A̱filibiyawa 4 - A̠lyiat A̠gwaza na di̠n Tyap: A̠li̠ka̠uli A̠fai

¹ Mat a̱nia, nyin á̱niet khwi Yesu ba nang n chat a̱ni, nyi yong chi̱k di̱ nwuak fwuo nyin hu da̱ A̱tyoli Yesu. Mat n fa̱k da̱ nyin, nyi yet á̱kpa̱ndang nung, nyin bya bu yet a̱gwai nung na ma̱ng bung tyok nung ji, ji̱ yet zang ta̱m nung ji a̱ni.

Bulut Tyia̱ Á̱niet Khwi Gba̱gbak

² Yodiya ma̱ng Sintiki, ma̱ninika, n naai nyin, ma̱sa̱kut nyi jhyi swat nyin hu. Nyi swan swat nyinyang ma̱ng á̱ghyang nyin, mat a̱mgba̱m nyin nyi yet á̱niet khwi A̱tyoli Yesu bya.

³ Nwan a̱tsotswat a̱kpa̱ndang ta̱m nung, beang á̱nyiuk bani, mat ba̱ ka̱n nyia̱ ta̱m za̱m ma̱ng a̱nung di̱ beang ya a̱son shei A̱sham Nkhang Yesu ka. Ba̱ ku nyia̱ ta̱m hu dundung ma̱ng Ka̱la̱men mbeang á̱kum á̱kpa̱ndang ta̱m nung ba, nang á̱ lyuut lyulyoot mba hu mi̱ Ta̱ka̱da Nswuan hu a̱ni.

⁴ Nyi gwai di̱ mun á̱pyia̱ nyin hu ma̱ng A̱tyoli Yesu kuzang jen. N bu nyia̱, nyi ni̱ ngwai!

⁵ Nyi yok konyan a̱ li yet a̱shonshyon nyin hu da̱ a̱mgba̱m nkyang nang nyi nyia̱ a̱ni. Nyi yok bwung bah; bwuok A̱tyoli Yesu hu bwat kpa̱mkpaan.

⁶ Nyi ni̱ ngyok sorop di̱ kyang bah. Da̱ a̱kwonu a̱kya, nyi ni̱ naai A̱gwaza tazwa kuzang kyang. Nyi ni̱ hyia̱ ma̱ng A̱gwaza kyang nang nyi chat a̱ni. A̱wot nyi gwai ma̱ng nggu mat a̱mgba̱m nkyang nang gu nyia̱ nyin ndyo a̱ni.

⁷ A̱jawa nyi na ndyen swat nyinyang ku neet da̱ a̱vwuo A̱gwaza a̱ni, si̱ hu swak a̱mgba̱m kyang nang zi̱ na fi̱k a̱ni. Swat nyinyang nang A̱gwaza nwuat nzi̱t a̱ni, ku na chok nfwuo nyin na ma̱ng a̱di̱dam nyin wu mami Kristi Yesu.

⁸ Nyin á̱niet khwi Yesu ba nang n chat a̱ni, a̱wot ma̱ninika: Nyi tyia̱ a̱di̱dam nyin wu di̱ kyang ku yet a̱chuchuk a̱ni; kyang ku maai á̱ nwuak hu shi a̱ni; kyang ku yet a̱tsotswat a̱ni; kyang ku yet a̱za̱za̱rak a̱ni; kyang ku yet a̱sham nang á̱ chyin a̱ni; kyang hu ku myim a̱ni; kyang ku yet a̱tan a̱ swak a̱ni; ma̱ng kyang ku myim á̱ dyep a̱ni. Nyi ni̱ nyia̱ a̱di̱dam di̱ nkyang nani nia.

⁹ Nyi ya a̱son mi̱ nyia̱ nta̱m ma̱ng a̱mgba̱m tyiet nung hu nang nyi fa̱k, nyi si̱ san, nyi si̱ bu li nang n nyia̱ a̱ni. A̱wot A̱gwaza a̱ nwuat swat nyinyang a̱ni, na shya̱ dundung ma̱ng a̱nyin.

Bulut Gwai mat Á̱niet Khwi Beang nggu ma̱ng Kurum

¹⁰ N gwai A̱gwaza za̱m, nang nyi bu njhyung nyi beang nung ma̱nini a̱ni. Nyi tak nang nyi ni̱ mbyia̱ fwuo nyi beang nung. A̱tsak a̱lyiat, n dyen nyi ku mi̱ nchat nyi beang nung, a̱wot nyi si̱ shya̱ a̱wat ka bah.

