱ gbang ma̱ng A̱gwaza a̱ni. Ma a̱nia wa, Kristi si̱ bu mbai ma̱ng A̱yahudawa ba swat nyinyang ba̱ shya̱ kpa̱mkpaan ma̱ng A̱gwaza a̱ni.

¹⁸ Mat kyang hu nang Kristi nyia̱ wa a̱ni, huhwa tyia̱ a̱mgba̱m nzi̱t A̱yahudawa ma̱ng Nnwap na̱ nwai yet A̱yahudawa a̱ni, ka̱ doot zi̱ shya̱ a̱wat zi̱ bai da̱ a̱vwuo A̱gwaza a̱ yet A̱tyia̱ wu a̱ni, mat A̱za̱za̱rak Ntswa wu nang a̱mgba̱m nzi̱t zi̱ mun byia̱ a̱ni.

Á̱niet Khwi Yesu ba yet A̱li Nwuat Za̱nang A̱gwaza kya

¹⁹ Mat a̱nia, ma̱ninika nyin Nnwap na̱ nwai yet A̱yahudawa a̱ni, nyi bu yet á̱nietchen ku á̱kang á̱niet bah. Nyi mun yet mman a̱byin nia dundung ma̱ng á̱za̱za̱rak á̱niet khwi A̱gwaza ba, ba̱ yet kyang mbwak A̱gwaza a̱ni.

²⁰ Nyin, nyi li nang a̱li nang á̱ kpaat di̱ kuntyin a̱yaata̱m Yesu ma̱ng a̱yaata̱m a̱kwonu A̱gwaza a̱ni. A̱wot Kristi Yesu wa ma̱ a̱pyia̱ nggu yet a̱tsatsak a̱fang a̱ta̱m kuntyin nok wu.

²¹ Kristi wa yet a̱tyu a̱ ba̱ng nok a̱hwa ndung a̱ni. A̱wot á̱ si̱ mun nok hu da̱ a̱nggu ku yet a̱za̱za̱rak A̱li Nwuat Za̱nang A̱gwaza.

²² A̱wot mat Kristi wa nyin Nnwap na̱ nwai yet A̱yahudawa a̱ni, nang á̱ mun á̱ si̱ nok nyin, nyi yet a̱za̱za̱rak a̱vwuo nang A̱za̱za̱rak Ntswa A̱gwaza nswan a̱ni.