3 Yoona 1 - A̠lyiat A̠gwaza na di̠n Tyap: A̠li̠ka̠uli A̠fai

Byat

¹ Nung Yoona, n gyet a̱niet khwop a̱niet a̱ni, nung gwa n dyuut wusika jini, ta̱m dyo da̱ a̱vwuo Gayut, a̱gi̱ngi̱ng a̱kpa̱ndang nung wu nang n chat mami a̱chuchuk a̱ni.

² A̱kpa̱ndang nung wu nang n chat a̱ni, n tyia̱ fwuo da̱ A̱gwaza a shya̱ ma̱ng a̱ka̱nka̱ra̱ng vam, a̱wot kuzang kyang naat cha̱chaat da̱ a̱vwuo ang, ma̱nang nwuak a̱chuchuk ang hu meang nnaat cha̱chaat a̱ni.

³ N shya̱ ma̱ng a̱gwai za̱m, mat nang n fa̱k á̱niet tyiet á̱ghyang mbai, ba̱ si̱ tak ma̱ng a̱nung si̱sak ji a nnyia̱ tsotswat di̱ khwi a̱chuchuk tyiet Kristi hu, a̱wot a si̱ ya a̱son di̱ khwi a̱chuchuk a̱wa a̱ni.

⁴ Kuzang jen nang n fa̱k mman nung na khwi a̱chuchuk wu, ku ni̱ tyia̱ nung a̱lyia̱ sai a̱ swak kuzang kyang.

Yok Á̱niet Khwi ba̱ Beang Á̱niet Tyiet A̱sham Nkhang ba

⁵ A̱kpa̱ndang nung wu nang n chat a̱ni, a ka̱n beang á̱niet khwi nzi̱t ba, ba̱ yet á̱niet tyiet ba̱ chong á̱ shei A̱sham nkhang ka a̱ni, ku nang ba̱ ngyet á̱nietchen bya da̱ a̱vwuo ang a̱ni. Beang huni tak nang a ngyet a̱tsotswat a̱tyu khwi Yesu wa.

⁶ Á̱niet a̱bya nang a beang a̱ni, ba̱ ka̱n tak ma̱ng á̱niet khwi ba ba̱ shya̱ a̱ji a̱ni, si̱sak nang a nchat á̱niet khwi ba ba̱t a̱ni. Ma̱sa̱kut, ya a̱son ma̱ng beang ntangka̱i á̱niet tyiet a̱nia ma̱ a̱chyet mba ka mi̱ fwuo nyiung, ma̱nang ku myim A̱gwaza a̱ni.

⁷ Mat á̱niet bani ni̱ ghwut a̱chyet mba ka da̱nian ba̱ ka nyia̱ Yesu ta̱m hwa. A̱wot ba̱ ni̱ saai beang da̱ a̱vwuo á̱niet nwai khwi A̱gwaza bah.

⁸ Mat a̱nia, ku yet ta hwa zi̱ beang á̱niet a̱bya, zi̱ ka yet á̱kpa̱ndang ta̱m dundung ma̱ng a̱mba nang ba̱ ni̱ ntyiet a̱chuchuk wu a̱ni.

Diyotari̱fi̱t ma̱ng Di̱mi̱ti̱ri̱yut

⁹ N wa ka̱n dyuut sot á̱niet khwi ma̱ a̱keang nyin ji wusika. A̱wot Diyotari̱fi̱t ni̱ lak shim tyok nzi̱t hu, mat a̱ ni̱ chat yet a̱kwak a̱son á̱niet khwi.

¹⁰ Mat a̱nia, ki̱ n mbai da̱ a̱vwuo nyin, n na tyai á̱ka̱tuk nkyang nang Diyotari̱fi̱t nyia̱ a̱ni kpa̱sai, ma̱ng á̱ka̱tuk a̱hyiak nang gu mbat nzi̱t a̱ni. A̱wot si̱ a̱hwa maai gu bah, a̱ bu ni̱ lak san á̱na̱nyiuk ba, ba̱ yet á̱niet tyiet ba̱ chong á̱ shei A̱sham nkhang ka a̱ni. A̱wot kyang ku swak a̱nia ma̱ng yet a̱ka̱tuk a̱ni, huhwa yet; a̱ bu ni̱ vwuong á̱niet khwi ba ba̱ chat san á̱niet tyiet bani a̱ni. A̱ bu ni̱ chat a̱ fi̱n á̱niet khwi a̱bya ba̱ chat beang á̱niet tyiet ba a̱ni, á̱ ghwut ndyo mami sot á̱niet khwi ji.

¹¹ Nwan Gayut, a̱kpa̱ndang nung nang n chat a̱ni, yok khwi a̱ka̱tuk za̱kwa wuni bah. Da̱ a̱kwonu a̱kya, khwi a̱tan za̱kwa wu wa. Mat a̱tyu a̱ nyia̱ a̱tan nkyang a̱ni, ku tak nang gu ngyet a̱si̱ A̱gwaza wa. Ma a̱nia wa, a̱tyu a̱ ma nyia̱ á̱ka̱tuk nkyang a̱ni, ku tak nang gu ndyen A̱gwaza bah, ku ma̱ chunchwiit.

¹² A̱wot tazwa Di̱mi̱ti̱ri̱yut, konyan lyiat a̱tan a̱lyiat da̱ nggu, a̱wot a̱ ni̱ khwi a̱chuchuk wu, ku tak nang gu ngyet a̱tan a̱yin a̱ni. Nzi̱t meang, zi̱ nwuak sheda nang gu ngyet a̱tan a̱yin wa. A̱wot a lyen nang sheda nzi̱t hu ngyet a̱tsak a̱lyiat wa.

Byat Ngaan hu

¹³ N byia̱ nkyang ma̱ a̱di̱di̱t n na tak ma̱ng a̱nwan a̱ni, a̱wot n chat n dyuut ang ndyo mi̱ wusika bah.

¹⁴ Mat n tyia̱ fwuo ka̱ á̱ labeang bah, n na ndi nyin, a̱wot zi̱ na lyiat ma̱ng á̱ghyang a̱ghyi ma̱ng a̱ghyi.

¹⁵ Yok A̱gwaza a̱ nwuak ang swat nyinyang. A̱mgba̱m á̱kpa̱ndang ang ba a̱ji mi̱ sot á̱niet khwi ji byat ang. Ma̱sa̱kut, byat á̱kpa̱ndang nzi̱t ba, ba̱ shya̱ mi̱ sot á̱niet khwi ji a̱ja a̱ni, konyan ma̱ng konyan.