¹¹ N shei nyin a̱lyiat nani, da̱nian n ka nchat beang hwa bah. Mat n wa ka̱n meang ma̱ng a̱swa di̱ kuzang kyang ku shya̱ nung a̱ni.

¹² N dyen si̱sak ji nang n na nswan nang a̱tyu kunak a̱ni, ma̱ng si̱sak ji nang n na nswan nang a̱tyu nzwá a̱ni. N wa ka̱n meang ma̱ng a̱swa mi̱ kuzang tangka̱i njen nang n shya̱ a̱pyia̱ nung a̱ni; ku ma̱ng kyayak ku ma̱ng a̱fa a̱khwot, ku n shya̱ gba̱mgbam, ku n shya̱ ma̱ a̱da̱dei.

¹³ Ki̱ n doot n swan nswat huni mi̱ kuzang tangka̱i njen nang n shya̱ a̱pyia̱ nung a̱ni, mat chet hu nang Kristi nang nung a̱ni.

¹⁴ A̱mgba̱m ma̱ng a̱nia, ku yet a̱sham ba̱t nang nyi mbeang nung mami swuo a̱bung nung hu a̱ni.

¹⁵ Nyin á̱niet khwi A̱filibiyawa ba, nyi lyen za̱m nang nyin bya ma̱nyin nyin, ku beang nung ma̱ng kurum di̱n jen nang n ku ntsa shei nyin A̱sham Nkhang ka a̱ni. Neet nang n ku nghwon fam a̱byin Ma̱kidoniya hu, á̱ ku mbyia̱ sot á̱niet khwi jhyang ji̱ ku beang nung a̱ni bah, si̱ ma̱nyin bya ma̱nyin nyin.

¹⁶ Ku nang n ku nshya̱ ma̱ a̱keang Ta̱solonika a̱ni, nyi ku beang nung bwuo a̱ka̱feang.

¹⁷ N hyia̱ a̱lyiat nani, mat n chat nyi nang nung kurum hwa bah. Da̱ a̱kwonu a̱kya, n chat nyi ma shya̱ zang ja da̱ a̱vwuo A̱gwaza, mat shok nang nyi nyia̱ nung dyo a̱ni.

¹⁸ Ma̱ninika, n wa ka̱n san kuzang kyang nang nyi ta̱m ma̱ng a̱nung ndyo a̱ni. A̱wot ku swak kyang hu nang n chat a̱ni. N wa ka̱n swa ma̱ng a̱mgba̱m za̱nang ji nang nyi ta̱m ma̱ng a̱nung ndyo gba̱mgbam mbwak A̱bafa̱ratut a̱ni. Za̱náng nyin ji yet za̱nang ja ji̱ byia̱ swam turare nyinyang nang A̱gwaza san a̱ si̱ fa̱k nyinyang ji a̱ni.

¹⁹ A̱wot A̱gwaza nung wu na nang nyin a̱mgba̱m kuzang kyang nang nyi chat a̱ni, mami a̱gba̱mgbam zwá nggu wu, mat mun á̱pyia̱ nzi̱t hu ma̱ng Kristi Yesu.

²⁰ Ma̱ninika, yok zi̱ nwuak A̱gwaza, a̱ bu yet A̱tyia̱ nzi̱t wu a̱ni shi, ba̱ng si̱ nat sang sangba̱p. Samba̱rka!

Byat Ngaan hu

²¹ Nyi byiat nung a̱mgba̱m á̱za̱za̱rak á̱niet A̱gwaza ba, ba̱ yet á̱niet khwi Kristi Yesu ba a̱ni. Á̱niet khwi ba ba̱ shya̱ a̱ji ma̱ng a̱nung a̱ni, ba̱ byiat nyin.

²² A̱wot a̱mgba̱m á̱kum á̱niet khwi A̱gwaza ba̱ shya̱ a̱ji a̱ni meang, ba̱ mun á̱ byat nyin. Á̱niet ba̱ yet á̱khwo a̱mali tyok Kaisar a̱ni, ba̱ byiat nyin a̱ swak.

²³ Yok A̱tyoli Yesu Kristi a̱ fa̱k shok nyin a̱mgba̱m. [[Samba̱rka!]]