2 Timoti 3 - A̠lyiat A̠gwaza na di̠n Tyap: A̠li̠ka̠uli A̠fai

Swat Á̱nietbishyi di̱ Ngaan Jen

¹ Timoti, ku myim a lyen shansham nang á̱ na nswuo a̱bung ba̱t di̱ jen ngaan ji.

² Di̱n jen a̱ja, á̱niet ba na yet, á̱niet chat á̱pyia̱ mba, á̱niet la̱u shyuo kurum, á̱niet tam da̱ á̱pyia̱ mba, á̱niet gba̱p a̱pyia̱, á̱niet ba̱ byian á̱ghyang ba lyulyoot ma̱ng a̱lyoot A̱gwaza a̱ni, á̱niet jhyuai á̱niet mbyin ba, á̱niet sang a̱gwai, á̱niet sang a̱wun A̱gwaza.

³ Á̱niet lak chat á̱ghyang, á̱niet ba̱ng á̱ghyang mi̱ fwuo, á̱niet tyam á̱ghyang, á̱niet nwai ta̱bat á̱pyia̱ mba, á̱niet a̱ka̱kpa̱t, á̱niet nyia̱ na̱nvan ma̱ng a̱mgba̱m kyang ku yet a̱tan a̱ni.

⁴ Á̱niet bani yet a̱yaabang a̱byin, á̱niet a̱gi̱gi̱k nyia̱, á̱niet ba̱ la̱u chat a̱kpai a̱ni, á̱niet chat fwuong nyinyang swak chat A̱gwaza hu.

⁵ Á̱niet bani shei nta nang ba̱ ngyet á̱tsatsak á̱niet khwi A̱gwaza bya. A̱wot da̱ chyet mba ka, ba̱ fwuo a̱tsatsak chet A̱gwaza hu. Tyong zan, a̱ ghwon ntangka̱i á̱niet a̱nia!

⁶ Á̱ghyang ma̱ mba yet á̱niet tyiet ba̱ ni̱ tsuam á̱ nwuai a̱ka̱sa á̱niet. Ba̱ laai á̱nyiuk ba̱ sang mumwang nang nfwuo mba na kpaat baa di̱ nyia̱ a̱ka̱tuk, a̱ si̱ yet mba ntangka̱i a̱kpi̱di̱dyi̱k nkpa̱t mi̱ nfwuo mba na. A̱wot a̱ka̱tuk nshyuo ma̱ a̱di̱di̱t si̱ jhyam ma̱ng a̱di̱dam mba wu.

⁷ (Á̱nyiuk bani kuzang jen ba̱ ni̱ shya̱ di̱ myiam. A̱mgba̱m ma̱ng a̱nia, ba̱ tat tyan lyen a̱chuchuk wu bah.)

⁸ Á̱niet tyiet bani ni̱ nnyia̱ fi̱p ma̱ng a̱chuchuk wu, ma̱nang Yanisa ma̱ng Yamba̱risu ku nnyia̱ fi̱p ma̱ng Musa gbangbang a̱ni. A̱di̱dam mba wu a̱ tyei a̱ka̱tuk. A̱wot nwuak a̱chuchuk mba hu yet a̱buk kyang wa.

⁹ Mat a̱nia, tyiet mba hu na ya a̱son bah. Mat ma a̱nggang konyan na li bwuon mba hu kpa̱sai, ma̱nang ku ku ndi ma̱ng Yanisa ma̱ng Yamba̱risu a̱ni.

Bulut Tyia̱ Timoti Gba̱gbak a̱ Yong Tsotswat di̱ A̱tan Tyiet wu

¹⁰ A̱wot nwan, Timoti, a̱tsak a̱lyiat, a wa ka̱n khwi tyiet nung hu cha̱chaat; tangka̱i za̱kwa nung hu, ma̱ng kyang nang n fa mi̱ swat nung hu a̱ni, nwuak fwuo nung hu, nyap fwuo nung hu, chat á̱niet nung hu, ma̱ng gbang a̱lyia̱ nung hu.

¹¹ A lyen ya̱shuk nung ma̱ng swuo a̱bung nung hu nang n swuo a̱ni. A si̱ bu lyen ya̱fa̱k nang á̱ ya̱fa̱k nung ma̱ a̱ka̱keang Antakiya, Ikoniya, ma̱ng Listra a̱ni. Ma̱ng a̱nia, n si̱ ngbang a̱lyia̱. A̱wot A̱gwaza wu si̱ ti̱n nung mami na a̱mgba̱m.

¹² A̱tsak a̱lyiat, konyan wa chat swan swat ku myim A̱gwaza mami Yesu Kristi a̱ni, á̱ na ya̱shuk guu.

¹³ A̱wot á̱ka̱tuk á̱niet tyiet ma̱ng a̱yaabang a̱byin, na mbeang a̱ka̱tuk mi̱ nfwuo mba na, ba̱ laai á̱niet, nang á̱ ma ndaai mbaa.

¹⁴ A̱wot nang a̱nwan a̱ni, ku yet ta hwa a ya a̱son di̱ yong tsotswat di̱ nkyang nang á̱ tyiet ang a̱ni. A bu nwuak a̱chuchuk da̱ ná ba̱t. Mat a lyen tangka̱i á̱niet ba̱ tyiet ang a̱ni.

¹⁵ A̱wot a bu jhyung, neet nang a yet a̱banggwon, á̱ si̱ tyiet ang A̱za̱za̱rak A̱lyiat A̱gwaza wu. Á̱si̱ ná, na̱ nwuak ang mumwang hu ku tyia̱ a̱ si̱ lyen vak san di̱ nwuak fwuo di̱ Yesu Kristi a̱ni.

¹⁶ A̱mgba̱m A̱lyiat A̱gwaza nani ghwut a̱bwonu A̱gwaza kya. A̱wot na̱ si̱ yet a̱tan ba̱t di̱ tyiet a̱chuchuk, ma̱ng gba á̱niet, ma̱ng jhyi nswat á̱niet, mbeang tyiet nkyang na̱ yet á̱tsotswat a̱ni.

¹⁷ Mat A̱lyiat A̱gwaza na tyia̱ konyan wa yet a̱tyu nta̱m A̱gwaza a̱ni; a yet a̱tsatsak a̱tyu nta̱m, a̱ bu swan ma̱ng la̱p vam a̱ fwuong nyia̱ kuzang tangka̱i a̱tan nta̱m.